Xiviko Xa Vahuweleri Va Mfumo

Miako Leyi Kurisiweke Leswaku Yi Fanela Ku Andza Ka Mfumo

SIKU ro nyikela ra miako leyi kurisiweke ya rhavi ra Timbhoni ta Yehova sweswinyana a ri ri siku leri tsakisaka exihlaleni xa Caribbean eJamaica. Ku andza loku ku ve ka nkoka hikwalaho ka ku katekisa ka Yehova matshalatshala lama tshembekaka ya vamakwerhu eku chumayeleni ka mahungu lamanene exihlaleni lexi xo xonga xa tiropiki.

Kaya ra vurhumiwa ri simekiwile eJamaica eku sunguleni ka 1946. Hikwalaho ka ku yisa ka varhumiwa ntirho emahlweni, ku andza ka vahuweleri a ku ri ka xihatla, lerova hi khume ra malembe ntsena nhlayo-xikarhi ya Timbhoni leti vikaka n’hweti na n’hweti yi kurile yi suka eka 732 yi ya eka 3 216. Leswaku ku khathaleriwa ku andza, swi ve swa ntikelo ku lunghiselela miako leyintshwa.

Hi 1954 ndhawu leyi fanelekaka yi kumiwile naswona ku aka ku sunguriwile eka muako lowuntshwa wa swithezi swimbirhi endhawini yo hola ya le handle ka doroba ra Kingston. Ku hetiwe hi May 1958. Nhlayo ya vahuweleri lembe rero yi tlakukele eka nhlohlorhi ya 4 367.

Ku ‘byala’ ni ku ‘cheleta’ ku hambetile naswona Yehova ‘u ye emahlweni a mirisa,’ lerova hi 1983 nhlayo ya vahuweleri yi tlakukela ehenhla ka 7 000, yi vumba xilaveko xa ku andzisiwa kun’wana. (1 Vakorinto 3:6) Komiti ya Rhavi, hi ku pfumeleriwa hi Huvo leyi Fumaka, yi kunguhate ku andzisa miako ya nkarhi wolowo. Vamakwerhu lava tlulaka 250 lava humaka exihlaleni hinkwaxo va tile va ta pfuna. Vatirhi lava nga ni vutshila ni lava nga hava vutshila va nyikele ntirho wa vona tanihi lava akaka hi maribye, vavatli, vativi va gezi ni vaplambara. Malembe ya vona a ya sukela eka 10 ku ya eka 86. Van’wana va nyikele hi timali emuakweni, van’wana va nyikele hi swakudya swa vatirhi, naswona van’wana va pfule makaya ya vona leswaku va lunghiselela byetlelo bya vatirhi vo tirhandzela lava humaka ekule. Hi lembe rin’we, muako lowu nga ni filoro ya vunharhu leyi tlhandlekelaka ya makamara ya ntlhanu kun’we ni xivandla xo titsakisela eka xona, kamara leri nga eka filoro ya vumbirhi ni xivandla xa vuhlayiselo xa 37 wa swikwere mitara, a wu hetiwile, wu lunghele ku tirhisiwa hi 11 wa swirho swa ndyangu wa Bethele.

Milton Henschel, xirho xa Huvo leyi Fumaka ya Timbhoni ta Yehova, u nyikele nkulumo yo nyikela hi February 22, 1986. U vulavule hi nhloko-mhaka leyi nge “Ku Hlula Loku Landzelelanaka.” (2 Vakorinto 2:14) Lava yingisaka nongonoko wo nyikela va endle ntsengo wa 2 949. Eka vona, 380 a va ri eHolweni ya Mfumo ni swiyenge swin’wana swa muako, naswona van’wana a va hlanganisiwe hi riqingho ni radio eka Tiholo tin’wana ta Mfumo emutini ni le holweni ya xikolo.

Vo tala va lava rhambiweke eHolweni ya Mfumo ya rhavi a va ri vamakwerhu va xinuna ni va xisati lava veke entiyisweni 30 wa malembe kumbe ku tlula. Swiga swo tala swo tlangela swi twiwile ehenhleni ka ku engeteriwa lokunene ka muako. I ntshembo wa hina leswaku vo tala va “ntshungu lowukulu” wa “tinyimpfu tin’wana” va ha ta tihlanganisa ni ku hlula loku landzelelanaka loko miako leyintshwa ya rhavi yi ri karhi yi tirhiseriwa ku andza ka Mfumo eJamaica.