‘Ku Khandziyela Ku Ya Lwela Ntiyiso’
“Khanḍiya golonyi ya wena u ya hlula, U ya lwela ntiyiso, ni ku lulama, ni musa. Voko ra wena ra šinene ri ta ku dyonḍisa mitiro le’yi tšhav̌isaka.”—PSALMA 45:4.
1, 2. (a) I rungula rihi leri nyanyuleke mupisalema ke? (b) Ha yini rungula rero ri fanele ku hi tsakisa?
MUYIMBELERI wa swiphato a a hisekela ku sungula risimu ra yena. Ku langutela ka ku ta ka hulumendhe leyinene emavokweni ya mufumi la nga thyakisekiki, wo lulama a ku ri na matimba ngopfu. A nga swi kotanga ku miyela. A a nga ha swi koti ku tikhoma, mupisalema u huwelele marito lawa: “Mbilu ya nga yi hisekela marito la’manene. Nḍi ku: Ntiro wa mina i wa Hosi! Ririmi ra nga i peni ya muṭari l’a tlhariheke.” (Psalma 45:1) Muyimbeleri la tlhokovetselaka wo sungula u fe khale. Kambe risimu ra yena ra vuprofeta ra ha hanya, naswona nsusumeto wa rona a wu nga si va ni matimba ngopfu ku fana na sweswi.—Ringanisa Vakolosa 3:16.
2 Xana “marito la’manene” lama nyanyuleke mbilu ya mupisalema ma tikombise ma ri yini ke? Mayelana ni mahungu lamanene ya Mfumo wa Xikwembu! “La’manene” swinene i rungula ra Mfumo leri faneleke “ku twarisiwa emisaveni hinkwayo leswaku yi va vumbhoni eka vanhu va matiko hinkwawo” “makumu” ya matiko lawa ma nga si fika. (Matewu 24:14) Namuntlha, xana xihloko ‘lexinene’ xa Mfumo wa Xikwembu wa Vumesiya xi nyanyule mbilu ya wena ke? Xi fanele. Hikwalaho ka yini? Hikuva riendli ra Xiheveru leri hundzuluxeriweke va ku “ku va la tsakelaka” (ra·chashʹ) ri vula xiendlo xo nyanyula, ku fana ni xihalaki lexi phuphumaka, lexi vilaka. Riendli leri nakambe ri vula ku tala. Naswona tsundzuka, Murhangeri wa hina, Yesu Kriste, u te: “Nomu wa munhu wu vula leswi mbilu ya yena yi teleke swona.” (Luka 6:45) Xisweswo, xana wena, tanihi mupisalema, u ni mbilu leyi khapaka hi “marito la’manene”? Loko swi ri tano, kutani ku hava lexi nga ku sivelaka ku yimbelela ntiyiso lowu lowukulu: Yesu Kriste wa fuma eMfun’weni wa Xikwembu!
Ku Twarisa Risimu Ra Ntiyiso
3. I tindlela tihi timbirhi letikulu leti tirhisiwaka eku haxeni ka mahungu lamanene ya Mfumo namuntlha?
3 Xana risimu leri ro vangama ri nga haxiwa njhani? Hi ku tirhisa moya lowo kwetsima ririmi ra mupisalema ri ve “peni” emavokweni ya Yehova. (Ringanisa 2 Samuel 23:2.) Tinsimu ta yena leti tsariweke a ti yimbeleleriwa vagandzeri hinkwavo va Yehova va khale leswaku va ti twa. Hina namuntlha hi nga seketela ntiyiso wa Mfumo wa Xikwembu hi tindlela timbirhi leti fanaka. Yo sungula, hi marito ya hina lawa ya twiwaka eka ku chumayela ka le rivaleni, naswona ya vumbirhi, hi marito ya hina lama hlayiwaka etibukwini ta hina. Kutani ke, loko hi hangalasa tibuku leti seketeriweke eBibeleni, hi vula leswi ririmi ra vanhu vo kwetsima lava huhuteriweke ana se va swi vuleke. (2 Timotiya 3:16; 2 Petro 1:20, 21) Naswona namuntlha mahungu ya Mfumo lama gandlisiweke ma haxiwa hi vunyingi ni tindzimi naswona hi rivilo leri tlulaka leri mupisalema a anakanyeke ha rona. Xana u hlanganyela nkarhi na nkarhi eku haxiweni ka wona, ngopfu-ngopfu hi ku hangalasa timagazini ta Xihondzo xo Rindza ni Awake!?
4. (a) Xana Kriste Yesu u “tlula hi ku saseka e v̌ana v̌a v̌anhu” hi ndlela yihi ke? (b) Ntlawa wa mulanguteri la totiweke wu ti tekelerisa ku yini ‘tintswalo ta milomu ya Kriste’?
4 Xivumbeko xa Hosi ya Yehova xi susumeta mupisalema leswaku a tsala a ku: “U tlula hi ku saseka e v̌ana v̌a v̌anhu, tintŝalo ti halakile miloṅwini ya wena; hikwalaho Šikwembu ši ku katekiseke hi laha ku nga heriki.” (Psalma 45:2) Ku sukela eka siku leri a totiweke ha rona hi moya wa Xikwembu, milomu ya Yesu yi chumayele hi Mfumo hi ku phikelela, ku kondza varhumiwa va vanhu va Sathana va yi miyeta swa xinkarhana. Hikwalaho ka vutshembeki bya Yesu, Yehova endzhaku u n’wi katekisile hi laha ku nga heriki hi ku n’wi pfuxa eka lava feke ivi a n’wi tlakusela ehenhla ka swivumbiwa leswin’wana hinkwaswo. (Vafilipiya 2:8-11) Ku sukela eku kwetsimisiweni ka Yesu ka le tilweni, loko a ‘tekelele leswi Xikwembu xi nga swona hi xiviri xa xona,’ u saseke ngopfu ku tlula mufumi la tlakusiweke ngopfu, munhu kumbe ntsumi. (Vaheveru 1:3, 4) Sweswi, tanihi Hosi leyi vekiweke, Yesu u nyika milomu ya ntlawa wa mulanguteri la totiweke ni vanghana va vona matimba leswaku va yimbelela mahungu lamanene ya Mfumo hi vurhena. Hambi swi ri tano, leri nakambe i risimu ra nyimpi.
5, 6. (a) Xana ku ‘khandziya ka Kriste ku ya lwela ntiyiso’ ku kombisa yini? (b) Xana ntlawa wa mulanguteri wu tirhisa Xihondzo xo Rindza ni Awake! hi ndlela yihi?
5 Ku ya emahlweni mupisalema u huwelela eka Hosi leyi fumaka: “We nhenha! tibohe banga ra wena e ṭhev̌eni ra wena, I ku ḍuneka ka wena ni ku kwetsima ka wena; Khanḍiya golonyi ya wena u ya hlula, u ya lwela ntiyiso, ni ku lulama ni musa. Voko ra wena ra šinene ri ta ku dyonḍisa mitiro le’yi tšhav̌isaka.” (Psalma 45:3, 4) Ku sukela hi 1914 Kriste a a ri karhi a khandziya hanci ya nyimpi, a tiyimisele ku hlasela. (Nhlavutelo 6:1, 2) U tibohe hi tlhari—xikombiso xa nyimpi ni xa vuhosi ni matimba lawa ya humaka eka Xikwembu leswaku a avanyisa matiko lama kanetaka. Kriste ana se u lwe na Sathana ni mademona yakwe, a va cukumeta ehansi va suka etilweni naswona a va pfalela ekusuhi ni misava.—Nhlavutelo 12:1-13.
6 Hambi swi ri tano, loko ku rhula ku nga si tlheriseriwa, swilo swo chavisa ku tlula leswi swi ta endliwa hi voko ra xinene ra Hosi loko yi ‘khandziyela ku ya lwela ntiyiso’ eArmagedoni leswaku yi herisa valala hinkwavo va Xikwembu emisaveni. (Psalma 45:4; Nhlavutelo 16:14, 16; 19:17, 18) Kriste u tiyise ntlawa wa mulanguteri la totiweke leswaku na wona wu yimbelela xitsundzuxo lexi. Xana “mulanguteri” u tirhisa yini leswaku a kurisa rito ra yena? Ngopfu-ngopfu matluka ya magazini wa Xihondzo xo Rindza—magazini lowu nga emahlweni eku huweleleni ka Mfumo wa Yehova lowu simekiweke. Ntlawa wa mulanguteri, ku fana ni vuthu ra swijajana leswi lumaka, wu totiwe hi moya lowu fanaka lowu susumetaka Kriste ku ‘khandziya a ya lwela ntiyiso.’ (Nhlavutelo 9:7-11) Hi laha ku humelelaka, va tirhisa timagazini leti lunghiseleriweke ehansi ka nkongomiso wa “mulanguteri”—Xihondzo xo Rindza ni Awake!—“ku ya lwela ntiyiso.”—Matewu 24:45; ringanisa Nhlavutelo 9:16-19.
‘Ku Khandziyela Ntiyiso’
7. Timagazini ta Xihondzo xo Rindza ni Awake! ti kurisa ntiyiso wa Bibele hi ndlela yihi ya vukari?
7 Hi malembe lama tlulaka dzana, Xihondzo xo Rindza a xi ri nghwazi eka ‘ku lwela ntiyiso wa Mfumo.’ Xi tirhisa Rito ra Xikwembu hi vutshila tanihi banga eka ku vandla vuandlalo bya xihoxo lebyi funengeteke tidyondzo to hemba ta vukhongeri. (Ringanisa Vaefesa 6:17; Vaheveru 4:12.) Nakambe magazini wa Awake! wu yimelela ku lwela ntiyiso. Loko swi ta eka swiendlakalo swa sweswinyana, Awake! yi handzula xisirhelelo lexi funengetaka mianakanyo ya sayense leyi kanetaka Bibele ni mimboyamelo ya ntirhisano ni mahanyelo lama nga ni khombo. Xana hi nga endla yini leswaku hi siya timagazini leti emavokweni ya vanhu vo tala leswaku va nga twa mahungu ya Mfumo lawa ya ponisaka vutomi?
8, 9. Xana ku tirhisa nawu lowu nga eka Vaefesa 5:16 eka ku hlaya Xihondzo xo Rindza ni Awake! ku nga ku pfuna njhani leswaku u “tsakela” ku hlanganyela eku vekeni ka vumbhoni hi timagazini? Nyika swikombiso.
8 Hinkwavo lava rhandzaka ntiyiso va fanele ku va “lava tsakelaka” mahungu lama timagazini ta Xihondzo xo Rindza ni Awake! ti nga na wona. (Psalma 45:1) Njhani? Ha yini u nga ti hlayi hi ku hatlisa loko u ti amukela? ‘Ndzi nga ka ndzi nga hlayi magazini kumbe buku ya nkarhi na nkarhi ku kondza loko ndzi sungule ndzi hlaya timagazini ta hina ndzi ti heta,’ ku vule Lillian eka malembe ya khume lama hundzeke. Wa ha tshembekile eka kungu rero. (Matewu 6:33) U nga endla yini endzhaku ka loko u tihlayile xana? Vulavula hi leswi nga endzeni ka tona ni van’wana—ndyangu ni swirho-kuloni swa bandlha. Nakambe leswi swi fanele ku ku nyika ku hisekela ku veka vumbhoni hi timagazini leswaku u ta byela vaakelani va wena hi swilo leswinene leswi u swi hlayeke. Handle ko kanakana u ta lava ku hlanganyela eka ku veka vumbhoni hi timagazini vhiki rin’wana ni rin’wana, u ti yisa emakaya ya vaakelani. Leswi swi nga ha ringanisiwa ni ndlela leyi muapostola Pawulo ‘a vekeke vumbhoni khwatsi ha yona.’—Mintirho 20:20, 21.
9 Peter ni nsati wakwe Petra a va tirha tanihi varhumiwa etikweni ra Vantima hi malembe ya mune lama hundzeke. Timagazini ta Xihondzo xo Rindza ni Awake! hi xin’wana xa swihlovo-nkulu swa vona swa ntamu wa moya. “Xihondzo xo Rindza xi hi pfuna leswaku hi tshama hi phaphamile emoyeni ensin’wini ya hina,” ku vula Petra. “Hi kuma xikhutazo ni matimba eka nkandziyiso wun’wana ni wun’wana wa Xihondzo xo Rindza ni Awake!,” ku engetela Peter, “naswona nkarhi na nkarhi loko timagazini leti ti fika, eka hina swi vonaka onge hi amukela papila leri humaka ekaya.” (Ringanisa Psalma 46:1.) Xana u ni ku tlangela ko tano ko enta ka timagazini ta hina naswona xana u chivirikela ku ti hlaya hi laha Peter na Petra va endlaka ha kona ke? Moya wa muxaka wolowo wu ta ku vangela ku nyikela timagazini nkarhi na nkarhi ni le ka van’wana.
10. I langutelo ra muxaka muni leri lavekaka eka ku veka vumbhoni loku humelelaka hi timagazini, naswona i mimpfuno yihi leyi ku nga yi humelerisaka?
10 Vahuweleri va Mfumo va fanele ku va ni langutelo lerinene eka ku veka vumbhoni hi timagazini. Vanhu lava va nga va vukhongeri hi xiviri va ha amukela rungula leri seketeriweke eBibeleni leri nga etimagazinini ta hina. (Ringanisa Mintirho 10:15, 30-33.) Ha yini? Hikuva va nge ri kumi eka xihlovo xin’wana. Malembe lama tlulaka 45 lama hundzeke eSweden, Lars u kume xiphutsa xa timagazini ta Xihondzo xo Rindza eka muthoriwa wa yena. “Leswi swa twala,” u byele nsati wa yena endzhaku ko ti hlaya. “Leswi Bibele yi swi vulaka, Xihondzo xo Rindza xa swi vula.” Leswi Lars a swi hlayeke swi n’wi susumetele enkhuvulweni—March 1940. Xiya xikombiso xin’wana. Vatirheli vambirhi va maphayona lava humaka edzongeni wa United States va te:
“Ku hlanganiwe ni wansati entirhweni wa timagazini. I mukhomi wa timali wa Kereke leyikulu ya Baptist naswona i xichudeni lexi tiyimiseleke xa Bibele. Loko a hlaye nxaxamelo wa nhloko-mhaka ya Armagedoni eka minkandziyiso ya Xihondzo xo Rindza ya January 1 ku ya eka February 15, 1985, a a tsakile. Eku sunguleni, u hete tiawara a kambisisa nhloko-mhaka yoleyo ivi a nga kumi nchumu handle ka tsalwa leri kumekaka eka Nhlavutelo 16:16. A a vutise mufundhisi wa yena a ku: ‘Armagedoni i yini xana? Xana u nga yi hlamusela?’ U n’wi langutile ivi a ku, ‘Yoleyo i nhloko-mhaka yo enta swinene,’ ivi endzhaku a famba. Hi tlhelo rin’wana, u vule leswaku Xihondzo xo Rindza, xi hlamule swivutiso swakwe hinkwaswo ni leswaku lexi a ku ri xona xihlovo xi ri xoxe lexi a xi kumeke xi ri ni matsalwa lama lavekaka eka nhloko-mhaka ya Armagedoni.”
11. (a) Ha yini u lunghiselela ku veka vumbhoni hi timagazini, naswona ka ngani? (b) Xana ntirho wa timagazini wu nga va mpfuno eka ntirho wa dyondzo ya Bibele? Hlamusela. (c) Xana u nga swi kotisa ku yini ku fambisa Xihondzo xo Rindza ni Awake!? Vona bokisi.
11 Xana u nga lunghiselela siku rin’we vhiki rin’wana ni rin’wana leswaku u veka vumbhoni hi timagazini, u endla leswi xiyenge xa hanyelo ra wena ra moya? (Ringanisa Vafilipiya 3:16.) “Vahuweleri, na wona maphayona, a va tirhisi nkarhi lowu aneleke entirhweni wa timagazini,” ku xiya rhavi ra Sosayiti ya Watch Tower ya le Nigeria. Kambe xana ku veka vumbhoni hi timagazini manuku ku fanele ku funengeta ntirho wo endla vadyondzisiwa ke? Hi laha ku hambaneke, swiviko leswi humaka eka marhavi ya Sosayiti ya le Australia ni le Brazil ya kombisa leswaku ku fambisa timagazini ku nga va goza ro sungula ro sungula tidyondzo to tala ta Bibele. “Eka ku fambisa ka mina ko sungula ka timagazini, tidyondzo tinharhu ti sunguriwile,” ku vula makwerhu wa xisati wa le Australia. Xana u nga swi kota njhani ku fambisa timagazini leti nga ha yisaka eka dyondzo ya Bibele? Languta ebokisini leri nga ni xihloko lexi nge “Ku Fambisa Timagazini” leswaku u kuma swiringanyeto.
Xana U Swi Ringetile Swiringanyeto Leswi?
12. I swiringanyeto swihi leswi tikombeke swi humelela eka muhuweleri un’wana?
12 Vutirheli Bya Hina Bya Mfumo bya Xinghezi bya May 1984 a byi ri na xiengetelo xa mune wa matluka xi vulavula hi ku veka vumbhoni hi timagazini. Xana u swi ringetile swiringanyeto leswi xi swi nyikeleke? Vahuweleri va Mfumo va nga endla kahle ku tlhela va hlaya xiengetelo xexo ivi va tirhisa xitsundzuxo xa xona entirhweni wa nsimu. Makwerhu un’wana wa xisati wa le United States u swi endlile leswi; mimbuyelo yi n’wi hlamarise hi laha ku tsakisaka. Wa tsala:
“A ndzi ri karhi ndzi tirhisa tinhla leti xaxametiweke exiengetelweni xa Vutirheli Bya Mfumo bya March 1984 [May eAfrika Dzonga] ehenhleni ka ku fambisa timagazini, naswona ta tirha! Eku heleni ka 1983 a ndzi fambise 36 wa timagazini ntsena lembe hinkwaro! A ndzi nga tsakanga, ku nga ri hi tinhlayo ta xiviko ntsena, kambe hikuva a ndzi tsandzeke ku yisa rungula leri ri ponisaka vutomi emavokweni ya vanhu lava va ri lavaka. Ndzi khongele Yehova ehenhleni ka mhaka leyi kutani ndzi tiyimisela ku endla matshalatshala yo tala leswaku ndzi fambisa Xihondzo xo Rindza ni Awake! Ndzi tirhise swiringanyeto ehenhleni ko veka pakani ya munhu hi xiyexe ya ku ti fambisa, ndzi tirhisa ku vulavulela ko koma loku kombisaka magazini wun’we ntsena, ndzi ya entirhweni wa nsimu hi siku ra timagazini nkarhi na nkarhi, naswona ndzi va ni langutelo lerinene. Manuku loko n’wini wa yindlu a ala nyiko ya nkarhi na nkarhi, ndzi ri: ‘Ina, loko swi ri tano ndzi to ku siyela minkandziyiso ya sweswinyana ya Xihondzo xo Rindza ni Awake! hi 40 wa tisente.’ Tinhla leti ta tirha hakunene. Eka tin’hweti ta mune leti hundzeke ndzi swi kotile ku va ni avhareji ya 14 wa timagazini hi n’hweti!”
13. I xitsundzuxo xihi lexi humesiweke hi 1888 lexi xa ha tirhaka ni namuntlha?
13 Eka nkandziyiso wa December 1888 wa Zion’s Watch Tower, ehansi ka nhloko-mhaka leyi nge “Xiringanyeto Eka Lava Tshovelaka,” xitsundzuxo lexi xi nyikeriwile: “Xihinga lexikulu eka vo tala xi vonaka xi ri, xa leswaku timbilu ta vona ti tele ngopfu hi marungula lamanene, lerova va ringeta ku vulavula kantsongo mayelana ni kungu ra Xikwembu.” Xana xitsundzuxo xexo xa ha tirha? Loko a vutisiwe leswi vahuweleri va nga swi endlaka leswaku va engetela ku fambisa timagazini, mulanguteri un’wana wa xifundza la humaka eFurwa u hlamurile a ku: “Komisa. Bana nhloko ya mhaka.”
14, 15. Xana swifaniso leswi nga eka Xihondzo xo Rindza ni Awake! swi nga tirhisiwa njhani eku vekeni ka vumbhoni? Nyika swikombiso.
14 Eka tindzimi to tala leti timagazini ti humaka ha tona, swifaniso swo koka mahlo hi mivala ya mune swi engetele ku tsakisa ka mahungu ya Mfumo loko ya ri karhi ya fikelela vanhu vo hambana-hambana. Eka nkandziyiso wa January 8, 1987, Awake! yi tihlanganise ni Xihondzo xo Rindza hi ku gandlisiwa hi mune wa mivala hi tindzimi to tala. Xana u tirhise swikombiso ni swifaniso leswi nga eka timagazini tanihi tinhla to vulavula ha tona? Vo tala va swi endlile, va va ni mimbuyelo leyinene. Theresa, murhumiwa le Far East ku sukela hi 1976, u swi endlile. U hangalase 260 wa timagazini hi n’hweti. U ri: “Ndzi tirhisa swifaniso ku tlakusa tinhla-nkulu ta mhaka ya mina. Minkarhi yo tala ndzi komba n’wini wa yindlu xifunengeto ivi ndzi boxa nhloko-mhaka, naswona hakanyingi magazini wa tifambisa.”
15 Kay, murhumiwa etikweni ra Suriname, u ve ni ntokoto lowu fanaka. Yena ni nuna wakwe va ve kwalaho hi malembe ya khume, naswona va kuma swifaniso swi tirha loko va veka vumbhoni, ngopfu-ngopfu eka lava va ripfumelo ra Hindu. Ha yini? Kay wa hlamusela:
“Vukhongeri bya Hindu i vukhongeri bya swifaniso. Eka yindlu yin’wana, ndzi kombele wansati: ‘Ndzi kombela u ndzi byela vito ra swikwembu swa n’wina leswi nga eswifanisweni swa wena.’
“‘Lexi i Shiva,’ ku hlamurile yena.
“‘Manuku, hi xihi xikwembu lexikulu?’ Ndzi tlhele ndzi vutisa. Ku hava nhlamulo. ‘Xana hi nga hlaya Yeremia 10:10-12? I Xikwembu xihi lexi nga tivulaka Muvumbi? I Yehova ntsena. Ha swi tiva leswaku mi rhandza swifaniso. Xana swifaniso leswi nga eka Xihondzo xo Rindza ni Awake! a swi xonganga ni ku tsakisa? Xana u nge lavi ntsako wo dyondza leswi swi vulaka swona?’”
Ha yini u nga ringeti ku nghenisa swifaniso ebulwini ra wena nkarhi lowu taka loko u ri entirhweni wa timagazini?
16. I swiringanyeto swihi leswi humaka eka muhuweleri wa le Hong Kong leswi u nga swi kumaka swi pfuna?
16 Loko a ri karhi a tirha eHong Kong, Gene u ve ni avhareji leyi tlulaka 300 wa timagazini leti fambisiweke hi n’hweti. Xana u swi endle njhani leswi? Wa hlamusela:
“Xo sungula, khongelela nkateko wa Yehova leswaku wu va ehenhla ka ku veka ka wena vumbhoni hi timagazini. Xa vumbirhi, vana la kongomeke, u n’wayitela ni ku va ni xinghana. Xa vunharhu, fanelekela ni ku va la pfumelaka, naswona lava xisekelo lexinene ni n’wini wa yindlu. Xa vumune, oda timagazini leti aneleke ta n’hweti hinkwayo. Ndzi ni oda leyikulu, tanihi loko leswi swi ndzi nyikaka nsusumeto lowukulu. Xa vuntlhanu, vekela madyambu man’we evhikini ya ntirho wa timagazini, tanihi leswi vanhu vo tala va nga le makaya hi nkarhi wolowo naswona va le xiyin’weni xo wisa. Xa vutsevu, sungula ntila wa timagazini, hambi loko wu ri lowuntsongo.”
Ku Sungula Ntila Wa Magazini
17. (a) Hi le ka xiyenge xihi xa ku veka ka hina vumbhoni hi timagazini laha nawu lowu nga eka Mintirho 15:36 wu nga tirhisiwaka kona? (b) Eka matiko lawa ya nga hluvukangiki hi ntirho wa poso, i ndlela yihi yin’wana leyi vahuweleri va nga fambisaka timagazini ha yona?
17 “Ku hlayisa tirhekhodo letinene ta laha timagazini ti fambisiweke kona kutani u tlhelela nkarhi na nkarhi i ndlela yin’wana yo engetela ku hangalasiwa ka timagazini,” ku vula Ollie, loyi a tirheke ensin’wini ya Vantima ya Burkina Faso. “Ndzi ve ni 15 wa vanhu entileni wa mina wa timagazini. Tanihi leswi Burkina Faso ku nga riki rhavi leri gandlisaka naswona ku tisiwa ka poso ku nga tiyisekangiki, Timbhoni hakanyingi ti amukela timagazini ta tona leswaku ti ti fambisa hi swikatsa, kumbexana mune kumbe ntlhanu wa minkandziyiso hi nkarhi wun’we.” Xana sweswo swi tano ni le tikweni ra ka n’wina ke? Loko swi ri tano, ku nga endliwa yini ku hlula mphikamakaneta leyi eka ku fambisa timagazini? “U nga khoma tikopi ta nkandziyiso wun’wana ni wun’wana emavokweni ya wena, u ti hangalasa kutani u pfumelela munhu la tsakelaka a hlawula lowu a nga ta lava ku wu hlaya,” ku ringanyeta Ollie. “Hakanyingi, u ta ti teka hinkwato.”
‘Hambeta U Tsakela Timhaka Letinene’
18. I timhaka tihi ta swiviko swa sweswinyana swa ntirho wa nsimu leti bumabumeriwaka ngopfu, naswona hi nga yisa mianakanyo leyikulu eka yini?
18 N’wina vahuweleri va Mfumo mi pfunete ku tlakuka lokukulu ka nhlayo ya swikhokhelo leswi kumiweke swa timagazini leti timbirhi. Mi fanele ku bumabumeriwa hi ku chivirika ka n’wina eku hangalaseni ka mahungu lamanene hi ndlela leyi. Nakambe ku bumabumeriwa ku tlakuka ka ntsengo wa nhlayo ya timagazini leti fambisiweke. Hambi swi ri tano, kumbexana hi nga yisa mianakanyo eka ku fambisa ka hina ka munhu hi xiyexe ka timagazini. Hi ku engeteleka lokukulu ka nsimu leyi hlanganisiwaka, ku fambisiwa ka timagazini hi muhuweleri ha un’we ku ehlile. Leswi hi hanyaka endzeni ka nkarhi wo hetelela, xana hi nga va lava ‘tsakelaka ngopfu marito lamanene’ ya Mfumo hi ku veka vumbhoni hi timagazini?—Psalma 45:1; 1 Petro 4:7.
19. Hi nga lwela ntiyiso wa Mfumo hi tindlela tihi timbirhi?
19 Kriste eku hluleni ka Mfumo u khandziyela ku ya hlula eku hlawulekiseni ka vito leri kwetsimaka ra Tata wakwe ni ku kurisa vuhosi bya Yena bya misava hinkwayo. (Nhlavutelo 6:2) A hi tirhiseni marimi ya hina ni matluka lama gandlisiweke ku huwelela ku fika ka yena. Onge hi nga tlakusa marito ya hina ni ntlawa wa mulanguteri la totiweke hi ku tshembeka loko wu karhi wu hlangana na Kriste eku lweleni ka ntiyiso wa Mfumo wa Xikwembu wa Vumesiya lowu simekiweke. Ina, a hi hangalaseni Xihondzo xo Rindza ni Awake! hinkwako-nkwako—timagazini leti tirhaka ntirho wa nkoka loko Hosi ya hina yi ‘khandziyela ku ya lwela ntiyiso.’—Psalma 45:4.
Wa Tsundzuka Xana?
◻ ‘Marito lamanene’ lama faneleke ku nyanyula mbilu ya wena i yini?
◻ Ku ‘khandziya ka Kriste ku ya lwela ntiyiso’ ku tisa mimbuyelo yihi?
◻ Xihondzo xo Rindza na Awake! swi tirha ku “lwela ntiyiso” hi ndlela yihi?
◻ Hi nga yisa mianakanyo leyi engetelekeke eka ku veka vumbhoni hi timagazini hi ndlela yihi ke?
[Bokisi leri nga eka tluka 18]
KU FAMBISA TIMAGAZINI
Xana U Ringetile?—
◆ Ku veka vumbhoni hi yindlu na yindlu
◆ Ku veka vumbhoni exitarateni
◆ Ku veka vumbhoni etindhawini ta mabindzu
◆ Ku veka vumbhoni hi ntila wa timagazini
◆ Ku veka vumbhoni ni madyambu
◆ Loko nyiko ya buku yi ariwa
◆ Loko u endla maendzo yo vuyela
◆ Loko u tlhelela eka khale ka swichudeni swa Bibele
◆ Loko u famba kumbe u xava
◆ Loko u vulavula ni maxaka, vatirhi-kuloni, vaakelani, vanghana va le xikolweni kumbe mathicara