“Tshemba Yehova” Ntsombano Wa Muganga—Wu Nga Ku Hundzi!

Masiku manharhu lama teleke, lama vuyerisaka ya vuleteri bya Bibele ni xinakulobye lexinene xa Vukriste ya ku rindzerile eNtsombanweni wa Muganga wa Timbhoni ta Yehova wa “Tshemba Yehova.” Hi December 1987 na January 1988, mintsombano leyi tlulaka 15 yi xaxametiwile edzongeni wa Afrika hinkwaro ntsena, kutani ku ta va ni wun’wana lowu nga riki kule ni kaya ra wena. Kunguhata ku va kona ku sukela eka nongonoko wo pfula lowu wu sungulaka hi 10:20 a.m. hi Ravuntlhanu, kutani u tshama ku kondza wu hela hi Sonto nindzhenga.

Nongonoko wo sungula wu ta kombisa nkulumo leyi nga ni marungula leyi nge “Vanhu Lava Hambanaka Ni Misava.” Nindzhenga, ndzayo leyinene leyi kongomeke yi ta kongomisiwa eka vatswari ivi endzhaku yi yisiwa eka vantshwa. Vantshwa va ta pfuniwa ku tivonela ku hanya vutomi lebyi nga vuriwaka “vutomi byimbirhi.” Endzhaku mhaka leyi yi ta kombisiwa hi drama leyi susumetaka mbilu ya manguva lawa.

Hi Mugqivela nimixo ku ta nyikeriwa nkulumo ya ku tinyiketa ni nkhuvulo, kun’we ni vuleteri ehenhleni ka tindlela leti hi nga kombisaka vutshembeki bya hina eka Yehova ha tona, ku pfumelelana ni nhloko-mhaka ya ntsombano. “Ku Tswala Vana Loku Nga Ni Vutihlamuleri eNkarhini Lowu Wa Makumu” ku ta va nkulumo-nkulu ya nongonoko wa nindzhenga, lowu nga ta hetelela hi tinkulumo ta nxaxamelo eka xihloko lexi nge “Rito Ra Xikwembu Ra Hanya.”

Nongonoko wa Sonto wu ta nyikela nkulumo leyi nge “Venga Mahanyelo Lama Nyenyetsaka Ya Misava Hi Laha Ku Heleleke,” kun’we ni drama ya Bibele leyi vatlangi va ambaleke hi laha ku heleleke yi kombisa xihatla xa minkarhi ya hina. Nindzhenga, nkulumo ya le rivaleni leyi nge, “Eminkarhini Ya Hina Yo Chavisa, I Mani Loyi U Nga N’wi Tshembaka Hakunene?” ku ta va mhaka yin’wana ya ntsombano.

Kumisisa ni Timbhoni ta Yehova ta kwalaho hi nkarhi ni ndhawu ya ntsombano lowu nga kusuhi na wena.