Ripfumelo Ri Nga Susa Tintshava!
NTSHUNGU a wu vilela. Tatana wa ha ku tisa n’wana wakwe la nga ni switshetshela eka vavanuna lava xiyiwaka va ri ni vuswikoti byo n’wi hanyisa. Ku hanyisa ku rindzeriwe hi mahlo-ngati. Kambe a ku humelelanga nchumu! Hi ku khomiwa hi gome, tatana u hele matimba.
Enkarhini wolowo, vavanuna van’wana va mune va humelerile naswona exikarhi ka vona a ku ri na murhangeri wa vona, Yesu wa Nazareta. Loko a tsutsumela eka yena, tatana loyi u komberile a ku: “Wa nga twela n’wana wa mina evusiwana, hikuva u xanisiwa ngopfu hi switshetshela; hakanyingi ú wele endzilweni, ni le matini. Ndzi n’wi tisile eka vadyondzisiwa va wena, kambe va tsandzekile ku n’wi hanyisa.”
Yesu u te: “N’wi tiseni haleno.” Vuyelo ku ve byihi? “Kava loko Yesu a tshinya demona, kutani demona ri huma eka n’wana; ku sukela nkarhi wolowo n’wana loyi a va a hanyile.” Ina, i hlori rin’wana! Kambe ha yini vadyondzisiwa va Yesu va tsandzekile?
Yesu u hlamuserile leswaku hikwalaho ka yini, a ku: “Hikwalaho ka ku tsana ka ku pfumela ka n’wina. Ndzi tiyisile ndzi ri ka n’wina: Loko mi ri ni ku pfumela loku ringanaka ni ndzoho ya murhi wa sinapi, mi nga ku ka ntshava leyi: ‘Rhurhela lahaya!’, kutani yi ta rhurha, ku ri hava lexi xi mi tsandzaka.”—Matewu 17:14-20.
Eka ntokoto lowu wa vutomi bya ntiyiso, swi le rivaleni leswaku ripfumelo ri na matimba. Kambe kahle-kahle ripfumelo i yini ke? Xana ri nga akiwa ni ku tiyisiwa? Xana hakunene ri nga susa tintshava?
Ripfumelo I Yini?
Muapostola Pawulo u hlamusele ripfumelo tanihi “ku tshemba loku tiyeke ehenhla ka swilo leswi languteriwaka, ni ku kholwa swinene [kumbe, vumbhoni lebyi khorwisaka] hi tlhelo ra swilo leswi nga voniwiki.” (Vaheveru 11:1) Hi marito man’wana, ripfumelo i vumbhoni lebyi khorwisaka bya nchumu lowu nga voniwangiki. A ri seketeriwanga eka mavarivari ntsena kambe ri na xisekelo lexi tiyeke. Kutani ke, ripfumelo ri hambanile ni ku tshemba. Dikixinari yin’wana yi hlamusela ku tshemba tanihi “ku pfumela kumbe ku lulamela ku pfumela, [ngopfu-ngopfu] eka vumbhoni lebyintsongo kumbe lebyi nga tiyisekangiki.” Ku hambana na sweswo, munhu la nga ni ripfumelo ra ntiyiso u ni vumbhoni lebyi tiyeke bya leswi a swi tshembaka. Hikwalaho, a nga ku byela leswaku ha yini a khorwiseka leswaku nchumu wo karhi wu ta hundza. Tatana la boxiweke eku sunguleni a a ri na vumbhoni byo karhi lebyi n’wi khorwisaka leswaku Yesu a nga hanyisa n’wana wa yena. I vumbhoni byihi xana? Ina, Yesu a a ri karhi a endla mahlori eka malembe lama tlulaka mambirhi, naswona ndhuma ya yena a yi hangalake ePalestina hinkwayo.—Luka 7:17; Yohane 10:25.
Ripfumelo ri tlhela ri hlamuseriwa tanihi “mapapila ya vumbhoni ya minchumu leyi languteriwaka.” Wanuna la xavaka nhundzu leyi nga kule naswona a ri na mapapila ya vumbhoni emavokweni yakwe u na vumbhoni lebyi khorwisaka bya leswaku nhundzu leyi yi kona naswona i ya yena, hambi loko a nga ha va a nga si yi vona. Kutani, na yena munhu la nga ni ripfumelo a nga nyika vumbhoni lebyi vonekaka bya leswi a swi tshembaka. Hi xikombiso, a hi nge u pfumela leswaku Yehova Xikwembu u ta tisa ku rhula ka ntiyiso emisaveni leyi hi ku tirhisa Mfumo wa Yena. Kutani munhu yoloye u fanele a sungula hi ku va ni vumbhoni bya leswaku Xikwembu xi kona ni leswaku xi na matimba, xi na ku swi rhandza ni vutlhari lebyi lavekaka byo tisa ku rhula ni leswaku Xi simeke Mfumo hikwalaho ka xikongomelo xexo. Vumbhoni byo tano byi fanele ku va lebyi tiyeke swinene leswaku byi khorwisa hayi munhu la nga ni ripfumelo ntsena kambe ni van’wana lava nga ha n’wi ‘vutisaka ehenhla ka ku tshemba loku a nga na kona’ ka ku rhula.—1 Petro 3:15.
Ripfumelo Ri Nga Susa Tintshava!
Hambi swi ri tano, un’wana a nga ha vutisa a ku, ‘Xana Yesu a a vula leswaku ripfumelo ro tano ri nga susa tintshava hi xiviri?’ Yesu a nga ha va a katse sweswo, kambe hakanyingi a a tirhisa swifaniso. (Matewu 13:34) Kutani entiyisweni a a tiva swihinga leswi nga fanaka ni tintshava eka mupfumeri. Entiyisweni, rito “ntshava” hakanyingi ri tirhisiwa ku vula ntsengo lowukulu ngopfu, tanihi “ntshava ya swikweleti.” Leswaku ripfumelo ra ntiyiso ri nga rhurhisa kumbe ku susa swihinga swo fana ni tintshava swi tiyisiwa hi mintokoto yo tala ya manguva lawa.
Hi xikombiso, xana a wu nga ta pfumela leswaku ku khwanyana ku suka enhan’wini ku ya fika emilengeni ku ta va ntshava yo tano? Kambe, la khwanyaneke mavoko ni milenge hinkwayo la tshamaka eVancouver, B.C., Canada, a nga dyondzanga ku khavisa ntsena hi bulachi kumbe mukwana wo khavisa lowu lumiweke enon’wini wa yena, kambe u tlhela a tiwundla hi ku xavisa swifaniso swa yena. Ku tlula kwalaho, ripfumelo ra yena ri n’wi susumetela ku vulavula ni van’wana hi leswi a swi dyondzeke eBibeleni, a endla tano a ri eka xitulu xakwe xa lava lamaleke kumbe hi ku tsala mapapila. U thayipa mapapila hi ku tirhisa xinhongana lexi lumiweke hi nomu wa yena. Nakambe u va kona eminhlanganweni ya Vukriste nkarhi na nkarhi naswona u nyikela tinkulumo eXikolweni xa Vutirheli bya le Tilweni lexi fambisiwaka hi Timbhoni ta Yehova. Xikombiso xa yena xa ripfumelo, lexi hlanganeke ni ku tirha hi matimba ni ku tiyimisela, i xihlovo xa xikhutazo eka lava nga ekusuhi na yena.
Ku pfumela eka Rito ra Xikwembu ni le ka switshembiso swa xona hi ku fanana swi pfune van’wana. Hi xikombiso, swi pfune vo tala ku hlula mikhuva ni mahanyelo lawa ya nga riki ya Vukriste, ku fana ni mintirho leyi nga twisisekiki ya bindzu, ku yiva, ku dzaha, ku tlanga hi mali, vudakwa, vungoma, vunghwavava ni mintirho ya vukhongeri byo hemba. Mhaka leyi tolovelekeke eka mintokoto yo tano hinkwayo a ku ri ku kuma vumbhoni lebyi khorwisaka bya leswaku Yehova Xikwembu u kona, leswaku Bibele i Rito rakwe leri tsariweke ni leswaku switshembiso swa yena leswi tsariweke eMatsalweni swa tshembeka naswona swi ta hetiseka. Ripfumelo ro tano ri nga susa tintshava.