Xiviko Xa Vahuweleri Va Mfumo

‘Ntshovelo Wu Vupfile’ eBurma

◻ TIKO lero saseka ra Burma ri ni vahuweleri va mahungu lamanene lava tlulaka 1 500. Mintsombano ya vona ya sweswinyana yi khomiwe hi tindzimi ta Xiburma, Xilushai na Xihaka Chin, ku ri ni ntsengo wa lava va veke kona va 2 273. Mintokoto leyi landzelaka yi paluxa ku tsakela loku vanhu lava fanaka ni tinyimpfu va nga na kona eka rungula ra Mfumo naswona yi kandziyisa leswi Yohane a swi voneke exivonweni: ‘Ntshovelo wa misava wu vupfile swinene.’—Nhlavutelo 14:15.

Swi Endlekile eDinam

◻ Loko ri ri evutirhelini bya yindlu na yindlu eMatupi, phayona ro hlawuleka ri hlangane na xichudeni lexi ngopfu-ngopfu a xi tsakela ku tiva hi tihele. Loko xi hlamuseriwe leswaku tihele ta Bibele i sirha leri tolovelekeke ra vanhu, a xi hlamale ngopfu. A xi swi kotanga ku tshama na swona kambe xi lave ku byela maxaka ya xona le ndzhaku emutini wa ka vona wa Dinam. Hi nkarhi wa tiholideyi ta xikolo, xi tlhelele endzhaku emutini wa ka vona ivi xi hangalasa ntiyiso lowu vulavulaka hi tihele. Namu wakwe u tsakele swinene ku tiva leswi engetelekeke, kutani u fambe ni xichudeni lexi le ndzhaku eMatupi leswaku a ya vulavula na phayona hi roxe. U tshame mavhiki eMatupi kutani a dyondza na phayona leri. Endzhakunyana, hi nkarhi wa riendzo ra vumbirhi eMatupi, u sindzise leswaku maphayona ma endzela muti wa ka vona, hikuva, u te a ku ri na vanhu vo tala lava tsakelaka kona. Maphayona manharhu hinkwawo ma amukele xirhambo xexo hi ntsako. Swi va tekele tiawara ta 12 to tika leswaku va fika eDinam.

A ku ri na nkosi eDinam siku leri maphayona ma fikeke ha rona, naswona vanhu lava humaka emitini ya le kusuhi na vona a va ri kona ku ta twa leswi engetelekeke ehenhleni ka tihele leti ta Bibele. Hinkwavo va tsutsumele ku ya vona vaendzi lava. Bulo ra Bibele leri khomiweke ku sukela hi 7:00 p.m. ku fika hi 11:00 p.m. ri landzerile. Munhu la twisisaka exikarhi ka ntshungu u yimise bulo hi 1 1:00 p.m., a pfumelela maphayona ku wiselanyana siku leri landzelaka. Mixo lowu landzelaka, va sungule bulo ra Bibele kwalomu ka awara ya nkombo ivi ri ya emahlweni ku fika hi awara ya khume nimadyambu, ri ri na ku wisanyana ka swakudya ntsena. Loko maphayona ma siya muti lowu, vanhu lava fanaka ni tinyimpfu va kombele leswaku ma tlhelela kutani ma heta nkarhi lowu engetelekeke na vona. Mawaku lunghelo leronghasi ra ku pfuna vanhu vo tano lava dyondzisekaka hi mahungu lamanene ya Mfumo lama vangamaka. Entiyisweni, ku tshovela ku ‘vupfile’ eBurma!

Ku Kuma Ntiyiso eBukwini Leyi Lahliweke

◻ Wanuna un’wana eBurma a a ri karhi a endzela munghana wakwe loyi a xavisaka tibuku ta khale ni tinyuziphepha tanihi maphepha lama nga ha pfuniki nchumu kutani a vona buku ya khale leyi a yi ri hava xifunengeto exikarhi ka maphepha lama nga ha pfuniki nchumu. U yi rholerile ivi a sungula ku yi hlaya. Hi ku hatlisa u tinyiketerile eku yi hlayeni. Swi endlekile leswaku yi va yi ri buku ya Sosayiti ya Watch Tower leyi nge Listening to the Great Teacher. U tsalele hofisi ya rhavi ya Sosayiti leswaku a kuma tibuku leti engetelekeke. Hi ku hatlisa hofisi ya rhavi yi rhumele phayona leswaku ri n’wi endzela. Dyondzo yi sunguriwile na yena, naswona endzhaku ka tidyondzonyana ti nga ri tingani, u xiye ku twala ka ntiyiso kutani a sungula ku basisa vutomi bya yena eka mikhuva leyo biha ivi endzhakunyana a tintshunxa eka swifaniso swa vukhongeri bya yena bya Vuhindu. Ku nga ri kungani, yena na n’wana wa yena wa mativula wa xisati va tinyiketile eka Yehova naswona va khuvuriwile. Sweswi i phayona ra nkarhi hinkwawo.

Entiyisweni, “ku tshovela i kukulu, kambe vatirhi a va talanga” eka nsimu leyi tswalaka mihandzu ya Burma.—Matewu 9:37, 38.