Swivutiso Swa Vahlayi
◼ Xana hi fanele hi fikelela makumu ya leswaku eka Matewu 7:13, 14 na Luka 13:24 hambi ku ri eku pfuxiweni ka vafi, vanhu vo tala va ta ala vugandzeri bya ntiyiso?
Doo, tindzimana leti a ti ma seketeli makumo wolawo. Ematshan’weni ya sweswo, hi ku hlawuleka ma kombetela eku kumeni ka vutomi eMfun’weni wa le tilweni.
Marito ya Yesu eka Matewu 7:13, 14 i xiyenge xa Dyondzo ya yena ya le Ntshaveni. U te: “Nghenani hi nyangwa leyo khuma, hikuva nyangwa leyi yisaka eku loveni yi ahlamile, ni ndlela leyi yaka kona yi anamile, kutani lava nghenaka hi yona va tele. Kasi nyangwa leyi yisaka evutomini yi khumile swinene, ni ndlela leyi yaka kona yi larile, kutani lava va yi kumaka ava talanga.”
Swo tala swa leswi Yesu a swi vuleke eka xiendlakalo lexi a swi kombetela eka Mfumo wa le tilweni hi laha ku hlawulekeke. Hi xikombiso, u sungule hi marito lama nge: “Ku katekile swisiwana emoyeni, hikuva Mfumo wa matilo i wa swona.” U vule leswaku lava tengeke embilwini va ta “vona Xikwembu” ni leswaku “Mfumo wa matilo” i wa lava “xanisiwaka hikwalaho ka leswo lulama.” (Matewu 5:3, 8, 10) Endzhakunyana eka nkulumo leyi fanaka, Yesu u vulavule hi ndlela yo anama leyi yisaka eku loveni ni ndlela yo lala leyi yisaka evuton’wini. Hi ku komisa, u engeterile: “A hi hinkwavo lava nge ka mina: ‘Hosi, Hosi’ lava nga ta nghena eMfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:13, 14, 21.
Nhlamuselo ya Luka 13:24 ya fana, hi laha mongo wu kombisaka ha kona. Yesu u nyikele swifaniso swimbirhi mayelana ni ‘mfumo wa Xikwembu.’ Endzhakunyana u vutisiwile: “Hosi, xana lava nga ta ponisiwa, va ta va va nga talanga ke?” Yesu u hlamurile: “Ringetani hi matimba ku nghena hi nyangwa leyo khuma, hikuva ndza mi byela leswaku lavo tala va ta navela ku nghena, kambe va ta tsandzeka.” “Vo tala” yi kombela eka vanhu lava kombeleke ku nghenisiwa endzhaku ka loko nyangwa wu pfariwile ni ku khiyiwa. Lava a va ri “lava endlaka leswi nga lulamangiki” lava a va nga faneleki ku va na “Abrahama, na Isaka, na Yakobo, va tshamile eMfun’weni wa Xikwembu va ri ni vaprofeta hinkwavo.” “Vo tala” va anakanye leswaku va ta va vo sungula “eMfun’weni wa Xikwembu,” kambe entiyisweni va ta va vo hetelela, kahle-kahle a a vula leswaku a va nge vi kona eka wona hi ku helela.—Luka 13:18-30.
Mongo wu kombisa leswaku Yesu a vulavula hi ku nghena eMfun’weni wa Xikwembu wa matilo. Varhangeri va Vayuda hi nkarhi wolowo ana se a va tiphine hi lunghelo ra xiyimo lexi tlakukeke hi nkarhi wo leha, va ri na Rito ra Xikwembu. Va vone onge a va fuwile hi tlhelo ra moya ni leswaku a va lulamile emahlweni ka Xikwembu, ku hambana ni vanhu lava tolovelekeke, lava a va va tekela ehansi. (Yohane 9:24-34) Hambi swi ri tano, Yesu u vule leswaku valuvisi ni vaoswi lava amukeleke rungula rakwe ivi va hundzuka va nga amukeriwa hi Xikwembu.—Ringanisa Matewu 21:23-32; Luka 16:14-31.
Vanhu lava tolovelekeke lava veke va vadyondzisiwa va Yesu a va ri enxaxamelweni wo amukeriwa tanihi vana va moya loko xirhambo xa le tilweni xi ta va xi pfulekile hi Pentekosta ya 33 C.E. (Vaheveru 10:19, 20) Hambi loko mintshungu leyikulu yi n’wi twile Yesu, lava va n’wi amukeleke kutani endzhakunyana va kuma ntshembo wa le tilweni a va nga ri vangani. Kambe ntlhambinyana wa vanhu lava tswariweke hi moya lava amukelaka hakelo yoleyo va nga fanisiwa na Yakobo la tshameke etafuleni etilweni na Yehova (Abrahama Lonkulu) ni N’wana wa yena (la fanekiseriwaka hi Isaka). Sweswo entiyisweni a swi lava leswaku munhu a tinyiketela hi matimba, kambe vo tala lava tweke Yesu a va endlanga tano.
Hikwalaho, hi nga swi vona eka mongo wa swiendlakalo leswi swimbirhi leswaku marito ya Yesu (mayelana ni nhlayo yintsongo leyi nga endleleni yo lala leyi yisaka evuton’wini ni ku ponisiwa) a ma kombetela ngopfu-ngopfu eku amukeriweni hi Xikwembu hi nkarhi wolowo loko A ha ri na ntshembo wolowo wa vutomi bya le tilweni. I vantsongo swinene lava tweke rungula ra ntiyiso ivi va dyondza leswi a swi laveka ni ku swi amukela kutani va tikombisa va ri lava tshembekaka.—Matewu 22:14; 24:13; Yohane 6:60-66.
Swa tsakisa leswaku hambi ku ri namuntlha, laha Bibele hinkwayo yi kumekaka naswona ku nga ni ku hetiseka lokukulu ka vuprofeta bya Xikwembu mayelana ni masiku ya makumu, va nga vantsongo swinene lava amukelaka rungula ra Vukriste ni ku tiyisela eku tirheleni Yehova. Leswi swi fambisana ni xifaniso xa Yesu mayelana ni misava yo hambana-hambana. U vule leswaku van’wana va ta ri twa “Rito ra Mfumo,” kambe Sathana u ta teka leswi swi byariweke. Van’wana a va ta amukela rito hi ntsako kambe hi ku famba ka nkarhi va ta tsandzeka hinkwalaho ka mahlomula kumbe ku xanisiwa. Naswona van’wana va ta tikombisa va nga ri na mihandzu hikwalaho ka “ku vilela hi swa misava ni ku kanganyisiwa hi rifuwo.”—Matewu 13:18-23.
Hi nga tiyiseka leswaku ku ta va ni ku hambana lokukulu loko timiliyoni ta timiliyoni ti pfuxiwa hi Siku ra ku Avanyisa. Hi nkarhi wolowo Sathana u ta va a nga ntshuxekanga leswaku a wutla timbewu ta ntiyiso leti byariweke etimbilwini ta vona. A va nge boheki ku langutana ni nxaniso kumbe ku vilela hi mafambiselo ya sweswi ya swilo. Va ta dyondziseriwa endhawini leyinene, leyi rhendzeriweke hi mintirho leyi hlamarisaka ya Xikwembu, ku katsa ni ku pfuxiwa ka vafi ni ku hanyisiwa ka matiko. Kavula, van’wana a va nge yingisi hambi ku ri hi nkarhi wolowo. (Ringanisa Yohane 11:45-53.) Kambe ku ni xivangelo lexinene xo ehleketa leswaku vo tala va ta ri twa rito, va ri amukela ivi va ponisiwa.