Xiviko Xa Vahuweleri Va Mfumo

Ku Nyikela Vumbhoni Bya Xitshuketa Swi Tswala Mihandzu

YESU u sungule bulo leri ri yiseke eka vumbhoni bya xitshuketa kambe lebyi humeleleke swinene loko eka Musamariya loyi a a ri exihlobyeni a te: “Ndzi nyike mati ndzi nwa.” (Yohane 4:7) Na hina namuntlha hi nga va lava humelelaka swinene loko hi xalamukela minkarhi ya ku nyikela vumbhoni bya xitshuketa. Makwerhu un’wana eAustralia u sungule bulo ra xitshuketa hi ku hlaya ndzimana ya siku ebenceni ra le phakeni. Wanuna la rhandzaka ku tiva u xiye xibukwana lexi ivi a vula leswaku na yena a a tsakela Matsalwa. A a ri munhu la nga byi tirhisiki Vukhatoliki kambe la dyondzisiweke hundzuluko exikolweni xa Khatoliki naswona sweswi a nga ha xi tivi lexi a faneleke a pfumela xona. Makwerhu u lunghiselele ku n’wi kumela buku leyi nge Life—How Did It Get Here? By Evolution or by Creation?a Endzhaku ka masiku mambirhi u yise buku leyi laha wanuna loyi a tirhaka kona, kambe a kuma leswaku a nga kona. Matsalana wa yena u wutle buku leyi, a ku: “A hi rindzele buku leyi.”

Endzhaku ka tiawara timbirhi makwerhu loyi u amukele riqingho leri kombelaka tikopi tin’wana timbirhi ta buku leyi nge Creation a tlhela a kombela leswaku Mbhoni yi n’wi endzela ehofisini yoleyo. Loko makwerhu a ye ehofisini ya yena, u kume wanuna loyi ni van’wana vambirhi. Dyondzo ya Bibele yi sunguriwile na vona, ku katsa na matsalana naswona ku lunghiseleriwe leswaku makwerhu a endza kambirhi hi vhiki. Emavhikini ya le mahlweninyana, ntombi ya wanuna loyi, ‘Mukriste la tswariweke nakambe,’ a hambeta a rhumela mapapila a vutisa swivutiso swa Bibele. Eku heteleleni, u joyine dyondzo leyi, hi laha munghana wa wanuna loyi ebindzwini ni munghana wa yena, loyi a ri museketeri wa hundzuluko va endleke ha kona.

Va ye emahlweni ni dyondzo ya vona ya Bibele nkarhi na nkarhi ku ringana tin’hweti ta ntlhanu, dyondzo ya vumbhirhi yi khomeriwe ephakini vhiki na vhiki. Kutani jaha ra matsalana ri joyine dyondzo ya ntlawa lowu. Hi ku hatlisa endzhakunyana, munghana wa vanuna wo rhanga ni munghana wa yena va rhurhele eIdaho eUnited States, laha va hambeteke va dyondza. Mavhiki ma nga ri mangani endzhakunyana, wanuna wo sungula u tshineleriwe hi munhu loyi a nga n’wi tivi hi laha ku heleleke, la vutiseke leswaku ku humelele yini hi dyondzo ya Bibele ya le phakini. Swi nga ha endleka a a ti yingisa tidyondzo ta vona. Malunghiselelo ma endliwile leswaku na yena a dyondza.

Byi ve byihi vuyelo bya leswi hinkwaswo? Tin’hweti ta nhungu kusukela eka ku hlangana ko sungula ephakini, wanuna wo sungula ni ntombi ya yena, khale ka ‘Mukriste wa lava tswariweke nakambe’ va nghenele vukati naswona va khuvuriwa. Matsalana ni jaha ra yena na vona va tekanile ivi va khuvuriwa. Munghana wa ta mabindzu ni munghana wa yena lava va yeke eUnited States va khuvuriwile naswona un’wana wa vona sweswi nkarhi hinkwawo u tirha tanihi phayona leri pfunaka. Loyi a a yingisa dyondzo ya Bibele ephakini u ye emahlweni ni dyondzo ya yena. Kutani u rhurhele eIreland naswona a langutele ku khuvuriwa!

Hinkwaswo leswi swi humelele hi mhaka ya leswi makwerhu a tirhiseke nkarhi wa yena wo wisa leswaku a nyikela vumbhoni bya xitshuketa naswona Yehova u ma katekisile matshalatshala ya yena. Na hina hi ku fanana onge hi nga tirhisa nkarhi wun’wana ni wun’wana lowu pfulekeke leswaku hi hangalasa mahungu lamanene eka lava nga ni ndlala ya rungula ra Mfumo wa Yehova!

[Nhlamuselo ya le hansi]