Dzunisa Yehova Hi Rifuwo Ra Wena
‘ANDZI fuwanga; ndza ha ri muntshwa naswona a ndzi na swilo swo nyawula.’ ‘A ndzi dyondzekanga; ndzi ta n’wi nyika yini Yehova?’ ‘Ndzi swerile swinene; Yehova u ta ndzi honisa.’ ‘Ndzi dyuharile; a ndzi nge he swi koti ku kuma rifuwo.’
Xana mianakanyo yo fana ni leyi yi ta emiehleketweni ya wena loko u vona nhloko-mhaka leyi? Kambe, u nga ha fuwa ku tlula ndlela leyi u ehleketaka ha yona. Tsundzuka marito ya Hosi Yesu eka bandlha ra le Smirna: “Ndzi tiva maxangu ya wena ni vusiwana bya wena (kambe u xifumi).” (Nhlavutelo 2:9) Edyondzweni ya yena ya le Ntshaveni, Yesu u te: “Mi nga tihlengeleteli xuma emisaveni . . . Kambe tihlengeleteleni xuma etilweni . . . Hikuva laha xuma xa wena xi nga kona, hi laha mbilu yi nga ta va kona na yona.” (Matewu 6:19-21) Xana marito lawa ya N’wini wa hina ma ku katsa? Ina, ku nga ha va ni chumu wun’wana eka wena lowu Tata wa hina wa le tilweni, Yehova ni N’wana wa yena va wu tekaka wu ri wa nkoka. A hi kambisiseni.
Ku Hlamarisa Ka Vuntshwa—Matimba Ni Ku Chivirika
Xana muntshwa a nga wu nyikela njhani ntirho wa nkoka eka Yehova? Swivuriso 20:29 ya hi tiyisekisa leswaku vantshwa i switirho leswi hlamarisaka—tinghitsi ta miri. Vona ndlela leyi swi phyuphyisaka ha yona ku vona muntshwa a nyiketela matimba ni vuntshwa bya yena entirhweni wa Xikwembu xa hina!
A hi pfuleninyana matluka ya matimu ivi hi ya eku sunguleni ka va-1930 loko nhlayo ya vantshwa yi twe hi ntiyiso lowu nga eBibeleni. Un’wana wa malembe ya 16 u lombe xipfuno xo hlaya Bibele lexi nge Creation, lexi humesiweke hi Sosayiti ya Watch Tower. Loko a fika eka ndzima leyi nge “The New Creation” ivi a dyondza hi ku tinyiketela, a a swi tiva leswi a a lava ku swi endla hi vutomi bya yena. Hi ku hatlisa, u tinyiketele eka Muvumbi wa matimba hinkwawo. Lembe leri tlhandlamaka u dyondze buku yin’wana leyi nge Vindication (Book One), ivi a dyondza hi ntshembo wa ku hlanganyela eku lweriweni ka vito ni vuhosi bya Xikwembu. Rungula leri ri pfuxe ku navela lokukulu eka yena ko nghenela ntirho wa nkarhi hinkwawo. Lembe rero u endle xikombelo xa malunghelo ya vuphayona naswona ku fikela namuntlha wa ha hambeta ni ntirho wa nkarhi hinkwawo. Hambi loko vo tala va tintangha ta yena se va wu hetile ntirho wa vona wa laha misaveni, vo tala va lava saleke va kombisa moya wa ku tinyiketela ka moya hinkwawo eka Tata wa hina wa le tilweni.
Xana vantshwa va Vakriste va yi kombisa mfanelo leyi fanaka ya nkoka namuntlha? Ina! Swiviko swa Yearbook swi kombisa leswaku mintshungu yo tala ku fana ni mathonsi ya mberha sweswi yi nghenela vuphayona. (Psalma 110:3) Philippines ri vike leswaku tiphesente ta 13 ta maphayona hinkwawo ya nkarhi hinkwawo ma le hansi ka malembe ya 20. Xana sweswo swi tano kun’wana? Ina, swi tano. Hi xikombiso, nkambisiso wa le xihlaleni lexintsongo xa Trinidad na Tobago wu kombisa leswaku maphayona lamantshwa ya 282 ma tsarisiwile exikarhi ka September 1, 1986 na September 30, 1988. Eka nhlayo yoleyo, va 48 a va ri ehansi ka malembe ya 20 hi vukhale. Xana u nga swi tsakela ku twa eka wun’wana wa lava?
Hlangana na Charmaine Francis. U ri: “Ku sukela loko ndza ha ri xihlangi, vatswari va mina a va vulavula na mina hi ku tirhela Yehova ni ku tshembeka eka yena. Loko vatswari va mina va vutisa leswaku a ndzi ta endla yini loko vo khotsiwa hikwalaho ko chumayela mahungu lamanene, a ndzi ku, ‘ndzi ta tirhela Yehova.’ Ndzi tinyiketele loko ndzi ri na malembe ya 13 naswona ndzi khuvuriwe loko ndzi ri na malembe ya 14. Endzhaku ka sweswo, hi nkarhi wun’wana ni wun’wana wa ku pfala ka swikolo, a ndzi nghenela vuphayona bya nkarhinyana. Hi 1983 ndzi nghenele ntirho wa vuphayona bya nkarhi hinkwawo. Eka lembe ra mina ro sungula ra vuphayona, ndzi ve ni ntsako wo pfuna wansati wa muti leswaku a va nandza wa Yehova. Sweswi ndzi fambisa tidyondzo ta Bibele ta kaye. Un’wana u lunghiselela ku khuvuriwa naswona van’wana vanharhu va va kona eminhlanganweni.”
Kutani ke, n’wina vantshwa, xana a mi pfumeli leswaku mi na swokarhi swa nkoka swo dzunisa Yehova ha swona? Kavula mi na swona! Hambi loko sweswi mi nga ri entirhweni wa nkarhi hinkwawo, mi nga dzunisa Yehova hi ku ya hi swiyimo swa n’wina. U nga ha va wa ha ri na malembe yo tala yo nghena xikolo. Kambe, wa ha ri na nkarhi wa nkoka swinene wo dzunisa Yehova eka vadyondzisi ni vadyondzi-kuloni. Christian Kalloo la nga ni malembe ya khume, u fambe ni kopi ya yena ya buku leyi nge Life—How Did It Get Here—By Evolution or by Creation? exikolweni. Vuyelo byi ve byihi? U fambise tikopi ta nkombo eka lava tsakelaka mhaka yoleyo. Nakambe u fambise yin’we evutirhelini bya yindlu na yindlu. U nga endla tano.—Ringanisa Matewu 21:15, 16.
Muleteri Wa Hina Lonene Wa Hi Dyondzisa
Muprofeta Esaya u te: “Hosi, Yehova, o nḍi nyikile ririmi ra mudyonḍisi.” U tlangela Yehova hikwalaho ka vuswikoti bya yena byo vulavula. Nakambe u rhekhode xitshembiso xa Yehova a ku: “Moya wa mina, lo’wu nga ka wena, ni marito ya mina, lawa nḍi ma v̌ekeke noṅwini wa wena, ma nga ka ma nga humi noṅwini wa wena, ne milon’wini ya v̌ana v̌a wena, ne miloṅwini ya v̌ana v̌a v̌ana v̌a wena.” (Esaya 50:4; 59:21) Hi laha vavanuna lava nga dyondzekangiki, lava tolovelekeke va veke vaapostola va Yesu kutani Xikwembu xi va endla va tlhariha etimhakeni ta moya ha kona, kutani Yehova u endla vanhu ntsena va tlhariha namuntlha.
Yearbook ya 1986 yi na rungula leri khutazaka eka lava va veke ni dyondzo yintsongo kumbe lava nga hava. Ematikweni yo tala Timbhoni ta Yehova ti lunghiselela titlilasi ta vanhu lava nga dyondzekangiki leswaku ti dyondzisa vanhu lavakulu ku hlaya. Yehova u va katekisile swinene vanhu vo tano! Exikarhi ka 1962 na 1984 le Nigeria, vanhu vo ringana 19 238 va endle nhluvuko lowunene eku dyondzeni ka ku hlaya ni ku tsala naswona sweswi va swi kota ku hlaya Bibele hi voxe ni ku hlayela lava va nyikelaka vumbhoni eka vona. Mawaku nkateko lowu fuweke swonghasi lowu va veke na wona! Makwerhu un’wana u humelele lerova a va muleteri wa ntlawa wa ku hlaya ebandlheni ra ka vona.
Nakambe kambisisa ntokoto wa Ezekiel Ovbiagele. A a nga swi koti ku hlaya loko a khuvuriwa hi 1940. Endzhaku ko dyondza ku hlaya, u endle nhluvuko lerova a tsarisiwa tanihi phayona naswona endzhakunyana, hi 1953, u hlawuriwe tanihi mulanguteri wa xifundza.
A ku nga ri na ndzilakana wa malembe eka endlelo ro dyondza. Van’wana va nga ha tshaha xivuriso xa khale lexi nge: “A wu nge yi dyondzisi mbyana leyi dyuhaleke marhengu lamantshwa!” Sweswo swi nga va tano hi timbyana, kambe vanhu a hi swiharhi. Hambi lava dyuhaleke va nga swi kota ku dyondza naswona va swi kota loko hakunene va swi navela ku tiva ni ku tirhela Yehova. U nga ha va u tiva hi van’wana lava endleke tano. Hi xikombiso, Alice Okon le Nigeria u khutaziwe ku hlaya Bibele ni ku tiva ntshembo lowu yi wu nyikaka; u wu amukerile ntshembo lowu wu taka ni ku wu tsakela. Eka malembe ya 80 a nga dyuhalanga lerova a nga koti ku dyondza. Xana a wu ehleketi leswaku u tsakise mbilu ya Yehova? U fuwile eripfumelweni. Swivuriso 3:14 ya hi tiyisekisa leswaku ku va ni vutlhari “[swi] tlula silver, ni ku anḍa ka byona ku tlula nsuku.” Loko munhu a swi kota ku vula ntiyiso kahle, marito ya yena ma fana ni “malamula ya nsuku e ntewaneni wa silver.”—Swivuriso 25:11; Vakolosa 3:16.
Ku Fuwa eRipfumelweni Ni Le Mintirhweni Leyinene Hambi Loko U Lamarile
Munhu la tswariweke a lamarile emirini a nga titwa a hele matimba loko a ya a kula, a xiya xiyimo xa yena. Swi nga ha va leswi vavaka swinene eka un’wana la hlaseriweke hi vulema se a kurile. Xana xiyimo xi bihe ngopfu eka vo tano? E-e, xi nga ha pfula ndlela yo ya evuton’wini lebyi nga heriki.
Hi nkarhi wa Nyimpi yo Sungula ya Misava, Edward Stead a a ri na swifuwo swo tala edorobeni lerintsongo ra Arvada, Wyoming, U.S.A., naswona nsati wa yena a a ri na hotela leyintsongo. Hi ku hlaseriwa hi chachalaza ya le Spain u helele hi nsawuto, ivi a hlaseriwa hi vuvabyi bya mahlangano, lebyi boheke mahlangano ya yena lerova miri wa yena wu endliwa xivumbeko xo fana na xitulu xa yena xa mavhilwa. Hambi leswi a a nga ha pfuni chumu, a ha swi kota ku vulavula naswona mavoko ya yena a ma ha tshukatshukanyana. Hi minkarhi yo tala a a navela ku tisunga. Kutani u hlangane ni ntiyiso naswona u wu amukele hi xihatla.
Eku sunguleni a a tshama enyangweni wa hotela ivi a vulavula ni vaendzi hi ripfumelo ra yena lerintshwa. A a swi kota ku tirhisa voko ra yena lerova a kota ku pfula buku ya Bibele ku kombisa lava a va yima va yingisa. Van’wana lava a va tlangela matshalatshala ya yena a va n’wi vitana mufundhisi la lamaleke. Endzhakunyana, u kunguhate ku ya nyikela vumbhoni emadorobeni man’wana loko o akeriwa vutshamo byo hlawuleka endzeni ka vhene. Leswi swi endliwile, naswona u phayone hi ndlela leyi yi nga tolovelekangiki ku ringana malembe yo tala, a famba magidi ya tikhilomitara exikarhi ka Wyoming na Texas, a ri na maphayona mambirhi kumbe manharhu lamantshwa lama n’wi hlayisaka. Ku va kona ka yena ntsena, a ku ri xikhutazo lexikulu eka hinkwavo lava a va n’wi tiva.
Loko u titwa u hele matimba hikwalaho ka ku lamala, hi kombela u hlaya mhaka leyi nga eka Xihondzo xo Rindza xa November 15, 1986 matluka 22-5. Vavanuna hinkwavo lava boxiwaka kwalaho i vakulu, vatsundzuxi va moya, lava fanelekaka ku khongotela vamakwavo lava nga ha vaka va hanye kahle emirini kambe va lava ku akiwa emoyeni. Vona ndlela leyi va fuweke ha yona swonghasi emahlweni ya Xikwembu!—1 Timotiya 6:18.
Esterleta Dick, u na malembe ya 63 hi vukhale, i Mbhoni leyi khuvuriweke ku ringana malembe ya 16. Hi 1978 u fe mahlo kambe a a tirha tanihi phayona ra nkarhi hinkwawo hi malembe mambirhi lama hundzeke. Xana u swi kotisa ku yini? A a tihlamulele.
“Siku rin’wana,” wa hlamusela, “phayona lerintsongo ra xisati ri ndzi vutisile: ‘Makwerhu Dick, minkarhi hinkwayo wa yi fikelela pakani ya wena tanihi phayona ra nkarhinyana. Ha yini u nga ringeti ku va phayona ra nkarhi hinkwawo?’”
Esterleta u ehlekete leswaku u ta va xihinganyeto eka vamakwavo, kambe a a tsundzuka leswaku mulanguteri wa xifundza u khutaze ntirho wa vuphayona. U ri: “Ndzi sungurile, sweswi ndzi hete malembe mambirhi entirhweni wa vuphayona. Ndza byi nyikela vumbhoni bya le xitarateni naswona ndzi na maendzo yo tala yo vuyela. Ku tlula kwalaho, ndzi fambisa tidyondzo ta le kaya ta Bibele ta tsevu. Njhani? Loko ndzi nga si endzela n’wini wa ndyangu, mhaka ya dyondzo ndzi hlayeriwa yona ekaya swin’we ni matsalwa lama tshahiweke, leswaku ndzi swi kota ku hlamusela hi nkarhi wa dyondzo. Swichudeni swa mina swinharhu swa Bibele swi va kona emihlanganweni na mina naswona xin’wana xi khuvuriwile.”
Un’wana Ni Un’wana A Nga ‘Tata Voko Ra Yena’ Hi Nyiko
Xana ku nyika ku hikeriwe exivandleni xa moya ntsena? E-e. Loko Hosi Davhida wa khale a endla malunghiselelo ya ku aka tempele, u vutisile: “I mani l’a ranḍzaka namuntlha ku humesela Yehova e nhlengo wa yena šana?” (1 Tikronika 29:5) Un’wana ni un’wana a nga swi kota ku endla tano. Hi ku fanana ni namuntlha, lavakulu kumbe lavantsongo, va ri ni rihanyo lerinene kumbe e-e, va nga ha tsakela ku endla munyikelo wa ku tirhandzela wa swilo leswi vonekaka ku yisa swilaveko swa Mfumo emahlweni. Swi nga ha endliwa hi ku tirhisa hofisi ya rhavi ya tiko ra ka n’wina kumbe hi bandlha ra kwalaho. Hi ndlela leyi, un’wana ni un’wana hi ku ya hi vuswikoti bya yena, a nga swi kota ku pfuneta hi timali leswaku mahungu lamanene ma chumayeriwa emisaveni hinkwayo leyi akiweke. I lunghelo.—2 Vakorinto 9:8-12.
Xa nkoka swinene, u na rona rifuwo ra moya leri u nga dzunisaka Yehova ha rona. Vantshwa va ni matimba ni vuntshwa. Lava nga dyondzekangiki va nga dyondza ku nyikela Yehova mihandzu ya milomu ya vona. Lava lamaleke va nga swi kota naswona va wu endlile nhluvuko eka vutivi, vutlhari ni ku twisisa, lerova vo tala a hi vadzunisi va Yehova va nkarhi hinkwawo ntsena kambe va tlhela va va vatsundzuxi ni varisi ebandlheni ra Vukriste. Xana a wu fuwanga ku tlula hi laha a wu ehleketa ha kona? Kutani ke, dzunisa Yehova hi rifuwo ra wena.—Vaheveru 13:15, 16.