Va Hlomiseriwe Ntirho Wa Vurhumiwa Hi Va-1990
NGUVA yo hlawuleka ya ntirho wa vurhumiwa ya sungula. Leswi tinyangwa ta nkarhi ti pfulekaka etindhawini to tala, Timbhoni leti tshembekaka ta Yehova, hinkwato ti tiyimisele ku endla ntirho lowukulu swinene.
Xisweswo swichudeni swa 24 swa ntlawa wa vu-89 wa Xikolo xa Bibele xa Gilead xa Watchtower swi ve kona eka nongonoko wa swona wa ku thwasa hi September 9, 1990 hi ku langutela lokukulu. Vanhu vo tlula 5 000 lava rhambiweke ni swirho swa ndyangu wa Bethele a va hlengeletanele ku thwasa ka varhumiwa lava lavantshwa, lava ana se va amukeleke swiavelo ematikweni ya khume. Nongonoko lowu khomeriweke eHolweni ya Nhlengeletano ya Timbhoni ta Yehova eMutini wa Jersey, New Jersey, hinkwawo a wu twiwa na hi lava va hlengeletaneke eBethele ya le Brooklyn, Watchtower Farms ni Ntsindza wa Dyondzo wa Watchtower ePatterson, New York.
Hi 10:00 a.m. ehenhla ka nhloko, Theodore Jaracz, xirho xa Huvo leyi Fumaka ya Timbhoni ta Yehova ni mutshami wa xitulu wa siku, u boxe risimu ro pfula. Endzhaku ka leswi, Arthur Worsley wa ndyangu wa Bethele ya le Brooklyn u nyikele xikhongelo. Kutani mutshami wa xitulu a kombetela eka Mintirho 10:33, laha ndhuna ya dzana ya Murhoma Korneliyo a byeleke Petro a ku: “Sweswi ke hinkwerhu hi tshamile swin’we, laha mahlweni ka Xikwembu, ku yingisa hinkwaswo leswi [Yehova a] ku leriseke swona.” Ku kombisiwe leswaku swiendlakalo swa matimu leswi humelelaka esikwini ra Petro a swi ta pfula ndlela ya leswaku mahungu lamanene ma twarisiwa eka vanhu va matiko hinkwawo.
Philip D. Wilcox, wo huma eWatchtower Farms, u nyikele yo sungula ya tinkulumo ta nkombo leti nyanyulaka. U tirhisa Vafilipiya 4:7 ku hlawula nhloko-mhaka ya yena leyi nge “Ku Rhula Ka Xikwembu A Ku Mi Pfune Exiavelweni Xa N’wina.” U te: “Yehova Xikwembu i xihlovo xa ku rhula hinkwako ka ntiyiso. U na ku rhula hi mongo lowu heleleke naswona a nga na ku vilela ko karhi loku tshikilelaka, ku chava kumbe ku karhatiwa hi mianakanyo. Hikwalaho, ku ni ku rhula naswona ku horile eka vukona lebyi vangamaka bya Yehova exiluvelweni xa yena, hi laha swi kombisiweke ha kona hi nkwangula-tilo lowu fanaka ni emeralda lowu voniweke hi Yohane exivonweni. (Nhlavutelo 4:2, 3) Ku rhula ka yena ku ya ni le handle eka hinkwavo lava nga ta ku pfumelela ku va pfuna. Xana u ta ku pfumelela?” Makwerhu Wilcox u xaxamete mimpfuno mimbirhi ya nkoka, xikhongelo ni ku tiyimisela ku rindzela Yehova. (Mikea 7:7; Vafilipiya 4:6) U ri ku hava lexi nga hi lovisaka, lexi pfumeleriwaka hi Xikwembu.
Lloyd Barry, xirho xa Huvo leyi Fumaka, u landzerile hi nhloko-mhaka leyi nge “Tshama U Ri La Tsakeke.” U sungule hi xiga lexi nge, “Ku hleka i murhi lowunene.” U tsundzuke xiga xexo hi mhaka ya leswi khale hi 1955 a xi ri nhloko-mhaka ya xifunengeto xa nkandziyiso wa magazini wa Awake! wo sungula ku humelela hi ririmi ra Xijapani. Kambe i ku hleka ka muxaka muni? Hayi lokuya ka manyunyu, “ku hleka ka šihunguki” ka vudlakuta. (Eklesiasta 7:6) Kambe i ku hleka lokunene ka varhumiwa ni van’wana lava amukelaka xirhambo xa Davhida lexi nge “tiṭakeleni ha Yehova.” (Psalma 32:11) Makwerhu Barry u kombise leswaku ku nga khathariseki miringo yo tika, Yobo u swi kotile ku tshama a tsakile, hi mhaka ya leswi a a swi tiva leswaku a a hlayisa vutshembeki eka Xikwembu. Varhumiwa lava tiyeke ku nga khathariseki mintokoto yo tika ku fana na Yobo va ta kuma mikateko leyikulu emakumu. (Yobo 29:24; 42:12) Xivulavuri xi gimetile: “Khomekani, mi tshama mi tsakile kutani mi ta kuma ku amukeriwa loku nga heriki ka Yehova.”
Xivulavuri lexi landzeleke a ku ri Richard E. Abrahamson, lexi hlawuleke nhloko-mhaka leyi nge “Vunene Bya Wena A Byi Tiviwe Hi Vanhu Hinkwavo,” lexi sekeriweke eka Vafilipiya 4:5. Hi ku ya hi Xigriki, rito “vunene” ri nga humesa mongo wa ku “titsongahata.” Varhumiwa van’wana va ve ni swiphiqo hikwalaho ka xihlawuhlawu ntsena. Un’wana a a hlamarisiwile hi ndlela leyi murhumiwa-kulobye a tsemeke chizi ha yona etafuleni. Endzhaku ka malembe ya 22 ya ntirho wa vurhumiwa, loyi a a hlamarisiwile u xiye leswaku swiphiqo swo tala swi sungula eka timhaka leti nga vuliki nchumu to tanihi hi ndlela leyi munhu a tsemaka chizi ha yona. Xivulavuri xi tsundzuxile: “Dyondzani ku pfumelelana ni swiyimo, tanihi murhi hi nkarhi wa xidzedze. Ku ni mimpfuno yo tala eku pfumelelaneni ni swiyimo, tanihi ku kota ku tiyiselela miringo ivi u namarhela xiavelo xa wena hi mianakanyo leyi rhuleke.”
Milton G. Henschel, wa Huvo leyi Fumaka, u kanele nhloko-mhaka leyi nge “Nyangwa Lowukulu Lowu Yisaka eNtirhweni Wu Pfulekile.” Makwerhu Henschel u kombise leswaku Yesu a a rhandza vanhu, a a va twela vusiwana naswona u va dyondzise swilo swo tala. Loko a ri aEfesa muapostola Pawulo u tsalele Vakorinto a ku: “Ndzi pfuleriwe nyangwa ya ntirho lowo saseka, kambe lava va ndzi alelaka, va tele.” (1 Vakorinto 16:8, 9) Ku nga khathariseki nkaneto lowu, Pawulo u dyondzise eholweni ya Xikolo xa Tirano ku ringana malembe mambirhi, lerova rungula ra Mfumo ri tiviwa etikweni hinkwaro ra Asia. (Mintirho 19:9, 10) Nyangwa lowu pfulekeke wu vange ku humelela eku chumayeleni ka yena. Bandlha ra Efesa a a ra ha tirha eku heleni ka lembe xidzana ro sungula.—Nhlavutelo 2:1-7.
Jack D. Redford, muleteri eGilead, u vulavule hi nhloko-mhaka leyi nge “Yanani eMahlweni Mi Tikamba.” (2 Vakorinto 13:5) Varhumiwa va le Gilead va pfule masimu lamantshwa ni ku tiyisa mabandlha lawa ana se ma vumbiweke, va tiyisela swo tala ni ku ala vuxisi lebyi Diyavulosi a byi tirhisaka ku va hambukisa. Naswona lavantshwa va hambeta va joyina ntlawa lowu. Hi mintokoto mimbirhi leyi halahariweke, mudyondzisi u kombise ndlela leyi swi nga swa nkoka swinene ha yona ku kambela ripfumelo ra wena. Murhumiwa un’wana u lahlekeriwe hi lunghelo ra yena endzhaku ko ala ku amukela xitsundzuxo hi ku tikukumuxa, mayelana ni ndlela leyi hoxeke. Ku hambana ni sweswo, un’wana u tshame exiavelweni xa yena hi ntsako, hambi loko eka tin’hweti ta yena tinharhu to sungula kwalaho, a a ondzeke swinene hikwalaho ka vuvabyi naswona swi n’wi vangele ku lahlekeriwa hi misisi ni ku twa. Wa ha ri kwalaho endzhaku ka malembe ya 42 naswona, hi tidyondzo ta Bibele, u pfune vanhu va 156 leswaku va khuvuriwa. Makwerhu Redford u gimetile: “Alelani Diyavulosi, kutani u ta mi balekela. Mi nga amukeli vuxisi bya yena. Hambetani mi tikombisa leswi mi nga swona. Yehova u ta mi hlayisa.”
Kutani, muleteri un’wana, Ulysses V. Glass, u vulavule hi nhloko-mhaka leyi nge “Vutlhari Byi Le Ka Lava Titsongahataka.” (Swivuriso 11:2) U tirhise wachi ya le vokweni leyi nga ni betiri leri tatiwaka hi dyambu ku kombisa leswaku rivoningo ra Rito ra Xikwembu ri nga hi hlayisa hi ri na “matimba.” “Kambe,” u te, “vutivi hi byoxe a byi nyiki vutlhari. Xikwembu xi lava ni ku titsongahata.” (Mikea 6:8) Ku titsongahata ku ta hi endla hi chava Xikwembu, naswona “masungulo ya v̌utlhari i ku tšhav̌a Yehova.” (Swivuriso 9:10) I ntiyiso, hi fanele hi ti ehleketelela; ku tiavanyisa ku ni khombo. Yehova u nyike van’wana vuswikoti byo karhi, hi laha a endleke ha kona loko ku akiwa tabernakele, kambe ku tshembeka eku titsongahateni swa laveka. Makwerhu Glass u byela ntlawa a ku: “Hi nkarhi wa vuleteri, mi nyikele vumbhoni bya ku tshembeka ni xichavo. Kombisani ku tshembeka ko tano exiavelweni xa n’wina, kutani Xikwembu xi ta mi katekisa.”
Albert D. Schroeder, wa Huvo leyi Fumaka, u nyikele nkulumo leyi kombisiweke leyi nge “Va Hlomiseriwe Ntirho Wa Vurhumiwa hi va-1990.” U sungurile: “Va-1990 va sungule hi ndlela leyi nyanyulaka. Matiko yo tala ya Yuropa Vuxa ma tsekatsekisiwile. Tin’hweti ti nga ri tingani leti hundzeke Rirhangu ra Berlin ri pfuriwile. The New York Times a a yi ri na nhloko-mhaka-nkulu leyi nge: ‘August 1990, N’hweti Leyi Tsekatsekiseke Misava.’ Kutani ke, n’wina mathwasana mi hanya enkarhini wa ku tsekatseka. Xana tin’hweti ta n’wina ta ntlhanu ta dyondzo ti mi hlomisile? Ina!” Kutani a boxa swivumbeko swin’wana leswi pfunaka swa New World Translation of the Holy Scriptures—With References ni ndlela leyi ku yi dyondza swi hanyiseke Rito ra Xikwembu ha yona. Xitirho xin’wana xa matimba lexi hlomiseke swichudeni hi lexi nge “All Scripture Is Inspired of God and Beneficial,” sweswi eka nkandziyiso wa xona lowu pfuxetiweke wa 1990. Buku ya sweswinyana ya Ku Lavisisa Ka Vanhu Xikwembu yi fanele yi va mpfuno lowukulu eka varhumiwa. Makwerhu Schroeder u gimetile: “Kutani ke vamakwerhu, nkhensani Yehova hi dyondzo leyi hlamarisaka, ya risima leyi mi yi kumeke—yi tiyile naswona a yi nge tsekatsekisiwi. Yanani emahlweni ni mikateko ya Yehova naswona mi n’wi tshemba swinene swin’we ni Murhangeri wa hina la hlamarisaka, Yesu Kriste. Marito lawa hi nga na wona ematsalweni ma huhuteriwile hakunene naswona ma ta mi kongomisa entirhweni wa vurhumiwa.”
Marungula yo huma ematikweni ya 11 ma hlayiwile. Swichudeni swi amukele tidiploma ta swona, naswona xin’wana xa swona xi hlayele Huvo leyi Fumaka ni ndyangu wa Bethele papila leri humaka embilwini.
Xiyenge xa ni ndzhenga xi katse dyondzo leyi komisiweke ya Xihondzo xo Rindza leyi fambisiweke hi David L. Walker, xirho xa Komiti ya Watchtower Farms. Kutani swichudeni swi tirhise nhloko-mhaka leyi nyanyulaka leyi nge “Matimba Ya Xikhongelo Eku Chumayeleni” ku kombisa mintokoto ya le nsin’wini. Bandlha ra kwalaho ri nyikele drama leyi nyanyulaka leyi nge Ku Ntshuxeriwa Ku Ndlandlamuxa Vugandzeri Bya Ntiyiso, leyi sekeriweke eku vuyeni ka Ezra hi le Yerusalema leswaku a ta kondletela vugandzeri bya ntiyiso. Makwerhu Frederick W. Franz, muungameri wa Xikolo xa Gilead, u gimete hi xikhongelo lexi khumbaka swinene.
[Xifaniso lexi nga eka tluka 24]
Ntlawa Wa Vu-89 Lowu Thwasaka Wa Xikolo Xa Bibele Xa Gilead Xa Watchtower
Eka nxaxamelo lowu nga laha hansi, tilayini ti hlayeriwe ku sukela emahlweni ku ya endzhaku naswona mavito ma xaxametiwe ku suka eximatsini ku ya exineneni eka layeni yin’wana ni yin’wana. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.