Talani Hi Ntsako

“Vadyondzisiwa, [va hambeta] va tala hi ku tsaka ni Moya lowo Kwetsima.”—Mintirho 13:52.

1. (a) Ntsako i muhandzu wa muxaka muni? (b) Xana Yehova u fanele a kwetsimisiwa hikwalaho ka lunghiselelo rihi leri tsakisaka?

NTSAKO! Mfanelo leyi ya Vukriste i ya vumbirhi, yi landzela rirhandzu eka nhlamuselo ya Pawulo ya mihandzu ya moya. (Vagalatiya 5:22-25) I yini lexi vangaka ntsako wo tano? I mahungu lamanene lawa ntsumi ya Xikwembu yi ma twariseke eka varisi lava titsongahataka malembe yo tlula 1 900 lama hundzeke: “Vonani, ndzi mi tivisa mahungu lamanene lama nga ta tsakisa tiko hinkwaro swinene; hileswaku namuntlha mi velekeriwile Mulondzovoti emutini wa Davhida; i Kriste, Hosi.” Kutani muendzeriwa wa ntsumi a humelela ivi a joyina ntsumi eku dzuniseni ka Xikwembu hi ntsako, ivi va ku: “Ku dzuneka a ku ve eka Xikwembu ematilweni ya le henhla-henhla, ku rhula a ku ve emisaveni eka vanhu lava xi va tsakelaka.”—Luka 2:10-14.

2, 3. (a) Ha yini a a swi fanela leswaku Xikwembu xi rhumela N’wana wa xona wa mativula leswaku a ta va Mukutsuri wa vanhu? (b) Xana Yesu u hetisise swikongomelo swa Xikwembu loko a ri emisaveni hi tindlela tihi tin’wana?

² Rirhandzu ra Yehova eka vanhu ri kombisiwa hi ku lunghiselela nkutsulo ha Kriste Hosi. N’wana loyi wa mativula wa Xikwembu u munhuhata vutlhari bya ntiyiso naswona u hlamuseriwa a ri la nge hi Tata wakwe hi nkarhi wa ku tumbuluxa: “Kutani ndzi va mutirhi la tiyeke ni la tshembekaka etlhelo ka yena, kutani ndzi tala hi ntsako siku na siku, ndzi tsaka emahlweni ka yena nkarhi wun’wana ni wun’wana; ndzi tsaka etikweni leri nga ni mihandzu ra misava ya yena, kambe a ndzi tsakela swinene vana va vanhu.”—Swivuriso 8:30, 31, Rotherham.

³ Hikwalaho, a a swi fanela leswaku Yehova a rhumela N’wana wa yena, loyi a a tsakela swinene vana va vanhu, leswaku a va Mukutsuri wa vanhu. Naswona xana leswi a swi ta xi dzunisa njhani Xikwembu? A swi ta pfula ndlela ya leswaku xi hetisisa xikongomelo xa xona xa ku tata misava hi vanhu lava lulameke lava rhandzaka ku rhula. (Genesa 1:28) Ku tlula kwalaho, loko a ha ri emisaveni N’wana loyi, Yesu, u swi kombisile leswaku ehansi ka ndzingo lowukulu munhu la hetisekeke a nga swi kota ku yingisa Yehova tanihi Hosi Leyikulu, xisweswo a lwela swinene vuhosi lebyi faneleke bya Tatana ehenhla ka ntumbuluko wa Yena. (Vaheveru 4:15; 5:8, 9) Ndlela ya Yesu ya ku hlayisa vutshembeki nakambe yi siye xikombiso lexinene eka Vakriste hinkwavo vo tshembeka leswaku va landzela minkondzo ya yena swinene.—1 Petro 2:21.

4. Ku tiyisela ka Yesu ku tisa ntsako wihi lowukulu, naswona xana leswi swi fanele swi hi khutaza hi ndlela yihi?

⁴ Yesu u kume ntsako lowukulu swinene hi ku endla ku rhandza ka Tata wa yena, naswona hi ku langutela ntsako lowukulu, hi laha muapostola Pawulo a kombiseke ha kona eka Vaheveru 12:1, 2: “[A hi tsutsumeni] hi ri ni ku tiyisela eku tsutsumeni ka mpfhuka lowu hi vekeriweke wona. A hi languteni eka Yesu, musunguri ni muhetisisi wa ku pfumela ka hina, loyi a nga chavangiki ku byarha [mhandzi ya nxaniso], a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu.” I ntsako wa njhani lowu? I ntsako lowu Yesu a nga na wona, hayi ntsena hi ku kwetsimisa vito ra Tata wakwe ni ku kutsula vanhu eku feni kambe ni ku fuma tanihi Hosi ni Muprista Lonkulu loko a ri karhi a kondletela vanhu lava yingisaka evuton’wini lebyi nga heriki emisaveni ya paradeyisi.—Vaheveru 2:11; Nhlavutelo 14:1, 4; 20:6.

5. “Vamakwavo” va Yesu i vamani, naswona va hlanganyela eka ntsako wihi wo hlawuleka?

⁵ Ina, N’wana wa Xikwembu minkarhi hinkwayo a a kuma ntsako hi ku tirhela vanhu. Naswona a a swi tsakela ku tirha ni Tata wakwe eku hlawuleni ka ntlawa wa vanhu lava hlayisaka vutshembeki lava a va vitanaka “vamakwavo,” lava loko va fa va pfuxeriwaka etilweni. Lava va nghena entsakweni lowu hlawulekeke na Yesu. Va vuriwa ‘lava kwetsimaka ni lava tsakeke,’ naswona “va ta va vaprista va Xikwembu ni va Kriste, kutani va ta fuma swin’we na Kriste malembe ya 1 000.”—Matewu 6:9; 20:28; Vaheveru 7:23-26.

6. (a) Hi xihi xirhambo lexi tsakisaka lexi Hosi yi xi nyikaka “tinyimpfu tin’wana” ta yona? (b) Hi wahi malunghelo lawa to tala ta tinyimpfu leti tin’wana ti ma tsakelaka namuntlha?

⁶ Ku tlula kwalaho, ntshungu lowukulu wa “tinyimpfu tin’wana,” lowu Hosi leyi fumaka yi va vekaka evokweni ra xinene ra ku amukeriwa, va kuma ku pona: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.” (Yohane 10:16; Matewu 25:34) Mawuku lunghelo leri tsakisaka swonghasi! Van’wana va lava va nga ta kuma ndzhaka ya Mfumo wa laha misaveni, vo tala va karhi va amukela swiavelo swa vutihlamuleri etlhelo ka vatotiwa, hi laha Yehova a vhumbeke ha kona: “V̌amatiko v̌a ta v̌a kona, v̌a ta risa mintlhambi ya ṅwina, v̌ana v̌a wamatiko, v̌a ta v̌a v̌arimeri v̌a ṅwina, ni v̌ahlayisi v̌a tivinya ta n’wina. Kambe ṅwina, mi ta tšhyiwa v̌aprista v̌a Yehova, mi ta v̌uriwa malanḍa ya Šikwembu ša hina.” Hinkwavo lava va hlanganyela ni muprofeta wa Xikwembu ivi va ku: “Nḍi ta tiṭakela e ka Yehova, moya wa nga wu ta tiṭakela e ka Šikwembu ša mina; hikuv̌a ši nḍi ambešile tinguv̌u ta ku hlayiseka.”—Esaya 61:5, 6, 10.

7. Ha yini “siku” leri ku sukela hi 1914 ri ri leri hlawulekeke?

⁷ Sweswi hi hanya esikwini ro hlawuleka swinene. Ku sukela hi 1914 a a ri ri siku ra ku fuma ka Kriste tanihi Hosi ya le tilweni, leyi hlamuseriweke eka Psalma 118:24, 25: “Hi rona siku le’ri endliweke i Yehova, a hi ṭakeni, hi ṭakela rona! Oho Yehova! ponisa! Oho Yehova! katekisa!” I siku leri nga ta chaputa loko Yehova a avanyisa vukhongeri bya Babilona ivi a hlanganisa mutekiwa wa Kriste wa vamakwavo va 144 000 ni Hosi ya vona ya le tilweni. Vanhu hinkwavo va Xikwembu va ta “tsak[a va] tsakisisa” hi leswi. Va ta tlhela va tsaka loko Hosi ya vona ya Vumesiya yi lwa eArmagedoni leswaku yi ponisa tiko ra yona ro tshembeka ri nghena emisaveni ya yona leyintshwa. (Nhlavutelo 19:1-7, 11-16) Xana Yehova wa ku nyika ku humelela loko vanhu va yena va twarisa ntshembo lowu lowu tsakisaka? Xiviko lexi landzelaka xi ta hlamusela.

Ku Andza Ka Misava Hinkwayo

8. (a) Xana ntsako ni moya lowo kwetsima swi kombisiwa njhani eka xiviko lexi nga eka matluka 18 ku ya eka 21 ya magazini lowu? (b) Hi tihi tin’wana ta tinhla-nkulu ta xiviko?

⁸ Timbhoni ta Yehova ta manguva lawa ‘ti tele hi ntshembo ni matimba ya moya lowo kwetsima.’ (Varhoma 15:13) Leswi swi kombisiwe eka chati leyi nga eka matluka 18 ku ya eka 21 ya magazini lowu, laha xiviko xa misava hinkwayo xa ntirho wa Mfumo wa 1990 xi andlariweke kona hi vuxokoxoko. Ha tsaka swinene ku vona nhlohlorhi leyintshwa ya vatirheli lava gingiritekaka ensin’wini va 4 017 213! Leswi swi fungha ku andza ka tiphesente ta 77 eka malembe ya khume lama hundzeke, loko ku hlengeleta ku ya emahlweni ematikweni ya 212 emisaveni hinkwayo. Endzhaku ka malembe ya 15 nkhuvulo nakambe wu fikelele nhlohlorhi ya nkarhi hinkwawo ya—301 518! A ku ri ni tifigara ta le henhla swinene ta nkhuvulo eka mintsombano yo tala, ngopfu-ngopfu leyi a ku ri na Timbhoni to huma eYuropa Vuxa. Exikarhi ka lava a ku ri na vantshwa vo tala, va endla marito ya vusoxalisi ya leswaku vukhongeri byi ta fa ni swikoxa ma va mavunwa.

9. (a) Ndzetelo wa vutswari wa le vuhlangini wu tisa vuyelo byihi lebyi tsakisaka? (b) Hi byihi vumbhoni bya kwalaho kumbe byin’wana lebyi seketelaka leswi?

⁹ Mintshungu ya vantshwa yi hlamula xirhambo xa le ka Psalma 32:11: “Tiṭakeleni ha Yehova, mi v̌a mi ṭakisisa, ṅwina va ku lulama! Yimbelelani hi ku ṭaka, ṅwina hikwenu v̌a timbilu to lulama.” Swi tikomba onge vatswari vo tala va xi tirhisa xitsundzuxo xo letela vana va vona “ku sukela evuhlangini.” (2 Timotiya 3:15) Tibuku ni tikhasete leti endleriweke lava ha riki swihlangi, swa karhi swa tirhisiwa hi ndlela leyi faneleke. Naswona vana lava va nghenaka xikolo, hi ku hatlisa va nyikela vumbhoni lebyinene, hi xikombiso, xinhwanyetana xa le Japani xa malembe ya nhungu hi vukhale xi vikile: “Hi nkarhi wo wisa wa ximumu, ndzi tshinelele mudyondzisi wa mina ivi ndzi n’wi vutisa: ‘Xana u ri endzerile sirha ra tata wa wena hi nkarhi wo wisa?’ U te: ‘Ina, tata wa mina a a ri na rirhandzu, naswona ndzi endzela sirha rakwe lembe rin’wana ni rin’wana.’ Ndzi te: ‘Loko wo dyondza Bibele ivi u landzelela tidyondzo ta Xikwembu, u ta swi kota ku vona tata wa wena la nga ni rirhandzu eparadeyisini ya laha misaveni.’ Kutani ndzi n’wi nyika Buku Yanga Ya Timhaka Ta Bibele. Sweswi tichara wa hina u hlayela tlasi ya hina ndzima yin’we hi nkarhi wa swakudya vhiki na vhiki.”

10. Hi xihi xikongomelo lexinene lexi hetisisiweke hi buku leyi nge Vantshwa naswona hi swihi swikombiso swin’wana?

¹⁰ Vantshwa vo tala va le malembeni ya vona ya kondlo-a-ndzi-dyi va yi tirhise kahle buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, eka dyondzo ya le xihundleni ni le ku nyikeleni ka vumbhoni eka vantshwa van’wana. Vatswari na vona va yi tlangerile buku leyi. Makwerhu wa xisati wa le Switzerland, u tsarise tanihi phayona ra nkarhinyana, a kunguhata ku endzela vatswari va vadyondzi-kulobye va vana wakwe. Leswi swi pfule ndlela ya minkanerisano leyinene ni vatswari vo tala, naswona tibuku ta 20 (to tala ta tona i ta leyi nge Vantshwa) ni timagazini ta 27 ti siyiwile eka vona. Loko xinhwanyetana lexi nghenaka xikolo eTrinidad xi nyike mudyondzisi wa xona buku leyi, mana wa xona u n’wi endzerile, a fambisa tibuku ta 25 eka vadyondzisi vo ringana 36. N’hweti leyi landzeleke u ye emahlweni hi vukheta a endzela vatswari lava a va tivaka, a fambisa tibuku tin’wana ta 92 ivi a sungula tidyondzo letintshwa ta Bibele ta le kaya. Le Koriya thichara wa le xikolweni xa le xikarhi u tirhise buku leyi nge Vantshwa ku nyikela tidyondzo to koma etimhakeni to tanihi leti nge “Ndzi Nga Ma Antswisisa Ku Yini Mapaselo Ya Mina Ke?” na “Xana Ndzi Nga Hanyisana Njhani Ni Thicara Wa Mina?” ivi a nyikela buku. Endzhaku ka loko swichudeni swi amukele tibuku ta 39, vatswari van’wana va sungule ku vilela. Kambe nhloko ya xikolo yi kambisise kopi, ivi yi ku “i yinene,” kutani yi odela nhwanyana wa yona.

Dyondzo Leyinene Swinene

11, 12. Hi byihi vumbhoni byin’wana lebyi tiyisaka leswaku tibuku ta Sosayiti ya Watch Tower ti nyikela dyondzo leyinene swinene?

¹¹ Ntikelo wa ku dyondzisa ka magazini wa hina nakambe wu tlangeriwa hi vo tala, hi xikombiso, xikolo xa le U.S. lexi odeke tikopi ta 1 200 ta Awake! ya July 22, 1990, (leyi paluxaka ku godzomberiwa hi crack) leswaku xi wu tirhisa etitlilasini ta xona. Ku tlula kwalaho, ku tikhoma lokunene ka vana va Timbhoni ta Yehova exikolweni ku hambeta ku nyikela xikombiso lexinene. Le Thailand etlilasini leyi nga ni pongo swinene, thichara u vitane Racha wa melembe ya 11 leswaku a yima emahlweni ka tlilasi ivi a n’wi bumabumela hi ku tikhoma ka yena, a ku: “Ha yini hinkwenu mi nga n’wi tekeleli tanihi xikombiso lexinene? U tinyiketerile etidyondzweni takwe naswona u tikhoma kahle?” Kutani a engetela a ku: “Ndzi anakanya leswaku mi boheka ku va Timbhoni ta Yehova ku fana na Racha leswaku mahanyelo yan’wina ma ta antswa.”—Ringanisa Swivuriso 1:8; 23:22, 23.

¹² Makwerhu lontsongo eRipubliki ra Dominican wa tsala: “Loko ndzi ri na malembe ya mune ntsena hi vukhale a ndzi ri ekusuhi no thwasa exikolweni xa le hansi xa vukhongeri, laha ndzi dyondzeke ku hlaya ni ku tsala kona. Tanihi nyiko, ndzi nyike nun leyi a yi ri mudyondzi wa mina buku leyi nge U Nga Hanya Hi Masiku aParadeyisini eMisaveni ni rungula leri nge: ‘Ndza tsaka leswi u ndzi dyondziseke ku hlaya ni ku tsala. Ndzi navela onge na wena u nga twisisa ripfumelo ra mina ivi u va ni ntshembo wa mina wa vutomi lebyi nga heriki emisaveni loko wu endliwe paradeyisi.’ Leswi swi ndzi endle ndzi hlongoriwa exikolweni. Endzhaku ka malembe ya nhungu ndzi tlhele ndzi hlangana ni mudyondzisi loyi. U hlamusele ndlela leyi a ringeteke ha yona ku hlaya buku leyi, ku nga khathariseki nkaneto wa muprista. U rhurhele eka ntsindza lowu eka wona a swi koteke ku dyondza Bibele ni un’wana wa Timbhoni. Hi khuvuriwe swin’we eka Ntsombano wa Muganga wa ‘Ririmi leri Tengeke.’” Hi laha ku profetiweke ha kona, vutlhari byi ta huma eka “milomu ya ŝihlangi”!—Matewu 21:16; Psalma 8:1, 2.

13. Xana vana vo tala va kondlo-a-ndzi-dyi va xi amukela njhani xitsundzuxo xa Solomoni, naswona xana leswi swi kombisiwa njhani eka xiviko xa vahuweleri va misava hinkwayo?

¹³ Solomoni u nyikele xitsundzuxo lexi khutazaka: “Džaha, ṭakela v̌untŝha bya wena, mbilu ya wena yi ku ṭakisa hi masiku ya vuntŝha bya wena, u famba hi ku ranḍa ka mbilu ya wena.” (Eklesiasta 11:9) Swa tsakisa swinene namuntlha ku vona vana vo tala swonghasi va Timbhoni ta Yehova va tirhisa marito lawa, va tirhisa malembe ya vona ya kondlo-a-ndzi-dyi leswaku va lunghiselela vutomi bya ntirho wa nkarhi hinkwawo eka Yehova ni ku nghenela ntirho-vutomi wo tlula hinkwayo loko va thwasa exikolweni. Maphayona ma hambeta ma andza hi ku hatlisa, ku ri na 821 108 lava vikaka elembeni. Kun’we ni vamakwerhu va xinuna ni vaxisati va 11 092 lava tirheke eBethele, sweswo swi yimela tiphesente ta 21 ta ntsengo wa vahuweleri!

14. Hi wihi nseketelo lowu vamakwerhu va hina va xisati va wu nyikelaka, naswona xana va lulameriwa hi xibumabumelo xihi?

¹⁴ Swa tsakisa leswi ematikweni yo tala, yo tanihi United States, kwalomu ka tiphesente ta 75 ta vahuweleri hinkwavo lava nga maphayona i vamakwerhu va xisati, va tiyisa marito ya Psalma 68:11: “[Yehova u] letele rito, kutani v̌av̌asati la’v̌o tala v̌a v̌ikela mahungu la’manene.” Vamakwerhu va hina va xisati va fanele va bumabumeriwa hi leswi va endlaka ntirho lowukulu wa nsimu. Ku dyondzisa ka vona hi vutlharhi eka tidyondzo ta Bibele ta le kaya swi tisa vo tala entiyisweni, naswona vamakwerhu va xisati lava tshembekaka lava seketelaka vavanuna va vona lava nga ni mintirho yo tala ya bandlha na vona va fanele ku dzunisiwa swinene.—Swivuriso 31:10-12; Vaefesa 5:21-25, 33.

Dyondzo Ya Bibele Yi Ya eMahlweni

15. (a) Xana matiko man’wana ma endla kahle hi ndlela yihi eka xiviko xa misava hinkwayo eka ntirho wa dyondzo ya Bibele? (b) Hi wihi ntokoto lowu u nga wu hlamuselaka, ku kombisa ndlela leyi tidyondzo ta Bibele ti vaka ni mihandzu ha yona?

¹⁵ Ntirho wo dyondzisa Bibele wu ya emahlweni, tidyondzo ta fambisiwa emisaveni hinkwayo hi avhareji ya ku fambisiwa ka tibuku ta 3 624-091 n’hweti na n’hweti. Ntiyiso wa Bibele wu nga cinca vumunhu, hi laha xiviko xo huma ekule xi kombisaka ha kona. Eku sunguleni ka January 1987, wanuna u yisiwe eNew Zealand a huma eAustralia endzhaku ko tshama tin’hweti ta 25 ejele hikwalaho ka ku yiva ni vukanganyisi. A a godzomberiwe hi swidzidzirisi naswona a a swi xavisa ku tlula malembe ya 17. Lembe leri landzeleke nsati wakwe u sungule ku dyondza Bibele ni Timbhoni ta Yehova, kutani vutivi bya yena byi kula, u xiye ku cinca lokukulu eka nsati wakwe. U hundzuke nsati ni manana wo antswa. Hi ku komberiwa hi nsati wakwe u ve kona eka nhlengeletano ya xifundza ya June 1989. Sweswi u amukele dyondzo ya Bibele ya le kaya, naswona ku hundzuka lokukulu ku sungule ku xiyiwa eka ndlela leyi a langutekaka ha yona ni mukhuva wa yena. Swirho hinkwaswo swa nkombo swi sungule ku va kona eminhlanganweni. U khuvuriwe hi January 1990 tanihi loyi a landzeleleke swinene xitsundzuxo lexinene xa Pawulo eka Vaefesa 4:17-24.

16. (a) Xana swiviko swa Xitsundzuxo swa 1990 i xihlovo xa ntsako hi ndlela yihi? (b) Hi xihi xihatla lexi faneleke xi xiyiwa, naswona hi wahi matshalatshala lawa hi nga ma endlaka ku pfuna?

¹⁶ Xivumbeko lexi xiyekaka xa xiviko xa lembe i vanhu lava veke kona vo tala swinene va 9 950-058 eku tlangeleni ka Xitsundzuxo, loku veke kona hi Ravumbirhi April 10, 1990. Matiko yo tlula 70 eka ya 212 ma vike nhlayo leyi a yi tlula nhlohlorhi ya wona ya vahuweleri kanharhu! Hi xikombiso ku nga khathariseki ku siveriwa, matiko ya nkombo ya le Afrika ni nhlohlorhi leyi hlanganisiweke ya vahuweleri ya 62 712 ma vike nhlayo ya lava veke kona eXitsundzuxweni ya 204 356. Vahuweleri lava hlaseriweke hi dzolonga va 1 914 va le Liberia va tsakele ku va na 7 811 eXitsundzuxweni. Haiti, ri na nhlohlorhi ya vahuweleri va 6 427, va vike 36 551. Vahuweleri va 886 eswihlaleni leswi hangalakeke swa Micronesia swi ve na 3 958. Vahuweleri va 1 298 va le Sri Lanka va vike 4 521 na Zambia ri ri na 73 729 wa vahuweleri, ri ve na 326 991 lava veke kona eXitsundzuxweni, mpimo wa munhu un’we eka 25 wa vaaki va le Zambia. Xiviko xa misava hinkwayo nakambe xi paluxa leswaku ka ha ri na timiliyoni ta vanhu lavanene lava rindzeleke ku hlengeleteriwa etshangeni ra tinyimpfu. Kambe ku va lonene a swi anelanga. Xana hi nga wu engetela ivi hi antswisa ntikelo ni ntirho wa hina wa dyondzo ya le kaya ya Bibele, hi pfuna vo tala va lava vaka kona eXitsundzuxweni ku aka ripfumelo leri tiyeke? Hi lava leswaku va va vanghana va hina lava chivirikaka, va dzunisa Yehova. Swi vula vutomi bya vona!—Psalma 148:12, 13; Yohane 17:3; 1 Yohane 2:15-17.

Ku Tala Ka Ntsako

17. Hi swihi swikombiso swa lembe xidzana ro sungula leswi faneleke swi pfuna ku tiyisa ku tiyimisela ka hina ko hlayisa ntsako wa hina?

¹⁷ Ku nga khathariseki miringo leyi hi langutanaka na yona, a hi tiyimiseleni ku namarhela ntsako wa hina. Kumbexana a hi nge boheki ku tokota swo vava ku fana na Stefano, kambe xikombiso xa yena xi nga hi tiyisa. Ehansi ka xihehlo, u swi kotile ku hlayisa ku tsaka ka yena. Valala va yena “va vona mombo wa yena wu fana ni mombo wa ntsumi.” Xikwembu xi n’wi seketerile hi nkarhi wa ku ringiwa ka yena. U nyikele vumbhoni hi xivindzi, a “tala hi Moya lowo Kwetsima” ku kondza a dlawela ripfumelo. Loko Pawulo na Barnaba va hundzukela eka vamatiko loko va chumayela, lava na vona “va tsaka, va dzunisa Rito ra [Yehova].” Nxaniso wu tlhele wu tlhekeka. Kambe a wu va tsanisanga lava va pfumelaka. “Vadyodzisiwa, va tala hi ku tsaka ni Moya lowo Kwetsima.” (Mintirho 6:15; 7:55; 13:48-52) Ku nga khathariseki leswaku valala va hina va hi endla yini, ku nga khathariseki leswaku miringo ya hina ya siku na siku hi yihi, hi nga tshuki hi pfumelela ntsako wa hina wa moya lowo kwetsima wu tsanisiwa. Pawulo wa tsundzuxa: “Tsakani eku languteleni, mi tiyisela emaxangwini, mi chivirika eku khongeleni.”—Varhoma 12:12.

18. (a) Xana Yerusalema Lontshwa i yini, naswona ha yini vanhu va Xikwembu va fanele va tsaka na yena? (b) Xana “matilo lamantshwa ni misava leyintshwa” swi ta katekisa vanhu hi ndlela yihi?

¹⁸ Vona ndlela leyi ntshembo wolowo wu tsakisaka ha yona! Eka vanhu vakwe hinkwavo, Yehova u ri: “Hikuv̌a, maŝivo, nḍi v̌umba matilo la’mantŝha, ni misav̌a le’yintŝha; timhaka ta khale a ti nga ha ṭunḍukiwi, ti nga ka ti nga tlheleri meehleketweni. Kambe hikwalaho ka leŝi nḍi nga ŝi v̌umba, ṭakani, mi ṭakisia hi masiku.” Kriste Hosi swin’we na “Yerusalema Lontshwa” (sweswi i ntsindza wa nhlengeletano ya Xikwembu ya le tilweni, “Yerusalema wa le henhla”) ni vandla ra misava leyintshwa emisaveni va ta tisela vanhu ntsako lowukulu. (Vagalatiya 4:26) Ku pfuxiwa ka vanhu lava feke, ku leteriwa ka hinkwavo lava yingisaka leswaku va kuma vutomi lebyi nga heriki loko vanhu va hetisekile, ku hanya hi laha ku nga heriki, hi ntsako emisaveni ya paradeyisi—mawaku ntshembo lowu hlamarisaka ni xivangelo xa ntsako lowu leswi swi nga wona! Tanihi leswi Yehova hi yexe a a kuma ‘ntsako hi Yerusalema ni ku tsaka hi vanhu va yena,’ kutani vaprofeta vakwe va humesa xirhambo xin’wana eka vanhu va Xikwembu: “Tiṭakeleni hikwalaho ka Yerusalema, mi v̌a mi ṭakisisa hikwalaho ka yena, ṅwina hikwenu la’v̌a ṅwi ranḍaka! Mi ṭukaṭuka hi ku ṭaka ŝiṅwe na yena.” (Esaya 65:17-19; 66:10; Nhlavutelo 14:1; 20:12, 13; 21:2-4) Onge hi nga tshama hi tale hi ntsako ni moya lowo kwetsima loko hi ri karhi hi yingisa xitsundzuxo xa muapostola Pawulo: “Titsakeleni eHosini masiku hinkwawo; ndzi tlhela ndzi vurisa sweswo, ndzi ri: Titsakeleni!”—Vafilipiya 4:4.

Ku Katsakanya Ntsako Wa Hina:

◻ Hi xihi xikombiso xa ku tiyisela hi ntsako lexi Yesu a hi siyeleke xona?

◻ Mintlawa mimbirhi leyi tinyiketeleke yi na swivangelo swihi swimbirhi swo tsaka?

◻ Xana vantshwa ni lavakulu va tsakela ntiyiso hi ndlela yihi?

◻ Ku pfuxeta xiviko xa 1990, hi yihi nhlamulo leyi nyikiwaka sweswi eka xikhongelo lexi nge, “Yehova! katekisa”?

◻ Xana ku tala ka ntsako ku ta kumiwa rini naswona njhani?

[Chati leyi nga eka tluka 18-21]

XIVIKO XA LEMBE RA NTIRHO RA 2004 XA TIMBHONI TA YEHOVHA EMISAVENI HINKWAYO

(See bound volume)

[Xifaniso lexi nga eka tluka 16]

Ntsumi ya Yehova yi tivise ku velekiwa ka Kriste Hosi tanihi ‘mahungu lamanene yo tsakisa swinene’