Xiviko Xa Vahuweleri Va Mfumo
Nani Ku Ringana 25 Wa Malembe Eku Heteleleni Yi Dyondza Ntiyiso
BIBELE yi vhumbe leswaku “ntshungu lowukulu” lowu humaka etinxakeni hinkwato wu ta ta wu ta gandzela etempeleni ya moya ya Yehova. (Nhlavutelo 7:9) Leswi swa humelela namuntlha naswona ha tsaka ku vona leswaku vo tala, hi ku pfuniwa hi ntiyiso wa Xikwembu, xisweswo va tsema tinketana ta vukhongeri bya mavunwa. Ntokoto lowu landzelaka wu kombisa leswi.
◻ Wansati wa le Rhoma, eItaly, wa hlamusela: “Ku sukela loko ndza ha ri ntsongo ku navela ka mina lokukulu a a ku ri ku va nani, tanihi leswi ndzi hisekeleke ku tirhela Xikwembu hi mbilu ya mina hinkwayo. Ndzi kote ku hetisisa ku navela ka mina loko ndzi ri na malembe ya 32 hi vukhale, hi December 8, 1960, loko ndzi hlambanye swiboho swa mina swo sungula swa ku yingisa, vusweti ni ku tenga. Xiavelo xa mina a a ku ri ku langutela vana vusiku ni nhlikanhi va kwalomu ka 30 lava pfumalaka ni lava tshikiweke lava a va ri swisiwana kumbe vana va vakhotsiwa. Ndzi kume ku aneriseka exiavelweni xa mina.
“Ripfumelo ra mina ri tsekatsekisiwe endzhaku ka malembe ya khume ya ntirho loko ku holova ku tlhekekile endzeni ka muako. Ndzi tivutisile leswaku, loko Xikwembu a xi hi kongomisa, ha yini a xi ta pfumelela ku holova ni minkitsikitsi yo tano endhawini ya xona.”
Nani leyi a yi ri ni makwavo wa xisati loyi a a tshama eFurwa naswona a a ri un’wana wa Timbhoni ta Yehova. U nyikele vumbhoni eka nani hi papila naswona u yi rhumelele New World Translation of the Holy Scriptures. Nani ya hlamusela: “Endzhaku ka malembe ya 23, a ku ri ro sungula ndzi hlangana ni Rito ra Xikwembu.” A ku ri hi nkarhi wolowo loko yi amukele dyondzo ya Bibele ni Timbhoni ta Yehova. Yi ri: “Loko ndzi ya emahlweni ni dyondzo, ndzi kote ku tiva Yehova Xikwembu ni swilaveko swa yena kun’we ni timfanelo ta yena leti hlamarisaka. Ndzi titwe ndzi karhatekile loko ndzi dyondze leswaku u ala ku tirhisa swifaniso, tanihi leswi muako a wu tele hi swifaniso swa mpimo ni muxaka wun’wana ni wun’wana. Ndzi swi twisisile leswaku loko ndzi lava ku tsakisa Yehova, a ndzi nge tshami eka ndhawu yoleyo. Endzhaku ka malembe ya 25 ya ntirho wa ku tinyiketela tanihi nani, eku heteleleni ndzi kume ntiyiso. Kutani hi October 1, 1985, ndzi nyikele xitiviso xa ku tshika ka mina, leswi swi heteke varhangeri va mina matimba swinene.
“Vamakwerhu va mina va xinuna ni va xisati lava rhandzekaka va ndzi pfunile hi tlhelo ra moya ni ra nyama. Hi ku nkhensa Yehova ni nhlengeletano ya yena, ndzi khuvuriwile hi August 30, 1986, kutani ndzi va ndzi nghenile egondzweni ro ya evuton’wini lebyi nga heriki.”
Yehova U Katekisa Ku Navela Ka N’wana Wa Kondlo-A-Ndzi-Dyi Ko Tirhela Xikwembu
◻ Mudyondzisi wa xikolo eBrazil loyi a a ri un’wana wa Timbhoni ta Yehova loko a fungha maphepha ya xikolo u xiye leswaku xichudeni xin’wana xa malembe ya 14 hi vukhale xi tsale hi ta ku navela ka xona ku dyondza leswi engetelekeke hi Xikwembu. U sungule dyondzo ya Bibele ni xichudeni, kambe loko nhwana loyi a endla nhluvuko, ndyangu wa ka vona wa Khatoliki wu sivele dyondzo naswona wu onhe tibuku ta yena. Xichudeni lexintsongo xi sungule ku dyondza Bibele hi nkarhi wo wisa wa xikolo, kambe swi kumiwile. Kutani dyondzo yi yisiwe emahlweni hi poso. Kambe hi ku hatlisa ndyangu wu kume mapapila ya yena kutani wu ma hisa. Tatana u sungule ku n’wi sindzisa ku ya eXilalelweni. U fambe na yena kambe u teke kopi ya Xihondzo xo Rindza leswaku a yi hlaya hi nkarhi wa ntirho, a yi tumbeta exikarhi ka matluka ya xibukwana xa kereke. Leswi swi ye emahlweni ku ringana tin’hweti ta tsevu, ku kondza siku rin’wana a baleka ekaya a ya eHolweni ya Mfumo. Hi nkarhi wa nhlangano tata wa yena u humelerile enyangweni ivi a byela vamakwerhu leswaku va byela n’wana wa yena leswaku u ta n’wi ba loko a fika ekaya. Matshalatshala ya vamakwerhu ya ku vulavula na yena a ma pfunanga nchumu.
Siku leri landzelaka, a tsakile ni ku n’wayitela, u ye a ya vona vamakwerhu. U va kombe mafela-ngati yo tala emirini wa yena laha tata wa yena a ha ku n’wi ba kona. Kutani ha yini a a tsakile? Endzhaku ko huma eHolweni ya Mfumo, tatana u vutise vanhu vo hlayanyana edorobeni, ku katsa ni meyara, hi ta mpfuno ni khombo ra ku va n’wana wa yena a ri un’wana wa Timbhoni ta Yehova. Meyara u vule leswaku Timbhoni i vanhu lavanene, lava faneriwaka hi ku tshembiwa. U engetele leswaku va ni mahanyelo lamanene naswona a swi ta va swinene ngopfu ku va ni n’wana la nga ni mimpimanyeto leyi, leyi a yi tlakuke ngopfu ku tlula liya ya vantshwa hi ntolovelo.
Ku nga khathariseki leswi, nhwana loyi u biwile. Kambe tatana u n’wi byele leswaku a a n’wi bela ku huma endlwini a nga ri na mpfumelelo. Naswona u te u ta n’wi ba nakambe loko o tshika ku dyondza Bibele kumbe ku va kona eminhlanganweni ya Timbhoni ta Yehova! Nhwana loyi sweswi i muhuweleri la chivirikaka, naswona van’wana va ndyangu wa ka vona va kombisa ku tsakela ntiyiso.
Entiyisweni, Yehova u katekisa vantshwa lava tsakelaka ku n’wi tirhela, hi laha ntokoto lowu wu kombaka ha kona.—Psalma 148:12, 13.