Xiviko Xa Vahuweleri Va Mfumo

Ntiyiso Wa Bibele Wu Ntshunxa Nani Le Bolivia

VANHU vo tala va timbilu letinene va huma evukhongerini bya mavunwa, va dyondza ntiyiso wa Bibele, va ta gandzela Yehova, Xikwembu xa ntiyiso. Vanhu vo tlula 7 600 va endle tano le Bolivia, ku katsa ni nani.

Loko a ri ni malembe ya kaye ntsena hi vukhale, M—— u hlangane ro sungula ni un’wana wa Timbhoni ta Yehova. U pfule nyangwa loko Mbhoni yi fika ekaya ka yena, naswona a ku ri ro sungula a twa vito ra Xikwembu, Yehova, ri vuriwa. Ri tshame emiehleketweni ya yena hi malembe yo tala.

Tanihi leswi a a ri n’hwana a ri yexe endyangwini, ku kunguhatiwe leswaku u fanele a va nani. “Vona ndlela leyi ndzi tsakeke ha yona ku tiva leswaku ndzi ta va entirhweni wa Xikwembu—naswona hi leswi a ndzi anakanye swona,” ku vula M——. Kambe ntsako wa yena wu landzele hi ku pfilunganyeka loko a vona ku homboloka ni xihlawu-hlawu lexi a xi endliwa endlwini ya vukhongeri. U ri: “Kumbexana a ndzi nge pfuki ndzi yi rivarile minhlaselo yoleyo ya gome ni ku xanisiwa koloko ka nyama ni ka moya loku a ku hlomula mbilu, leswi ndzi endleke ndzi languta Xikwembu, ku nga ri xa rirhandzu, kambe tanihi lexi xupulaka xi ri hava ntwela-vusiwana.”

U ya emahlweni: “Nkarhi lowu ndzi veke nani ha wona, a ndzi hlulekile ku kuma vito leri nge Yehova eBibeleni. Ndzi kume ‘Yahweh,’ ntsena naswona sweswo swi ndzi pfilunganyile. Siku rin’wana ndzi humile ku ya lava vanhu lava va vulavulaka hi Yehova, kambe a ndzi va kumanga.

“Nkarhi wu hundzile, naswona siku rin’wana loko ndzi ri endleleni yo ya ekaya, ndzi vone mfungho lowu a wu ku, ‘Holo Ya Mfumo Ya Timbhoni Ta Yehova.’ A a ndzi lava ku va byela leswaku i vaprofeta va mavunwa, kambe a ku nga ri na munhu eholweni. Ndzi tlhelerile hi Sonto. Nhlangano a wu ya emahlweni, naswona vunyingi a byi vonaka byi hlamarile ku vona nani ni swiambalo swa yona swa vunani yi ri kwalaho. Endzhaku ka nhlangano, ndzi ringete ku huma hi ku hatlisa. Hambi swi ri tano, un’wana wa Timbhoni u ndzi xewetile, kutani ndzi n’wi vutisile ndzi ku, ‘Ha yini mi nyamisa La Kwetsimaka hi ku byarha vito rero?’ Xivutiso xa mina xi yise eka bulo ra Bibele, naswona ndzi endle malunghiselelo ya leswaku a ndzi endzela ekaya. Vatswari va mina va n’wi hlongorile. Hambi swi ri tano, endzhaku ka tin’hweti timbirhi hi hlanganile naswona u ndzi rhambele ekaya ka yena leswaku hi ya va ni dyondzo ya Bibele. Ndzi nyanyuriwe swinene hi rungula leri a ndzi kombeke rona, a kombisa leswaku Vakriste va fanele ku tirhisa vito ra Xikwembu. Vumbhoni byebyo byi ndzi nyike matimba lama lavekeke yo landzula swilo hinkwaswo leswi nga pfuniki nchumu leswi ndzi swi dyondzisiweke tanihi nani.

“Ndzi tsundzuka swilo swo tala hi vutomi bya mina endlwini ya vukhongeri. Hi xikombiso, nkarhi wun’wana a a ndzi lava swakudya leswi engetelekeke. Kutani ndzi tsalele vatswari va mina ndzi kombela leswaku va ndzi rhumelela swona, a a ndzi nga swi tivi leswaku mapapila a ma pfuriwa ma hlayiwa endlwini ya vukhongeri va nga si ma rhumela. Hi nkarhi wa swakudya lowu landzeleke, ku vekiwe xinkwa xo tala ni jeli emahlweni ka mina naswona ndzi sindzisiwe ku swi dya hinkwaswo. Se a ndzi ri ni swakudya swo tala ngopfu. Ndzi byele vanghana va mina hi mhaka leyi, naswona un’wana u ringanyete leswaku ndzi fayelela xinkwa lexi ndzi nga ta ka ndzi nga xidyi ivi ndzi xi hangalasa ehansi. Loko ndzi endle tano, hi ku hatlisa nani yi ndzi khomile kutani yi ndzi korhamisela ehansi, hi matimba swinene ndzi sindzisiwa ku nantswela fuloro hinkwaro ri basa hi ririmi. Kamara a ri ri rikulu. Loko ndzi ri karhi ndzi endla hi laha ndzi lerisiweke ha kona, ndzi twe swikhiyana ku ri karhi ku hlekiwa—ku nga ri na musa lowu kombisiwaka.

“Sweswi ndzi vona mhaka leyi swi tsakisaka ha yona ku va la ntshunxekeke eka swilo sweswo hinkwaswo. Hi laha u nga langutelaka ha kona, ntshunxeko lowu wu katsa ku tinyiketela. Hi xikombiso, tatana u ndzi hlongorile endlwini. Hambi swi ri tano, ndzi nga si suka endlwini ya vukhongeri, ndzi ve ni lunghelo ro pfuna tinani tin’wana letitsongo ku dyondza ntiyiso. Ndza tsaka ku vula leswaku van’wana va hina hi nyiketele vutomi bya hina eka Yehova Xikwembu!

“Endzhaku ka loko ndzi sukile endlwini ya vukhongeri, a a swi nonon’hwa eka tata wa mina ku twisisa leswaku hikwalaho ka yini ndzi sukele mintirho leyi hakelaka kahle kambe leyi dyaka nkarhi. Kambe, a a ndzi lava nkarhi lowu engetelekeke entirhweni wa Xikwembu. Sweswi ndzi tirha tanihi phayona ra nkarhi hinkwawo, ndzi ri ni vutomi lebyi olovaka ni lebyi vuyerisaka. Lexi ndzi tsakisaka swinene, manana ni vamakwerhu lavakulu va xinuna va ndzi joyinile entirhweni wa Yehova.”

Ina, ntiyiso wa Bibele wu ntshunxa munhu eka fambiselo ra vukhongeri byo hemba bya misava leyi, naswona wu tisa ntsako lowu nga heriki.—Yohane 8:32.