Xiviko Xa Vahuweleri Va Mfumo

Timbhoni Ta Yehova Ti Chumayela Hi Xitshuketa Naswona Ti Kuma Vuyelo Lebyinene

VANHU vo tala va tive ntiyiso wa Bibele ro sungula loko un’wana wa Timbhoni ta Yehova a chumayele hi xitshuketa eka vona. Hi ku endla leswi Timbhoni ti landzela xikombiso xa Yesu Kriste, loyi a chumayeleke hi xitshuketa eka wansati wa Musamariya loko a ta eku keni ka mati exihlobyeni. (Yohane, ndzima 4) Le Afrika Vuxa, un’wana wa Timbhoni ta Yehova u nyikele vumbhoni bya xitshuketa eka nani ya Mukhatoliki. Hofisi ya rhavi ra Sosayiti ya Watch Tower yi hi byela vuyelo bya kona:

◻ Mpundzu wun’wana loko yi ri karhi yi ya edorobeni, Mbhoni yi hlangane ni nani ya Mukhatoliki. Yi kume nkarhi wo vutisa nani leyi: “U ya kwihi hi nkarhi lowu xana?” Yi te: “Ndzi ya khongela Xikwembu xa mina.” Ivi yi vutisa nani: “Xana wa ri tiva vito ra Xikwembu xa wena?” “Vito ra xona a hi Xikwembu xana?” ku hlamula nani. Mbhoni yi vule leswaku yi ta ta ekaya ra yena hi ndzhenga wolowo ku ta bula hi vito ra Xikwembu. Endzhaku ka ku burisana loku, nani yi ye ekerekeni ya yona ivi yi vutisa un’wana wa vafundhisi leswaku “Yehova” swi vula yini. Nhlamulo yi te, “I vito ra Xikwembu.” Nani yi hlamarisiwe hi ku twa leswaku mufundhisi a a swi tiva kambe a nga si tshama a n’wi dyondzisa ha swona.

Mbhoni yi endzele wansati yoloye masiku ya kaye hi ku landzelelana naswona yi n’wi dyondzisa ntiyiso hi ta Vunharhu-un’we, moya-xiviri, ndzilo wa tihele ni ntshembo wa vafi. Wansati u tswonge hinkwaswo kutani a kombela Mbhoni yoleyo leswaku yi n’wi nyika nkarhi wo anakanyisisa hi tidyondzo leti letintshwa hinkwato. Endzhaku ka mavhiki mambirhi u tlhele a tihlanganisa ni Mbhoni yoleyo a kombela leswaku va ya emahlweni ni ku vulavurisana. Enkarhini lowu nani a yi tiyimisele ku tshika kereke naswona a yi swi herisile swifaniso swa yona, tincindha ta vuhlalu ni xihambano. Mufundhisi u ringetile ku yi khongotela leswaku yi tlhelela endzhaku, kambe yona a yi tibohe ku landza ntiyiso. Endzhakunyana yi khuvuriwile kutani yi tirha tanihi phayona ro pfuna ra nkarhi na nkarhi hi tin’hweti to tala ku nga khathariseki rihanyo ra yona leri tsaneke ni ku dyuhala.

Tanihi leswi yindlu ya yena yi kuleke, u yi pfulele bandlha leswaku ri yi tirhisa tanihi Holo ya Mfumo. Vamakwerhu va cince lwangu ra khale, va fayetela makhumbi ya le ndzeni, kutani va endla xiphemu lexikulu xa muako ku va ndhawu leyi kokaka mahlo ya minhlangano. Khale ka nani leyi ya Mukhatoliki yi tshama ekamareni leri nga endzhaku ka holo. Yi tsakile swinene ku va yi swi kotile ku endla munyikelo lowu eka vugandzeri bya Yehova.

◻ Ntokoto wun’wana lowu kombisaka vutlhari bya ku nyikela vumbhoni bya xitshuketa wu ta hi le Kampala, Uganda. Loko yi ri ndleleni yo ya ehofisini ya mfumo, Mbhoni ya murhumiwa yi vulavule hi xitshuketa ni lava a yi ri na vona ekhexeni. Wanuna un’wana, Nkul. L——, u kombise ku tsakela ku teka buku leyi nyikeriwaka kambe a a nga ta swi kota ku yi teka hi nkarhi wolowo. Kutani u nyike murhumiwa vito ra yena ni adirese ya hofisi ya yena. Endzhakunyana murhumiwa u ye kwalaho kutani a kombela ku vona Nkul. L——. U vitaniwile, kambe lexi nga hlamarisa murhumiwa, ku humelele wanuna loyi a nga riki yena. A ku ri ni vavanuna vambirhi va mavito yo fana lava a va tirha ehofisini yoleyo. Vumbhoni lebyi komeke byi nyikeriwile eka Nkul. L—— wa vumbirhi, naswona u kombise ku tsakela loku hlamarisaka. Hambi leswi Nkul. L—— wo sungula, a a nga ha tsakeli, dyondzo ya Bibele yi sunguriwile na Nkul. L—— wa vumbirhi. Sweswi i Mbhoni leyi khuvuriweke, naswona nsati wa yena ni n’wana wa xinuna va endla nhluvuko lowunene wo lava ku khuvuriwa.

Yesu Kriste i Murisi Lonene naswona wa va tiva lava fanaka ni tinyimpfu lava timbilu ta vona ti tinyikeleke ku endla leswinene. Mintokoto leyi yi kombisa leswaku u kongomisa valandzeri va yena eka vanhu vo tano. Ku chumayela hi xitshuketa swi nga va ni mihandzu!—Yohane 10:14.