Vugevenga eMisaveni Leyi Pfilunganekeke

VUGEVENGA a hi mhaka ya manguva lawa. Ku dlaya ko sungula ku humelele eka magidi yo tala ya malembe lama hundzeke loko Kayini a dlaye makwavo Avele. Ku pfinya ni vusodoma swa boxiwa eMatsalweni ya khale ya Xiheveru. (Genesa 4:8; 19:4, 5; 34:1-4) Vanhu a va ri karhi va tekeriwa swa vona eka lembe xidzana ro sungula ra Nguva ya hina leyi Tolovelekeke, hi laha xifaniso xa Musamariya lonene xi kombisaka ha kona. (Luka 10:29-37) Kambe ku na ku hambana namuntlha.

Mavonelo ya vanhu emadorobeni yo tala lamakulu ya misava, hambi hi le New York, London, Calcutta kumbe eBogotá, hi leswaku vugevenga byi andza ngopfu naswona byi na nxungeto lowukulu. Xiviko lexi humaka eka India Today lexi nga ni nhloko-mhaka leyi nge: “Vagandzeri va Mpfilumpfilu” xi ri: “Nchumu lowu pfilunganyaka lowu xungetaka ku onha mahanyelo lamanene ni ntwanano, lowu hlanganisaka tiko i ku andza ka vukari, ku xandzukela ndzayo ni vuhomboloki evugandzerini.” Hambi ku ri maphorisa, loko ma lwisana ni vugevenga minkarhi yin’wana ma ringiwa ku tlula mindzilakana ya ku sindzisa ka nawu ni ku tirhisa tindlela ta vugevenga hi woxe. Xiviko lexi nga hundza lexi humaka eIndia xi ri: “Mafu, ku nga khathariseki nsirhelelo wa maphorisa ma ya emahlweni ma endla mahungu.” Naswona sweswo swi tano ematikweni man’wana.

Ku koteka ka leswaku u va muhlaseriwa wa vugevenga ku vonaka ku ya ku kula. Xiviko lexi humaka eUnited States xi vula leswaku “wun’we eka mindyangu ya mune ya Maamerika wu khumbiwile hi vugevenga bya vukari kumbe ku yiva hi 1988.” Ku tlula kwalaho, sweswi vanhu va endla vugevenga bya vukari va ri ni malembe ya le hansi. Magazini wa Latin-America lowu nge Visión wu vula leswaku “kaye ehenhla ka va-sicario [vadlayi lava hakeriwaka] van’wana ni van’wana va khume i vana. [I] ‘vana’ hi xivumbeko naswona va le hansi ka nsirhelelo wa le nawini.” Nakambe ku katseka ka vana eka vugevenga bya vukari i endlelo ra misava hinkwayo.

Bibele yi profetile kwalomu ka malembe ya 2 000 lama hundzeke: “Tiva leswaku emasikwini ya makumu, ku ta fika minkarhi yo nonon’hwa. Hikuva vanhu va ta va lava tirhandzaka, va ta va lava rhandzaka mali ngopfu . . . lava nga khongeriki; va ta va vanhu va tihanyi, . . . lava nga tikotiki, lavo leva, lava vengaka leswo lulama, va ta va timbabva, vanhu va futa, lava nga ni manyunyu . . . Vanhu lavo biha ni vakanganyisi va ta ya emahlweni va nyanya ku biha, va ri karhi va xisa, na vona va xisiwa.”—2 Timotiya 3:1-4, 13.

Ku sukela hi 1914 vumhoni bya andza bya leswaku hi hanya emasikwini wolawo yo nonon’hwa ya makumu. Misava, leswi yi tokoteke tinyimpi timbirhi ta misava ni mimpfilumpfilu yin’wana leyikulu, yi hundzuke leyi nga lawulekiki hi tindlela to tala, leyi pfilunganekeke. Vugevenga byi hangalakile. Etindhawini to tala emadorobeni swigevenga swa lawula, swi cinca tindlela ta mahanyelo ya lavo tala lava landzelelaka nawu. Hi laha holobye la dumeke wa U.S. a vuleke ha kona: “Ku na swilo swo tala leswi hi nga vilelaka ha swona sweswi, swilo leswi a hi nga swi chavi. Minkarhi yin’wana hi chava ngopfu-ngopfu hi hundzuka vabohiwa, loko lava va fanelaka ku pfaleriwa va famba hi ku ntshunxeka.”

Hikwalaho ka sweswo, namuntlha vanhu va amukela switsundzuxo leswi a swi nga ri swa nkoka emalembeni ya 20 kumbe 30 lama hundzeke. Minyangwa yi na tiloko timbirhi kumbe tinharhu naswona ti tiyisiwe hi tinsimbhi. Etindhawini to tala vanhu va khoma mali leyi ringaneke hi ku tshemba ku anerisa xigevenga leswaku va papalata ku beriwa ku pfumala xo nyika makhamba. Switarata swo tala a swi tirhisiwi loko dyambu ri pela, swi tatiwa hi lava pfumelaka ntokoto lava omeke tinhloko ni lava bohiwaka hi swiyimo leswaku va va kwalaho ntsena—vaphasiwa vo olova va vahlaseri lava famba-fambaka emunyameni wa doroba.

Hi nga endla yini leswaku hi papalata ku va vahlaseriwa va vugevenga emisaveni leyi yi pfilunganeke ni leyi nga lawulekiki? Hi nga langutana njhani na byona?