Yehova U Yingisa Swirilo Swa Hina Swa Xihatla Swa Mpfuno

MPFUNO a a wu laveka hi xihatla. Leswi swi vonake eka gome lerikulu exikandzeni xa mucheleri wa hosi. Loko a vutisiwe leswaku ku onhake yini, mucheleri u hlamusele gome ra yena ehenhla ka xiyimo lexi onhakeke xa Yerusalema ni makhumbi ya wona. Kutani ku te xivutiso: ‘U lava ku kuma yini?’ Nehemiya mucheleri endzhaku u tsarile a ku: “Kutani nḍi khongela Šikwembu ša le matilweni.” Xolexo a ku ri xirilo xa xihatla, xa le xihundleni, xa mpfuno wa Yehova. Vuyelo ku ve byihi? Phela, hosi Ataserkisi wa Muperesi hi ku hatlisa u pfumelele Nehemiya ku pfuxa makhumbi ya Yerusalema!—Nehemia 2:1-6.

Ina, Xikwembu xi yingisa swikombelo swa xihatla swa lava va xi rhandzaka. (Psalma 65:2) Kutani loko ndzingo wu vonaka wu ri wukulu ku ku tlula, u nga ha khongela hi laha mupisalema Davhida a endleke ha kona eka Psalma 70, loko a lava mpfuno wa Xikwembu hi xihatla. Nhloko-mhaka ya psalma leyi yi kombisa leswaku xikongomelo xa yona i “ku tsundzuxa.” Hi ku hambana kuntsongo yi phindha Psalma 40:13-17. Kambe xana Psalma ya vu-70 yi nga hi pfunisa ku yini tanihi vanhu va Yehova?

Xikombelo Xa Nkutsulo Wa Xihatla

Davhida u sungula hi xikombelo: “Oho Šikwembu, hatlisa ku ta nḍi nṭhunša! Yehova, angwetla ku nḍi pfuna!” (Psalma 70:1) Loko hi ri eku tshikilelekeni, hi nga kombela leswaku Xikwembu xi hatlisa xi hi pfuna. Yehova a nga hi ringi hi swilo leswo biha, naswona wa “swi tiva ku ponisa vanhu [lava tinyiketelaka eka Xikwembu] eku karhatekeni ka vona.” (2 Petro 2:9; Yakobo 1:13) Kambe ku vuriwa yini hi loko a pfumelela ndzingo leswaku wu ya emahlweni, kumbexana leswaku a ta hi dyondzisa swo karhi? Kutani hi nga kombela vutlhari eka yena leswaku hi kota ku lwisana na wona. Loko hi kombela hi ripfumelo, u hi nyika vutlhari. (Yakobo 1:5-8) Xikwembu nakambe xi hi nyika matimba lama lavekaka leswaku hi tiyisela miringo ya hina. Hi xikombiso, ‘xa hi tiyisa loko hi khomiwe hi vuvabyi lebyikulu.’—Psalma 41:1-3; Vaheveru 10:36.

Vudyoho bya hina bya ndzhaka, ku katsa ni ku paluxeka emiringweni ni matshalatshala ya Diyavulosi yo herisa vuxaka bya hina na Yehova nkarhi na nkarhi, swi fanele swi hi susumetela ku khongelela mpfuno wa Xikwembu siku rin’wana ni rin’wana. (Psalma 51:1-5; Varhoma 5:12; 12:12) Xa nkoka i marito lawa ya xikhongelo xa xikombiso xa Yesu: “U nga hi yisi emiringweni, kambe u hi ponisa eka Lowo biha.” (Matewu 6:13) Ina, hi nga kombela Xikwembu leswaku xi nga hi pfumeleli ku tsana loko hi ringiwa leswaku hi nga xi yingisi ni leswaku xi sivela Sathana, “Lowo biha,” leswaku a nga hi hluli. Kambe a hi hlanganiseni swirilo swa hina swa nkutsulo ni magoza yo papalata swiyimo leswi nga hi nghenisaka emiringweni ni le mintlhan’wini ya Sathana swi nga fanelangi.—2 Vakorinto 2:11.

Lava Nge, “Ah!”

Hi nga ha ringiwa hi laha ku vavisaka hi ku va valala va hina va hi sandza hikwalaho ka ripfumelo leri hi ri kombisaka. Loko sweswo swo humelela eka wena, tsundzuka marito ya Davhida: “A v̌a khomiwe hi tingana, v̌a rurumela, la’v̌a lav̌aka [moya-xiviri wa] mina, a v̌a tlhele nḍaku, v̌a sanḍiwa, la’v̌a ranḍaka ku onhaka ka mina! A va tlherisiwe nḍaku hi tingana ta v̌ona. La’v̌a vulaka Ah! Ah!” (Psalma 70:2, 3) Valala va Davhida a va lava ku n’wi vona a file; a va ‘lava moya-xiviri’ kumbe vutomi bya yena. Hambi swi ri tano ematshan’wini yo rihisela, u kombise ripfumelo leswaku Xikwembu xi ta va khomisa tingana. Davhida u khongelele leswaku valala va yena a va “khomiwe hi tingana, v̌a rurumela”—va hlundzukisiwa, va pfilunganyeka, va karhateka, va hela matimba eka matshalatshala yo hetisisa makungu ya vona yo biha. Ina, lava lavaka ku vaviseka ni lava tsakelaka khombo ra yena a va pfilunganyeke va tokota ku tsongahatiwa.

Loko hi ve ni leswi nga ha vuriwaka ku tsaka ka lunya loko nala a weriwe hi khombo, hi ta fanela ku hakela nandzu wa xidyoho xa hina eka Yehova. (Swivuriso 17:5; 24:17, 18) Hambi swi ri tano, loko valala va sandza Xikwembu ni vanhu va xona, hi nga khongelela leswaku hikwalaho ka vito ra yena lero kwetsima, Yehova ‘a va tlherisela ndzhaku a va khomisa hi tingana’ emahlweni ka vanhu lava va lavaka ku dzunisiwa hi vona. (Psalma 106:8) Ku rihisela i ka Xikwembu, naswona xi nga pfilunganya ni ku khomisa valala va hina ni va xona tingana. (Deuteronoma 32:35) Hi xikombiso, murhangeri wa Vunazi Adolf Hitler a a lava ku herisa Timbhoni ta Yehova eJarimani. Vona ndlela leyi vavisaka swonghasi leyi a tsandzekeke ha yona, hikuva sweswi magidi yo tala ya tona ma twarisa rungula ra Mfumo kwalaho!

Hi ku hlekula loku tsongahataka, valala va hina va nga ha ku: “Ah! Ah!” Tanihi leswi va rhukanaka Xikwembu ni vanhu va xona, vadyohi volavo “a va tlherisiwe nḍaku hi tingana ta vona,” va tokota ku tsongahatiwa. Loko hi ri karhi hi khongelela leswi, a hi hlayiseni vutshembeki bya hina kutani hi tsakisa mbilu ya Yehova, leswaku a kota ku hlamula Sathana ni un’wana ni un’wana loyi a N’wi hlundzukisaka. (Swivuriso 27:11) Naswona hi nga tshuki hi chava valala va hina lava tinyungubyisaka, hikuva “l’a ṭhembaka Yehova o [ta sirheletiwa].” (Swivuriso 29:25) Nebukadnetsara hosi ya manyunyu ya Babilona, loyi a nga yisa vanhu va Xikwembu evukhumbini, u tokote ku tsongahatiwa naswona u boheke ku pfumela leswaku ‘Hosi ya le matilweni ya swi kota ku tsongahata lava fambaka hi ku tikukumuxa.’—Daniel 4:37.

‘Xikwembu A Xi Kurisiwe!’

Hambi leswi valala va nga ha hi vangelaka ku karhateka, minkarhi hinkwayo a hi dzuniseni Yehova swin’we ni vagandzeri-kulorhi. Ematshan’wini yo pfumelela ku lawuriwa hi ntshikilelo wa leswaku u tsandzeke ku kurisa Xikwembu, Davhida u te: “A v̌a ṭake, v̌a ṭakisisa e ka wena, hikwav̌o la’v̌a ku lav̌aka! La’v̌a ranḍaka ku hlayiseka ka wena, a v̌a v̌ule hi masiku, v̌a ku: Šikwembu a ši kurisiwe!” (Psalma 70:4) Vanhu va Yehova va ya emahlweni va tsaka swinene hikuva va “ṭaka, v̌a ṭakisisa” eka yena. Tanihi Timbhoni ta yena leti tinyiketeleke, leti khuvuriweke, va ni ntsako lowukulu lowu nga vuyelo bya vuxaka bya le kusuhi na yena. (Psalma 25:14) Hambi swi ri tano, va nga ha langutiwa tanihi valavi va Xikwembu lava titsongahataka. Hi ku va vapfumeri lava hlayisaka milawu ya Xikwembu, va ya emahlweni va lava vutivi lebyi engetelekeke bya xona ni Rito ra xona.—Eklesiasta 3:11; 12:13, 14; Esaya 54:13.

Tanihi leswi Timbhoni ta Yehova ti twarisaka mahungu lamanene, entiyisweni minkarhi hinkwayo ti ri: “Šikwembu a ši kurisiwe!” Ti dzunisa Yehova, ti n’wi veka exiyin’weni xa le henhla-henhla. Hi ntsako, ti pfuna valavi va ntiyiso leswaku va dyondza hi ta Xikwembu ni ku xi dzunisa. Ku hambana ni varhandzi va ntsako va misava, vanhu va Yehova va ‘rhandza ku ponisa ka yena.’ (2 Timotiya 3:1-5) Hi ku tilangutela eka ku dyoha ka vona ka ndzhaka, va nkhensa swinene hikwalaho ka lunghiselelo ra rirhandzu ra Yehova Xikwembu ra ku poniseriwa evuton’wini lebyi nga heriki, leri endliweke ri koteka hi ku tirhisa gandzelo ra nkutsulo ra N’wana wa yena la rhandzekaka, Yesu Kriste. (Yohane 3:16; Varhoma 5:8; 1 Yohane 2:1, 2) Xana wa xi dzunisa Xikwembu ni ku kombisa leswaku u ‘rhandza ku ponisa ka xona’ hi ku kombisa vugandzeri bya ntiyiso lebyi xi dzunisaka?—Yohane 4:23, 24.

Tshemba Muntshunxi

Loko Davhida a tiphofula eka psalma leyi, u twe xilaveko lexikulu lerova a ku: “Mina, nḍi šisiwana, nḍi le khombyeni; Oho Šikwembu, nḍi hatlisele! U mupfuni wa nga ni munṭhunši wa nga; Yehova, u nga hlweri!” (Psalma 70:5) Hi ku hlaseriwa hi miringo leyi rhendzeleke vapfumeri—mahlomulo yo tanihi nxaniso, minkucetelo ni minhlaselo ya Sathana—hi nga vonaka hi ri ‘swisiwana.’ Hambi loko hi nga cukumetiwanga, hi vonaka hi nga koti ku tisirhelela eka valala va mahanyelo yo biha. Hambi swi ri tano, hi nga tiyiseka leswaku Yehova wa swi kota naswona u ta hi ponisa tanihi malandza ya yena yo tshembeka.—Psalma 9:17-20.

Yehova i “Munṭhunši” loko hi lava ku ntshunxiwa. Ku tsana ka hina vini ku nga ha va ku hi yise eka xiyimo lexi nga ni ndzingo. Kambe loko ‘vuhunguki bya hina byi hi hambukisa ndlela, mbilu ya hina yi nga tshuki yi hlunamela Yehova.’ (Swivuriso 19:3) A nga fanelanga ku soriwa, naswona u lunghekele ku hi pfuna loko hi khongela eka yena hi ripfumelo. (Psalma 37:5) Ku vuriwa yini loko hi lwela ku papalata xidyoho? Kutani ke, a hi swi vuleni leswi exikhongelweni, hi kombela mpfuno wa Xikwembu leswaku hi ya emahlweni hi landzelela ndlela yo lulama. (Matewu 5:6; Varhoma 7:21-25) Xikwembu xi ta hlamula xikhongelo xa hina xo huma embilwini naswona hi ta kula emoyeni loko hi titsongahatela nkongomiso wa moya wa xona wo kwetsima.—Psalma 51:17; Vaefesa 4:30.

Loko hi ri enyimpini leyikulu ya ku ringiwa ka ripfumelo, hi nga ha titwa onge a hi nge tiyiseli ku ya emahlweni. Tanihi leswi miri wa hina wa vudyoho wu tsaneke, wu nga navela ku ponisiwa hi xihatla. (Marka 14:38) Kutani hi nga ha kombela: “Yehova, u nga hlweri.” Ngopfu-ngopfu loko hi karhateka hi ndzhukano ehenhla ka vito ra Xikwembu hi nga ha susumeteriwa ku khongela hi laha muprofeta Daniyele a khongeleke ha kona: “[Yehova], wa nga yingisa! Hosi, u riv̌alela, Hosi, yingisa, u tira u nga hlweri, hikwalaho ka wena, Šikwembu ša mina, hikuv̌a i v̌ito ra wena . . . tiko ra wena [ri] tšhyiweke ha rona.” (Daniel 9:19) Hi nga va ni ripfumelo ra leswaku Tata wa hina wa le tilweni a nge hlweri, hikuva muapostola Pawulo u nyikele xitiyisekiso lexi: “A hi tshineleni kusuhi ni xiluvelo xa tintswalo, hi ri ni ku tshemba leswaku hi ta tsetseleriwa ni ku kuma tintswalo leti nga ta hi pfuna eminkarhini ya ku pfumala.”—Vaheveru 4:16.

Hi nga rivali leswaku Yehova i Muntshunxi. Tanihi malandza ya yena, swi ta hi pfuna ku tsundzuka leswi, ni mintlhaveko ya xikhongelo ya Psalma 70. Eminkarhini yin’wana hi nga ha lava ku khongela hi ku phindha-phindha ehenhleni ka mhaka ya nkhathalelo lowukulu swinene. (1 Vatesalonika 5:17) Ku nga ha vonaka ku nga ri na ntlhantlho eka xiphiqo xo karhi, ku nga ri na ndlela yo hlula xiphiqo xa hina. Kambe Tata wa hina wa le tilweni wa rirhandzu u ta hi tiyisa naswona a nge hi pfumeleli leswaku hi ringiwa hi leswi nga hi hlulaka. Hikwalaho, hi nga karhali ku ya emahlweni ka xiluvelo xa Hosi ya hi laha ku nga Heriki hi xikhongelo lexi humaka embilwini. (1 Vakorinto 10:13; Vafilipiya 4:6, 7, 13; Nhlavutelo 15:3) Khongela hi ripfumelo, kutani u n’wi tshemba handle ko kanakana, hikuva Yehova u yingisa swirilo swa hina swa xihatla swo lava mpfuno.