Bibele—Xana Ya Kwetsima Hakunene?

I VANHU vangani namuntlha lava langutaka Bibele tanihi leyi kwetsimeke, yi ri Rito ra Xikwembu? Enkarhini lowu wa ku kanakana, vo tala va yi languta yi hundzeriwe hi nkarhi naswona yi nga tirhi, va kanakana leswaku ya kwetsima hakunene. Hambi varhangeri van’wana va vukhongeri bya Vujagana va dyondzisa leswaku Bibele yi tele hi milorho ni mintsheketo. Va tivutisa ‘loko nhlamuselo ya Bibele ya matimu yi faneleka leswaku yi nga pfumeriwa hi munhu wo tlhariha.’—The Interpreter’s Dictionary of the Bible, Vholumo 2, tluka 611.

Vadyondzi lava dumeke va byala mbewu ya ku kanakana mayelana ni ku faneleka ka ku teka Bibele tanihi Rito ra Xikwembu. Munhu un’wana u vule leswaku “loko u lava ku tirhisa ririmi ra Rito ra Xikwembu, vito leri faneleke ra Bibele ri ta va Rito ra Israyele, Rito ra Vakriste vo sungula lava rhangeleke.” (The Bible in the Modern World, hi James Barr) U ehleketa yini? Xana Bibele i Rito ra Xikwembu? Xana ya kwetsima hakunene?

I Mani La Tsaleke Bibele?

Ku tsariwa ka Genesa, buku yo sungula ya Bibele, hi ndhavuko ku nyikeriwa eka Muxe, Muheveru loyi a nga hanya kwalomu ka malembe ya 3 500 lama hundzeke. Hi ku ya hi Bibele hi yoxe, vavanuna va kwalomu ka 40 lava humaka eka mindhavuko yo hambana-hambana ya vutomi va hlanganyerile eku tsaleni ka Matsalwa hinkwawo, lama vumbaka nhlengeleto wa tibuku ta 66, kumbe swiphemu-phemu swa Bibele. Hambi swi ri tano vavanuna lava a va tixiyanga tanihi vatsari va xiviri va Bibele. Mutsari un’wana u te: “Matsalwa lawa hinkwawo ma huhutiwile hi Xikwembu.” (2 Timotiya 3:16) Un’wana u tsale hi vatsari va Bibele a ku: “Vanhu lava susumetiweke hi Moya lowo Kwetsima, va vurile leswi humaka eka Xikwembu.”—2 Petro 1:21.

Leswi swi veka vatsari exiyin’weni xa vakhomi va xitsalo, kumbe vamatsalani, lava lawuriwaka, kumbe ku leteriwa hi Xikwembu. Hi ku ya hi Bibele, mutsari hi ntolovelo a a pfumeleriwa ku hlawula marito ya yena n’wini eku phofuleni ka mahungu lama nyikeriweke hi Xikwembu. (Habakuk 2:2) Hi yona mhaka leyi ku nga ni tindlela to tala ta matsalelo eBibeleni hinkwayo. Kambe vutsari nkarhi hinkwawo a byi kongomisiwa hi Xikwembu.

Kavula, ku vula ka vatsari lava leswaku va huhuteriwe hi Xikwembu a hi vumbhoni bya leswaku Bibele i rungula ra le henhla ra Muvumbi eka vanhu. Kambe, leswaku la nge Henhla-henhla i Mutsari wa Bibele kumbe e-e kahle-kahle swi nga voniwa hi nkambisiso wa vukheta ni wo pfumala xihlawu-hlawu wa buku hi yoxe. Xana Bibele ya byi nyikela vumbhoni bya leswaku yi tsariwe hi Xikwembu? Entiyisweni, xana hi nga vula hi ku tiyiseka leswaku Bibele ya kwetsima?