Wa Tsundzuka Xana?

Xana u anakanyisise hi vukheta hi minkandziyiso ya sweswinyana ya Xihondzo xo Rindza? Loko swi ri tano, handle ko kanakana u ta swi tsakela ku tsundzuka leswi landzelaka:

◻ Xana rhekhodo ya Bibele ya tinyimpi ta Yehova yi hi nyika ntshembo wo langutana ni “nhlomulo lowukulu” hi ndlela yihi? (Matewu 24:21, NW)

Nkarhi hinkwawo, Yehova u kombise leswaku a nga tlula valala va yena hi ku ehleketa ni ku cinca swiyimo leswaku a ponisa vanhu va yena.—8/15, tluka 27.

◻ Vatswari va fanele va tiyimisela ku endla yini leswaku va hlayisa ku vulavurisana exikarhi ka vona ni vana va vona?

Vatswari va fanele va heta nkarhi ni vana va vona. Nakambe, va fanele va tiyimisela ku titsona swin’wana hikwalaho ka vana va vona leswaku va va kurisa emianakanyweni, emirini, na hi tlhelo ra moya.—9/1, tluka 22.

◻ Ku hundzuka ka Yesu ku vula yini eka hina namuntlha? (Marka 9:2-4)

Ku hundzuka ku aka ripfumelo eritweni ra vuprofeta ra Yehova ni ku tiyisa ripfumelo ra hina eka Yesu Kriste tanihi N’wana wa Xikwembu ni Mesiya la tshembisiweke. Nakambe ku nga ha tiyisa ripfumelo ra hina eka ku pfuxeriwa ka Yesu evuton’wini bya moya ivi ku engetela ripfumelo ra hina eka hulumendhe ya Xikwembu.—9/15, tluka 23.

◻ Rito leri nge “nkarhinyana” eka Esaya 11:6, (NW) ri vula yini?

Ku hundzuluxela ka vukheta ka ndzimana leyi ku kombisa leswaku hlolwa ni xinyimpfana a swi nge tshami swin’we nkarhi hinkwawo emisaveni leyintshwa. Swi le rivaleni leswaku swiharhi swo tano swa ha ta va ni tindhawu ta swona hi ku hambana-hambana ivi swi va hi tinxaka ta ‘swifuwo ni swiharhi’ hi laha a swi ri ha kona eParadeyisini yo sungula. (Genesa 1:24) Hambi swi ri tano, swiharhi swi ta va ni ku rhula, swi kota ku tshama swin’we handle ka khombo.—9/15, tluka 31.

◻ Hi xihi xilotlelo xa Vukriste bya ntiyiso?

Rirhandzu i xilotlelo xa Vukriste bya ntiyiso. Ripfumelo, mintirho ni xinghana lexinene i swa nkoka, kambe loko ku nga ri na rirhandzu, nkoka wa swona a wu xiyiwi. Leswi swi tano hikuva Yehova i Xikwembu xa rirhandzu hi laha ku xiyekaka. (1 Vakorinto 13:1-3; 1 Yohane 4:8)—10/1, tluka 20.

◻ Xana marito lama nge “nkari wu kona wa ku v̌elekiwa, wu kona nkari wa ku fa” eka Eklesiasta 3:2 ma seketela mianakanyo ya leswaku Xikwembu xi kunguhate nkarhi wa hina wa ku fa ka ha ri emahlweni ke?

Doo. Solomoni hi ku olova a a hlamusela ndzhendzeleko lowu yaka emahlweni wa vutomi ni rifu leswi xungetaka vanhu lava nga hetisekangiki. Eklesiasta 7:17 yi ri: “U nga ṭhuki u tiendla lo’wo biha ku tlurisisa, kumbe u nga ṭhuki u tiendla šihunguki, hikuva a u ta fela yini wu nga si va nkari wa wena šana?” Xitsundzuxo lexi a xi ta vula yini loko nkarhi wa vanhu wa ku fa a a wu kunguhatiwa ka ha ri emahlweni?—10/15, matluka 5-6.

◻ I yini lexi kombisaka leswaku muapostola Petro a a nga ri bixopo wo sungula wa Rhoma?

A ku na xikombiso xa leswaku Petro u tshame a endzela muti wa Rhoma; kumbe leswaku Petro u tshame a tivula munhu un’wana ematshan’wini yo tivula un’wana wa vaapostola va Kriste. (2 Petro 1:1)—10/15, tluka 8.

◻ Xana swi fanerile leswaku Vakriste va rhumela swiluva laha ku nga ni nkosi?

Loko swi tiveka kahle leswaku mukhuva (kumbe nkhaviso, wo tanihi xihambano) enkarhini wolowo wu khumbana ni vukhongeri endhawini leyi munhu a tshamaka ka yona, wu fanele wu papalatiwa. Kutani Vakriste a va nge rhumeli swiluva hi xivumbeko xa xihambano kumbe ku swi tirhisa hi ndlela leyi tovelekeke leyi khumbanaka ni vukhongeri bya mavunwa hi ku helela. Hambi swi ri tano, sweswi ematikweni yo tala, mukhuva wo nyikela swiluva handle ko khumbana ni vukhongeri wu hangalakile. Vakriste van’wana va rhumele swiluva ku engetela nchavelelo enkarhini wa gome ni ku kombisa ntwela-vusiwana ni nkhathalelo.—10/15, tluka 31.

◻ I yini lexi tinhlamuselo ta ximfumo ti xi vekaka erivaleni hi Vunharhu-un’we?

Ti swi veka erivaleni leswaku dyondzo ya Vunharhu-un’we a hi mianakanyo yo olova. Ku ri na sweswo, i mianakanyo leyi rharhanganeke leyi hlengeletiweke hi malembe xidzana yo talanyana ivi yi khomanisiwa swin’we. Vadyondzi vo tala, ku katsa ni Vativi va Vunharhu-un’we, va swi pfumela leswaku kahle-kahle Bibele a yi na yona dyondzo ya Vunharhu-un’we.—11/1, matluka 21-22.

◻ Ha yini 29 C.E. ri ri lembe ra nkoka ematin’wini ya Bibele?

Hikuva, hi ku hlanganisa rungula leri kongomeke ra Bibele ni ku fungha ka matimu ka siku ra Tiberiyo, swichudeni swa Bibele swa swi kota ku hlayela leswaku vutirheli bya Yohane byi sungule hi ximun’wana xa 29 C.E. ni leswaku endzhakunyana ka tin’hweti ta tsevu, hi ximun’wana xa 29 C.E. Yohane u khuvule Yesu.—11/15, tluka 31.

◻ “Vugandzeri” a a byi vula yini eka vanhu lava vulavulaka Xiheveru, naswona leswi swi tirha njhani eka Timbhoni ta Yehova namuntlha?

Rito ra Xiheveru leri fanaka na “vugandzeri” ri nga hundzuluxeriwa ri va “ntirho.” Hikwalaho, hi ku ya hi mianakanyo ya Xiheveru vugandzeri a a byi vula ntirho. Leswi hi leswi swi vulaka swona evanhwini va Yehova namuntlha, kutani ke, mfungho wa nkoka swinene wa vukhongeri bya ntiyiso i ntirho wa Xikwembu wo chumayela.—12/1, tluka 19.