Xiviko Xa Vahuweleri Va Mfumo

Ku Vangamisa Ku Vonakala Ka Vona Le India

LE INDIA mahungu lamanene ya Mfumo ma karhi ma chumayeriwa hi Timbhoni leti tsakeke ta 11 524. (Matewu 24:14) Va 1 066 lava khuvuriweke hi lembe ra ntirho ra 1991 se i vahuweleri va Mfumo lava vangamisaka ku vonakala ka vona eka van’wana. Mayana ntsako lowu va veke na wona ku vona 28 866 wa lava veke kona enkhubyeni wa Xitsundzuxo xa rifu ra Kreste!

◻ Lavanyingi va sungule ku dyondza ntshembo wa Mfumo hi ku nyikeriwa ka vumbhoni bya xitshuketa. Hi xikombiso, Mbhoni yi vulavule hi Mfumo eka vatirhi-kulobye, lava hi tlhelo va nga vavatli. Mutirhi-kulobye un’wana u swi amukerile ivi a endla ku vonakala ka yena ku voningela ndyangu wakwe ni vanghana. Na vona va tsakele ku tivisa van’wana hi marungula lawa yo tsakisa ya Mfumo. Hi ku ya hi xiviko xa kona, hi malembenyana ntsena, ‘vanhu vo tlula 30 se a va amukele ntiyiso.’ Yehovha u n’wi katekisile yena ni vamakwavo lavantshwa va moya, hikwalaho ko vangamisa ku vonakala ka vona.

◻ Makwerhu un’wana lontsongo wa le vandlheni rin’wana u vangamise ku vonakala ka yena hi ku nyikela vumbhoni bya xitshuketa eka vadyondzi-kulobye exikolweni. Van’wana va vona a a va wu tsakela ntshembo wa Mfumo, naswona a a tala ku va hlamusela Bibele ku kala ku lava ku va mahlambandlopfu. Un’wana loyi a ri Mukhatoliki, u amukele ntiyiso hambi leswi a chavisiwa hi mufundhisi leswaku u ta vona mangava loko o hambeta a hlanganyela ni Timbhoni. Hambi swi ri tano, mudyondzi loyi a tiyiseka leswaku a dyondza ntiyiso wa Bibele eka Timbhoni, naswona u hambete a dyondza. Eku heteleleni u khuvuriwile, naswona sweswi u tirha tanihi nandza wa vutirheli evandlheni. Wa tsaka hikwalaho ka ntshembo lowu tisiwaka hi ku vonakala loku tsakisaka ka ntiyiso!—Varhoma 12:12.

◻ Un’wana la yingiseleke Mbhoni leyitsongo i mudyondzi la dumeke, loyi a nga pfumeliki vukona bya Xikwembu, loyi a rhandza ku hlekula lava nge va pfumela eka Xikwembu, kambe siku rin’wana u nghenelerile ebulweni kutani a vutisa swivutiso swo tala. U hlamale ngopfu loko a kuma tinhlamulo leti vupfeke ta swivutiso swa yena hinkwaswo, kutani a gimeta hi leswaku Bibele i Rito ra Xikwembu. U hambete a kula hi vutivi bya Bibele kutani a hetelela hi ku khuvuriwa. Tata wa yena wa Muhindu u holovisane na yena a kala a n’wi hlongola ekaya rakwe. Hambi swi ri tano, ku yima ka jaha leri ri tiya entiyisweni ku hakeriwe loko vamakwavo vambirhi va xinuna ni vanghana va rona vambirhi va amukele ntiyiso ivi va khuvuriwa. Makwavo wa rona un’wana sweswi u tirha ehofisini ya rhavi le India.

◻ Nhloko ya swichudeni yi nghenelerile eka mabulo lawa ni Mbhoni leyi leyitsongo. A a tshamela ku dzaha fole, tlhelo a ri xindzendzele. U tshame a lava ku ba swichudeni swimbirhi leswi a swi dyondze ntiyiso eka Mbhoni yoleyo. Hikwalaho ko amukela ntiyiso, swi arile ku nghenelela eka xitereke xa kholichi naswona a swi nga nyikeli hi ngati hi nkarhi wa tsima ra ku hlengeleta ngati leri a ri hlohloteriwe hi nhloko ya swichudeni. Sweswi jaha leri ra tsaka hi ku va Mbhoni ya Yehovha leyi byarhaka ku vonakala.

◻ Xichudeni lexi rhangeke xi vangamisa ku vonakala, xi pfune tintangha ta xona ta 15 leswaku ti tinyiketela ni ku khuvuriwa, hi ku nyikela vumbhoni bya xitshuketa.

Swa tsakisa ku vona vo tala etikweni leri lerikulu va amukela ntshembo wa Bibele wa misava leyintshwa ya Xikwembu, naswona va tihlanganisa ni vamakwavo va misava hinkwayo lava Yehovha Xikwembu a va hlengeletaka leswaku va ta hanya hi masiku ehansi ka Mfumo wa yena.