Swivutiso Swa Vahlayi

Loko Mukreste a vabya kumbe a ri eriendzweni, kutani a nga swi koti ku va kona enkhubyeni wa Xilalelo, xana u fanele a xi tlangela n’hweti leyi landzelaka?

Le Israyele wa khale Paseka a yi khomiwa lembe na lembe hi siku ra vu-14 ra n’hweti yo sungula, leyi vuriwaka Nisan (kumbe Abib). Kambe hi kuma lunghiselelo ro hlawuleka eka Tinhlayo 9:10, 11: “Byela v̌ana v̌a Israel, u ku: Kungaku loko munhu e šikari ka ṅwina a yirisiwile hi mufi, hambi loko a enḍile kule, hambi a ri uṅwana wa ka ṅwina, hambi wa v̌atukulu v̌a ka ṅwina, o ta endla Paska ya Yehova. V̌a ta yi endla hi ṅhweti ya v̌umbiri [leyi vuriwaka Iyyar, kumbe Ziv], hi siku ra 14, ni madyambu; v̌a ta yi dya ni šinkwa le’šo ke tšomela, ni maṭavu la’yo bav̌a.”

Xiya leswaku leswi a swi simekanga masiku mambirhi ya Paseka (Nisan 14 kumbe Ziv 14), laha Muisrayele un’wana ni un’wana ni n’wini wa muti a va ta hlawula siku leri va vonaka ri antswa eka vona. Lunghiselelo ra swakudya swa Paseka en’hwetini ya vumbirhi a ri hikiwile. A ri endleriwe ntsena Muisrayele loyi a a nga tengangi hi siku ra nkhuvo wa Nisan 14 kumbe loyi a ri kule ni laha xitsundzuxo xa nkarhi na nkarhi a xi endleriwa kona.

Xiendlakalo lexi rhekhodiweke, laha leswi swi nga tirhisiwa ngopfu, a ku ri enkarhini lowu Hosi leyi tshembekaka Hezekiya a nga kondletela ku tlangeriwa ka Nkhuvo wa Swinkwa swo kala Comela. A va wu kumanga nkarhi wo lunghiselela hi n’hweti yo sungula (vaprista a va nga tilunghisanga ni vanhu va nga si hlengeletanana), kutani wu khomiwa hi siku ra vu-14 ra n’hweti ya vumbirhi.—2 Tikronika 29:17; 30:1-5.

Handle ka swiyimo swin’wana swo fana ni sweswo, Vayuda a va endla Paseka hi siku leri va hlawuleriweke rona hi Xikwembu. (Eksoda 12:17-20, 41, 42; Levhitika 23:5) Yesu ni vadyondzisiwa vakwe va endle xitsundzuxo hi laha Nawu a wu lava ha kona, a va xiyanga siku leri tanihi leri tolovelekeke. Luka wa vika: “Kuteloko ku fikile siku ra Xinkwa lexo-ke-comela, ri nga leri va tlhavaka swinyimpfana swa Paseka ha rona, Yesu a rhuma va Petro na Yohane, a ku ka vona: ‘Yanani, mi ya lunghisela nkhuvo wa Paseka, hi ta kota ku wu dya.’”—Luka 22:7, 8.

Hi nkarhi wolowo, Yesu u sungule xitsundzuxo xa lembe na lembe lexi Vakreste va xi tivaka tanihi Xilalelo xa Hosi. Nkoka wo va Vakreste va va kona enkhubyeni lowu, wu le rivaleni, a wu kali wu lava ku kandziyisiwa ku tlula mpimo. Lexi i xiendlakalo xa nkoka swinene xa Timbhoni ta Yehovha elembeni. Marito ya Yesu ma komba xivangelo xa kona; u te: “Endlani leswi hi ku ndzi anakanya.” (Luka 22:19) Xisweswo, Mbhoni yin’wana ni yin’wana ya Yehovha yi fanele yi kunguhata ka ha sale tin’hweti leswaku yi hlayisa siku rero ri ri hava malunghiselelo man’wana. Xilalelo xa Hosi xi ta tlangeriwa hi Ravumbirhi, April 6, 1993, endzhaku ka ku pela ka dyambu endhawini ya ka n’wina.

Etimhakeni tin’wana swiendlakalo leswi nga languteriwangiki, swo tanihi vuvabyi kumbe swiphiqo swa vutleketli, swi nga ha sivela Mukreste ku hlanganyela hi laha a kunguhateke ha kona. Ku fanele ku endliwa yini emhakeni yo tano?

Hi nkarhi wa nkhuvo, swinkwa swo kala comela ni vhinya yo tshwuka swa hundzisiwa naswona lava totiweke hi moya lowo kwetsima wa Xikwembu, lava hlawuleriweke ku ya hanya etilweni, va hlanganyela eku dyeni. (Matewu 26:26-29; Luka 22:28-30) Loko un’wana loyi lembe rin’wana ni rin’wana a a hlanganyela eku dyeni, kutani lembe leri a vabya, a boheka ku va emubedweni kumbe exibedlhele, vakulu va vandlha rero va ta lunghiselela un’wana wa vona leswaku a teka xinkwa ni vhinya a ya n’wi nyika, va burisana hi matsalwa ya Bibele lama khumbaka mhaka leyi ni ku nyikela swifanekiselo. Loko Mukreste la totiweke a ri kule ni laha vandlha rakwe ri nga kona, u fanele a lunghiselela ku ya evandlheni ra le ndhawini leyi a nga ta va a ri eka yona siku rero.

Hikwalaho ka leswi, ku ta va ku ri ehansi ka swiyimo leswi hlawulekeke ntsena laha Mukreste la totiweke a nga ta tlangela Xilalelo xa Hosi endzhaku ka masiku ya 30 (n’hweti yin’we), hi ku pfumelelana ni xileriso lexi nga eka Tinhlayo 9:10, 11 ni xikombiso lexi nga eka 2 Tikronika 30:1-3, 15.

Lava nga va ntlawa wa Yesu wa “tinyimpfu tin’wana,” lava nga ni ntshembo wa vutomi lebyi nga heriki eparadeyisini emisaveni, a va dyi xinkwa ni ku nwa vhinya. (Yohane 10:16) I swa nkoka leswaku va hlanganyela eka xitsundzuxo xa lembe na lembe, kambe a va dyi swifanekiselo. Kutani loko un’wana wa vona a vabya kumbe a endzile, ivi a nga vi kona evandlheni ro karhi madyambu wolawo, u fanele a hlaya a ri yexe matsalwa lama faneleke (ku katsa ni timhaka ta Yesu leti hlamuselaka xitsundzuxo xexo) kutani a khongelela mikateko ya Yehovha eka xiendlakalo lexi emisaveni hinkwayo. Kambe emhakeni leyi ku hava xilaveko xa malunghiselelo lama engetelekeke yo hlangana kumbe ku va ni bulo ro hlawuleka ra Bibele endzhaku ka n’hweti.