Wa Tsundzuka Xana?

Xana u anakanyisise hi minkandziyiso ya sweswinyana ya Xihondzo xo Rindza? Loko swi ri tano, kumbexana swi ta ku tsakisa ku tsundzuka leswi landzelaka:

▫ I yini “šikombiso ša v̌unene” lexi Yehovha a xi endlelaka valandzeri va mikondzo ya Yesu? (Pisalema 86:17)

A ku ri “ntsako wa moya lowo kwetsima” lowu tiyiseke Vakreste vo sungula leswaku va tiyisela minxaniso yo hambana-hambana leyi va weleke. (1 Vatesalonika 1:6) Swa ha fana ni namuntlha, Yehovha, Munyiki wa “nyiko yin’wana ni yin’wana leyo saseka,” wa swi tsakela ku “nyika Moya lowo Kwetsima eka lava kombelaka ka yena.” (Yakobo 1:17; Luka 11:13) Kutani i moya lowo kwetsima lowu endlelaka valandzeri va Yesu “šikombiso ša v̌unene.”—12/15, matluka 18-19.

▫ Ha yini swi ri swa nkoka leswaku hi amukela langutelo ra Xikwembu hi ku hemba?

Pisalema 5:6 yi ri Xikwembu “[xi ta] herisa la’v̌a v̌ulav̌ulaka hi v̌unwa.” Nhlavutelo 21:8 yi ya emahlweni yi vula leswaku makumu ya vahembi hinkwavo i “rifu ra vumbirhi.” Hikwalaho, ku amukela langutelo ra Xikwembu hi ku hemba swi hi nyika xivangelo xo tiya xa ku vulavula ntiyiso ivi xisweswo hi amukela nyiko ya yena ya vutomi.—12/15, tluka 23.

▫ I yini leswi a swi vumba ku gandzela ka Vasamariya? (Yohane 4:20)

Eka vugandzeri bya Vasamariya lebyi pfanganeke, a va amukela Matsalwa ya tibuku ta ntlhanu ntsena to sungula ta Muxe, Pentateuch. Kwalomu ka lembe xidzana ra vumune B.C.E., va yimise tempele eNtshaveni ya Gerizimu, va phikizana ni tempele ya Xikwembu le Yerusalema. Hambi leswi tempele ya Vasamariya yi nga herisiwa, ni namuntlha va ha tlangela Paseka kan’we hi lembe le Gerizimu.—1/1, tluka 25.

▫ Xana Vakreste va fanele va khutaza mintirho ya ku sivela nthyakiso ni ya ku basisa?

Loko Yesu a ri emisaveni, a nga ringetanga ku tlhantlha swiphiqo swa vanhu hinkwaswo swa nkarhi wa yena. Loko Yehovha hi ku tirhisa Mfumo wa yena wa Vumesiya a tirhisa milawu ya yena ya ku lulama emisaveni hinkwayo, swiphiqo swa mbango swi ta tlhantlhiwa hi laha ku heleleke. Hikwalaho, Timbhoni ta Yehovha ti ni langutelo leri ringaniseriweke. Ku rhandza vaakelani swi va susumetela leswaku va xixima swilo leswi nga swa van’wana, kambe hi laha swi lavekaka ha kona va rhangisa ku chumayela rungula ra Mfumo wa Xikwembu. (Matewu 6:33)—1/1, tluka 31.

▫ Xana Yesu u kombise ku va mubyarhi wa ku vonakala hi tindlela tihi? (Yohane 8:12)

Yesu a a tinyiketele ku chumayela mahungu lamanene ya Mfumo wa Xikwembu. (Luka 4:43; Yohane 18:37) Nakambe u paluxe mavunwa ya vukhongeri naswona xisweswo a nyikela ntshunxeko wa moya eka lava a va ri evukhumbini bya vukhongeri. (Matewu 15:3-9) Hi ndlela leyi xiyekaka, u tikombise a ri ku vonakala ka misava hi ku nyikela vutomi bya yena lebyi hetisekeke tanihi nkutsulo. (Matewu 20:28; Yohane 3:16)—1/15, matluka 10-11.

▫ Hi swihi swivangelo swin’wana leswi ha swona hi faneleke hi titsongahatela Yehovha Xikwembu?

Yehovha i Mufumi wa Vuako hinkwabyo, naswona hikwalaho ka leswi hi fanele hi titsongahatela yena. Nakambe, tanihi leswi Yehovha a nga wa matimba hinkwawo, ku hava loyi a nga humelelaka eku n’wi kaneteni, kutani a hi nge honisi ku titsongahata eka yena. Swivumbiwa hinkwaswo leswo tlhariha swi vumberiwe ku hetisisa xikongomelo xa Muendli wa swona, kutani leswi swi endla swivumbiwa hinkwaswo swi boheka ku titsongahata eka Xikwembu etimhakeni hinkwato.—2/1, matluka 10-11.

▫ I yini lexi nga sivela Yosefa leswaku a nga endli vumbhisa ni nsati wa Potifaro?

Yosefa a ri ni matimba lama lawulaka mianakanyo ya yena. A byi tsundzuka swinene vuxaka bya yena na Yehovha naswona a swi xiya leswaku ku endla vumbhisa a ku ta va xidyoho ku nga ri eka nuna wa yena ntsena, kambe ngopfu-ngopfu eka Xikwembu.—2/15, tluka 21.

▫ Xana Yesu a vula yini loko a ku: “Hi mina . . . ntiyiso”? (Yohane 14:6)

Yesu a nga lo vulavula ntiyiso ni ku wu dyondzisa ntsena; u wu hanyerile ni ku va ximunhuhatwa xa wona. Xisweswo, Vukreste a hi kungu ntsena; i ndlela ya vutomi.—3/1, tluka 15.

▫ I dyondzo yihi leyi chavelelaka leyi nga eka Pisalema 51?

Pisalema leyi yi hi pfuna ku xiya leswaku loko hi wela exidyohweni kambe hi tisola hakunene, Tata wa hina la nge matilweni wa rirhandzu u ta hi twa loko hi huwelela hi lava musa kutani u ta hi ponisa leswaku hi nga heleriwi hi ntshembo. Hambi swi ri tano, hi fanele hi khumbeka swinene hi xisolo xihi na xihi lexi vekiwaka evitweni ra Yehovha.—3/15, tluka 18.

▫ I yini lexi kombisiwaka hi nkhuvulo wa mati?

Nkhuvulo i xikombiso xa le handle xa munhu xa ku tinyiketela eka Yehovha Xikwembu. Ku nyuperisiwa ematini swi kombisa leswaku lava va khuvuriwaka va fa eka ndlela ya vutomi lebyi a va hanya byona. Ku humesiwa ematini swi kombisa leswaku sweswi va hanyela ku rhandza ka Xikwembu, va ku rhangisa evuton’wini bya vona. (Matewu 16:24)—4/1, matluka 5-6.