Swivutiso Swa Vahlayi

Xana Yohane loyi a khuvuleke Yesu u fanele ku vuriwa “Yohane Mukhuvuri” (“John the Baptist”) kumbe “Yohane lowo Khuvula” (“John the Baptizer”)?

Mavitelo lawa hamambirhi ma lulamile naswona ma sekeriwa hi Bibele.

Yohane a a ta “lunghisela Hosi tiko leri lulameke,” laha a nga swi endla hi ku “byela vanhu ku hundzuka va khuvuriwa, leswaku Xikwembu xi va rivalela swidyoho swa vona.” (Luka 1:17; 3:3) Muapostola Matewu u tsarile a ku: “Enkarhini wolowo ku humelela Yohane Mukhuvuri, a dyondzisa emananga ya Yudiya, a ku: ‘Hundzukani, hikuva Mfumo wa matilo wu le kusuhi.’ . . . Kutani vaaki va Yerusalema, ni vaaki hinkwavo va Yudiya . . . va huma va ya ka yena; kutani a va khuvula enambyeni wa Yordani, va ri karhi va tivula swidyoho swa vona.”—Matewu 3:1-6.

Xiya leswaku Matewu u vitana Yohane a ku i “Mukhuvuri.” Matewu, loyi a rungula mhaka yakwe hi ndlela leyi yi nga twisisekaka ha yona kahle eka Vayuda, u fanele a vone onge Vayuda va ta swi tiva leswaku “Mukhuvuri” i mani. U tirhise “Mukhuvuri” onge i xivongo. Yesu ni vadyondzisiwa vakwe va tirhise “Yohane Mukhuvuri,” hi laha malandza ya Heroda ma endleke ha kona.a—Matewu 11:11, 12; 14:2; 16:14.

Mudyondzisiwa Marka u vika ku tirhisiwa loku fanaka ka “Mukhuvuri.” (Marka 6:25; 8:28) Kambe loko a tivisa ta Yohane, Marka u n’wi vita “Yohane lowo Khuvula.” (Marka 1:4, NW) Xigriki lexi tirhisiweke eka Marka 1:4 xi ni ku hambananyana ni tindzimana letin’wana. Nakambe Marka 1:4 yi nga ha hundzuluxeriwa yi ku “loyi a khuvulaka.” Marka a a kandziyisa lexi Yohane a endla xona; hi yena loyi a khuvula, hi lowo khuvula.

Hambi swi ri tano, a ku kona laha ku kombiwaka leswaku hi fanele hi hambanisa tindlela leti to vita Yohane. Eka Marka 6:24, 25, hi hlaya leswi hi ta Salomu: “A huma, a ya vutisa mana wa yena a ku: ‘Ndzi ta kombela yini xana?’ Yena a ku: ‘Kombela nhloko ya [Yohane lowo Khuvula, NW]!’ Hi ku hatlisa ni mahika a nghena ka hosi, a kombela, a ku: ‘Ndzi lava leswaku u ndzi nyika nhloko ya Yohane Mukhuvuri enkambeni, sweswi-sweswi.’” Mavitelo lawa hamambirhi a ma tirhisiwa ku fana.

Vanhu van’wana va nga ha twisisa rito “Mukhuvuri” hi ku ya hi nhlamuselo ya vumbirhi ya xihlamusela marito xin’wana, leyi nge: “Xirho kumbe museketeri wa vandla ra evhangeli ra Protestente leri ri vonakaka hi vulawuri bya rona ni nkhuvulo wa vapfumeri ntsena, wa ku va nyuperisa ematini.” Kahle-kahle Yohane a a nga ri wo tano.

Hikwalaho, “Yohane Mukhuvuri” na “Yohane lowo Khuvula” i mavitanelo lamanene ni lama fanelaka.

[Nhlamuselo ya le hansi]