Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Loko swi ri tano, vona loko u ta swi kota ku hlamula swivutiso leswi landzelaka:

▫ Xana i mpfuno wihi lowu nga nyikiwaka vavabyi na vadyuhari evandlheni namuntlha?

Evandlheni ro sungula ra Vukreste, a ku tsariwa mavito ya tinoni leti lavaka mpfuno wa swilo leswi vonakaka. (1 Timotiya 5:9, 10) Hi laha ku fanaka namuntlha, minkarhi yin’wana vakulu va nga ha tsala mavito ya vavabyi ni vadyuhari lava lavaka nkhathalelo wo hlawuleka. Hambi swi ri tano, a swi fanelanga swi siyeriwa vakulu ntsena leswaku va endla leswi. Hinkwerhu evandlheni hi fanele hi xiya swilaveko swo tano. (1 Timotiya 5:4-8)—8/15, matluka 28-9.

▫ Xana mhaka ya le Bibeleni ya ku mitiwa ka Yonasi hi xiharhi xa le matini a yi tshembisi?

Doo, hambi ku ri nkavavangaheti leyitsongo, nyankwave lonkulu wo basa, kumbe nkavavangaheti leyorhula yi nga n’wi mita munhu. Ku ya emahlweni, Yesu hi byakwe u swi tiyisisile leswaku mhaka ya Yonasi i ntiyiso. (Matewu 12:39, 40)—8/15, tluka 32.

▫ Xana ku tirhisiwa ka switshungulo ni timhamba ta vukholwa-hava swi ni vuyelo byihi lebyi vavisaka?

Loko vanhu va swi tirhisa, swi va tshikisa ku tirhisa vutlharhi bya ku langutana ni swirhalanganya swa vona naswona swi va susumetela ku languta mikateko yi ri rimitsu ra hinkwaswo. Swi tlhela swi endla loyi a swi tirhisaka a titwa onge u sirhelelekile. Lexi xiyekaka ngopfu, munhu la tshembaka matimba ya timhamba ta masalamusi ni switshungulo swa mikateko u tshika vutomi bya yena byi lawuriwa hi matimba lama nga vonakiki.—9/1, tluka 4.

▫ Xana hi swihi swilo swa mune leswi nga pfunaka ha yona leswaku vukati byi khomelela?

Leswi i ku tiyimisela ku yingisela, ku kota ku tisola, ku kota ku nyikela nseketelo wa nkarhi na nkarhi hi tlhelo ra mintlhaveko, ni ku navela ku khomana hi rirhandzu. (1 Vakorinto 13:4-8; Vaefesa 5:33; Yakobo 1:19)—9/1, tluka 20.

▫ Xana hi yihi ndlela leyi Yehovha a hi pfunaka ku tiyisela loko hi langutana ni miringo?

Yehovha u hi pfuna hi ku tirhisa swikombiso swa ku tiyisela leswi rhekhodiweke eRitweni rakwe, ku nga Bibele. (Varhoma 15:4) Loko hi anakanyisisa hi swikombiso leswi, hi khutaziwa ku tiyisela, nakambe hi tlhela hi dyondza swo tala hi ndlela leyi hi nga tiyiselaka ha yona.—9/15, matluka 11-12.

▫ Xana ku chava Xikwembu i yini ke?

Ku chava Xikwembu swi vula ku va ni xichavo eka Yehovha leswi hi susumetelaka ku endla leswi n’wi tsakisaka, hambi loko hi langutane ni miringo leyo nonon’hwa, hikuva hi rhandza Xikwembu hi timbilu ta hina hinkwato.—9/15, tluka 15.

▫ Xana hi nga ti languta njhani tintswalo ta Xikwembu?

A hi fanelanga ku languta tintswalo ta Xikwembu ti ri ta hava. Hi fanele hi fana na Pawulo ivi hi kombisa ku tlangela ka hina hi ku lwa ni ku nga hetiseki ka hina. (1 Vakorinto 9:27) Hi ndlela leyi hi ta kombisa, leswaku hi ni ku navela lokukulu ka ku endla leswi lulameke, hambi hi langutane ni ku nonon’hweriwa.—10/1, tluka 23.

▫ Ha yini swi fanela loko Pawulo a vule leswaku ku leha mbilu i mfanelo yo sungula ya rirhandzu?

Ku vuriwe leswaku vumakwerhu bya Vukreste a byi nge vi kona handle ka ku lehiselana mbilu, kumbe ku tiyiselelana. Leswi swi hikwalaho ka leswi hinkwerhu ka hina hi nga hetisekangiki, naswona ku nga hetiseki ka hina ni swihoxo swa hina swi ringa van’wana. Hikwalaho, ku lehisa mbilu i swinene leswaku rirhandzu ri va kona exikarhi ka vamakwerhu.—10/15, tluka 21.

▫ Xana Vakreste vo sungula a va ri tirhisa vito ra Xikwembu?

Vumbhoni byi vula tano. Yesu u dyondzise valandzeri vakwe ku khongela Xikwembu: “Vito ra wena a ri hlawuleke.” (Matewu 6:9) Nakambe emakumu ka vutirheli byakwe, u khongerile: “V̌ito ra wena, nḍi ri tiv̌isile v̌anhu lav̌a u nḍi nyikeke v̌ona e misav̌eni.” (Yohane 17:6, BX) Handle ka sweswo, tikopi to sungula ta Septuagint a ti ri na vito ra Xikwembu hi xivumbeko xa Tetragrammaton ya Xiheveru.—11/1, tluka 30.

▫ Xana i swikombiso swihi swa Bibele leswi kombisaka leswaku ndlela leyi hi langutaka swihoxo swa hina ha yona yi nga khumba vutomi bya hina?

Hosi Sawulo u tiomise nhloko a ala ku layiwa, ivi swihoxo swa yena swi engeteleka, eku heteleleni swi endla leswaku a dlayiwa hikwalaho ko lahliwa hi Xikwembu. (1 Samuwele 15:17-29) Hambi swi ri tano, ku nga khathariseki swihoxo ni swidyoho swakwe, Hosi Davhida u hundzukile a amukela ndzayo ivi a tshama a tshembekile eka Yehovha. Swikombiso leswi swa Bibele swi kombisa leswaku ku amukela swihoxo swa hina swi hi pfuna ku hlayisa vuxaka lebyinene ni Xikwembu naswona hi va na lunghelo ra vutomi lebyi nga heriki. (Pisalema 32:1-5)—11/15, matluka 29-30.

▫ Yehovha u va pfuna njhani vanhu vakwe loko va karhateka hikwalaho ka makhombo ya ntumbuluko kumbe hi swivangelo swin’wana?

Yehovha wa va pfuna, hayi hi ku susa matimba ya ntumbuluko hi singita kumbe hi ku endla xiendlo xin’wana lexi nga riki xa ntumbuluko, kambe u tirhisa ntamu wun’wana lowu vanhu vo tala va nga wu xiyiki ngopfu—ku nga rirhandzu. Ina, Yehovha wa va rhandza vanhu vakwe, naswona u va dyondzise ku rhandzana swinene, lerova u kota ku va endlela leswi vonakaka ku ri singita hi ku tirhisa rirhandzu leri. (1 Yohane 4:10-12, 21)—12/1, tluka 10.