Nkarhi Lowu Va Yi Hlayaka Ha Wona Ni Ndlela Leyi Va Pfunekaka Ha Yona

Ni Mixo Swinene:

Mpatswa lowu tekaneke, lowu tirhaka wu kunguhate ku pfuka ka ha sele khume ra timinete eka nkarhi wa wona lowu tolovelekeke mixo wun’wana ni wun’wana, leswaku wu tirhisa nkarhi wolowo ku hlaya swin’we Bibele wu nga si huma endlwini. Leswi wu swi hlayaka swi endla leswaku wu va ni bulo leri akaka loko se wu humile endlwini.

Nkulu wa le Nigeria u tirhisa xiyimiso lexi nga eka Xikolo xa Vutirheli bya le Tilweni tanihi xisekelo xa nhlayo wa Bibele wa ndyangu, emutini wa yena. Va hlaya xiphemu xa yona siku na siku endzhaku ko vulavurisana ka vona hi ndzimana ya siku, hi ntolovelo va swi endla ni mixo. Vana va komberiwa leswaku va cincana eku hlayeni swiyenge swin’wana leswi aviweke. Endzhaku va rhambiwa ku vutisa swivutiso eka tindzimana leti hlayiweke.

Wansati la tekiweke wa le Japani u hlaye Bibele hinkwayo kan’we hi lembe, ku sukela hi 1985. Xiyimiso xakwe i ku hlaya 20 ku ya ka 30 wa timinete a sungula hi awara ya ntlhanu ni mixo siku na siku. Loko a vula ndlela leyi a pfunekeke ha yona, u ri: “Ndzi tiyisiwile eripfumelweni. Swi ndzi pfuna ku rivala vuvabyi bya mina, ndzi anakanya hi ntshembo wa Paradeyisi.”

Makwerhu wa xisati la nga ni malembe ya 30 a ri phayona, loyi nuna wakwe a nga riki Mbhoni, u pfuka hi awara ya ntlhanu mixo wun’wana ni wu’nwana ku endla ku hlaya ka yena ka Bibele. Xiyimiso xakwe xi lava leswaku a hlaya matluka ya mune eka Matsalwa ya Xiheveru, ni ndzima yin’we eka Matsalwa ya Vukreste ya Xigriki, ni ndzimana yin’we eka Swivuriso. U hlaye Bibele hinkwayo lembe na lembe ku sukela hi 1959. U ri: “Ku hlaya ka mina ku ndzi endla ndzi titwa ndzi rhandziwa hi Yehovha . . . Ndzi kume xikhutazo, nchavelelo ni ndzulamiso.” Wa engetela: “Loko ndzi hlaya Bibele, onge hi loko Yehovha a tiyisa swipiringi swa mina siku na siku.”

Makwerhu wa xisati loyi a dyondzeke ntiyiso etikweni leri ntirho wa Timbhoni ta Yehovha a wu yirisiwile naswona a ri ni nuna la kanetaka ripfumelo rakwe. Wa swi kota ku endla nhlayo wa yena wa Bibele ku sukela hi Musumbhunuku ku ya fika hi Ravutlhanu, exikarhi ka awara ya tsevu na awara ya nkombo ni mixo. Leswi swi n’wi nyike matimba. Loko a anakanya hi laha ku hlaya ka yena Bibele ku n’wi khumbeke ha kona, u ri: “Hi dyondza ku rhandza Yehovha na Yesu, ni ku tshama hi tsakile hambi loko ku ri na swirhalanganya ni mintshikilelo yo karhi, hi ku tiva leswaku switshembiso swa Yehovha a swi tsandzeki.”

Makwerhu wa xisati loyi a veke kona eka Xikolo xa Vutirheli bya Vuphayona, u kunguhate ku endla hi laha ndzayo yi nyikeriweke ha kona kwalaho, ku endla ku hlaya Bibele ku va pakani ya siku na siku. Eku sunguleni, u swi kotile ku swi endla exikarhi ka awara ya ntlhanu ni ya tsevu ni mixo. Loko ku cinca ka yena ntirho swi lwisane na xiyimiso lexi, u cince nkarhi wa yena wu ya exikarhi ka awara ya kaye ni ya khume ni vusiku. Loko swiyimo swin’wana leswi tikaka swi tlhekeka, u ri, “A ndzi hambeta ndzi cinca xiyimiso xa mina hi ku ya hi swiyimo.”

Ni Ndzhenga:

Vamakwavo vambirhi va xisati va nyama lava nga swirho swa ndyangu wa Bethele le Brazil, va ni mukhuva wo hlaya swin’we Bibele kwalomu ka 20 wa timinete siku na siku, endzhaku ka swakudya swa ni nhlikanhi. Va hlaye Bibele hinkwayo kwalomu ka minkarhi leyi ringanaka 25; hambi swi ri tano, va tsala: “Minkarhi hinkwayo hi kuma swin’wana leswintshwa, kutani ku hlaya Bibele a ku vi nchumu lowu phirhwaka.”

Makwerhu wa xisati la nga tekiwangiki wa le Japani, u xiye leswaku hambi leswi a kurisiweke tanihi Mbhoni, a a nga ma tivi kahle Matsalwa; loko a ve phayona u kunguhate ku hlaya Bibele minkarhi hinkwayo. Sweswi u endla ku hlaya ka yena ka Xikolo xa Vutirheli bya le Tilweni loko a ri karhi a ya exibedlhele ku ya tshunguriwa, kan’we vhiki rin’wana ni rin’wana. Nindzhenga loko a ri ekaya u endla vulavisisi lebyi engetelekeke. Loko vhiki ri ya eku heleni, u ya emahlweni a hlaya Bibele, a hlawula tibuku hi ku ya hi nxaxamelo lowu ti tsariweke ha wona.

Mufana wa malembe ya 13 hi vukhale loyi a hlayeke Bibele hinkwayo makhamba manharhu, sweswi u hlaya ndzima yin’we siku na siku loko a huma exikolweni. U ri, leswi swi n’wi pfune leswaku “a titwa a rhandza Yehovha swinene.”

Mbhoni leyi khomekeke swinene tanihi wanuna la tirhaka, tanihi nkulu, tanihi nuna, nakambe tanihi tatana, u yingisela tikhasete leti rhekhodiweke ta Bibele loko a ri endleleni yo ya entirhweni hi xitimela. Loko a ri ekaya u tlhela a swi hlaya hi xiviri leswi a swi yingiseleke.

Ku tlhandlekela eka ku hlaya ka yena ka munhu hi xiyexe, phayona ra le Furwa ri yingisa khasete ya Bibele loko ri lunghiselela swakudya, loko ri ri karhi ri chayela, loko ri langutane ni minkarhi yo nonon’hwa, kumbe ku tihungasa ntsena.

Phayona ra le Japani ra 21 wa malembe hi vukhale ri tsundzuka leswaku mana wa rona a a ri khutaza leswaku ri fanele ri hlaya xo karhi xa moya siku na siku, xisweswo a a ri hlaya Bibele siku na siku hambi leswi a ri hlaya hi minkarhi leyi hambaneke, ku sukela loko ra ha ri na malembe manharhu. Endzhaku ka ku hlaya xiphemu lexi ri xi hlawuleke siku rero, a ri tiyiseka leswaku ri tlhela ri hlaya tindzimana-nkulu, naswona ri tirhisa timinete ti nga ri tingani ku pfuxeta leswi ri swi hlayeke emianakanyweni.

Mbhoni yin’wana leyi nga phayona, yi hlaye Bibele hinkwayo makhamba ya kwalomu ka khume eka malembe ya 12 lama hundzeke. Nuna wakwe a hi mupfumeri, xisweswo u endle xiyimiso xa yena xo hlaya xi va xa ndzhenga.

Ni Madyambu:

Nkulu la nga phayona ra nkarhi hinkwawo eJapani, loyi a hlayaka Bibele vusiku byin’wana ni byin’wana, a nga si ya eku etleleni, se u ni malembe ya nhungu a ri karhi a endla tano. U ri: “Ndzi rhandza swinene matsalwa lama kombisaka ndlela leyi Yehovha a anakanyaka ha yona, ndlela leyi a titwaka ha yona hi timhaka to karhi ni ndlela leyi a tamelaka swiyimo ha yona. Ku anakanyisisa hi matsalwa wolawo, swi ndzi pfune ku tekelela mianakanyo ya Yehovha ni ku pfuna vamakwerhu va xinuna ni va xisati va Vukreste ni swirho swa ndyangu wa mina.”

Nkulu wa le Furwa a a hlaya Bibele ku ringana awara yin’we madyambu man’wana ni man’wana ku sukela hi lembe ra 1979. Hakanyingi u va a ri na vuhundzuluxeri bya ntlhanu kumbe tsevu lebyi vekiweke emahlweni ka yena ku endlela ku fananisa. U ri ku hlaya ka yena hi rixaladza swi n’wi pfune ku twisisa “ndlela leyi a nga tirhisaka ha yona vutivi bya Bibele eka swiyimo swa siku rin’wana ni rin’wana.” Leswi nakambe swi n’wi endle a va la humelelaka ngopfu eku nyikeleni ka ndzayo leyi humaka eMatsalweni.

Emalembeni ya 28 lama hundzeke, makwerhu wa xinuna wa le Nigeria u swi endle mukhuva ku hlaya Tsalwa leri nyikeriweke eka Ku Kambisisa Matsalwa Siku Na Siku ni madyambu, leswaku ku ta burisaniwa ha rona mixo lowu landzelaka. Ku fambisana na sweswo, u hlaya ndzima hinkwayo eBibeleni leyi ndzimana yi tshahiwaka eka yona. Endzhaku ka loko a nghenele vukati, u ye emahlweni ni mukhuva lowu wo hlaya ni ku vulavurisana ni nsati wakwe hi rungula rero.

N’wana un’wana wa kondlo-a-ndzi-dyi loyi vatswari vakwe va nga riki Timbhoni u swi endle mukhuva ku hlaya ku ringana ntlhanu ku ya eka khume ra timinete vusiku byin’wana ni byin’wana a nga si ya eku etleleni. Teto i timinete ta risima eka yena, wa khongela a nga si hlaya ni loko a hetile ku hlaya. Pakani yakwe i ku tiva rungula leri Yehovha a ri kongomiseke eka un’wana ni un’wana wa vatsari va Bibele ku ri tsala.

Makwerhu la tekeke, la nga entirhweni wa le Bethele, u vula leswaku u hlaye Bibele kan’we hi lembe emalembeni ya nhungu lama hundzeke. U hlaya timinete ta 20 ku ya ka 30 a nga si etlela. Hambi loko a karhele swinene, loko a etlela a nga hlayanga swa n’wi tikela ku khomiwa hi vurhongo. U boheka ku pfuka a khathalela xilaveko xakwe xa moya.