Timbhoni Ta Yehovha eMisaveni Hinkwayo—Brazil

BRAZIL i tiko lerikulu hi tindlela to tala. Hi mpimo wa rona ni vaaki va rona i tiko ra vuntlhanu eka lamakulu swinene emisaveni. Ri hlanganisa kwalomu ka hafu ya ndhawu ya tiko ra Amerika Dzonga naswona i kaya ra vanhu vo tala ku tlula matiko laman’wana ya tiko-nkulu rero loko ma hlanganisiwile. Nakambe Brazil hi rona lerikulu emisaveni leri nga ni makhwati yo tala ya mpfula. Emakhwatini wolawo ku khuluka nambu lowukulu swinene emisaveni—Amazon.

Nakambe Brazil i tiko lerikulu hi ndlela yin’wana. Nhlayo ya rona ya vahuweleri va mahungu lamanene ya Mfumo wa Xikwembu yi tshinelela eka 400 000, naswona lembe leri hundzeke vanhu vo tlula 1 000 000 va ve kona eka Xitsundzuxo xa rifu ra Kreste. Hikwalaho tiko leri ri le mahlweni malunghana ni ntirho wa ku chumayeriwa hi Mfumo. Mintokoto ya sweswinyana yi kombisa mhaka leyi.

Ku Tirha Laha Xilaveko Xi Kuleke Kona

Antonio ni nsati wakwe va endle xiboho lexi nonon’hwaka xo sukela maxaka ya vona ni ku tshika ntirho lowu hakelaka kahle eSão Paulo, lowu va sirheleleke va ya tirha laha a ku ri ni xilaveko lexikulu xa vahuweleri va Mfumo, etikweni ra Minas Gerais. Nsimu ya vona yi katse ntlawa wa vatirhi va laha ku endliwaka kona, chukela. Hi siku ro sungula va chumayele kona, va sungule tidyondzo ta Bibele ta kaye. Ku nga si hela tin’hweti ta 18, a va fambisa tidyondzo to tlula 40!

Eku sunguleni, minhlangano yi khomeriwe exigaywini. Hambi swi ri tano, vahuweleri lavantshwa va lave ku vona Holo ya Mfumo ya xiviri. Hikwalaho, ku hirhiwe bazi leswaku ri rhwala vanhu vo ringana 75 ku ya evandlheni ra le kusuhi. Ntsombano wu landzerile; laha swichudeni leswintshwa swa Bibele swo ringana 45 swi veke kona naswona ku buriwe na swona. Khume-ntlhanu wa swona swi khuvuriwe entsombanweni wolowo. Kavula, mihloti ya ntsako yi khulukile hi ku olova!

Khampani leyi fanaka ya mabazi yi tirhisiwile eka maendzo lama fanaka, valawuri va yona va hi hakerise mali ya le hansi. Hi ku tlangela, Antonio u nyikele xipfuneto xo dyondza Bibele eka mulawuri wa mabazi. U pfumele ku sungula ku dyondza Bibele madyambu wolawo naswona endzhaku ka tinhweti ti nga ri tingani u khuvuriwile endzhaku ko dyondza hi matimba. Eku sunguleni, nsati wakwe a nga yi tsakeli dyondzo, kambe hi ku famba ka nkarhi u ve ni langutelo lerinene. Namutlha na yena i Mbhoni leyi khuvuriweke ya Yehovha.

Hi February 1992 vandlha ri vumbe hi vahuweleri lava gingiritekaka vo ringana 22. Hi 1994 nhlayo leyi yi engetelekile yi ya eka 42, ri ri ni maphayona ya 4 ya nkarhi hinkwawo, kumbe vachumayeri va mahungu lamanene va nkarhi hinkwawo. Hikwalaho ka sweswo, Antonio u hetelele hi ku: “Mina ni nsati wa mina hi swi vonile leswaku loko hi ‘ringa Yehovha’ tanihi laha Malakiya 3:10 yi vulaka ha kona, u ta hi ‘tšhululela eku kateka hi mpimo lo’wu tlurisaka.’”

Ku Fambisa Tibuku Ta Bibele

Kumbexana xivangelo lexi endlaka ntirho wo chumayela wu ya wu kula swinene eBrazil hi leswi Timbhoni ti fambisaka tibuku ta Bibele nkarhi wun’wana ni wun’wana. Hi xikombiso, vandlha rin’wana ri tsalele hofisi ya rhavi ra Sosayiti ya Watch Tower ri kombela 250 wa tikopi ta buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. Ha yini ti odiwa hi vunyingi?

Papila ri hlamuserile: ‘Xin’wana xa swikolo leswi nga edorobeni swi bohe ku tirhisa buku leyi tanihi buku yo dyondzisa ha yona eka tin’wana ta tidyondzo ta xona. Xiboho xa valawuri va xikolo xi vangeriwe hikwalaho ka vumbhoni bya xitshuketa lebyi nyikeriweke hi vatswari va swichudeni lava nga Timbhoni ta Yehovha ni un’wana wa valanguteri va xikolo. Onge Yehovha a nga hambeta a katekisa malandza yakwe tanihi leswi ma nyikelaka swiletelo leswinene hi buku leyi.’ Ina, naswona onge Yehovha a nga hambeta a katekisa nhluvuko lowunene entirhweni wo chumayela hi Mfumo eka tiko lerikulu ra Brazil.

[Bokisi leri nga eka tluka 8]

XIVIKO XA TIKO

Lembe ra Ntirho ra 1994

NHLONHLORHI YA LAVA NYIKELAKA VUMBHONI: 385 099

MPIMANYETO: Mbhoni yin’we eka vanhu va 404

LAVA VEKE KONA EXITSUNDZUXWENI: 1 018 210

NHLAYO-XIKARHI YA VAHUWELERI LAVA NGA MAPHAYONA: 38 348

NHLAYO-XIKARHI YA TIDYONDZO TA BIBELE: 461 343

NHLAYO YA LAVA KHUVURIWEKE: 24 634

NHLAYO YA MAVANDLHA: 5 928

HOFISI YA RHAVI: CESÁRIO LANGE

[Xifaniso lexi nga eka tluka 9]

Movha wa mpfumawulo wu ri entirhweni eSão Paulo kwalomu ka va-1940

[Xifaniso lexi nga eka tluka 9]

Ku nyikela Vumbhoni Entangeni wa Swimilani eRio de Janeiro

[Xifaniso lexi nga eka tluka 9]

Hofisi ya rhavi Cesário Lange