Xana Ku Chava Ku Ta Hela Rini?

XANA swi nga ku hlamarisa ku tiva leswaku nsirhelelo wa xiviri wu fambisana ni wa wanuna loyi a hanyeke eka malembe ya 2 000 lama hundzeke? Loko a kombisa xilaveko xa rirhandzu, Yesu Kreste u vule xifaniso lexi xiyekaka: “Munhu un’wanyana a a rhelela hi le Yerusalema, a ya eYeriko, kutani a wela emavokweni ya swigevenga, swi n’wi hluvula swiambalo, swi n’wi ba, kutani swi suka swi famba, swi n’wi siya a ri kusuhi ni ku fa.” Hambi leswi vahundzi vambirhi va honiseke muhlaseriwa loyi, Musamariya wa musa u kombise tintswalo. Kambe, i mani loyi a khathalaka hi lava hlaseriwaka hi vugevenga namuntlha? I ku ntshunxeka kwihi eka ku chava loku hi nga ku langutelaka?—Luka 10:30-37.

Hambi leswi va tivulaka lava pfumelaka eka Xikwembu, vo tala va anakanya leswaku nawu ni ku rhula swi fanele swi tisiwa hi munhu. Kambe xana swigwevo leswo leha swa le khotsweni kumbe maphorisa yo tala, lama holaka mali yo nyawula, ma nga swi kota ku herisa vugevenga? Xana wa tshemba hakunene leswaku vayimeri lava vekaka milawu, loko vo endla matshalatshala hinkwawo yo tisa nsirhelelo wo antswa hi ku tiyimisela, va nga swi herisa swilo swo tanihi ku tirhisiwa ko biha ka swidzidzirisi, vugevenga lebyi hleriweke ni vusweti? Hambi swi ri tano, ndlala ni torha ra hina ra leswo lulama a swi fanelanga swi va swa hava.—Matewu 5:6.

Pisalema 46:1 yi ri: “Šikwembu i v̌utšhav̌elo bya hina ni matimba ya hina, i ku pfuna lo’ku kumiwaka kusuhi e mapfalweni.” Hi ta swi vona leswaku marito lawa a mo va xiphato lexo saseka ntsena.

Hi laha u tivaka ha kona, tinhloko-mhaka ta mahungu siku na siku ti vika ku dlayana hi tihanyi, eka tinyimpi ta xin’wana-manana ni le minhlaselweni ya vutherorisi. Eswiphen’wini swin’wana swa misava, swi tolovelekile ku dlaya vana lava nga laviwiki kumbe vanhu lava voneke vugevenga byo karhi hi mahlo. Hikwalaho ka yini vutomi byi heleriwe hi nkoka swonghasi? Hambi leswi, ku nga ni swivangelo swo hambana-hambana swa vugevenga byo tano, ku ni xivangelo xin’we lexi hi nga fanelangiki hi xi honisa.

Hi ku ya hi Rito ra Xikwembu, ku nga Bibele, “misava hinkwayo yi le hansi ka matimba ya Lowo biha.” (1 Yohane 5:19) Kahle-kahle, Yesu Kreste u paluxe Sathana Diyavulosi tanihi “mudlayi,” a nga ri muhembi ntsena. (Yohane 8:44) Hi ku hlohlotela vanhu hi tindlela to hambana-hambana, xivumbiwa lexi xa matimba xa moya xi hlohlotela ku andza ka madzolonga namuntlha. “Mi ni khombo, n’wina misava ni lwandle, hikuva Diyavulosi ú xikele ka n’wina; u karihile ngopfu hi ku tiva leswaku nkarhi wa yena wu komile,” ku vula Nhlavutelo 12:12. Kambe, lexi tsakisaka, fambiselo leri ro homboloka ri ta siviwa hi “matilo lamantshwa ni misava leyintshwa, laha ku nga ta va ni ku lulama.”—2 Petro 3:13.

Ku tlhandlekela eka ntshembo lowu lowu hlamarisaka wa misava leyintshwa, hi wihi mpfuno lowu hi nga na wona sweswi?

Hi nga si yi languta nhlamulo leyinene ya sweswo, i swinene ku tsundzuka leswaku hambi va ri Vakreste va xiviri a va tiyiseki leswaku va ta sirheleleka eka vugevenga. Muapostola Pawulo u hlamusele makhombo lawa yena hi byakwe a hlanganeke na wona. U “lave ku dyiwa hi milambu; [u] lave ku dlawa hi swigevenga; [u] lave ku dlawa hi varikw[avo]; [u] lave ku dlawa hi vamatiko; [u] lave ku dlawa ematini ni le mananga; [u] lave ku dyiwa hi mati ya lwandle.” (2 Vakorinto 11:26) Hambi swi ri tano, Pawulo u ponile eka makhombo lawa. Swa fana ni namuntlha; hi ku va ni vukheta hi nga hambeta hi hetisisa mintirho ya hina tanihi ntolovelo, hi laha swi nga kotekaka ha kona. A hi xiyisiseni swilo swin’wana leswi nga pfunaka.

Loko munhu a tshama endhawini leyi nga ni khombo, mahanyelo lamanene ma nga va nsirhelelo, tanihi leswi vanhu va xiyisisaka van’wana swinene. Hambi leswi tinsula-voya ti kunguhataka vugevenga ti tlhela ti gevenga, to tala ti titeka ti ri vanhu ku fana ni vanhu van’wana. Papalata ku sola leswi va swi endlaka, naswona u nga ringeti ku lavisisa leswi va swi endlaka. Xisweswo, u ta endla swi nga olovi leswaku u va muhlaseriwa. Tsundzuka leswaku makhamba ma ringeta ku kumisisa lava va nga xava nchumu lowuntshwa kumbe lava endzaka va siya makaya ya vona ya nga ri na munhu, hikwalaho tivonele eka leswi u swi byelaka van’wana.

To tala ta Timbhoni ta Yehovha ti kume leswaku ndhuma ya tona ya leswaku i vatirheli yi ti endla leswaku ti sirheleleka hi mpimo wo karhi. Hakanyingi, tinsula-voya ti kombise leswaku ti xixima Vakreste vo tano, lava handle ko ya hi nghohe va tinyiketelaka ku pfuna vanhu etikweni. Timbhoni hi toxe a hi vadlayi kumbe makhamba, kumbe vanhu ‘lava rhandzaka timhaka ta van’wana,’ hikwalaho a ti vi nxungeto eka vanhu.—1 Petro 4:15, ringanisa NW.

Nsirhelelo eMisaveni Leyintshwa Ya Xikwembu

Ha karhateka hikwalaho ka ‘ku andza ka vuhomboloki’ lebyi vhumbhiweke hi Yesu Kreste, kambe, ematshan’weni yo karhateka ku tlula mpimo, hi nga va ni ntshembo wa leswaku ku nga ri khale Xikwembu xi ta ri herisa fambiselo leri ro biha. Handle ko vhumbha ku chumayeriwa ka “Evhangeli leyi ya Mfumo” emisaveni hinkwayo, Yesu u tsundzuxe valandzeri vakwe: “Loyi a tiyiselaka ku fika makumu, hi yena loyi a nga ta ponisiwa.”—Matewu 24:12-14.

Hi nga tiyiseka leswaku lava hlaselaka van’wana, minkarhi yin’wana hi tihanyi leti tsemaka nhlana, va ta herisiwa. Swivuriso 22:22, 23 yi ri: “U nga dyeleli šisiwana hi leŝi ši nga šisiwana, u nga šanisi wa nhlomulo e nyangweni ya muti; hikuv̌a Yehova o ta v̌a lamulela, la’v̌a v̌a dyeke o ta v̌a tekela v̌utomi.” Yehovha u ta herisa lava endlaka leswo biha, vo tanihi tinsula-voya, swigevenga, lava tirhisaka rimbewu hi ndlela yo biha. Ku tlula kwalaho, a nge va honisi lava weriweke hi makhombo yo tano. U ta va tlherisela leswi va lahlekeriweke hi swona, a tlhela a kondletela rihanyo ra vona.

Hakunene, lava “[fularhelaka] ŝo biha, [va] endla le’ŝinene” va ta kuma vutomi lebyi nga heriki hi ku pona nhlomulo lowukulu lowu taka kumbe hi ku pfuxiwa eku feni. “La’v̌o lulama v̌a ta fuma misav̌a, v̌a ta ṭhama ka yona hi masiku.” (Pisalema 37:27-29) Mimbuyelo yo tano yi ta kumeka hikwalaho ka gandzelo ra nkutsulo ra Yesu. (Yohane 3:16) Kambe, xana vutomi byi ta va njhani eParadeyisini leyi kondleteriweke?

Vutomi ehansi ka Mfumo wa Xikwembu byi ta tsakisa hakunene. Yehovha wa vhumbha: “Tiko ra mina ri ta aka v̌uakweni byo ṭaka, ne tindlwini le’ti ṭhembekaka, ne tinḍawini le’ti nga ni ku ṭaka e ku wiseni.” (Esaya 32:18) Hinkwavo lava nga ta kuma vutomi lebyi nga heriki va ta va va byi lulamisile vumunhu bya vona. A ku nge vi na wo biha kumbe wo homboloka, kumbe la nga ta hlaseriwa hi munhu wo tano. Muprofeta Mikiya u ri: “Va ta ṭhama uṅwana ni uṅwana e hansi ka nkuwa, ni le hansi ka vinya ya yena, ku nga ri na loyi a v̌a pfušaka.” (Mikiya 4:4; Ezekiyele 34:28) Vona ndlela leyi swi hambaneke ha yona ni tindhawu leti nga ni khombo leti hi tshamaka eka tona namuntlha!

[Bokisi/Xifaniso lexi nga eka tluka 6]

VANA NI VUKHETA

Tinsula-voya to tala ti tirha nkarhi hinkwawo, ti endla vugevenga byi va ntirho lowu thwaseriwaka. Ti nga ha tirha hi mintlawa yimbirhi kumbe yinharhu, hambi loko ku ri un’we ntsena la kombetelaka xibalesa eka wena. Swi ya swi va erivaleni leswaku loko xigevenga xi ri munhu lontsongo, xi ni khombo swinene. I yini lexi u nga xi endlaka loko u hlaseriwa?

Tshama u rhurile leswaku u nga endli khamba ri va ni rhumbu—ku pfumala ka rona ntokoto swi nga endla leswaku ri ku dlaya. Loko u ri un’wana wa Timbhoni ta Yehovha, ri byele leswaku u yona. Kambe lunghekela ku nyika khamba leswi ri swi lavaka. Loko wo hlwela, u ta titikisela swilo. Endzhakunyana ka sweswo, swi nga va swinene loko wo kombela maphephe ya wena ya vutitivisi kumbe mali yo hakela ha yona ebazini loko u tlhelela ekaya.

Hakanyingi a wu nge swi tivi leswaku nsula-voya hi yihi. Makhamba man’wana i mahlonga ya swidzidzirisi kumbe ma ni vutshila swinene, man’wana ma lava mali yo xava swakudya ntsena. Xisweswo, hambi u ya kwihi na kwihi, u nga tshuki u famba ni mali yo tala. Papalata ku ambala swin’wetsin’wetsi, swingwavila swa nsuku kumbe tiwachi to durha. Famba ni ku chayela hi ndlela leyi tolovelekeke, u nga kombisi ku chava. U nga xondzoloti vanhu onge u va ehleketelela vugevenga. Loko ku tshuka ku va ni ku balasela exitarateni, ti vumbuluxe ehansi; swiambalo swi nga ha hlantswiwa endzhaku.—Khale ka phorisa ra le Rio de Janeiro.

[Xifaniso lexi nga eka tluka 5]

Tshama u rhurile naswona u nyika khamba leswi ri swi lavaka. Loko u hlwela, u ta titikisela swilo