Wa Tsundzuka Xana?

Xana u tiphinile hi ku hlaya minkandziyiso ya sweswinyana ya Xihondzo xo Rindza? Loko swi ri tano, u ta kuma swi tsakisa ku tsundzuka leswi landzelaka:

▫ Xana swa koteka ku kuma ntiyiso wa vukhongeri?

Yesu Kreste u te: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Yesu a nga kombisanga ntsena leswaku swi nga koteka ku kuma ntiyiso kambe u kombise ni leswaku swa laveka eku gandzeleni ka hina Xikwembu. U byele wansati wa Musamariya a ku: “Vagandzeri va xiviri va . . . ta gandzela Tatana hi moya ni ntiyiso.” (Yohane 4:23)—4/15, tluka 5.

▫ Xana Robert Estienne a a ri mani, naswona u tiendlele vito hi ndlela yihi?

Robert Estienne a a ri mukandziyisi la tshameke a hanya hi lembe-xidzana ra vu-16. U nyiketele vutomi byakwe eka tibuku ta Matsalwa yo Kwetsima naswona u lwele ku twananisa marito ya Bibele ni lawa yo sungula. Endlelo rakwe ro avanyisa tibuku ta Bibele hi tindzimana i endlelo leri endliwaka emisaveni hinkwayo namuntlha.—4/15, matluka 10, 14.

▫ Xana hi vuyeriwa njhani eku hlayeni ka Bibele ka siku na siku?

Matsalwa ma tshama ma ri lamantshwa eka hina, ni vuprofeta lebyi vulavulaka hi masiku ya makumu byi ya byi twisiseka eka hina hi ku ya hi leswi hi swi voneke, leswi hi swi tweke ni leswi hi swi tokoteke. Loko ntokoto wa hina vini evuton’wini wa ku langutana ni swiphiqo wu ya wu kula, hi xi tlangela hi xitalo xitsundzuxo xa Bibele. (Swivuriso 4:18)—5/1, tluka 15.

▫ Xana tindzimana ta Bibele ti nga tsundzukiwa hi ndlela yihi?

Loko u ri karhi u hlaya Bibele, fungha matsalwa lawa u ma hlawuleke lawa u lavaka ku ma tsundzuka, kumbe u ma tsala emakhadini u veka makhadi lawa laha u nga ta ma vona masiku hinkwawo. Loko u ri karhi u ringeta ku nhlokohata matsalwa lawa, anakanyisisa ha wona kutani u tlhela u ma tirhisa. U nga ringeti ku nhlokohata yo tala hi nkarhi wun’we, nkarhi wun’wana ku nga ha va rin’we kumbe mambirhi vhiki rin’wana ni rin’wana.—5/1, matluka 16, 17.

▫ Hi rihi rungula leri Evhangeli ya Luka yi nga na rona leri engetelaka leswi vatsari van’wana va Evhangeli va swi tsaleke?

Hambi leswi timhaka to tala leti tsariweke hi Luka ti fanaka ni ta Matewu, ti hambanile hi 59 wa tiphesente ntsena. Luka u tsale mahlori ya tsevu lama kumekaka ebukwini yakwe ntsena naswona u vike swifaniso swa Yesu swo tlula nhlayo leyi yi andzisiwe kambirhi, leswi vatsari van’wana va Tievhangeli va nga swi vikangiki.—5/15, tluka 12.

▫ Hi yihi miseve ya ku vonakala ya ntiyiso leyi xiyekaka leyi paluxiweke hi 1935?

Hi lembe rero vanhu va Yehovha va twisise leswaku ntshungu lowukulu lowu hlamuseriweke eka Nhlavutelo 7:9, 14 a ku nga ri ntlawa wa vumbirhi wa le tilweni, kambe a ku ri lava nga ni mintshembo ya laha misaveni. (Yohane 10:16)—5/15, tluka 20.

▫ Hi tihi tindlela leti tirhaka leti ha tona hi nga chavelelaka lava feriweke?

Yingisela. Nyika xitiyisekiso. Tiendle u kumeka. Teka goza loko swi fanerile. Tsala papila kumbe u rhumela khadi leri chavelelaka. Khongela na vona. (Yakobo 5:16) Hambeta u va pfuna.—6/1, matluka 13, 14.

▫ Xana vamakwerhu va xinuna ni va xisati va moya va nga endla yini ku pfuna lava nge mindyangwini leyi avaneke hi vukhongeri leswaku va tiyisela?

Nkarhi na nkarhi vulavula hi ndlela leyi khutazaka, u vula marito lama khutazaka. (1 Vatesalonika 5:14) Swiendlo leswi swi tirha tanihi leswi phyuphyisaka mianakanyo ni miri wa vona. Loko swi koteka ni loko swi fanerile, va rhambe emintirhweni ya swa le tilweni ni le ku tihungaseni. Va nghenise eswikhongelweni swa wena. (Varhoma 1:9; Vaefesa 1:16)—6/1, tluka 29.

▫ Hi tihi tihakelo leti humaka eka ku lehisa mbilu loko hi ri evutirhelini bya nsimu?

Ku lehisa mbilu ku pfuna muhuweleri wa Mfumo ku tiyisela ku honisiwa ni ku kanetiwa kun’wana ni kun’wana. Ematshan’weni ya ku holova ni vini va miti lava hlundzukeke, vatirheli lava lehisaka mbilu va ta swi kota ku nyika nhlamulo yo rhula kumbe va hambana na vona hi ku hatlisa, hi ndlela yoleyo va tshama va rhurile naswona va tsakile. (Matewu 10:12, 13) Ku tlula kwalaho, lava fanaka ni tinyimpfu va ta kokeleka erungulweni ra Mfumo.—6/15, tluka 9.

▫ Ha yini ku tiva ntiyiso wa Bibele swi ri swa nkoka swinene?

Ku tiva ntiyiso swi hi ntshunxa emavunweni, ku pfilunganyeka ni vukholwa-hava. Loko hi hanya ha wona, ntiyiso wu hi tiyisa leswaku hi tiyisela loko hi langutane ni swiyimo swo tika naswona wu hi nyika ntshembo lowu hi endlaka hi yima hi tiyile loko hi ri emiringweni.—7/1, tluka 8.

▫ Hi byihi vutihlamuleri lebyikulu lebyi vandlha leri totiweke ra Vukreste ri siveke Israyele wa ntumbuluko ha byona?

I lunghelo ro nyikela vumbhoni hi vukulukumba bya Yehovha eka matiko. (Esaya 43:21; 1 Petro 2:9)—7/1, tluka 19.

▫ I yini lexi hlamuseriweke hi marito ya muapostola Petro lama nge wanuna u fanele ku ‘fundzha’ nsati wa yena? (1 Petro 3:7)

Wanuna la fundzhaka nsati wakwe a nge n’wi tsongahati kumbe ku n’wi tekela ehansi. Ematshan’wini ya sweswo, u swi kombisa hi marito ni swiendlo swa yena—exihundleni ni le rivaleni—leswaku wa n’wi xixima. (Swivuriso 31:10-31)—7/15, tluka 19.

▫ Ha yini ku ri rirhandzu ku hlongola mudyohi la nga hundzukiki evandlheni ra Vukreste?

Ku susa i xikombiso xo rhandza Yehovha ni tindlela takwe. (Pisalema 97:10) Goza leri ri kombisa rirhandzu eka lava va landzelaka swiendlo leswo lulama hikuva ri susa exikarhi ka vona loyi a nga ni nhlohlotelo wo biha eka vona; ri tlhela ri sirhelela ku tenga ka vandlha. (1 Vakorinto 5:1-13)—7/15, tluka 25.

▫ Xana “nandza la tshembekaka, wo tlhariha,” la vuriweke hi Yesu eka Matewu 24:45-47, a nga voniwa njhani namuntlha?

Ngopfu-ngopfu u voniwa hi ntirho lowu a wu endlaka hi ku humesa tibuku leti sekeriweke eBibeleni, ku dyondzisa ni ku chumayela “evhangeli leyi ya Mfumo,” ni ku namarhela ka yena swinene Rito ra Xikwembu, Bibele. (Matewu 24:14; 28:19, 20)—8/1, tluka 16.