Xikwembu, Mfumo, Na Wena

“Kereke Ni Mfumo Swi Langutanile Eka Nhlawulo Wa Malunghana Ni Ku Dlaya Vukati Le Ireland”

NHLOKO-MHAKA leyi leyi nga eka The New York Times yi kombisa ndlela leyi vanhu namuntlha va nga ha langutanaka ha yona ni ku hlawula exikarhi ka leswi Mfumo wu lavaka swona ni leswi kereke ya vona yi dyondzisaka swona.

Xihloko lexi xi te: “Leswi se ku saleke nkarhi lowu nga endliki ni n’hweti leswaku ku endliwa nhlawulo malunghana ni loko ku fanele ku herisiwa vumbiwa byo yirisa ku dlaya vukati, tiko ra Ireland leri teleke Marhoma Khatoliki ri hlalela ku kwetlembetana ka varhangeri va Hulumendhe ya rona ni va kereke ya rona.” Mfumo wu kunguhate ku herisa ku yirisiwa ka ku dlaya vukati, kasi Kereke ya Khatoliki yi kanetana swinene ni ku dlaya vukati u tlhela u nghenela vukati lebyintshwa. Makhatoliki ya le Ireland ma boheke ku hlawula exikarhi ka Kereke ni Mfumo. Loko ku langutiwa vuyelo bya kona, Mfumo wu lo hlula hi nkateko.

Lexi hlamarisaka swinene, hi malembe yo tala le N’walungwini wa Ireland vanhu a va langutane ni nkwetlembetano lowukulu malunghana ni vuhosi bya tiko. Vo tala va dlayiwile. Marhoma Khatoliki ni Maprotestente a va ri ni malangutelo lama kanetanaka ya mayelana ni Mfumo lowu va nga tivekaka ehansi ka wona: va hambeta va fumiwa hi mfumo wa Britain le N’walungwini wa Ireland kumbe Ireland hinkwaro ri fumiwa hi mfumo wa le xikarhi.

Hi ku fanana, etikweni leri khale a ri vuriwa Yugoslavia, valawuri lava a va fuma a va lava leswaku swirho swa ripfumelo leri nga faniki, leswi katsaka Makhatoliki na Maorthodox swi ya lwa enyimpini yo lwela tiko. Eka vaaka-tiko lava tolovelekeke, xana a va ta hlawula yini? Xana a va fanele va landzela lava vulaka leswaku va yimela Mfumo, kumbe a va fanele va yingisa Xikwembu, lexi nge: “U nga tshuki u dlaya . . . Rhandza munhu-kuloni kukota loko u tirhandza”?—Varhoma 13:9.

U nga ha anakanya leswaku xiyimo xa muxaka wolowo a xi nge pfuki xi ku khumbile. Kambe xi nga ku khumba. Entiyisweni, xi nga ha ku khumba hambi ku ri sweswi. Ebukwini ya yena leyi nge The State in the New Testament, mufundhisi Oscar Cullmann u vulavula hi “swiboho leswi vulaka vutomi ni rifu leswi Vakreste va manguva lawa va faneleke kumbe va bohekaka ku swi endla eswiyin’weni leswi chavisaka loko va xungetiwa hi tihulumendhe to lerisa.” Hambiswiritano, u tlhela a vulavula hi “vutihlamuleri bya xiviri lebyi ringanaka ni lebyi nga bya nkoka bya Mukreste un’wana ni un’wana—ni Mukreste la hanyaka ehansi ka swiyimo leswi vuriwaka swa ‘ntolovelo,’ ‘swa siku na siku’—leswaku a ta kota ku langutana ni ku tihlamulela eka xiphiqo lexikulu lexi a langutanaka na xona hikwalaho ka leswi a nga Mukreste ntsena.”

Kutani xana vuxaka lebyi nga kona exikarhi ka vukhongeri ni Mfumo byi fanele byi va khumba Vakreste namuntlha? Hakunene byi fanele byi va khumba. Ku sukela eminkarhini ya khale, Vakreste va ringete ku hlakulela langutelo leri ringaniseriweke hi valawuri va tiko. Murhangeri wa vona, Yesu Kreste, u avanyisiwile, a soriwa ni ku dlayiwa hi Mfumo wa Rhoma. Vadyondzisiwa va yena a va boheka ku twananisa vutihlamuleri bya vona bya Vukreste ni mintirho ya vona eka Mfumo wa Rhoma. Hikwalaho, ku kambisisa vuxaka bya vona ni valawuri, swi ta nyika Vakreste nkongomiso namuntlha.

[Laha Xifaniso Xi Humaka Kona eka tluka 3]

Tom Haley/Sipa Press