Xiviko Xa Vahuweleri Va Mfumo

Ku Yima U Tiyile eXikolweni Swa Vuyerisa

BIBELE ya vhumbha: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.” (Esaya 54:13) Hi mongo lowu anameke, “v̌ana v̌a wena hikwav̌o” ku nga ha va malandza ya Xikwembu ya laha misaveni hinkwawo, ku katsa ni lamatsongo swinene. Namuntlha, vatswari lava nga Vakreste va endla matshalatshala ya leswaku vana va vona va “v̌a v̌adyonḍisiwa v̌a Yehova” ekaya ni le minhlanganweni ya Vukreste.

Kambe, loko va ri exikolweni, vantshwa va Vakreste va langutana ni mitlhontlho yo tika. Hakanyingi va tikuma va boheka ku yima va tiyile eka leswi va swi dyondzeke eBibeleni. Naswona hi ku endla tano, vuyelo byi nga ha pfuna swichudeni ni vadyondzisi hi ndlela leyi fanaka, hilaha swi kombisiweke hakona hi ntokoto lowu landzelaka wo huma eMicronesia.

Le xihlaleni lexitsongo xa Tol, xa le vupela-dyambu bya Pacific, eSwihlaleni swa Chuuk, vadyondzisi va xikolo xa kwalaho va byele vana hinkwavo leswaku va lunghiselela ni ku hlanganyela eka nkhuvo wa xikolo wo tlangela Halloween. Vadyondzi lava nga Timbhoni a a va swi tiva leswaku nkhuvo lowu wu nga ha katsa swikhavisi ni swiambalo leswi nga ni swifaniso swa swipuku, vatokoloxi ni valoyi—leswi hinkwaswo ka swona swi fambisanaka ni mikhuva ya vungoma. Vana lava a va swi kotanga ku hlanganyela, hikwalaho ka ripfalo ra vona.a

Hikwalaho ka ndzetelo wa Bibele lowu va wu kumeke ekaya ni le vandlheni ra Vukreste, a a va swi tiva leswaku mikhuva yo tano a yi xi tsakisi Xikwembu, hambiloko yi endleriwa ku titsakisa ntsena. Leswaku va kota ku hlamusela xiyimo xa vona kahle, vana lava va rhambe Barak, un’wana wa varhumiwa va Timbhoni la nga kwalaho xihlaleni, leswaku a ya vulavula ni vadyondzisi va vona.

Endzhaku ko twa nhlamuselo ya kona, vadyondzisi va lunghiselele nhlangano wa vumbirhi, lowu eka wona Barak a fanele a ya vulavula ni vatirhi hinkwavo va le xikolweni. Eka nhlangano lowu, Barak u andlale mintiyiso leswaku a kombisa leswi Halloween yi nga swona hakunene. U teke rungula rakwe eka minkandziyiso yo hlayanyana ya Watch Tower, swin’we ni le ka tibuku tin’wana. Vadyondzisi ni vafambisi a va hlamarile ku twa hi ta masungulo, matimu ni vukhongeri lebyi katsekaka eka nkhuvo lowu. Va hlawule ku va ni nhlangano wa vatirhi hinkwavo, leswaku va boha ndlela yo lulamisa xiyimo lexi.

Endzhaku ka masiku ma nga ri mangani, ku tivisiwe xitiviso lexi a xi nga rindzeriwanga. Malunghiselelo hinkwawo ya Halloween ma herisiwile. Xikolo a xi nga ta yi tlangela Halloween lembe rero. Mawaku vuyelo lebyinene swonghasi, lebyi tisiweke hi ku tiyimisela ka vantshwa va Timbhoni, leswaku va endla leswi lulameke exikolweni! Vantshwa a va fanelanga va chava kumbe ku va ni tingana to yimela ntiyiso wa Bibele va tiyile.

Emisaveni hinkwayo, Timbhoni ta Yehovha ti dyondzisa vana va tona ku tirha hi matimba exikolweni. Vantshwa va Timbhoni na vona va leteriwa leswaku va hanya hi ku landza misinya ya milawu ya Bibele ni ku byela van’wana hi ntshembo ni tidyondzo ta vona loko va kuma nkarhi. Hambiloko vuyelo byi nga tsakisi kumbe ku hatlisa hilaha byi veke hakona eka mhaka leyi, vantshwa va nga va ni xivindzi ni ku eneriseka hi ku tiva leswaku va endla leswi lulameke. Naswona xa nkoka swinene, a va tiyiseke leswaku Tata wa vona wa le tilweni wa tsaka naswona u ta va katekisa hikwalaho ka ku yingisa ka vona hi ku tshembeka.

[Nhlamuselo ya le hansi]