Swivutiso Swa Vahlayi

“Xihondzo xo Rindza” xa August 15, 1996, xi te: “Eka xiphemu xo hetelela xa nhlomulo, ‘vanhu’ lava balekeleke etlhelweni ra Yehovha va ta ponisiwa.” Xana leswi swi vula leswaku endzhaku ka xiphemu xo sungula xa nhlomulo lowukulu, vanhu vo tala lavantshwa va ta ya etlhelweni ra Xikwembu?

A ku nga vuriwi swona sweswo.

Marito ya Yesu lama nga eka Matewu 24:22 ma ta hetiseka hi xitalo enkarhini lowu taka hi ku pona xiphemu xo sungula xa nhlomulo lowukulu lowu taka, wa ku hlaseriwa ka vukhongeri. Xihloko lexi xi te: “Tsundzuka leswaku ‘masalela’ ya vatotiwa ni ‘ntshungu lowukulu,’ ana se va ta va va ponisiwile loko Babilona Lonkulu a wa hi ku hatlisa, hilaha ku heleleke, eka xiphemu xo sungula xa nhlomulo.”

Vanhu vo tano lava tshembekaka a va nge vi ekhombyeni loko Yesu ni vuthu ra yena ra le tilweni va teka goza exiphen’wini xo hetelela xa nhlomulo. Kambe, xana i vamani lava nga ta pona xiphemu xexo xa nhlomulo? Nhlavutelo 7:9, 14 yi kombisa leswaku ntshungu lowukulu lowu nga ni ntshembo wa laha misaveni wu ta pona. Ku vuriwa yini hi Vakreste lava totiweke hi moya? “Swivutiso Swa Vahlayi” eka Xihondzo xo Rindza xa August 15, 1990, swi hlamusele mhaka leyi ha yona hi nga tiyisekiki hi nkarhi lowu masalela ya vatotiwa ma nga ta yisiwa ha wona etilweni. Hikwalaho xihloko lexi xa sweswinyana (August 15, 1996) xi siye mhaka empfukeni hi ku nyikela nhlamuselo leyi angarhelaka: “Hilaha ku fanaka eka xiphemu xo hetelela xa nhlomulo, ‘vanhu’ lava balekeleke etlhelweni ra Yehovha va ta ponisiwa.”

Mayelana ni leswaku ku ta va ni vanhu vo karhi lava nga ta kota ku dyondza ntiyiso ivi va ta etlhelweni ra Xikwembu endzhaku ka ku sungula ka nhlomulo lowukulu, xiya marito ya Yesu lama nga eka Matewu 24:29-31. Endzhaku ka ku sungula ka nhlomulo, xikombiso xa N’wana wa munhu xi ta vonaka. Yesu u vule leswaku vanhu va tinxaka hinkwato ta misava va ta tiba swifuva ni ku ba nkosi. A nga vulanga nchumu malunghana ni leswaku vanhu va ta xalamukela xiyimo lexi, va hundzuka, va ya etlhelweni ra Xikwembu ivi va va vadyondzisiwa va ntiyiso.

Hi ku fanana, exifanisweni xa tinyimpfu ni timbuti, N’wana wa munhu wa humelela naswona u hambanisa vanhu hi ku va avanyisa hi ku ya hi leswi va swi endleke kumbe leswi va nga swi endlangiki enkarhini lowu hundzeke. Yesu a nga vulanga nchumu mayelana ni vanhu lava kombiseke timfanelo to fana ni ta timbuti nkarhi wo leha, lava hi xitshuketa va hundzukaka ivi va fana ni tinyimpfu. U tela ku ta avanyisa vanhu hi ku ya hi leswi ana se va tikombeke va ri swona.—Matewu 25:31-46.

Hambiswiritano, a hi na xivangelo xo tiyiseka ngopfu hi yinhla leyi. Vanhu va Xikwembu, lava totiweke ni va ntshungu lowukulu, va swi tiva leswi va faneleke va swi endla sweswi—ku chumayela ni ku endla vanhu vadyondzisiwa. (Matewu 28:19, 20; Marka 13:10) Sweswi i nkarhi lowu hi faneleke hi hlayisa xitsundzuxo lexi etimbilwini ta hina: “Hina hi tirhisanaka ni Xikwembu, ha mi khongotela nakambe, hi ri: Leswi mi amukeleke tintswalo ta Xikwembu, mi nga ti tshiki ti wela hansi! Hikuva Xikwembu xi te: ‘Ndzi ku yingisile enkarhini wa mina wa ku tsetselela, esikwini ra mina ra ku ponisa, ndzi ku lamulerile.’ Vonani, nkarhi lowunene wa ku tsetseleriwa wu fikile, namuntlha hi rona siku ra ku ponisiwa.”—2 Vakorinto 6:1, 2.