Ndlela Leyinene
TIMBHONI TA YEHOVHA ti khumbeke swinene malunghana ni ku hohloka ka xiyimo xa vukhongeri emisaveni ni mahanyelo yo biha ni ku va vanhu va nga ha byi tshembi vukhongeri. Hikwalaho ka sweswo, minkarhi yin’wana ti vitaniwa van’waxisungusungu. Kambe, xana ti tano ke? E-e. Hambileswi ti nga ni mimpimanyeto leyi tiyeke ya vukhongeri, a hi van’waxisungusungu hi ku ya hi ndlela leyi rito leri se ri tirhisiwaka ha yona. A ti va sindzisi varhangeri va tipolitiki leswaku va simeka langutelo ro karhi, naswona a ti tirhisi minkombiso ya ku vilela ni madzolonga leswaku ti lwisana ni lava va nga pfumelelaniki na tona. Ti kume ndlela leyinene. Ti tekelela Murhangeri wa tona, Yesu Kreste.
Timbhoni ta Yehovha ta tshemba leswaku ntiyiso wa vukhongeri wu kona, ni leswaku wu kumeka eBibeleni. (Yohane 8:32; 17:17) Kambe Bibele yi dyondzisa Vakreste leswaku va va ni tintswalo, vunene, ku rhula ni ku anakanyela—ku nga timfanelo leti nga pfumelelaniki ni ku hisekela etlhelo. (Vagalatiya 5:22, 23; Vafilipiya 4:5) Ebukwini ya Bibele ya Yakobo, Vakreste va ntiyiso va khutaziwa ku hlakulela “vutlhari byo ta hi le henhla,” lebyi ku vuriwaka leswaku “byi ni ku rhula, ni ku olova, ni ku yingisela, byi tele musa ni mihandzu leyinene; kambe ngopfu-ngopfu byi tengile.” Yakobo u engeterile a ku: “Mihandzu ya hanyelo leri lulameke yi huma eka mbewu leyi nga byariwa hi ku rhula, hi vanhu lava tirhaka mintirho ya ku rhula.”—Yakobo 3:17, 18.
Timbhoni ta Yehovha ta swi tsundzuka leswaku Yesu a a wu hisekela ngopfu ntiyiso. U byele Pontiyo Pilato a ku: “Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso.” (Yohane 18:37) Hambileswi a ri nhenha leyi yimelaka ntiyiso, a nga kalanga a sindzisa van’wana leswaku va amukela leswi yena a swi kholwaka. Ematshan’weni ya sweswo, a a fikelela mianakanyo ni timbilu ta vona. A a swi tiva leswaku Tata wakwe wa le tilweni, ku nga Xikwembu lexi nga ni “v̌unene [ni ku lulama]” xi ta boha leswaku i ndlela yihi naswona hi rini laha xi nga ta susa vukanganyisi ni vuhomboloki emisaveni. (Pisalema 25:8) Hikwalaho a nga kalanga a lava ku tshikilela lava a va nga pfumelelani na yena. Ku hambana ni sweswo, a va ri varhangeri va ndhuvuko wa vukhongeri va siku ra yena lava ringeteke ku tshikilela Yesu.—Yohane 19:5, 6.
Timbhoni ta Yehovha ti ni mimpimanyeto leyi tiyeke mayelana ni tidyondzo ta vukhongeri, naswona ti kombisa timfanelo letinene etimhakeni ta mahanyelo. Ku fana na muapostola Pawulo, ta tiyiseka leswaku “ku ni Hosi yin’we, ni ku pfumela kun’we, ni nkhuvulo wun’we” ntsena. (Vaefesa 4:5) Naswona ta ma tsundzuka marito ya Yesu lama nge: “Nyangwa leyi yisaka evutomini yi khumile swinene, ni ndlela leyi yaka kona yi larile, kutani lava va yi kumaka a va talanga.” (Matewu 7:13, 14) Hambiswiritano, a ti ringeti ku sindzisa van’wana leswaku va landzela tidyondzo ta tona. Ematshan’weni ya sweswo ti tekelela Pawulo naswona ti “khongotela” hinkwavo lava navelaka ku “[vuyelelana] na Xikwembu” leswaku va vuyelelana na xona. (2 Vakorinto 5:20) Leyi i ndlela leyinene. I ndlela ya Xikwembu.
Xisungusungu xa vukhongeri, tanihi laha rito leri ri tirhisiwaka hakona namuntlha, xi hambane ngopfu ni sweswo. Van’waxisungusungu va tirhisa tindlela to tala—ku katsa ni madzolonga—leswaku va rhwexa vanhu milawu ya vona. Hi ku endla tano, va va xiphemu xa nkoka xa fambiselo ra tipolitiki. Hambiswiritano, Yesu u vule leswaku valandzeri va yena a va fanelanga va va “va misava.” (Yohane 15:19; 17:16; Yakobo 4:4) Hi ku pfumelelana ni marito lawa, Timbhoni ta Yehovha ti hlayisa vukala-tlhelo lebyi tiyeke eka minkwetlembetano ya tipolitiki. Naswona, hilaha swi vuriweke hakona hi Fuoripagina, phepha-hungu ra le Italy, “ku hava ni xin’we lexi ti xi sindzisaka eka munhu un’wana; un’wana ni un’wana u ntshunxekile ku amukela kumbe ku ala leswi ti swi vulaka.” Ku va ni vuyelo byihi? Rungula ra ku rhula ra Bibele ra Timbhoni ri koka vanhu va tinxaka hinkwato, hambi ku ri lava va tshameke va va van’waxisungusungu.—Esaya 2:2, 3.
Misava Leyi Nga Ni Mahanyelo Lamanene
Timbhoni ta swi xiya leswaku vanhu va nge koti ku swi tlhantlha swiphiqo leswi karhataka van’waxisungusungu. U nge n’wi sindzisi munhu leswaku a va ni ripfumelo eka Xikwembu kumbe ku amukela tidyondzo ta wena ta vukhongeri. Ku anakanya leswaku nchumu wo tano wu nga koteka, swi vange madzolonga lama chavisaka ematin’wini, yo tanihi Tinyimpi ta Nkutsulo, Minkonaniso ya malembe ya le xikarhi, ni ku “hundzuriwa” ka Maindia ya le Amerika. Hambiswiritano, loko u tshemba Xikwembu, u ta tiyimisela ku tshika timhaka emavokweni ya xona.
Hi ku ya hi Bibele, Xikwembu xi veke nkarhi lowu ha wona xi nga pfumelela vanhu ku tlula milawu ya xona naswona xisweswo swi vanga mahlomulo ni ku vaviseka. Nkarhi wolowo wu kusuhi ni ku hela. Ana se Yesu wa fuma tanihi Hosi eMfun’weni wa Xikwembu wa le tilweni, naswona ku nga ri khale Mfumo lowu wu ta teka goza ro susa tihulumendhe ta vanhu ivi wu lawula timhaka ta vanhu ta siku na siku. (Matewu 24:3-14; Nhlavutelo 11:15, 18) Vuyelo bya kona byi ta va paradeyisi ya misava hinkwayo leyi ku rhula ni ku lulama swi nga ta va eka yona hi xitalo. Enkarhini wolowo a ku nga ha vi ni ku kanakana malunghana ni ndlela leyi Xikwembu xa ntiyiso xi faneleke xi gandzeriwa ha yona. “La’v̌o lulama v̌a ta fuma misav̌a, v̌a ta ṭhama ka yona hi masiku.” (Pisalema 37:29) Timfanelo leti nga ta va kona hilaha ku nga heriki to tanihi rirhandzu, ntiyiso, vululami ni vunene ti ta humelela leswaku ku vuyeriwa vanhu hinkwavo lava yingisaka.
Loko a anakanya hi nkarhi wolowo, mupisalema hi ndlela yo tlhokovetsela u ri: “V̌unene ni ku lulama ŝi hlanganile, ku lulama ni ku rula ku ntŝontŝanile; ku ṭhembeka ku ta mila misav̌eni, ku lulama ka le henhla e tilweni ku ta languta e hansi. Ha kunene Yehova o ta nyika nkateko wa yena; tiko ra hina ri ta humesa mihanḍu ya rona. Ku lulama ku ta famba e mahlweni ka yena e ku lulamisa ndlela ni mikonḍo ya yena.”—Pisalema 85:10-13.
Hambileswi hi nga ta ka hi nga swi koti ku cinca misava, munhu un’wana ni un’wana a nga swi kota ku hlakulela timfanelo to chava Xikwembu hambi ku ri namuntlha. Xisweswo, hi ta ringeta ku va muxaka wa vanhu lava Xikwembu xi va lavaka tanihi vagandzeri va xona emisaveni yoleyo leyintshwa. Enkarhini wolowo hi ta va hi ri exikarhi ka vanhu va musa lava mupisalema a vulavuleke ha vona: “V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” (Pisalema 37:11) Xikwembu xi seketela ni ku katekisa lava endlaka ku rhandza ka xona, naswona xi tshembisa swilo swa risima eka vumundzuku bya vona. Muapostola Yohane u te: “Misava ya hundza, ni ku navela ka yona, kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.
[Xifaniso lexi nga eka tluka 7]
Timbhoni ta Yehovha ti navela leswaku vanhu hinkwavo va kuma mahungu lamanene ya Mfumo wa Xikwembu
[Laha Xifaniso Xi Humaka Kona eka tluka 6]
Lamp on pages 3, 4, 5, and 6: Printer’s Ornaments/by Carol Belanger Grafton/Dover Publications, Inc.