Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri leyi pfunaka swinene? Kutani ha yini u nga kambeli mianakanyo ya wena hi swivutiso leswi landzelaka?

◻ Xana Armagedoni yi ta va njhani? (Nhlavutelo 16:14, 16)

A ku nge vi khombo ra nyutliya kumbe khombo leri vangiweke hi vanhu. E-e, i nyimpi ya Xikwembu leyi nga ta heta tinyimpi hinkwato ta vanhu, ni ku herisa hinkwavo lava hlohlotelaka tinyimpi to tano ivi yi tisa ku rhula ka ntiyiso eka lava lavaka ku rhula. A yi nga hlweri. (Habakuku 2:3)—4/15, tluka 17.

◻ Xana i mucato wa muxaka muni lowu fundzhaka Yehovha?

Mucato lowu swilo swa moya swi lawulaka tindlela ta misava wu ta fundzha Yehovha hakunene. Vakreste va ta tiphina hi xiendlakalo loko va papalata mikhuva ya misava leyi thyakeke, vukholwa-hava ni ku hundzeleta; loko va nga xi pfumeleli xi kavanyeta mintirho ya swa le tilweni ya nkarhi na nkarhi; ni loko va kombisa xichavo ematshan’weni ya ku tikurisa.—4/15, tluka 26.

◻ I yini lexi hlawulekisaka munhu la tshembekaka?

Munhu la tshembekaka a nga tshembiwa, ku nga ri hi munhu-kulobye ntsena kambe, xa nkoka swinene, a nga tshembiwa ni hi Xikwembu. Ku tenga ka mbilu ya munhu wo tano ku voniwa eka swiendlo swa yena. A nga kanganyisi. A nga hombolokanga kumbe ku onhaka. (2 Vakorinto 4:2)—5/1, tluka 6.

◻ Ha yini Yeremiya a ku: “Ŝi lulamile ka munhu loko a rwala džoko ra yena e v̌untŝheni bya yena”? (Swirilo 3:27)

Ku dyondza ku langutana ni miringo loko wa ha ri muntshwa swi pfuna munhu leswaku a lunghekela ku hlangavetana ni swiphiqo swo nonon’hwa swa loko a ta va a kurile. (2 Timotiya 3:12) Vuyelo bya ku tshembeka byi ku hundza kule ku ntshunxeka ka xinkarhana loku ku landzula ku nga ku tisaka.—5/1, tluka 32.

◻ I yini lexi a xi fanekiseriwa hi ku humelela ka Muxe na Eliya exivonweni xa ku hundzuka?

Emhakeni ya ku hundzuka, Muxe na Eliya i swikombiso leswi fanelaka swa vamakwavo va Yesu lava totiweke. Ku va vona swin’we na Yesu va “humelel[e] va ri lava kwetsimaka” swi fanekisela leswaku Vakreste lava tshembekaka lava totiweke va ta “kwetsimisiwa” na Yesu eka lunghiselelo ra Mfumo wa le tilweni. (Luka 9:30, 31; Varhoma 8:17; 2 Vatesalonika 1:10)—5/15, matluka 12, 14.

◻ Xana “xihundla xo kwetsima” (NW) xa Xikwembu i yini? (1 Vakorinto 2:7)

“Xihundla xo kwetsima” xa Xikwembu xi kumeka eka Yesu Kreste. (Vaefesa 1:9, 10) Hambiswiritano, a hi ku tiva Yesu tanihi Mesiya la tshembisiweke ntsena. Xi katsa hulumendhe ya le tilweni, Mfumo wa Xikwembu wa Vumesiya, naswona xi katsa ni xiphemu lexi Yesu a averiweke xona exikongomelweni xa Xikwembu.—6/1, tluka 13.

◻ Xana Mukreste u fanele a ku languta njhani ku dyuhala ni vuvabyi?

Ematshan’weni yo languta miringo yo tano yi ri leyi hungutaka ntirho wa yena eka Yehovha, u fanele a yi languta tanihi nkarhi wo kurisa ku titshega ka yena hi yena. U fanele a tlhela a tsundzuka leswaku ntikelo wa Mukreste a wu pimiwi hi ntirho lowu a wu endlaka, kambe hi ku ya hi ripfumelo ni ku enta ka rirhandzu rakwe. (Marka 12:41-44)—6/1, tluka 26.

◻ Xana ku va Yehovha a tirhisa vanhu ematshan’weni ya tintsumi leswaku va tsala Bibele ku byi kombisa njhani vutlhari bya yena lebyikulu?

Loko swihlawulekisi swa vanhu a swi kayivela hakunene, a hi ta va ni xiphiqo xa ku twisisa rungula ra Bibele. Naswona, Bibele yi fikelela mbilu, yi ni timhaka to hambana-hambana ni ku tsakisa loku swihlawulekisi swa vanhu swi yi endlaka yi va na kona.—6/15, tluka 8.

◻ Xana hi xihi xihundla xa ntsako endyangwini?

Xihundla xi kumeka eRitweni ra Xikwembu, ku nga Bibele ni ku tirhisa misinya ya yona ya milawu, yo tanihi ku tikhoma, ku xixima vunhloko, mbulavurisano lowunene ni rirhandzu.—6/15, matluka 23, 24.

◻ Xana ku hanyisa loku endliweke hi Yesu a ku hambane swinene eka leswi talaka ku endliwa namuntlha hi lava tivulaka lava nga ni matimba yo hanyisa hi ndlela yihi?

Mintlhaveko a yi nga kombisiwi hi matimba eka mintshungu naswona Yesu a nga kalanga a lahlekeriwa hi miehleketo. Ku engetela kwalaho, Yesu a nga kalanga a tsandzeka ku horisa lava vabyaka hi vukanganyisi bya leswaku minyikelo ya vona ya timali a yi nga nyawuli kumbe leswaku a va pfumala ripfumelo.—7/1, tluka 5.

◻ Xana Yehovha u pfune vanhu va yena leswaku va va ni ndhawu exikongomelweni xa yena malunghana ni vito ni Mfumo wa yena hi ndlela yihi?

Xo sungula, Yehovha u byarhise vanhu va yena ntiyiso. Xa vumbirhi, u va nyike moya wa yena lowo kwetsima. Naswona xa vunharhu, hi ni vumakwerhu bya hina bya misava hinkwayo ku katsa ni lunghiselelo ra nhlengeletano ya Yehovha ra vugandzeri.—7/1, matluka 19, 20.

◻ Xana ku tenga i yini?

Ku tenga i ku va ni mahanyelo lamanene, vunene, swiendlo ni ku anakanya hi ndlela leyinene. A hi mfanelo leyi tsaneke kambe hi leyi tirhaka, leyinene. Vunene a swi vuli ku papalata xidyoho ntsena; swi vula ku tikarhatela ku endla leswo lulama. (1 Timotiya 6:11)—7/15, tluka 14.

◻ Xana hi yihi ndzhaka ya nkoka swinene leyi vatswari va nga yi hundziselaka eka vana va vona?

Ndzhaka ya nkoka swinene i xikombiso xa vona vini xo kombisa rirhandzu eka van’wana. Lexi hlamarisaka, vana va lava ku vona ni ku twa vatswari va vona va phofula ni ku kombisa rirhandzu ra vona ra xiviri eka Xikwembu eka xin’wana ni xin’wana lexi va xi endlaka.—7/15, tluka 21.

◻ Hi swihi swilo swin’wana swa nkoka swa dyondzo ya ndyangu leyi humelelaka?

Dyondzo ya ndyangu yi fanele yi va ya nkarhi na nkarhi. Mi fanele mi ‘londzovota nkarhi’ wa dyondzo. (Vaefesa 5:15-17) Endla minkarhi yo dyondza yi hanya eka vana hi ku endla Bibele yi hanya. Leswaku vana va yi tsakela, va fanele va titwa va katseka eka yona.—8/1, matluka 26, 28.