Va Endle Ku Rhandza Ka Yehovha

Tatana La Tiyimiseleke Ku Rivalela

XI VITANIWE xirungulwana xa risima eka hinkwaswo leswi tshameke swi tsariwa—hikwalaho ka xikongomelo lexinene. Xifaniso xa Yesu xa rirhandzu ra tatana eka n’wana wa yena la lahlekeke xi fana ni fasitere leri ha rona hi nga vonaka ntwela-vusiwana lowu hlamarisaka wa Xikwembu eka vadyohi lava hundzukaka.

Ku Lahleka Ni Ku Kumeka

Wanuna un’wana a ri ni vana vambirhi va majaha. Lontsongo wa kona a ku ka yena: ‘Ndzi lava ndzhaka ya mina sweswi, a ndzi lavi ku ku yimela u kondza u fa.’ Tatana u pfumelelane na yena, kumbexana a n’wi nyika vunharhu bya hinkwaswo leswi a ri na swona—ku averiwa loku nga enawini ka n’wana lontsongo eka majaha mambirhi. (Deteronoma 21:17) Muntshwa loyi u hlengelete rifuwo ra yena hi ku hatlisa ivi a ya etikweni ra le kule laha a tirhiseke mali hinkwayo hi ku hanya vutomi bya manyala.—Luka 15:11-13.

Endzhaku ku we ndlala leyikulu. Hikwalaho ko heleriwa hi ntshembo, jaha ri amukele ntirho wa ku risa tinguluve—ku nga ntirho wa le hansi eka Muyuda. (Levhitika 11:7, 8) Swakudya a swi kala lerova a sungula ku navela makamba lama dyiwaka hi tinguluve! Eku heteleleni, jaha leri ri tiehleketile. Ri ehleketile ri ku: ‘Malandza ya tatana ma dya kahle ku tlula mina! Ndzi ta tlhelela ekaya, ndzi tivula swidyoho swa mina, ivi ndzi kombela ku va tanihi un’wana wa malandza ya tatana.’a—Luka 15:14-19.

Jaha leri ri fambe hi ku nonoka ri tlhelela ekaya. A swi kanakanisi leswaku ku languteka ka rona a ku cincile swinene. Hambiswiritano, tata wa rona u ri vonile “loko [ra] ha ri kule.” Hikwalaho ka ntwela-vusiwana, u tsutsumele eka n’wana wa yena, a n’wi vukarha, ivi a “n’wi ntswontswa.”—Luka 15:20.

Ku amukeriwa loku ka rirhandzu ku endle leswaku swi olovela jaha leri leswaku ri tiphofula. Ri te: “Tatana, ndzi dyohele Tilo na wena, a swa ha ndzi faneri ku vuriwa n’wana wa wena. [Ndzi endle un’wana wa vatirhi va wena, NW].” Tata wa rona u vitane malandza ya yena. U ma lerisile a ku: “Hatlisani mi tisa nguvu leyo saseka ngopfu mi n’wi ambexa, mi nghenisa xingwavila eritihweni ra yena, mi n’wi ambexa ni tintanghu. Tisani rhole leri noneke, mi ri tlhava, hi dya, hi tsaka; hikuva n’wana loyi wa mina a a file, kambe sweswi wa hanya; a a lahlekile, kambe sweswi ú kumiwile.”—Luka 15:21-24.

Nkhuvo lowukulu wu sungurile, ku katsa ni vuyimbeleri ni ku cina. Jaha lerikulu ri twe mpfumawulo lowukulu loko ri vuya hi le masin’wini. Loko ri twe leswaku makwavo u vuyile ekaya ni leswaku hi yona mhaka ku nga ni nkhuvo, ri hlundzukile. Ri vilerile eka tata wa rona ri ku: ‘Ndzi ku tirhele malembe yo tala, naswona a ndzi si tshama ndzi nga ku yingisi, kambe a wu si tshama u ndzi nyika ximbutana leswaku ndzi tiphina ni vanghana va mina. Kambe sweswi loko n’wana wa wena loyi a tlangiseke rifuwo ra wena a vuya, u n’wi endlela nkhuvo.’ Tata wa yena u n’wi hlamurile hi tintswalo a ku: ‘N’wananga, nkarhi hinkwawo a wu ri na mina, naswona hinkwaswo leswi nga swa mina i swa wena. Kambe a hi fanele hi tsaka hikuva makwenu a file kambe u tlhelele evuton’wini. A a lahlekile kambe u kumekile.’ (Xiitaliki i xerhu.)—Luka 15:25-32.

Dyondzo Eka Hina

Tatana exifanisweni xa Yesu u fanekisela Xikwembu xa hina xa tintswalo, ku nga Yehovha. Ku fana ni jaha leri lahlekeke, hi nkarhi wo karhi vanhu van’wana va sukela nsirhelelo lowu nga endlwini ya Xikwembu kambe endzhakunyana va vuya. Xana Yehovha u va languta njhani vanhu vo tano? Lava tlhelelaka eka Yehovha naswona va hundzukile hi mbilu hinkwayo, va nga tiyiseka leswaku “a nga tengisi hi mikari hikwayo, a nga hlayisi v̌ukari bya yena hi masiku.” (Pisalema 103:9) Exifanisweni lexi, tatana u tsutsumile leswaku a hlanganisa n’wana wa yena. Hilaha ku fanaka, Yehovha a ngo swi rhandza ntsena kambe wa swi hisekela ku rivalela vadyohi lava hundzukaka. U ‘tiyimisele ku rivalela,’ naswona u endla tano “ku nga ri hi mpimo.”—Pisalema 86:5; Esaya 55:7; Zakariya 1:3.

Exifanisweni xa Yesu, rirhandzu ra xiviri ra tatana ri endle leswaku swi olovela n’wana ku va ni xivindzi xo tlhelela. Kambe xiya: Xana a ku ta va ku humelele yini loko tatana a lo hlamba mavoko eka mufana loyi kumbe hikwalaho ko hlundzuka a n’wi byele leswaku a nga ha vuyi ekaya? Langutelo ro tano kumbexana a ri ta va ri endle leswaku mufana loyi a fambela makumu.—Ringanisa 2 Vakorinto 2:6, 7.

Kutani, hi ndlela yo karhi rirhandzu ra xiviri ra tatana ri pfule ndlela ya ku vuya ka n’wana wa yena hi nkarhi lowu a nga famba ha wona. Minkarhi yin’wana, vakulu va Vukreste namuntlha va fanele va susa vadyohi lava nga hundzukiki evandlheni. (1 Vakorinto 5:11, 13) Loko va endla tano, va nga sungula ku khulela ndlela ya leswaku mudyohi a kota ku tlhelela, hi ku n’wi kombisa hi rirhandzu magoza lawa a faneleke a ma teka leswaku a ta tlheriseriwa evandlheni enkarhini lowu taka. Ku tsundzuka xikhutazo xo tano xa mbilu hinkwayo endzhakunyana ku susumetele vanhu vo tala lava lahlekeke hi tlhelo ra moya leswaku va hundzuka, naswona ku va susumetele ku tlhelela endlwini ya Xikwembu.—2 Timotiya 4:2.

Tatana u tlhele a kombisa ntwela-vusiwana loko n’wana wa yena a vuya. A ku helanga nkarhi wo leha a nga si vona ku hundzuka ka mbilu hinkwayo ka mufana loyi. Kutani, ematshan’weni ya leswaku a sindzisa n’wana wa yena leswaku a hlamusela vuxokoxoko hinkwabyo bya swidyoho swa yena, u nghene emhakeni yo n’wi amukela, naswona u kombise ku tsaka lokukulu loko a endla tano. Vakreste va nga tekelela xikombiso lexi. Va fanele va tsaka hileswi loyi a lahlekile a kumekeke.—Luka 15:10.

Swiendlo swa tatana loyi swi kombisa kahle leswaku a ku ri khale a langutele ku vuya ka n’wana wa yena la lahlekeke. Kavula, swoleswo ko va xikombiso xa ku navela loku Yehovha a nga na kona eka hinkwavo lava siyeke ndyangu wa yena. A nga “lavi leswaku ni un’we wa [hina] a lova, kambe [u] lava leswaku [hinkwerhu hi] ta eku hundzukeni.” (2 Petro 3:9, xiitaliki i xerhu.) Lava hundzukaka eswidyohweni swa vona va nga tiyisekisiwa leswaku va ta katekisiwa hi “minkarhi yo phyuphya leyi humaka eHosini.”—Mintirho 3:20.

[Nhlamuselo ya le hansi]