Tivonele Eka Vadyondzisi Va Mavunwa!
“[Ku] ta va ni vadyondzisi va mavunwa exikarhi ka n’wina.”—2 PETRO 2:1.
1. I yini leswi Yuda a a tiyimisele ku tsala ha swona, naswona hikwalaho ka yini a cince rungula ra yena?
VONA nchumu lowu tsemaka nhlana swonghasi! Vadyondzisi va mavunwa evandlheni ra Vukreste ra lembe-xidzana ro sungula! (Matewu 7:15; Mintirho 20:29, 30) Yuda makwavo wa Yesu hi manana a a xi xiya xiendlakalo lexi. U vule leswaku a a navela ku tsalela vapfumeri-kulobye “ta ku ponisiwa loku nga ka hina hinkwerhu,” kambe u hlamuserile a ku: “Ndzi kumile leswaku swa ndzi fanela ku mi tsalela ndzi mi khongotela ku lwela vupfumeri.” Hikwalaho ka yini Yuda a cince rungula ra yena? U te, hikuva “vanhu van’wana va ngungumerile va nghena e[mavandlheni] . . . va gombonyokisa tintswalo ta Xikwembu xa hina, va endla swa manyala ha tona.”—Yuda 3, 4.
2. Hikwalaho ka yini 2 Petro ndzima 2 na Yuda ti fana swinene?
2 Handle ko kanakana, Yuda u tsale leswi endzhakunyana ka loko Petro a tsale papila ra yena ra vumbirhi. A swi kanakanisi leswaku Yuda a a ri tiva papila leri. Phela, u boxe swilo swo tala leswi yelanaka na rona epapileni ra yena ra matimba ro khongotela. Hikokwalaho, loko hi ri karhi hi kambisisa 2 Petro ndzima 2, hi ta vona ndlela leyi yi fanaka ha yona ni papila ra Yuda.
Vuyelo Bya Tidyondzo Ta Mavunwa
3. I yini leswi humeleleke enkarhini lowu hundzeke leswi Petro a vulaka leswaku swi ta tlhela swi humelela?
3 Endzhaku ka loko Petro a khutaze vamakwavo leswaku va yisa nyingiso eka vuprofeta, u ri: “Khale, vaprofeta va mavunwa [eIsrayele wa khale] na vona va humelele exikarhi ka vanhu, tanihi leswi ku nga ta va ni vadyondzisi va mavunwa exikarhi ka n’wina.” (2 Petro 1:14–2:1) Vanhu va Xikwembu va le minkarhini ya khale va kume vuprofeta bya ntiyiso, kambe a va fanele va tlhela va lwisana ni tidyondzo leti onhaka ta vaprofeta va mavunwa. (Yeremiya 6:13, 14; 28:1-3, 15) Yeremiya u tsarile, “E v̌aprofeteni v̌a Yerusalem, nḍi v̌one manyala, ku oŝana, ni ku famba e v̌unweni.”—Yeremiya 23:14.
4. Hikwalaho ka yini vadyondzisi va mavunwa va faneriwa hi ndzoviso?
4 Loko a hlamusela leswi vadyondzisi va mavunwa a va ta swi endla evandlheni ra Vukreste, Petro u ri: “[Va] ta nghenisa hi le xihundleni tidyondzo to hambuka leti onhaka; va ta landzula hambi a ri N’wini [Yesu Kreste] loyi a va kutsuleke, va tivangela ku lova loku nga ta hatla ku va wela.” (2 Petro 2:1; Yuda 4) Vuyelo byo hetelela bya ku pambuka koloko ka lembe-xidzana ro sungula ku ve Vujagana hilaha hi byi tivaka hakona namuntlha. Petro u kombisa xivangelo xo va vadyondzisi va mavunwa va faneriwa swinene hi ndzoviso: “Lavo tala va ta landza swa manyala leswi va swi endlaka, naswona ndlela ya ntiyiso yi ta sandziwa hi mhaka ya vona.”—2 Petro 2:2.
5. I yini leswi vadyondzisi va mavunwa a va ri ni vutihlamuleri eka swona?
5 Anakanya hi leswi! Hikwalaho ka nkucetelo wa vadyondzisi va mavunwa, lavo tala emavandlheni a va ta katseka emahanyelweni layo biha. Rito ra Xigriki leri hundzuluxeriweke ri va “manyala” ri vula ku pfumala mikhuva leyinene, swilo swa manyala, mahanyelo yo pfumala tingana. Eku sunguleni Petro u vule leswaku Vakreste va “pon[ile] eku onhakeni loku nga kona emisaveni hikwalaho ka ku navela loko biha.” (2 Petro 1:4) Kambe van’wana a va ta tlhelela eku onhakeni koloko, naswona vadyondzisi va mavunwa emavandlheni a va ta va ni nandzu lowukulu! Xisweswo ndlela ya ntiyiso a yi ta sandziwa. Vona ku vavisa ka swona! Entiyisweni, leyi i mhaka leyi Timbhoni ta Yehovha hinkwato namuntlha ti faneleke ti yisa nyingiso lowukulu eka yona. A hi fanelanga hi swi rivala leswaku hi ku ya hi mahanyelo ya hina, hi nga ha dzunisa Yehovha Xikwembu ni vanhu va yena kumbe hi va tisela ndzhukano.—Swivuriso 27:11; Varhoma 2:24.
Ku Sungula Tidyondzo Ta Mavunwa
6. I yini leswi kucetelaka vadyondzisi va mavunwa, naswona va swi endlisa ku yini leswaku va kuma leswi va swi lavaka?
6 Hi vutlhari, ha yi xiya ndlela leyi vadyondzisi va mavunwa va sungulaka mianakanyo ya vona leyi onhaka ha yona. Petro u sungula hi ku vula leswaku va swi endla exihundleni, kumbe hi ndlela leyi nga vonakiki, leyi tumbeleke. Wa engetela: “Hikwalaho ka makwanga ya vona, va ta mi dyelela hi marito ya vona ya vuxisi.” Vadyondzisi va mavunwa va susumetiwa hi ku navela ka vutianakanyi, hilaha vuhundzuluxeri bya The Jerusalem Bible byi swi kandziyisaka hakona: “Va ta ringeta hi matimba ku mi xava leswaku mi va eka vona hi mavulavulelo ya vona ya vukanganyisi.” Hilaha ku fanaka, vuhundzuluxeri bya James Moffatt laha byi ri: “Hikwalaho ka ku navela ka vona loko biha va ta mi dyelela hi ku vulavula ka vona ka mano.” (2 Petro 2:1, 3) Mavulavulelo ya vadyondzisi va mavunwa ma nga ha vonaka ma ri ntiyiso eka loyi a nga xalamukangiki hi tlhelo ra moya, kambe marito ya vona ma kunguhatiwe hi vukheta leswaku ‘ma xava’ vanhu, hi ku va xisetela leswaku va endla swikongomelo swa vakanganyisi swa vutianakanyi.
7. Hi yihi filosofi leyi a yi tiveka swinene eka lembe-xidzana ro sungula?
7 A swi kanakanisi leswaku vadyondzisi va mavunwa va lembe-xidzana ro sungula a va kuceteriwa hi mianakanyo ya misava leyi a yi ri kona enkarhini wolowo. Hi nkarhi wa vutsari bya Petro, filosofi leyi vuriwaka Vugnostic a yi sungula ku tiveka swinene. Vagnostic a va kholwa leswaku xin’wana ni xin’wana xi bihile naswona ko va nchumu lowu khumbhanaka ni timhaka ta swa moya ntsena lowu nga wunene. Xisweswo, van’wana va vona a va vula leswaku a swi na mhaka leswaku munhu u endla yini hi miri wakwe wa nyama. Hi ku famba ka nkarhi, a va kanetana, va vula leswaku a swi nge koteki leswaku munhu a va ni miri wo tano. Hikokwalaho, va gimete hileswaku, swidyoho swa nyama—ku katsa ni vuxaka bya rimbewu—a hi swidyoho leswikulu. Handle ko kanakana, malangutelo yo tano ma sungule ku va ni nkucetelo eka lava a va vula leswaku va wela eka Vukreste.
8, 9. (a) Hi yihi mianakanyo leyi soholotiweke leyi khumbheke van’wana va Vakreste vo sungula? (b) Hi ku ya hi Yuda, xana van’wana evandlheni a va endla yini?
8 Xidyondzi xin’wana xa Bibele xi vule leswaku “eKerekeni a ku ri ni lava a va soholota dyondzo yo kwetsima,” kumbe ‘tintswalo leti nga faneriwiki.’ (Vaefesa 1:5-7) Hi ku ya hi xona, van’wana a va ku: “Xana mi vula leswaku [tintswalo leti nga faneriwiki] ta Xikwembu hi letikulu swinene lerova ti ta swi kota ku funengeta xidyoho xin’wana ni xin’wana? . . . Kutani a hi yeni emahlweni hi dyoha, hikuva [tintswalo leti nga faneriwiki] ta Xikwembu ti nga swi kota ku sula xidyoho xin’wana ni xin’wana. Kahle-kahle loko hi ya hi dyoha swinene hilaha [tintswalo leti nga faneriwiki] ta Xikwembu ti nga ta kota ku tirha.” Xana u tshama u twa mianakanyo leyi soholotiweke swinene ku tlula yoleyo?
9 Muapostola Pawulo u hlangavetane ni mianakanyo leyi hoxeke malunghana ni tintswalo ta Xikwembu loko a vutisile a ku: “Xana hi ta ya emahlweni hi dyoha leswaku tintswalo ti andza xana?” U tlhele a vutisa: “Xana hi ta dyoha, hileswi hi nga riki ehansi ka Nawu, kambe hi ri ehansi ka tintswalo xana?” Xivutiso xin’wana ni xin’wana Pawulo u xi hlamule hi tinghitsi: “Niswitsanana!” (Varhoma 6:1, 2, 15) Entiyisweni, hilaha Yuda a xiyeke hakona, van’wana a “va gombonyokisa tintswalo ta Xikwembu xa hina, va endla swa manyala ha tona.” Hambiswiritano, Petro u vula leswaku eka vanhu vo tano ‘ku lovisiwa ka vona a ku etlelanga.’—Yuda 4; 2 Petro 2:3.
Swikombiso Leswi Nga Xitsundzuxo
10, 11. Hi swihi swikombiso swinharhu swa xitsundzuxo leswi Petro a swi nyikelaka?
10 Leswaku a kandziyisa leswaku Xikwembu xi ta teka goza ro lwisana ni lava dyohaka ha vomu, Petro u nyikela swikombiso swinharhu swa Matsalwa leswi nga xitsundzuxo. Xo sungula, wa tsala: “Xikwembu a xi tsetselelanga tintsumi loko ti dyohile.” Yuda u ri, tintsumi leti, “[a ti hlayisanga] xiyimo xa tona, kambe ti sukile laha a ku ri kaya ka tona ka xiviri” etilweni. Ti tile emisaveni emahlweni ka Ndhambhi kutani ti ambala mimiri ya nyama leswaku ti ta va ni vuxaka bya rimbewu ni vanhwanyana va vanhu. Leswaku ti xupuriwa hikwalaho ka mahanyelo ya tona lama nga riki ya ntumbuluko, ti hoxiwe “eTartarus,” kumbe hilaha mhaka ya Yuda yi vulaka hakona, ti “pfale[riwe] hilaha ku nga heriki exinyamini lexi chavisaka ku fikela siku lerikulu ra ku avanyisiwa.”—2 Petro 2:4, NW; Yuda 6; Genesa 6:1-3.
11 Ku ya emahlweni, Petro u vulavula hi vanhu va le sikwini ra Nowa. (Genesa 7:17-24) U vula leswaku enkarhini wa Nowa Xikwembu “a xi tsetselelanga misava ya khale . . . enkarhini lowu xi nga nisa ndhambi emisaveni ya vanhu lava a va nga ri na mhaka na xona.” Xo hetelela, Petro u vula leswaku Xikwembu xi veke “[ndlela leyi] xi yi endla[ka] xitsundzuxo eka lava va nga ta ka va nga ri na mhaka na xona” hi ku “[endla] leswaku miti ya va Sodoma na Gomora yi hundzuka nkuma.” Yuda u nyikela vuxokoxoko lebyi engetelekeke bya leswaku vanhu volavo ‘va endle vumbhisa hilaha ku hundzeletiweke ni [ku mukisana] ni nyama leswaku va yi endla leswi nga riki swa ntumbuluko.’ (2 Petro 2:5, 6; Yuda 7) Vavanuna a va nga endli vuxaka bya rimbewu lebyi nga riki enawini ni vavasati ntsena kambe a va tlhela va va ni ku navela loko biha ka nyama ni vavanuna van’wana, kumbexana ni nyama ya swivandzana.—Genesa 19:4, 5; Levhitika 18:22-25.
12. Hi ku ya hi Petro, xana mahanyelo layo lulama ma hakeriwa hi ndlela yihi?
12 Kambe hi nkarhi lowu fanaka, Petro wa swi xiya leswaku Yehovha i muhakeri wa lava n’wi tirhelaka hi vutshembeki. Hi xikombiso, u hlamusela ndlela leyi Xikwembu “xi hlayise[ke] Nowa mutwarisi wa leswo lulama, swin’we ni vanhu van’wana va 7” ha yona loko xi nise Ndhambhi. Nakambe u vulavula hi ku ponisa ka Yehovha “Lota munhu wo lulama” enkarhini wa Sodoma, a gimeta hi ku: “Hosi ya swi tiva ku ponisa vanhu va vukhongeri eku karhatekeni ka vona, ni ku tshika vanhu lavo homboloka va ri eku biweni ku fikela siku ra ku avanyisa.”—2 Petro 2:5, 7-9.
Swiendlo Leswi Faneriwaka Hi Ku Xupuriwa
13. I vamani lava hi ku kongoma va hlayiseriweke ku avanyisiwa, naswona hi yihi milorho leyi va vonakaka va tinyiketela eka yona?
13 Petro u boxa van’wana lava faneriwaka swinene hi ku avanyisa ka Xikwembu, ku nga, “[lava] navela[ka] ku titsakisa hi swilo swa thyaka, va sandza ni vuhosi.” Hi nga ha karhateka hilaha Petro a karhatekeke hakona loko a te: “Vanhu lava va titshemba ngopfu, naswona va titiva; a va chavi ku sandza swa le henhla leswi kwetsimeke.” Yuda u vula leswaku “vanhu lava, . . . va nyamisa miri wa vona hi milorho ya vona . . . va sandza ni swivumbiwa leswo hlawuleka swa le tilweni.” (2 Petro 2:10; Yuda 8) Kumbexana milorho ya vona a yi katsa ku titsakisa loko biha hi tlhelo ra rimbewu loku khutazaka ku hlongorisa ntsako wa rimbewu. Kutani, xana va “sandza ni vuhosi” ni “ku sandza swa le henhla leswi kwetsimeke” hi ndlela yihi?
14. Xana vadyondzisi va mavunwa va “sandza ni vuhosi” ni “ku sandza swa le henhla leswi kwetsimeke” hi ndlela yihi?
14 Leswi va swi endla hi ku sandza vulawuri lebyi simekiweke hi Xikwembu. Vakulu va Vukreste va yimela Yehovha Xikwembu la kwetsimaka swin’we ni N’wana wakwe, hikwalaho va ni ku kwetsima ko karhi loku va nyikiweke kona. Entiyisweni, va swi endla swihoxo, hilaha Petro hi yexe a swi endleke hakona, kambe Matsalwa ma khutaza swirho swa vandlha leswaku swi titsongahata eka vakwetsimi volavo. (Vaheveru 13:17) Swihoxo swa vona a swi vi xivangelo xo vulavula hi vona hi ndlela yo biha. Petro u vula leswaku tintsumi “a ti humesi marito ya ku va avanyisa [vadyondzisi va mavunwa] hi ku va sandza” hambileswi a swi ta va swi fanerile swinene. Petro u ya emahlweni a ku: “Kambe vanhu lava va fana ni swivumbiwa swo pfumala miehleketo, swiharhi swa nhova swo tswaleriwa ku khomiwa ni ku dlawa ntsena; va sandza etimhakeni leti va nga tiviki nchumu eka tona, kutani va ta herisiwa.”—2 Petro 2:10-13.
“Naloko Va Ri Na N’wina eMinkhubyeni”
15. Hi tihi tindlela leti tirhisiwaka hi vadyondzisi va mavunwa, naswona vuxisi bya vona va byi endlela kwihi?
15 Hambileswi vavanuna lava vo homboloka “swi va tsakisa[ka] vona ku cina mintlangu,” nileswi va nga “swivati ni swisandzu evanhwini,” nakambe i vakanganyisi. Va endla swilo ‘exihundleni,’ va ri karhi va tirhisa “marito ya vona ya vuxisi,” hilaha Petro a vuleke hakona eku sunguleni. (2 Petro 2:1, 3, 13) Xisweswo a va nge va tlhontlhi erivaleni vakulu lava ringetaka ku seketela mimpimanyeto ya Xikwembu ya mahanyelo, kumbe va hlongorisa ku navela ka vona ka ku tiphina hi tlhelo ra rimbewu dyambu ri lo hosi. Ematshan’weni ya sweswo, Petro u vula leswaku “naloko va ri na n’wina eminkhubyeni, vona va tsakela ku cina ni ku nwa ngopfu, hi mhaka ya vusopfa bya vona.” Naswona Yuda wa tsala: ‘Vanhu lava i maribye lama tumbeleke ehansi ka mati eminkhubyeni ya n’wina ya rirhandzu.’ (Yuda 12) Ina, ku fana ni maribye yo tontswa lama nga ehansi ka mati, lama nga boxaka tshaku ra xikepe, leswi nga endlaka leswaku vatluti lava nga swi rindzelangiki va nwela, vadyondzisi va mavunwa a va ri karhi va onha vanhu lava nga rindzelangiki nchumu lava a va endla onge va va rhandza hi nkarhi wa ‘minkhuvo ya rirhandzu.’
16. (a) A ku ri yini ‘minkhuvo ya rirhandzu,’ naswona hi wahi maendlelo lama fanaka lawa vanhu va mahanyelo yo biha va ma tirhisaka namuntlha? (b) I vamani lava vadyondzisi va mavunwa va yisaka nyingiso wa vona swinene eka vona, kutani i yini leswi vanhu volavo va faneleke va swi endla?
16 Kumbexana ‘minkhuvo leyi ya rirhandzu’ a ku ri swiendlakalo swa ku titsakisa loko Vakreste va lembe-xidzana ro sungula va hlengeletana swin’we leswaku va tiphina hi swakudya ni ku tsakela xinakulobye. Namuntlha na tona Timbhoni ta Yehovha minkarhi yin’wana ta hlengeletana leswaku ti titsakisa, kumbexana eka swakudya swa nkhuvo wa vukati, etipikinikini kumbe exinkhubyanini xa nimadyambu. Xana vanhu lavo homboloka va swi tirhisa njhani swiendlakalo swo tano leswaku va xisetela vahlaseriwa? Petro wa tsala: “Va ni mahlo lama taleke hi vuoswi . . . Va rhiya mimoya leyi nga tiyangiki.” Va languta ngopfu “timbilu leti toloveleke makolo” ta lava nga tiyangiki hi tlhelo ra moya lava tsandzekeke ku endla ntiyiso wu va wa vona hakunene. Kutani tsundzuka leswi humeleleke esikwini ra Petro, naswona u tivonela! Ala swiringanyeto swihi ni swihi leswi thyakeke, naswona u nga tshuki u wongiwa hi vuxongi bya miri bya munhu loyi a endlaka swiringanyeto swa ku tikhoma hi ndlela yo biha!—2 Petro 2:14.
“Ntila Wa Baalama”
17. Xana “ntila wa Baalama” a ku ri yini, naswona wu va khumbhe njhani Vaisrayele vo ringana 24 000?
17 Vanhu lava lava “rhukaniweke” i khale va ri karhi va tiva ntiyiso. Va nga ha ya emahlweni va gingiriteka evandlheni. Kambe Petro u ri: “Va tshikile ndlela leyinene, va landza ntila wa Baalama n’wana Beyori, loyi a rhandzeke bindzu hi ku endla leswo homboloka.” (2 Petro 2:14, 15) Ntila wa muprofeta Baalama a ku ri ku kucetela van’wana leswaku va tikhoma hi ndlela yo biha leswaku ku vuyeriwa yena. U byele Balaka Hosi ya Mumowabi leswaku Xikwembu a xi ta rhukana Israyele loko vanhu vo kuceteriwa leswaku va endla vuoswi. Hikwalaho ka sweswo, vunyingi bya vanhu va Xikwembu va xiseteriwile hi vavasati va Mowabi, naswona 24 000 wa vona va dlayiwile hikwalaho ka ku tikhoma loko biha.—Tinhlayo 25:1-9; 31:15, 16; Nhlavutelo 2:14.
18. Xana Baalama a a sindzisa hi ndlela yihi, naswona vuyelo bya kona byi va fanekisela njhani vadyondzisi va mavunwa?
18 Petro u vula leswaku Balaama u siveriwile loko mbhongolo ya yena yi vulavule na yena, kambe Balaama “[u rhandze] bindzu [swinene] hi ku endla leswo homboloka,” lerova ni loko sweswo swi humelerile, a nga hundzukanga “eku hlanyeni ka yena.” (2 Petro 2:15, 16) Vona vuhomboloki byonghasi! Khombo, eka un’wana ni un’wana loyi a kotisaka Baalama loyi a ringetaka ku onha vanhu va Xikwembu hi ku va kucetela leswaku va endla vunghwavava! Baalama u fele vubihi bya yena, ku nga xikombiso xa leswi nga ta humelela eka hinkwavo lava landzelaka ntila wa yena.—Tinhlayo 31:8.
Minkucetelo Ya Vona Ya Vudiyavulosi
19, 20. (a) Xana vanhu lava fanaka na Baalama va fanisiwa na yini, naswona hikwalaho ka yini? (b) Va xisetela vamani, naswona ha yini? (c) Ha yini hi nga vulaka leswaku swiendlo swa vona i swa vudiyavulosi, naswona hi nga tisirheleta njhani ni ku sirhelela van’wana eka vona?
19 Loko a hlamusela lava fanaka na Baalama, Petro wa tsala: “Vanhu lava i swihlovo [kumbe, mipitsi] swo pfumala mati; i hunguva [kumbe, mapapa] leyi fambisiwaka hi bubutsa.” Eka mufambi la khomiweke hi torha emananga, xihlovo lexi omeke xi nga vula rifu. A swi hlamarisi leswi “munyama lowukulu ngopfu wu va langute[leke]” lava fanaka ni swilo sweswo! Petro u ya emahlweni a ku: “Va tlakusa rito ni ku tidzunisa ngopfu hi swilo swa hava; hi ku navela loko biha ka swa manyala swa laha misaveni, va phasa vanhu lava va ha ku ponaka emavokweni ya valahleki.” Petro u ri, va xisetela vanhu lava nga riki ni ntokoto hi ku “va tshembisa ku ntshunxeka,” kasi vona hi voxe i mahlonga ya leswi bolaka.”—2 Petro 2:17-19; Vagalatiya 5:13.
20 Minkucetelo ya vadyondzisi volavo lavo homboloka i ya vudiyavulosi. Hi xikombiso, va nga ha ku: ‘Xikwembu xa swi tiva leswaku hi tsanile ni leswaku hi karhatiwa hi ku navela. Kutani loko hi tikhorisa hi ku enerisa ku navela ka hina hi tlhelo ra rimbewu, Xikwembu xi ta hi kombisa tintswalo. Loko hi phofula swidyoho swa hina, xi ta hi rivalela hilaha xi endleke hakona nkarhi lowu hi teke entiyisweni ro sungula ha wona.’ Tsundzuka leswaku Diyavulosi u tirhise kungu rero leri fanaka eka Evha, a n’wi tshembisa leswaku a a ta dyoha a nga xupuriwi. Emhakeni ya Evha, u vule leswaku ku dyohela Xikwembu a swi ta n’wi nyika vutlhari ni ntshunxeko. (Genesa 3:4, 5) Loko hi tshuka hi vona munhu wo tano wo homboloka loyi a hlanganyelaka ni vandlha, hi fanele hi tisirhelela ni ku sirhelela van’wana hi ku vika munhu yoloye eka lava nga ni vutihlamuleri evandlheni ra Vukreste.—Levhitika 5:1.
Ku Sirheleriwa Hi Vutivi Lebyi Kongomeke
21-23. (a) Hi byihi vuyelo bya ku tsandzeka ku tirhisa vutivi lebyi kongomeke? (b) Hi xihi xiphiqo xin’wana lexi Petro a vulavulaka ha xona lexi hi nga ta xi kambisisa enkarhini lowu taka?
21 Petro u gimeta xiyenge xa papila ra yena hi ku hlamusela vuyelo byo tsandzeka ku tirhisa vutivi lebyi eku sunguleni a vuleke leswaku i bya nkoka ‘evuton’wini ni le ku tinyiketeleni eka Xikwembu.’ (2 Petro 1:2, 3, 8) Wa tsala: ‘Entiyisweni, loko endzhaku ko huma ethyakeni ra misava hikwalaho ka vutivi lebyi kongomeke bya Hosi ni Muponisi Yesu Kreste, va tlhela va katseka eka swilo sweswo kutani va hluriwa, swiyimo swa vona leswo hetelela swi va leswo biha swinene ku tlula leswo sungula.’ (2 Petro 2:20, ringanisa NW.) Vona ndlela leyi swi vavisaka ha yona! Vanhu vo tano esikwini ra Petro va lahle ntshembo wa risima wa vutomi lebyi nga riki ni ku fa etilweni hikwalaho ko lava ku titsakisa swa xinkarhana hi tlhelo ra rimbewu.
22 Kutani Petro u ri: “A swi ta va swi antswile eka vona loko va nga tivanga ndlela ya ku lulama, ku ri na loko va yi tivile kutani va tlhelela ndzhaku va tshika nawu lowo hlawuleka lowu va nyikiweke wona. Swi va humelele hilaha xivuriso xa ntiyiso xi vuleke hakona, loko xi te: ‘Mbyana yi vuyela emahlanteni ya yona.’ Naswona: ‘Nguluve, loko yi hlantswiwile, yi tlhela yi puluvundza endzhopeni!’”—2 Petro 2:21, 22; Swivuriso 26:11.
23 Xiphiqo xin’wana lexi handle ko kanakana xi sunguleke ku khumbha Vakreste va lembe-xidzana ro sungula, xa fana ni lexi khumbhaka van’wana namuntlha. Le ndzhaku, swi le rivaleni leswaku van’wana a va vilela hi ku nga fiki ka vukona bya Kreste lebyi tshembisiweke. A hi kambisiseni ndlela leyi Petro a tamelaka mhaka leyi ha yona.
Wa Tsundzuka Xana?
◻ Hi swihi swikombiso swinharhu swa xitsundzuxo leswi Petro a swi boxaka?
◻ Xana vadyondzisi va mavunwa va “sandza ni vuhosi” hi ndlela yihi?
◻ Xana ntila wa Baalama i yini, naswona lava ringetaka ku wu landzela va nga ha ringetisa ku yini ku xisetela van’wana?
◻ Hi byihi vuyelo bya ku tsandzeka ku tirhisa vutivi lebyi kongomeke?
[Xifaniso lexi nga eka tluka 16, 17]
Baalama i xikombiso xa xitsundzuxo