Hambeta U Anakanyisisa Hi Siku Ra Yehovha
“Emasikwini yo hetelela, ku ta humelela vasandzi.”—2 PETRO 3:3.
1. Mukreste un’wana wa manguva lawa a a yi hatlisela njhani minkarhi?
MUTIRHELI un’wana loyi a nga ni malembe yo tlula 66 a ri entirhweni wa nkarhi hinkwawo u tsarile: “Nkarhi hinkwawo a ndzi hatlisela minkarhi. Nkarhi hinkwawo a ndzi anakanya leswaku Armagedoni yi tshinele swinene. (Nhlavutelo 16:14, 16) Kukotisa tata wa mina ni kokwana wa mina wa xinuna, a ndzi ri karhi ndzi hanya hi ndlela leyi muapostola [Petro] a khutazaka ha yona, ‘ndzi hambeta ndzi anakanyisisa hi vukona bya siku ra Yehovha.’ Nkarhi hinkwawo a ndzi languta xitshembiso xa misava leyintshwa tanihi ‘nchumu wa xiviri hambiloko yi nga si voniwa.’”—2 Petro 3:11, 12; Vaheveru 11:1; Esaya 11:6-9; Nhlavutelo 21:3, 4.
2. Xana ku tshama hi anakanyisisa hi siku ra Yehovha swi vula yini?
2 Xiga xa Petro lexi nge ‘mi hambeta mi anakanyisisa’ hi siku ra Yehovha xi vula leswaku a hi fanelanga hi ri rivala. A hi fanelanga hi rivala leswaku siku leri Yehovha a nga ta herisa mafambiselo lawa ya swilo ha rona tanihi masungulo ya ku simekiwa ka misava ya yena leyintshwa leyi tshembisiweke ri le kusuhi swinene. Ri fanele ri va ra xiviri swinene eka hina lerova hi ri vona hakunene, ri yime emahlweni ka hina. A ri ri ra xiviri hi ndlela yoleyo eka vaprofeta va Xikwembu va le minkarhini ya khale, naswona nkarhi na nkarhi a va vulavula ha rona tanihi leri tshineleke.—Esaya 13:6; Yuwele 1:15; 2:1; Obadiya 15; Sofoniya 1:7, 14.
3. I yini lexi nga ha vaka xi susumetele Petro leswaku a nyikela ndzayo malunghana ni siku ra Yehovha?
3 Hikwalaho ka yini Petro a hi khutaza ku languta siku ra Yehovha tanihi leri nga ta ta, onge hi loko ri ta fika “mundlwani”? Hikuva swi le rivaleni leswaku van’wana va sungule ku kaneta dyondzo ya vukona bya Kreste lebyi tshembisiweke, laha ku nga ta xupuriwa lava endlaka leswo biha. (2 Petro 3:3, 4) Kutani eka ndzima 3 ya papila ra yena ra vumbirhi, leri hi nga ta ri kambisisa sweswi, Petro u hlamula swihehlo swa vasandzi lava.
Xikombelo Xa Rirhandzu Lexi Hi Faneleke Hi Xi Tsundzuka
4. I yini leswi Petro a lavaka leswaku hi swi tsundzuka?
4 Rirhandzu leri Petro a a ri na rona hi vamakwavo ri kombisiwa hi ku va vitana “varhandziwa” hi ku phindha-phindha eka ndzima leyi. Loko hi rirhandzu a va kombela leswaku va nga rivali leswi va dyondzisiweke swona, Petro u sungula hi ku: “Varhandziwa, . . . ndzi pfuxile miehleketo ya n’wina leyi nga ni ku twisisa, hi ku mi tsundzuxa. A ndzi endlela ku mi tsundzuxa marito lama nga vuriwa khale hi vaprofeta lavo hlawuleka, ni milawu ya Hosi ni Muponisi, leyi teke hi milomo ya vaapostola va n’wina.”—2 Petro 3:1, 2, 8, 14, 17; Yuda 17.
5. Xana vaprofeta van’wana va vule yini malunghana ni siku ra Yehovha?
5 Hi wahi “marito lama nga vuriwa khale hi vaprofeta lavo hlawuleka” lawa Petro a khutazaka vahlayi leswaku va ma tsundzuka? Entiyisweni, hi lawa ma vulavulaka hi vukona bya Kreste ematimbeni ya Mfumo malunghana ni ku avanyisiwa ka vanhu lava nga chaviki Xikwembu. Eku sunguleni Petro u endle leswaku va anakanyisisa hi marito lawa. (2 Petro 1:16-19; 2:3-10) Yuda u vulavula hi Enoko, ku nga muprofeta wo sungula la boxiwaka la nyikeleke xitsundzuxo xa ku avanyisa lokukulu ka Xikwembu ehenhla ka vaendli va leswo homboloka. (Yuda 14, 15) Endzhaku ka Enoko ku ve ni vaprofeta van’wana, naswona Petro a nga swi lavi leswaku hi rivala leswi va swi tsaleke.—Esaya 66:15, 16; Sofoniya 1:15-18; Zakariya 14:6-9.
6. Hi wahi marito ya Kreste ni vaapostola va yena, lama hi voningelaka malunghana ni siku ra Yehovha?
6 Ku engetela kwalaho, Petro u byela vahlayi va yena leswaku va tsundzuka “milawu ya Hosi ni Muponisi.” Milawu ya Yesu yi katsa xikhongotelo lexi nge: “Tivoneleni leswaku timbilu ta n’wina ti nga tikeriwi . . . leswaku siku rero ri nga mi tshuketi . . . kukotisa xirimbani.” “Tlharihani mi hiteka, hikuva a mi tivi leswaku nkarhi wu ta va rini.” (Luka 21:34-36; Marka 13:33) Nakambe Petro u hi khutaza ku hlayisa marito ya vaapostola. Hi xikombiso, muapostola Pawulo u tsarile: “Siku ra Hosi ri ta fika kukota khamba leri taka nivusiku. Hikokwalaho hi nga tshuki hi etlela kukota leswi van’wana va endlisaka swona, kambe a hi hitekeni, hi tikhoma.”—1 Vatesalonika 5:2, 6.
Xikongomelo Xa Vasandzi
7, 8. (a) I vanhu va muxaka muni lava hlekulaka marungula ya Xikwembu ya xitsundzuxo? (b) Xana vasandzi va ri yini?
7 Hilaha hi swi xiyeke hakona eku sunguleni, xivangelo xo va Petro a nyikela xitsundzuxo hileswi van’wana a va sungule ku vungunya switsundzuxo sweswo, hilaha Vaisrayele va le minkarhini ya khale va hlekuleke vaprofeta va Yehovha hakona. (2 Tikronika 36:16) Petro wa hlamusela: “Xo sungula, mi fanela ku twisisa leswaku, emasikwini yo hetelela, ku ta humelela vasandzi lava fambisiwaka hi ku navela ka vona loko biha; va ta mi sandza.” (2 Petro 3:3, xiitaliki i xerhu.) Yuda u vula leswaku ku navela ka vasandzi lava i ka ku “nga chavi Xikwembu.” U va vula “vanhu lava fambisiwaka hi swa misava lava nga hava Moya.” (Xiitaliki i xerhu.)—Yuda 17-19.
8 Vadyondzisi va mavunwa lava Petro a vulaka leswaku va “navela ku titsakisa hi swilo swa thyaka” kumbexana va le xikarhi ka vasandzi lava nga riki na vumoya. (2 Petro 2:1, 10, 14) Va vungunya Vakreste lava tshembekeke hi ku va vutisa va ku: “Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona, ku sukela loko misava yi tumbuluka.”—2 Petro 3:4.
9. (a) Ha yini vasandzi va ringeta ku tsan’wa xikhutazo xo hatlisela minkarhi lexi nga eRitweni ra Xikwembu? (b) Xana ku tshama hi anakanyisisa hi siku ra Yehovha i xisirhelelo eka hina hi ndlela yihi?
9 Hikwalaho ka yini ku ri ni ku sandza loku? Hikwalaho ka yini ku vuriwa leswaku vukona bya Kreste a byi nge vonaki, ni leswaku Xikwembu a xi kalanga xi nghenelela etimhakeni ta vanhu naswona a xi nge ngheneleli? Phela, hi ku tsan’wa xikhutazo xa ku hatlisela minkarhi lexi nga eRitweni ra Xikwembu, vasandzi lava lava nga ni vuharhi va lava ku khudzeherisa van’wana hi tlhelo ra moya, xisweswo va endla leswaku va ngheniwa hi ku olova hi ku navela ka vutianakanyi. Vona xikhutazo xa matimba eka hina namuntlha xa leswaku hi tshama hi xalamukile hi tlhelo ra moya! Onge hi nga hambeta hi anakanyisisa hi siku ra Yehovha naswona nkarhi hinkwawo hi tsundzuka leswaku mahlo ya yena ma hi langutile! Xisweswo hi ta susumeteleka ku tirhela Yehovha hi ku chivirika ni ku hlayisa mahanyelo ya hina lama tengeke.—Pisalema 11:4; Esaya 29:15; Ezekiyele 8:12; 12:27; Sofoniya 1:12.
Swilo Leswi Endliwaka Hi Vomu Ni Leswi Nga Swa Hava
10. Petro u swi kombisa njhani leswaku vasandzi va hoxisile?
10 Vasandzi vo tano va honisa mhaka ya nkoka. Va yi honisa hi vomu kutani va ringeta ku endla leswaku van’wana va yi rivala. Hikwalaho ka yini? Leswaku va ta kota ku xisetela vanhu hi ku olova. Petro wa tsala: “Vanhu lava va vula ha vomu, hi ku rivala mhaka leyi.” Hi yihi mhaka ya kona? “Hileswaku matilo a ma ri kona khale ni khale, ni leswaku misava yi vumbiwile hi rito ra Xikwembu yi huma ematini, yi ri xikarhi ka mati. Hi rito rero, misava leyi a yi ri kona enkarhini wolowo, yi dyiwile hi mati ya ndhambi, yi lova.” (2 Petro 3:5, 6, xiitaliki i xerhu.) Ina, Yehovha u lovise misava leyo homboloka hi nkarhi wa Ndhambhi esikwini ra Nowa, ku nga mhaka leyi na Yesu a yi tiyiseke swinene. (Matewu 24:37-39; Luka 17:26, 27; 2 Petro 2:5) Kutani, ku hambana ni leswi vasandzi va swi vulaka, swilo hinkwaswo a swi hambetanga swi ya emahlweni “hilaha a swi famba hakona, ku sukela loko misava yi tumbuluka.”
11. I ku langutela kwihi loku a ku nga si va nkarhi wa kona, loku endleke leswaku Vakreste vo sungula va hlekuriwa hi vanhu van’wana?
11 A swi ta va swi fanerile loko vasandzi va vungunye Vakreste lavo tshembeka hikuva leswi a swi ta va swi endle onge hi loko ku ve ku langutela loku nga hetisekangiki. Emahlweninyana ka ku fa ka Yesu, vadyondzisiwa va yena “a va ehleketa leswaku Mfumo wa Xikwembu wu ta hatla wu humelela.” Kutani, endzhaku ka ku pfuxiwa ka yena eku feni va lave ku tiva loko Mfumo wu ta simekiwa xikan’we-kan’we. Nakambe, kwalomu ka khume ra malembe emahlweni ko va Petro a tsala papila ra yena ra vumbirhi, van’wana a va “tshukisiwa” hi “ku vulavula” kumbe “hi papila,” ku nga leswi a ku vuriwa leswaku swi huma eka muapostola Pawulo kumbe eka vanakulobye va yena, “ku tiyisa leswaku siku ra Hosi sweswi ri fikile.” (Luka 19:11; 2 Vatesalonika 2:2; Mintirho 1:6) Hambiswiritano, ku langutela koloko ka vadyondzisiwa va Yesu a ku nga ri ka hava, a va lo ku hatlisela ntsena. Siku ra Yehovha a ra ha ta!
Rito Ra Xikwembu Ra Tshembeka
12. Xana Rito ra Xikwembu ri vonake ri tshembekile eka vuprofeta bya rona malunghana ni “siku ra Yehova” hi ndlela yihi?
12 Hilaha hi swi xiyeke hakona eku sunguleni, vaprofeta va le mahlweni ka Vukreste a va hamba va tsundzuxa leswaku siku ra Yehovha ra ku tirihisela ri tshinele. “Siku ra Yehova” leritsongo ri fikile hi 607 B.C.E. loko Yehovha a tirihiserile eka vanhu vakwe lava hambukeke. (Sofoniya 1:14-18) Endzhaku, matiko man’wana yo tanihi Babilona na Egipta, ma xanisiwe hi “Siku ra Yehova” leritsongo. (Esaya 13:6-9; Yeremiya 46:1-10; Obadiya 15) Ku hela ka mafambiselo ya swilo ya Xiyuda eka lembe-xidzana ro sungula na kona a ku vhumbhiwile, naswona ku humelerile loko mavuthu ya Rhoma ma hlasele Yudiya hi 70 C.E. (Luka 19:41-44; 1 Petro 4:7) Kambe Petro u vulavula hi “siku ra Yehova” ra le nkarhini lowu taka, leri nga ta tlula ni Ndhambhi ya misava hinkwayo hi vukulu!
13. I xikombiso xihi xa le matin’wini lexi kombisaka ku tiya ka makumu ya mafambiselo lawa ya swilo?
13 Petro u sungula nhlamuselo yakwe ya ndzoviso wolowo lowu taka, a ku: “Hi ro rito rero.” A ha ku vula leswaku “hi rito ra Xikwembu,” misava ya le mahlweni ka Ndhambhi yi “hum[e] ematini, yi ri xikarhi ka mati.” Xiyimo lexi, lexi hlamuseriwaka eka rungula ra Bibele leri vulavulaka hi ntumbuluko, xi endle swi koteka leswaku ku va ni Ndhambhi loko mati ma halake kunene hi ku kongomisiwa hi Xikwembu, kumbe hi rito ra xona. Petro u ya emahlweni: “Hi ro rito rero [ra Xikwembu], matilo ni misava ya sweswi, swi hlayiseriwe ku tshwa hi ndzilo, swi yimele siku ra ku avanyisiwa ni ra ku lovisiwa ka vanhu lava nga riki na mhaka na Xikwembu.” (2 Petro 3:5-7; Genesa 1:6-8) Hi ni rito ra Yehovha leri tshembekaka emhakeni leyi! U ta herisa “matilo ni misava”—ku nga mafambiselo lawa ya swilo—hi vukarhi bya siku ra yena lerikulu! (Sofoniya 3:8) Kambe rini?
Ku Navela Swinene Leswaku Makumu Ma Fika
14. Hikwalaho ka yini hi nga tiyisekaka leswaku sweswi hi hanya “emasikwini ya makumu”?
14 Vadyondzisiwa va Yesu a va lava ku tiva leswaku makumu ma ta fika rini, kutani va n’wi vutisile va ku: “Xana xikombiso xa ku vuya ka wena ni xa ku hela ka [minkarhi] xi ta va xihi ke?” Swi le rivaleni leswaku a va lava ku tiva leswaku mafambiselo ya swilo ya Xiyuda ma ta hela rini, kambe nhlamulo ya Yesu yi kongome ngopfu enkarhini lowu ‘matilo ni misava’ ya sweswi swi nga ta herisiwa ha wona. Yesu u vhumbhe swilo swo tanihi tinyimpi letikulu, ku pfumaleka ka swakudya, ku tsekatseka ka misava, vuvabyi ni vugevenga. (Matewu 24:3-14; Luka 21:5-36) Ku sukela hi lembe ra 1914, hi vone ku hetiseka ka xikombiso lexi Yesu a xi nyikeleke “xa ku hela ka [minkarhi]” kun’we ni swilo leswi muapostola Pawulo a vuleke leswaku a swi ta fungha ‘masiku ya makumu.’ (2 Timotiya 3:1-5) Kunene, ku ni vumbhoni bya ntsandza-vahlayi lebyi kombisaka leswaku hi hanya emakun’wini ya mafambiselo lawa ya swilo!
15. I yini leswi Vakreste va swi endleke ku nga khathariseki xitsundzuxo xa Yesu?
15 Timbhoni ta Yehovha a ti ri karhi ti navela swinene ku tiva leswaku siku ra Yehovha ri ta fika rini. Hikwalaho ka ku navela ka tona lokukulu, minkarhi yin’wana a ti ringeta ni ku ringanyeta nkarhi lowu ri nga ha fikaka ha wona. Kambe hi ku endla tano ti tsandzekile ku hlayisa xitsundzuxo xa N’wini wa vona xa leswaku a hi “tivi leswaku nkarhi wu ta va rini.” hilaha swi veke hakona eka vadyondzisiwa va Yesu vo sungula. (Marka 13:32, 33) Vasandzi va vungunye Vakreste lava tshembekaka hikwalaho ka ku langutela ka vona wu nga si va wona nkarhi wa kona. (2 Petro 3:3, 4) Hambiswiritano, Petro u tiyisekisa leswaku siku ra Yehovha ri ta fika, hi nkarhi wa Yena.
Xilaveko Xo Va Ni Langutelo Ra Yehovha
16. Hi xihi xitsundzuxo lexi hi xi tekelaka enhlokweni hi vutlhari?
16 Hi fanele hi va ni langutelo ra Yehovha malunghana ni nkarhi, hilaha Petro sweswi a hi tsundzuxaka hakona: “Kambe mi nga rivali mhaka yin’we leyi, varhandziwa: Emahlweni ka Hosi, siku rin’we ri kotisa malembe ya 1000, ni malembe ya 1000 ma kotisa siku rin’we.” Vona ndlela leyi vutomi bya hina byo ringana malembe ya 70 kumbe 80 byi komeke ha yona loko byi ringanisiwa na wona! (2 Petro 3:8; Pisalema 90:4, 10) Kutani loko ku hetiseka ka swikongomelo swa Xikwembu ku vonaka ku hlwela, hi fanele hi amukela ndzayo ya muprofeta wa Xikwembu leyi nge: “Hambi yi nga hlwela [nkarhi lowu vekiweke], u yi langutela, hikuv̌a yi ta endlakala ŝinene, yi nga ka yi nga hlweri.” (Xiitaliki i xerhu.)—Habakuku 2:3.
17. Hambileswi masiku ya makumu ma hambeteke nkarhi wo leha ku tlula hilaha vo tala a va rindzele hakona, i yini leswi hi nga tiyisekaka ha swona?
17 Hikwalaho ka yini masiku ya makumu ya mafambiselo lawa ya swilo ma teke nkarhi wo leha swinene ku tlula hilaha vo tala a va langutele hakona? Hi xivangelo lexinene, hilaha Petro a hlamuselaka hakona ku ya emahlweni: “Hosi a yi hlweli ku endla leswi yi nga tshembisa swona, hilaha van’wana va twisisaka ‘ku hlwela’ hakona, kambe yi lehisa mbilu hikwalaho ka n’wina; a yi lavi leswaku ni un’we wa n’wina a lova, kambe yi lava leswaku hinkwavo va ta eku hundzukeni.” (2 Petro 3:9) Yehovha u navelela vanhu hinkwavo swilo leswinene. U karhateka ngopfu hi vutomi bya vanhu, tanihi leswi a nge: “A nḍi ṭakeri rifu ra mudyohi, kambe hi leŝaku a hunḍuka e ndleleni ya yena kutani a hanya.” (Ezekiyele 33:11) Kutani hi nga tiyiseka leswaku makumu ma ta fika hi nkarhi lowu faneleke leswaku ku hetiseka xikongomelo xa Muvumbi wa hina wa vutlhari hinkwabyo, wa rirhandzu!
I Yini Leswi Nga Ta Hundza?
18, 19. (a) Hikwalaho ka yini Yehovha a tiyimisele ku lovisa mafambiselo lawa ya swilo? (b) Xana Petro u ma hlamusela njhani makumu ya mafambiselo lawa ya swilo, naswona i yini leswi kahle-kahle swi nga ta herisiwa?
18 Hikwalaho ka leswi Yehovha a va rhandzaka swinene lava n’wi tirhelaka, u ta susa hinkwavo lava va va vangelaka maxangu. (Pisalema 37:9-11, 29) Hi ku ya hi leswi Pawulo a swi vuleke eku sunguleni, leswaku ndzoviso lowu wu ta fika hi nkarhi lowu nga rindzeriwangiki, Petro wa tsala: “Siku ra Hosi ri ta ta tanihi khamba, kutani matilo ma ta hundza hi huwa leyikulu; hinkwaswo swa ntumbuluko swi ta tshwa hi ndzilo swi hela, kutani misava ni mintirho leyi nga ka yona swi ta hisiwa.” (2 Petro 3:10; 1 Vatesalonika 5:2) Matilo ni misava ya xiviri a swi herisiwanga hi Ndhambhi, naswona a swi nge herisiwi esikwini ra Yehovha. Kutani, i yini leswi nga “ta hundza” kumbe leswi nga ta herisiwa?
19 Tihulumendhe ta vanhu leti a ti ri karhi ti lawula vanhu kukotisa “matilo” ti ta hela na yona “misava,” kumbe vandla ra vanhu lava nga chaviki Xikwembu yi ta hela. Kumbexana “huwa leyikulu” yi kombisa ku hundza ka matilo ka xihatla. “Hinkwaswo swa ntumbuluko” leswi vumbaka vandla ra vanhu lava hombolokeke swi ta “n’okisiwa” kumbe ku herisiwa. Naswona “misava,” ku katsa “ni mintirho leyi nga ka yona,” “swi ta hisiwa.” Yehovha u ta yi paluxa swinene mintirho ya vanhu leyo homboloka loko a herisa mafambiselo ya swilo hinkwawo hilaha ku faneleke swinene.
Tshama U Namarhele Ntshembo Wa Wena
20. Xana vutomi bya hina byi fanele byi khumbheka njhani hi ku va ni vutivi bya swiendlakalo swa le nkarhini lowu taka?
20 Tanihi leswi swiendlakalo leswi leswi chavisaka swi tshineleke, Petro u vula leswaku hi fanele hi hanya “vutomi lebyo hlawuleka bya vukhongeri, [h]i ri karhi [h]i langutela siku ra Xikwembu.” A swi kali swi lava hi tilumaluma! “Matilo ma [ta] hela, ni hinkwaswo swa ntumbuluko swi . . . ta n’okisiwa hi ndzilo.” (2 Petro 3:11, 12) Hikwalaho ka leswi swiendlakalo leswi swo chavisa swi nga ha sungulaka ku humelela ku nga ri khale, swi fanele swi khumbha xin’wana ni xin’wana lexi hi xi endlaka kumbe hi kunguhataka ku xi endla.
21. I yini leswi nga ta siva matilo ya sweswi ni misava ya sweswi?
21 Sweswi Petro u hi byela leswi nga ta siva mafambiselo ya khale, a ku: “Kambe, hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku nga ta va ni ku lulama.” (2 Petro 3:13; Esaya 65:17) Aha, mayana ku rhuriwa ndzhwalo loko tano! Kreste ni vafumi-kulobye va 144 000 va ta vumba hulumendhe ya “matilo lamantshwa,” naswona vanhu lava nga ta pona makumu ya misava leyi va ta vumba “misava leyintshwa.”—1 Yohane 2:17; Nhlavutelo 5:9, 10; 14:1, 3.
Tshama U Ri Karhi U Hatlisela Minkarhi Ni Ku Va Ni Mahanyelo Lama Tengeke
22. (a) I yini lexi nga ta hi pfuna ku papalata xivati xin’wana ni xin’wana xa moya kumbe xisandzu? (b) Hi rihi khombo leri Petro a tsundzuxaka ha rona?
22 Petro u ya emahlweni a ku: “Hikokwalaho, varhandziwa, leswi mi languteleke swilo leswi, chivirikani leswaku Xikwembu xi mi kuma mi nga ri na xivati kumbe xisandzu, naswona mi ri ni ku rhula. Kutani twisisani leswaku loko Hosi ya hina yi lehisa mbilu, yi endlela ku hi ponisa.” Ku rindzela hi ku lehisa mbilu ni ku languta siku ra Yehovha leri nga ha vonakaka onge ra hlwela xi ri xikombiso xa ku lehisa ka Xikwembu mbilu, swi ta hi pfuna leswaku hi papalata xivati xihi na xihi xa moya kumbe xisandzu. Kambe, ku ni khombo! Petro u nyika xitsundzuxo xa leswaku eka matsalwa ya “makwerhu Pawulo murhandziwa wa hina . . . ku ni swilo swin’wana leswi swi nonon’hwaka ku swi twisisa; lava pfumalaka vutivi ni lava nga tiyangiki va swi gombonyokisa, hilaha va endlaka hakona eka matsalwa laman’wana, kutani swi va lovisa.”—2 Petro 3:14-16.
23. Hi xihi xitsundzuxo xa Petro xo hetelela?
23 Handle ko kanakana, vadyondzisi va mavunwa va gombonyokise matsalwa ya Pawulo malunghana ni tintswalo ta Xikwembu leti nga faneriwiki, va ma tirhisa tanihi xisirhelelo xo endla manyala. Kumbexana Petro a a tsundzuka leswi loko a tsala xitsundzuxo xa yena xo lela: “Hikokwalaho n’wina varhandziwa, leswi mi tivaka mhaka leyi hi nkarhi, tivoneleni, hikuva mi nga tshuka mi humile endleleni hi ku yengiwa hi lavo homboloka, kutani mi lahlekeriwa hi ku tiya ka n’wina.” Kutani u gimete papila ra yena hi ku khutaza a ku: “Kulani, mi ri etintswalweni ni le ku tiveni ka Yesu Kriste, Hosi ya hina ni Muponisi wa hina.”—2 Petro 3:17, 18.
24. I langutelo rihi leri malandza ya Yehovha hinkwawo ma faneleke ma va na rona?
24 Entiyisweni, Petro u lava ku tiyisa vamakwavo. U navela leswaku hinkwavo va va ni langutelo leri phofuriweke hi Mbhoni yo tshembeka leyi nga ni malembe ya 82 hi vukhale leyi tshahiweke eku sunguleni: “A ndzi ri karhi ndzi hanya hi ndlela leyi muapostola a khutazaka ha yona, ‘ndzi hambeta ndzi anakanyisisa hi vukona bya siku ra Yehovha.’ Nkarhi hinkwawo a ndzi languta xitshembiso xa misava leyintshwa tanihi ‘nchumu wa xiviri hambiloko yi nga si voniwa.’” Onge hinkwerhu hi nga hanya hi ndlela leyi fanaka.
A Wu Ta Hlamurisa Ku Yini?
◻ Xana ‘ku hambeta hi anakanyisisa’ hi siku ra Yehovha swi vula yini?
◻ I yini leswi vasandzi va swi honisaka hi vomu, naswona hikwalaho ka yini?
◻ I yini lexi endleke leswaku vasandzi va vungunya Vakreste lava tshembekeke?
◻ Hi rihi langutelo leri hi faneleke hi ri hlayisa?
[Xifaniso lexi nga eka tluka 23]
Hambeta u anakanyisisa hi siku ra Yehovha . . .
[Xifaniso lexi nga eka tluka 24]
. . . ni hi misava leyintshwa leyi nga ta landzela