Rindza Hi Ku Lehisa Mbilu

MURISI loyi hi ku phindha-phindha a huwelelaka a ku, “Hlolwa!” kasi a ku na hlolwa u kume leswaku loko a ba nyandhayeye enkarhini lowu landzelaka a a nga ha yingisiwi. Hilaha ku fanaka namuntlha, vo tala va honisa ku tshinela ka siku ra Yehovha hikuva va twe switsundzuxo swa ntsandza-vahlayi leswi tikombeke swi ri mavunwa. Mhaka ya leswaku vanhu vo tala swonghasi va tsandzeka ku xiya leswaku hi xihi xitsundzuxo lexi nga xa ntiyiso ivi va xi yingisa yi tirhisiwa hi nala lonkulu wa Xikwembu, Sathana, “ntsumi ya ku vonakala” ya mavunwa.—2 Vakorinto 11:14.

Moya wa ku pfumala ku khathala wu nga va ni khombo hambi ku ri eka lava va tirheleke Yehovha nkarhi wo leha. Ha yini? Xiya xitsundzuxo xa muapostola Petro xa lembe-xidzana ro sungula.

Anakanya Kahle

Papila ra Petro ra vumbirhi leri huhuteriweke a ri ri xitsundzuxo eka Vakreste vo sungula, na le ka hina ra ha ri xona. U tsarile: “Varhandziwa, leri se i papila ra vumbirhi ndzi mi tsalela rona, leri eka rona, tanihi le ka lero sungula, ndzi pfuxaka matimba ya n’wina ya ku ehleketisisa, hi ku mi tsundzuxa.” (2 Petro 3:1) A xi ri xihi xivangelo xa ku vilela ka Petro? Petro u kandziyisa vukona bya vahlekuri lava ku hlekula ka vona ku solaka ku hiteka malunghana ni nkarhi lowu malandza ya Xikwembu ma hanyaka eka wona. Sweswi i nkarhi wo tivonela ku yengiwa hi vahlekuri. Xisweswo Petro u khutaza vahlayi va yena ku “tsundzuka marito lama vuriweke khale hi vaprofeta vo kwetsima.” (2 Petro 3:2; Mintirho 3:22, 23) Xana vaprofeta a va vule yini?

Malandza lama tshembekaka ya Xikwembu hi minkarhi yo tala ma yise nyingiso eka ndlela leyi ku avanyisa ka Xikwembu ku heriseke vubihi ha yona. Petro u tsundzuxa vahlayi va yena hi Ndhambhi ya siku ra Nowa leyi Xikwembu xi yi tirhiseke tanihi ndlela yo nghenelela loko misava yi tele hi vubihi. Ndhambhi yoleyo ya maboboma yi herise misava ya nkarhi wolowo hilaha ku humelelaka. Kambe Xikwembu xi hlayise Nowa ni ndyangu wa yena engalaveni swin’we ni swivumbiwa leswi hanyaka swa ‘muxaka wun’wana ni wun’wana wa nyama.’ Mintsheketo ya matiko hinkwawo yi tiyisa vumbhoni bya ntiyiso wa mhaka yoleyo ya le Bibeleni.a—Genesa 6:19; 2 Petro 3:5, 6.

Petro u vitana ku nghenelela koloko ka Xikwembu ‘ntiyiso lowu nga xiyiwiki’ hi vanhu van’wana. Kutani van’wana va kanganyisiwile va phasiwa hi xirimbani xa ku pfumala ku khathala xa vahlekuri va nkarhi wolowo. Kambe, hina hi fanele hi xiya leswi Yehovha ana se a swi endleke. Petro wa hi byela: “Ha rona rito rero, matilo ni misava leyi nga kona sweswi swi hlayiseriwe ndzilo naswona swa ha vekiwile ku fikela siku ra vuavanyisi ni ra ndzoviso wa vanhu lava nga xiximiki Xikwembu.” (2 Petro 3:7) Ina, ku nghenelela ka Xikwembu ku ta endleka nakambe.

Xikwembu A Xi Hlweri

Ana se ku hundze nkarhi wo leha swinene. Ha yini Xikwembu xi rindze nkarhi wo leha swonghasi leswaku xi tlhantlha swiphiqo swa vanhu? Nakambe, Petro u kandziyisa mhaka yin’wana. U ri: “Varhandziwa, mi nga kohli hi mhaka leyi ya leswaku siku rin’we eka Yehovha ri fana ni malembe ya gidi naswona malembe ya gidi ma fana ni siku rin’we.” (2 Petro 3:8) Ndlela leyi Yehovha a langutaka nkarhi ha yona ya hambana ni ya hina. Eka Xikwembu lexi nga riki na makumu, nkarhi wa ku sukela eku vumbiweni ka Adamu ku ta fikela sweswi a wu fiki ni le ka vhiki. Kambe ku nga khathariseki langutelo ra nkarhi leri hi nga na rona, gidi ra malembe rin’wana ni rin’wana ni siku rin’wana ni rin’wana leri hundzaka ri hi tshineta ekusuhi swinene ni le ku hetisekeni ka xikongomelo xa Yehovha.

“Ku rindza n’weti i ku rindza munyama” i xivuriso lexi kombisaka leswaku ku rindzela xiendlakalo ntsena swi vonaka swi hlwerisa ku humelela ka xona. Hambiswiritano, Petro u bumabumela ku “rindzela ni ku hamba [hi] tsundzuka vukona bya siku ra Yehovha.” (2 Petro 3:12) Xana hi nga va ni langutelo ra mianakanyo leri hi hlayisaka hi xalamukele ku tshinela ka ku nghenelela ka Xikwembu hi ndlela yihi?

Swiendlo Swi Vulavula Ku Tlula Marito

Petro u yisa nyingiso eka swiendlo ni mintirho. U vulavula hi “swiendlo swo kwetsima swa ku tikhoma” swin’we ni “swiendlo swa ku tinyiketela loku nga ni vukwembu.” (2 Petro 3:11) Xana leswi swi katsa yini?

Nandza wa xiviri wa Xikwembu u endla swilo hi ndlela leyi xi tsakisaka. Ripfumelo ra mugandzeri yoloye wa ntiyiso ri kombisiwa hi mahanyelo ya yena. Leswi swi n’wi hlawula eka lava vulavulaka ntsena hi ku pfumela eka Xikwembu ni switshembiso swa xona. Kumbexana u swi xiyile leswaku vutirheli bya le rivaleni bya Timbhoni ta Yehovha byi ti endla leti hambaneke. Ti ku endzela ekaya ka wena leswaku ti kokela nyingiso wa wena eswitshembisweni swa Xikwembu leswi xaxametiweke eBibeleni. Kambe ti tlhela ti nyikela vumbhoni bya mintshembo ya tona ni tidyondzo kun’wana ni kun’wana laha ti hlanganaka na vanhu.

Mbhoni leyi tshamaka yi khomekile hi ku vula ripfumelo ra yona eka van’wana yi endla leswaku ripfumelo ra yona ri tiyisiwa. Marito ma dzikisa nkucetelo naswona hi nkarhi lowu fanaka ma tisa ntsako wa le ndzeni ni ku eneriseka. Loko hi twarisa mahungu lamanene ya Mfumo wa Xikwembu, hi tsakisa na Yehovha. Ha swi tiva leswaku ‘a nga pfumali ku lulama lerova a nga rivala ntirho wa hina ni rirhandzu leri hi ri kombisaka hikwalaho ka vito ra yena,’ hilaha Pawulo muapostola-kulobye wa Petro a vulaka hakona.—Vaheveru 6:10; Varhoma 10:9, 10.

Hi byihi vuyelo bya ku khumbeka loku hi ku huwelela mahungu lamanene ya Mfumo hi masiku yo hetelela ya mafambiselo lawa yo biha ya swilo? Madzana ya magidi ya vanhu va timbilu to tshembeka va dyondza ndlela yo va ni vuxaka bya le kusuhi na Yehovha, leswaku va vuyeriwa eka musa lowu nga faneriwiki wa yena ni ku kuma ntsako wa ntiyiso eka ntshembo wa vutomi lebyi nga heriki emisaveni ya paradeyisi.

Kurisa Vutivi Bya Wena

Hambileswi hi swi tivaka ku suka eBibeleni leswaku Yehovha Xikwembu u ta nghenelela hi nkarhi wa yena lowu faneleke, hi fanele hi yingisa xitsundzuxo lexi engetelekeke lexi Petro a xi nyikelaka. “Leswi mi kumeke vutivi lebyi ka ha ri emahlweni, tivoneleni leswaku mi nga hambukisiwi na vona hi xidyoho xa vanhu lava delelaka nawu kutani mi wa eku tserhameni ka n’wina.”—2 Petro 3:17.

Yehovha u swi tive kahle ka ha ri emahlweni leswaku van’wana lava pfumalaka ripfumelo leri tiyeke va ta hetiwa matimba hi leswi vonakaka swi ri ku hlwela ka ku nghenelela ka Xikwembu. A a swi tiva ni leswaku nkucetelo wa vanhu lava nga riki na vukwembu wu nga onha malandza ya yena ya ntiyiso kumbe, va tekela ehansi dyondzo ya vona ya leswaku ku kwetsimisiwa ka vito ra Xikwembu ku tshinele. Wa nga vona ndlela leyi swi nga na khombo ha yona ku wa eku tserhameni emasikwini lawa ya makumu!

Sweswi a hi nkarhi wo tshama hi ri karhi hi kanakana kumbe ku nga tiyiseki hi leswi Yehovha a nga ta swi endla. (Vaheveru 12:1) Ematshan’weni ya sweswo, sweswi i nkarhi wo ya hi tlangela swinene leswi ku lehisa mbilu ka Yehovha ku swi tiseke—ntshembo wa ku ponisiwa ka timiliyoni leti vaka xiphemu xa ntshungu lowukulu wa matiko hinkwawo ni ku langutela ku pona nhlomulo lowukulu lowu taka. (Nhlavutelo 7:9, 14) Petro wa khutaza: “Hambetani mi kula eka musa lowu nga faneriwiki ni le ka vutivi bya Hosi tlhelo Muponisi wa hina Yesu Kreste. Ku vangama a ku ve eka yena sweswi ni hilaha ku nga heriki.”—2 Petro 3:18.

“Tihlayiseni eRirhandzwini Ra Xikwembu”

Ku khomeka hi ku chumayela Mfumo naswona nkarhi na nkarhi hi va kona eminhlanganweni ya Vukreste leswaku hi gandzela ni ku dyondza Rito ra Xikwembu swa hi sirhelela. Xisweswo, a hi nge vi na nkarhi wo karhateka swinene hi swiyimo leswi onhakaka swa mafambiselo ya namuntlha yo biha. Minchavo ni mivilelo a swi fanelanga swi lawula vutomi bya Mukreste wa ntiyiso. (1 Vakorinto 15:58) Loko hi tshama hi khomekile hi ku tirhela Yehovha, nkarhi wu hundza hi ku hatlisa.

Yuda, loyi a ri ntangha ya Petro naswona a ri makwavo wa Yesu hi manana, wa hi khutaza a ku: “N’wina, varhandziwa, hi ku tiaka eripfumelweni ra n’wina ro kwetsima swinene, mi khongela hi moya wo kwetsima, tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.” (Yuda 20, 21) Xiya nkoka wa langutelo lerinene leri kurisiwaka hi ku tiyisela eku khongeleni. (1 Vatesalonika 5:17) Kutani Yuda wa engetela a ku: “Hambetani mi kombisa tintswalo eka lava kanakanaka; va poniseni hi ku va phula endzilweni. Kambe hambetani mi kombisa tintswalo eka van’wanyana, mi endla tano hi xichavo, mi ri karhi mi venga hambi nguvu ya le ndzeni leyi thyakisiweke hi nyama.” (Yuda 22, 23) Mawaku ndlela leyi swi nga swa nkoka ha yona ku tiyisana hi minkarhi leyi yo nonon’hwa! Naswona wa nga vona ndlela leyi swi nga swa nkoka ha yona ku nga weli endzingweni, hi ku tirhisa “siku ra ku ponisiwa” leri ndlandlamuxiweke tanihi xisirhelelo xa “ku tikhoma ko biha,” loku sweswi ku andzeke swinene emisaveni ya namuntlha leyi onhakeke hi tlhelo ra mahanyelo.—Yuda 4; 2 Vakorinto 6:1, 2.

Hi ku yingisa ndzayo ya rirhandzu ya Petro, Pawulo na Yuda, na hi ku tshama u khomekile naswona u hiseka entirhweni wa Xikwembu, u nga rindza hi ku lehisa mbilu u rindzela ku nghenelela ka Yehovha. Kambe xana u ta endla tano?

U nga kanakani ku vulavurisana ni Timbhoni ta le ndhawini ya ka n’wina leswaku ti ku pfuna ku tiyisa ripfumelo ra wena exitshembisweni xa Muvumbi xa vutomi lebyi nga heriki. Dyondza leswi languteriweke leswaku u fanelekela ku hlanganyela eka ntirho wo nyikela vumbhoni emisaveni hinkwayo lowu nga ta ka wu nga ha endliwi nakambe lowu nga ta yimisiwa eka nhlomulo lowukulu lowu tshinelaka. (Marka 13:10) Kutani u ta va ni ntshembo wo hanya emisaveni leyintshwa yo lulama leyi Yehovha a yi tshembisaka. (2 Petro 3:13) Yingisa switsundzuxo swa yena! Rindza hi ku lehisa mbilu! Tshama u khomekile!

[Nhlamuselo ya le hansi]

[Xifaniso lexi nga eka tluka 7]

Dyondza hi switshembiso swa Xikwembu swa Paradeyisi sweswi

[Laha Xifaniso Xi Humaka Kona eka tluka 5]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.