“Ti Ni Matimba Naswona Ta Khorwisa”

“KU SUKELA mundzuku ndzi ta yi tirhisa entirhweni wo chumayela, hikuva tinhlamuselo leti yi ti tameleke ti ni matimba naswona ta khorwisa hakunene,” ku tsale un’wana wa Timbhoni ta Yehovha eFurwa. Mbhoni yin’wana ya le United States yi tsarile yi ku: “Ndzi hatlise ndzi yi hlaya ivi xikan’we-kan’we ndzi sungula ku yi tirhisa evutirhelini bya nsimu, tanihi leswi hi hlanganaka ni vanhu vo tala swinene lava nga tsakeriki ni lava nga yi tshembiki Bibele.” Xana a va vulavula ha yini ke? Hi broxara ya matluka ya 32 leyi nge Buku Ya Vanhu Hinkwavo, leyi humesiweke hi Sosayiti ya Watch Tower eMitsombanweni ya Muganga ya “Ku Pfumela eRitweni Ra Xikwembu” leyi khomiweke hi 1997/98.

Broxara leyi yi lunghiseleriwe ngopfu vanhu vo karhi—lava va nga ha vaka va dyondzekile kambe va tiva switsongo hi Bibele. Vo tala va vona va tibyele swo karhi hi Bibele, hambiloko vona hi voxe va nga si tshama va yi hlaya. Xikongomelo xa broxara leyi i ku khorwisa muhlayi leswaku Bibele yi fanele ku kambisisiwa hakunene. Broxara leyi a yi sindzisi muhlayi leswaku a pfumela leswaku Bibele yi huhuteriwe hi Xikwembu. Ku ri na sweswo, yi tshika mintiyiso yi tivulavulela. Mavekelo ya mhaka a ma tiki ngopfu, kambe ma twisiseka naswona hi lama kongomeke.

Hilaha swi kombisiwaka hakona hi tinhlamuselo leti tshahiweke laha henhla, lava a va ri kona entsombanweni a va hisekela ku tirhisa broxara leyi evutirhelini bya vona bya nsimu. Hi xikombiso, eFurwa ku hleriwe tsima ro hlawuleka ro nyikela vumbhoni hi August 23 na 24 laha madzana ya magidi ya vaendzi lava ha riki vantshwa vo huma emisaveni hinkwayo a va hlengeletanile eParis hi Siku ra Vantshwa va Misava Hinkwayo. Timbhoni ta kwalomu ka 2500 (ngopfu-ngopfu ta malembe yo sukela eka 16 ku ya eka 30) ti fambise tikopi ta 18 000 ta broxara leyi hi Xifurwa, Xijarimani, Xinghezi, Xintariyana, Xipaniya, Xipolish.

A hi tikarhateleni swinene ku tirhisa broxara leyi yi nge Buku Ya Vanhu Hinkwavo, evutirhelini bya hina. Onge broxara leyi yi nga pfuna swinene eku khorwiseni ka vanhu lava nga ni mianakanyo leyinene leswaku va fanele va tikambisisela Bibele hi voxe.