Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka lowukulu eka wena? Kutani ha yini u nga ringeti mianakanyo ya wena hi swivutiso leswi landzelaka?

◻ Hi kwihi ku hambana exikarhi ka “siku ra Hosi” ni “siku ra Yehova”? (Nhlavutelo 1:10; Yuwele 2:11)

“Siku ra Hosi” ri katsa ku hetiseka ka swivono swa 16 leswi hlamuseriweke eka Nhlavutelo tindzima 1 ku ya ka 22 ni swiendlakalo swa nkoka leswi Yesu a swi vhumbheke loko a hlamula xivutiso xa vadyondzisiwa va yena malunghana ni xikombiso xa vukona bya yena. Eku chaputeni ka siku ra Hosi, siku leri chavisaka ra Yehovha ri ta sungula loko a avanyisa misava leyi onhakeke ya Sathana. (Matewu 24:3-14; Luka 21:11)—12/15, tluka 11.

◻ Hi swihi swivumbeko swin’wana swo hlawuleka swa Bibele ya Makarios?

Vito ra Yehovha ri humelela minkarhi leyi tlulaka 3500 eBibeleni ya Makarios. Xidyondzi xin’wana xa tibuku ta vukhongeri ta Xirhaxiya xi te: “Vuhundzuluxeri byi namarhele rungula ra Xiheveru, naswona ririmi ra vuhundzuluxeri ri tengile ni ku fambisana ni nhloko-mhaka.”—12/15, tluka 27.

◻ I yini “ntiyiso” lowu Yesu a vuleke leswaku wu ta hi ntshunxa? (Yohane 8:32)

Loko Yesu a vulavula hi “ntiyiso,” a a vula rungula leri huhuteriweke hi Xikwembu—ngopfu-ngopfu rungula ra mayelana ni ku rhandza ka Xikwembu—leri hlayisiweke eBibeleni.—1/1, tluka 3.

◻ I mani Yehu na Yehonadabu va manguva lawa?

Yehu u fanekisela Yesu Kreste, loyi emisaveni a yimeriwaka hi “Israyele wa Xikwembu,” Vakreste lava totiweke. (Vagalatiya 6:16; Nhlavutelo 12:17) Tanihi leswi Yehonadabu a nga hlanganisa Yehu, “ntshungu lowukulu” lowu humaka ematikweni wu seketele vayimeri va Yesu va laha misaveni. (Nhlavutelo 7:9, 10; 2 Tihosi 10:15)—1/1, tluka 13.

◻ Xana swi vula yini ‘ku famba ni Xikwembu’? (Genesa 5:24; 6:9)

Leswi swi vula leswaku lava endlaka tano, vo tanihi Enoko na Nowa, va hanye hi ndlela leyi a yi komba leswaku a va ri ni ripfumelo leri tiyeke eka Xikwembu. A va endla leswi Yehovha a va leriseke swona, naswona va hanya vutomi bya vona hi ku pfumelelana ni leswi a va swi tiva malunghana na yena hi ku ya hi ndlela leyi a a khoma vanhu ha yona.—1/15, tluka 13.

◻ Ha yini munhu a fanele a kunguhata ka ha ri emahlweni leswi faneleke swi endliwa loko a file?

Hi ndlela yo karhi, ku endla malunghiselelo yo tano i nyiko ya ndyangu wa yena. Swi kombisa rirhandzu. Swi kombisa ku navela ku ‘wundla lava nga swirho swa ndyangu wa wena’ hambi loko u nga ha ri na swona. (1 Timotiya 5:8)—1/15, tluka 22.

◻ Xana “ntwanano wa khale” wu hetisise yini? (2 Vakorinto 3:14)

A wu ri ni swifanekiselo swa ntwanano lowuntshwa, naswona, hi magandzelo ya wona lama phindha-phindhiwaka, a wu kombisa leswaku munhu a a swi lava swinene ku kutsuriwa exidyohweni ni le ku feni. A wu ri “mukongomisi . . . la yisaka eka Kreste.” (Vagalatiya 3:24)—2/1, tluka 14.

◻ Xana ntwanano lowuntshwa hi lowu nga heriki hi tindlela tihi? (Vaheveru 13:20)

Xo sungula, ku hambana ni ntwanano wa Nawu, a wu nge siviwi ni kan’we. Xa vumbirhi, vuyelo bya matirhelo ya wona hi lebyi nga heriki. Naswona xa vunharhu, vafumiwa va laha misaveni va Mfumo wa Xikwembu va ta hambeta va pfuneka eka lunghiselelo ra ntwanano lowuntshwa eka Gidi ra Malembe.—2/1, tluka 22.

◻ Hi byihi vuyelo lebyi vaka kona loko u ri ni moya wa ku tlangela?

Musa lowu munhu yoloye a wu kumaka hikwalaho ka ku tlangela loku humaka embilwini wu hoxa xandla eka ntsako wa yena ni ku rhula. (Ringanisa Swivuriso 15:13, 15.) Hi ku va ku ri mfanelo leyinene, ku tlangela ku sirhelela munhu eka mintlhaveko leyi hoxeke yo tanihi ku hlundzuka, mavondzo ni xikhomela.—2/15, tluka 4.

◻ Lava tswariweke hi moya va nghenisiwe eka mintwanano yihi?

I ntwanano lowuntshwa lowu Yehovha a wu endlaka ni swirho swa Israyele wa moya, ni ntwanano wa Mfumo, lowu Yesu a wu endlaka ni valandzeri va mikondzo ya yena lava totiweke. (Luka 22:20, 28-30)—2/15, tluka 16.

◻ Hi yihi minkhuvo yinharhu leyikulu leyi Vaisrayele a va lerisiwe ku hlanganyela eka yona?

I Nkhuvo wa Swinkwa swo Kala Comela, lowu a wu landzela Paseka ya Nisan 14; Nkhuvo wa Mavhiki, hi siku ra vu-50 ku sukela eka Nisan 16; na Nkhuvo wo Hlengeleta, kumbe Nkhuvo wa Mitsonga, hi n’hweti ya vunkombo. (Deteronoma 16:1-15)—3/1, matluka 8, 9.

◻ Ha yini ku ri lunghelo ku va kona eminhlanganweni ya Vukreste?

Yesu u te: “Laha ku nga na vambirhi kumbe vanharhu lava hlengeletaneke swin’we hi vito ra mina, ndzi kona exikarhi ka vona.” (Matewu 18:20; 28:20) Nakambe, ndlela ya nkoka leyi swakudya sweswo swa moya swi phameriwaka ha yona i minhlangano ya vandlha swin’we ni tinhlengeletano letikulu. (Matewu 24:45)—3/1, tluka 14.

◻ Hi wahi masungulo ya vito ra Nimrodo?

Swidyondzi swo hlayanyana swi vula leswaku vito ra Nimrodo a hi vito leri a nyikiweke rona loko a tswariwa. Ematshan’weni ya sweswo, va ri teka ri ri vito leri a nyikiweke rona endzhakunyana leswaku ri fambisana ni mukhuva wa yena wo xandzuka endzhaku ka loko wu tikombile.—3/15, tluka 25.

◻ Xana ndyangu i wa nkoka ku fikela kwihi evandleni ra vanhu?

Ndyangu wa laveka evanhwini. Matimu ma kombisa leswaku loko lunghiselelo ra ndyangu ri hela, matimba ya vaaki ni tiko ma tsana. Kutani ndyangu wu ku khumba swinene ku tshamiseka ka vanhu ni vuhlayiseki bya vana ni switukulwana swa nkarhi lowu taka.—4/1, tluka 6.

◻ Hi swihi swilo swinharhu leswi kombisaka leswaku Bibele i Rito ra Xikwembu?

(1) Ya pakanisa hi tlhelo ra sayense; (2) yi ni misinya ya milawu leyi nga hundzeriwiki hi nkarhi leyi tirhaka evuton’wini bya namuntlha; (3) yi ni vuprofeta lebyi kongomeke lebyi hetisekeke, hilaha swi kombisiwaka hakona hi timhaka ta matimu.—4/1, tluka 15.