Vo Tala Va Vula Leswaku Va Ni Ripfumelo

WANSATI la rhandzaka vukhongeri wa le Brazil u te: “Yesu wa hlamarisa! Wa hlamarisa hakunene!” Ina, matimba ya vito ra Yesu ma le rivaleni. Ematin’wini hinkwawo, vanhu va xanisekile va tlhela va n’wi fela hi ku tirhandzela.

Muapostola Petro na Yohane va chumayele ‘exisekelweni xa vito ra Yesu,’ eYerusalema. Hikwalaho ka leswi va endleke sweswo, va khotsiwile va tlhela va biwa. Kambe, “va suk[e] emahlweni ka Sanedri, va tsakile hikuva va hlayiwe lava faneriwaka hi ku khomisiwa tingana hikwalaho ka vito ra yena.”—Mintirho 5:28, 41.

Antipasi a a ri Mukreste un’wana wa lembe-xidzana ro sungula la nga xixima vito ra Yesu. Ebukwini yo hetelela ya Bibele, Nhlavutelo, Yesu u kombetele eka yena tanihi “mbhoni ya mina, yo tshembeka, leyi dlayiweke kwahalano ka n’wina, laha Sathana a tshamaka kona.” (Nhlavutelo 2:13) Swin’we ni Vakreste van’wana ePergamo, Antipasi u ale ku landzula ripfumelo rakwe eka Kreste. Antipasi u khomelele swinene evitweni ra Yesu hambiloko swi lava leswaku a nyikela hi vutomi byakwe!

Kwalomu ka hafu ya lembe-xidzana endzhaku, hi 155 C.E., loyi a tivulaka Mukreste, vito ra yena ku nga Polycarp, u langutane ni ndzingo lowu fanaka loko a lerisiwa ku rhuketela Kreste. U angule a ku: “Ndzi N’wi tirhele malembe ya 86 naswona A nga ndzi dyohelanga nchumu. Xana ndzi nga yi sandzisa ku yini Hosi ya mina leyi yi ndzi poniseke?” Hikwalaho ka ku ala ka yena ku landzula Kreste, Polycarp u hisiwe emhandzini.

Vaapostola, Antipasi ni van’wana a va tiyimisele ku tiyisa vumbhoni bya vona malunghana na Kreste hi rifu! Ku vuriwa yini hi vanhu va namuntlha?

Vito Ra Yesu Namuntlha

Vito ra Yesu ri ya emahlweni ri pfuxa mintlhaveko ya matimba. ELatin Amerika, ku andza ka tikereke leti vulaka leswaku ti pfumela eka Yesu ku ve lokukulu eka malembe-xikhume ya sweswinyana. Hambi ku ri swimitana leswitsongo swi ni kereke ya Pentekosta. Hi nkarhi lowu fanaka, nkucetelo wa tipolitiki etikerekeni to tano wu ya wu kula. Hi xikombiso, eka Huvo ya Milawu ya le Brazil, ku ni swirho swa 31 swa tikereke leti.

Nakambe, Yesu u rhangisiwa emahlweni eka ntlawa lowuntshwa wa vukhongeri eUnited States. Valandzeri va wona va tivitana Vahlayisi va Xitshembiso. Hi 1997 magazini wa Time wu vike leswaku lava vaka kona emihlanganweni ya wona va andze ku suka eka 4200 hi 1991 ku ya eka 1,1 wa timiliyoni hi 1996. Rin’wana ra tinsimu ta wona ri ri: “Oho ku hlula hi Yesu, Muponisi wa mina hilaha ku nga heriki.”

Hambiswiritano, swin’wana leswi endliweke hi vito ra Yesu a swi vanga swinene. Hakanyingi a ku huweleriwa xihlambanyo xa nyimpi hi vito rakwe. Vayuda va dlayiwe hi vunyingi, vahedeni va dlayiwa hi ndlela ya tihanyi, lava kanetaka va xanisiwile, va tsemiwa swirho ivi va hisiwa emhandzini—hinkwaswo swi endliwa hi vito ra Yesu. Sweswinyana, ku endliwa ka bindzu hi vuevhangeli ku ve loku dumeke. Leswi hinkwaswo i ku tirhisa vito ra Yesu ni leswi entiyisweni ri yimelaka swona, hi ndlela leyi hombolokeke ni leyi nyenyetsaka!

Ku tlula kwalaho, swi tlakusa swivutiso swo karhi leswi fanelekaka, leswi nge: I yini leswi katsekaka eku veni ni ripfumelo evitweni ra Yesu? Hi rihi vonelo ra Timbhoni ta Yehovha emhakeni leyi? Xihloko lexi landzelaka xi ta hlamula swivutiso leswi.