Xiviko Xa Vahuweleri Va Mfumo
Timbhoni Ti Nghenela Tsima Ro Hlawuleka eFurwa
HI January 29, 1999 ku sukela ni mpundzu wa Ravuntlhanu ku fikela hi mahelo-vhiki, Timbhoni ta Yehovha le Furwa hi khinkhi ti hangalase tikopi ta 12 wa timiliyoni ta xiphephana lexi nge People of France, You Are Being Deceived! eswitarateni, kutani endzhaku ti nghena hi yindlu ni yindlu. Hikwalaho ka yini ti endle tsima ro tano?
Mpundzu wolowo wa Ravuntlhanu enhlengeletanweni ya vatsari va mahungu le Paris, xivangelo xa tsima rero xi boxiwile. Muyimeri wa Timbhoni u hlamusele a ku: “Lexi hi lavaka ku xi endla namuntlha i ku va hi tiviwa leswi hi nga xiswona ni ku pfala milomu ya lava hangalasaka timhaka leti soholotiweke ehenhla ka hina. A hi na mhaka ni swisolo, kambe a hi nge he yingiseli mavunwa ni tinhlamuselo leti onhaka ndhuma ya hina.”
Hambileswi Timbhoni ta Yehovha ti nga ntlawa wa vunharhu hi ku kula eka vukhongeri bya Vukreste eFurwa, vana vo tala va Timbhoni va sandziwile ni ku xanisiwa eswikolweni. Vanhu lavakulu va lahlekeriwe hi mintirho ya vona naswona va xungetiwile hikwalaho ka vukhongeri bya vona. Lexi hlamarisaka, ku koxiwe ni xibalo xa 60 wa tiphesente eka minyikelo ya vukhongeri leyi ti yi kumeke. Xana tsima leri ri pfune njhani emhakeni leyi ya xihlawu-hlawu?
Xiphephana lexi xi ri: “Timbhoni ta Yehovha ta 250-000 kun’we ni vanghana va tona lava tshamaka eFurwa TI KOMBISA KU VILELA hikwalaho ka ndlela ya vukanganyisi leyi vukhongeri bya tona bya Vukreste, lebyi veke kona eFurwa ku sukela hi 1900, byi tekiweke ha yona tanihi wun’wana wa mipambukwa leyi nga ni khombo ku sukela hi 1995. . . . TI KOMBISA KU VILELA hikwalaho ka nxaniso lowu yaka emahlweni lowu ti langutaneke na wona.” Swihehlo swa mavunwa eka Timbhoni le Furwa ni tindlela ta vukanganyisi leti tirhisiweke hi vasandzi ku endlela leswaku vanhu va tiko va va ni langutelo leri hoxeke swi paluxiwile. Xiphephana xi gimeta hi ku: “Namutlha, ku tlula timiliyoni timbirhi ta Timbhoni ta Yehovha ni vanghana va tona va tshama eYuropa. Va xixima milawu ya Matiko lawa va tshamaka eka wona, hi ku hanya hi mimpimanyeto ya Evhangeli. Vanhu va Furwa, leswi i ntiyiso. I mfanelo ya hina ku mi byela ntiyiso lowu hilaha wu nga hakona!”
N’wangulo Lowunene Wa Xihatla
Timiliyoni ta swiphephana ti fambisiwile hi siku ro sungula. Le Paris ntsena, ninhlikanhi Timbhoni leti tlulaka 7 000 se a ti fambise ku tlula 1,3 wa timiliyoni ta swiphephana evanhwini. Vanhu a va nga si tshama va vona vunyingi lebyikulu swonghasi bya Timbhoni byi fambisa swiphephana eswitarateni. Vuhaxi, ku katsa ni maphepha-hungu ya tiko ya kwalaho, ni thelevhixini, byi yi tsakerile ndlela leyi tsima leri ri endliweke ha yona. Phepha-hungu leri nge Le Progrès de Lyon ri te: “Goza leri . . . ri hi pfule mahlo. Eka malembe ya khume lama hundzeke, rito leri nge ‘mpambukwa’ . . . ri tekiwe ri fambisana ni nchumu lowu hombolokeke, wa khombo ni lowu vavisaka. . . . Timbhoni ta Yehovha a ti na khombo lerova ti nga pfuxa mpfilumpfilu etikweni.”
Lava tivaka Timbhoni ta Yehovha va tlangela xiyimo xa tona xo rhula kun’we ni xichavo xo enta lexi ti nga na xona eka nawu wa tiko wo kondletela ku rhula. Xisweswo, vo tala eswitarateni, va kombise ku tlangela ni nseketelo wa vona eka makume ya magidi ya Timbhoni leti hlanganyeleke eka tsima leri. Hi ku hatlisa ku amukeriwe tinqingho, mapapila yo rhumeriwa hi ti-fax ni lama posiweke kunene lama humaka eka vanhu, va kombisa ku tlangela ka vona xiphephana lexi va xi kumeke. Ku tlula kwalaho, lava timbilu letinene va nyikiwe nkarhi wo twa ntiyiso hi Timbhoni, ematshan’weni ya tinhlamuselo ta mavunwa ni leti nga twaliki, naswona lava vupfumeri bya vona byi sandziweke va kote ku kombisa mintlhaveko ya vona eka leswi va swi tekaka swi ri swa risima.