Ku Amukela Nkongomiso Wa Yehovha Hi Ntsako

HI KU VULA KA ULYSSES V. GLASS

A xi ri xiendlakalo lexi hlawulekeke swinene. A ko va ni swichudeni swa 127 ntsena entlaweni lowu thwasaka. Kambe lava a va ri kona a ku ri vayingiseri lava nga ni nkhinkhi va 126 387, lava a va huma ematikweni yo tala. A ku ri ku thwasa ka ntlawa wa vu-21 wa Xikolo xa Bibele xa Gilead xa Watchtower, loku khomeriweke eYankee Stadium eDorobeni ra New York, hi July 19, 1953. Ha yini xexo xi ve xiendlakalo xa nkoka swinene evuton’wini bya mina? Mi nge ndzi mi hlamuselanyana masungulo ya mhaka ya kona.

NDZI velekiwe le Vincennes, Indiana, eU.S.A., hi February 17, 1912, ka ha sele kwalomu ka malembe mambirhi leswaku Mfumo wa Vumesiya wu simekiwa, hilaha swi hlamuseriweke hakona eka Nhlavutelo 12:1-5. Hi lembe ra le mahlweni ka rero vatswari va mina a va sungule ku dyondza Bibele kun’we ni tivholumo ta Studies in the Scriptures. Mixo wun’wana ni wun’wana hi Sonto, Tatana a a hlayela ndyangu yin’wana ya tibuku leti, ivi hi bula hi leswi hi swi hlayeke.

Manana a a tirhisa leswi a a swi dyondza leswaku a pfuna vana va yena ku hlakulela mianakanyo leyinene. A a ri munhu la nga ni xinghana—a ri ni tintswalo, a rhandza ku pfuna. A hi ri vana va mune, kambe Manana a rhandza ni vana va vaakelani. A heta nkarhi a ri na hina. A tsakela ku hi byela timhaka ta Bibele ni ku yimbelela na hina.

A tlhela a rhamba vanhu vo hambana-hambana lava a va ri evutirhelini bya nkarhi hinkwawo leswaku va ta ekaya. A va tshama siku rin’we kumbe mambirhi, hakanyingi va khoma minhlangano ni ku nyikela tinkulumo ekaya. Ngopfu-ngopfu a hi rhandza lava a va tirhisa swifaniso ni lava a va hi byela switori. Hi nkarhi wun’wana hi 1919, loko nyimpi yo sungula ya misava yi ri ni kwalomu ka lembe yi herile, makwerhu la endzeke u kongomise tinhlamuselo ta yena ngopfu-ngopfu eka hina vana. U vulavule hi ku kwetsimisiwa—loku sweswi hi ku vitanaka kahle hi ku i ku tinyiketela—a tlhela a hi pfuna ku twisisa ndlela leyi a ku khumba vutomi bya hina ha yona. Vusiku byolebyo loko ndzi ya eku etleleni, ndzi khongele eka Tata wa mina wa le tilweni ndzi n’wi byela leswaku ndzi lava ku n’wi tirhela minkarhi hinkwayo.

Hambiswiritano, endzhaku ka 1922 mivilelo yin’wana evuton’wini yi tikombe yi bakanyela xiboho xexo etlhelo. Hi rhurhe ko tala naswona a hi nga ha hlangani ni vandlha ra vanhu va Yehovha. Tatana a nga ri kona a ye entirhweni wakwe wa ka rhalaweyi. Dyondzo ya hina ya Bibele a yi nga ha khomiwi nkarhi hinkwawo. Ndzi endle tikhoso ta le xikolweni hi xikongomelo xa ku va mutshila wa swa vunavetisi naswona a ndzi kunguhata ku ya eyunivhesiti ya ndhuma.

Ku Lulamisa Tipakani Ta Mina eVuton’wini

Exikarhi ka va-1930, misava yi tlhele yi lava ku sungula nyimpi ya misava. A hi tshama eCleveland, Ohio, loko un’wana wa Timbhoni ta Yehovha a hi endzela ekaya. Hi sungule ku anakanyisisa swinene hi leswi hi swi dyondzeke loko ha ha ri vana. Buti wa mina, Russell, a ri ni mianakanyo leyi hlutekeke, kutani u ve wo sungula ku khuvuriwa. Ya mina mianakanyo a yi nga hlutekanga kahle, kambe hi February 3, 1936, na mina ndzi khuvuriwile. Ku tlangela ka mina leswi ku tinyiketela eka Yehovha ku katsaka swona a ku kula, naswona a ndzi dyondza ku amukela nkongomiso wa Yehovha. Hi lembe rolero vamakwerhu va xisati vambirhi, ku nga Kathryn na Gertrude, na vona va khuvuriwile. Hinkwerhu ka hina hi nghenele ntirho wa nkarhi hinkwawo hi va maphayona.

Hambiswiritano, a swi vuli leswaku a ku nga ri na swin’wana leswi a hi swi ehleketa. Ndzi yingisele hi vukheta loko nsati wa buti a ndzi byela hi nhwanyana loyi a ri phyembye la vuriwaka Ann, loyi a “hiseka swinene” ku sukela loko a twe ntiyiso naswona a a ta ta eminhlanganweni ekaya ka hina. Hi nkarhi wolowo Ann a ri matsalana ehofisini ya nawu, naswona u khuvuriwe ku nga si hela ni lembe. A ndzi nga tiyimiselanga ku nghenela vukati, kambe a swi ri erivaleni leswaku Ann a wu amukele hi ku helela ntiyiso. A a lava ku tirhela Yehovha hi ku helela. A nga ri munhu wa ku, “Xana ndzi nga swi endla?” Ku ri na sweswo, a ta vutisa a ku, “Hi yihi ndlela yo antswa leyi ndzi nga swi endlaka ha yona?” Naswona a tiyimisela ku swi endla. Langutelo rolero lerinene ri ndzi kokile. Handle ka sweswo, a a sasekile swinene, naswona wa ha sasekile. U ve nsati wa mina, naswona hi ku hatlisa u ve mutirhi-kulorhi entirhweni wa vuphayona.

Ndzetelo Wa Nkoka Tanihi Maphayona

Tanihi maphayona hi vone xilotlelo xa ku eneriseka loko hi pfumala na loko hi taleriwile. (Vafilipiya 4:11-13) Siku rin’wana, hi mpimavayeni a hi nga ri na swakudya. A ho va na ntlhanu wa tisente ntsena. Hi ye ebuchareni, ivi ndzi vutisa, “Xana u nga hi nyika soseji ya ntlhanu wa tisente?” Muxavisi u hi langutile kutani a tsema maqatha ya mune. Ndza tiyiseka leswaku a yi ri ya nxavo wo tlula ntlhanu wa tisente, kutani yi hi xurhisile.

A hi toloverile ku hlangavetana ni nkaneto lowukulu loko hi ri karhi hi ya emahlweni ni vutirheli bya hina. A hi ri exitarateni edorobeni ra le kusuhi na le Syracuse, eNew York, hi ri karhi hi fambisa swiphephana naswona hi hakarhe tibodo leswaku hi rhambela vanhu enhlanganweni wa le rivaleni wo hlawuleka. Swihontlovila swimbirhi swi ndzi khome hi ndlela ya tihanyi. Un’wana a ri phorisa, kambe a nga ambalanga yunifomo ya yena, naswona u honise xikombelo xa mina xo vona beji ya yena. Hi nkarhi wolowo, Grant Suiter la humaka eBethele ya le Brooklyn u tile ivi a vula leswaku hi fanele hi ya exitichini xa maphorisa hi ya kanela mhaka leyi. U bele hofisi ya Sosayiti ya le Brooklyn riqingho, ivi hina havambirhi hi lerisiwa ku tlhelela exitarateni siku rolero hi ri ni tibodo ni swiphephana leswaku swi ta tirhisiwa tanihi vumbhoni. Hilaha a swi languteriwe hakona, hi khomiwile. Hambiswiritano, loko hi byele maphorisa leswaku a ma ta mangaleriwa hikwalaho ka ku hi khoma swi nga ri enawini, ma hi tshikile.

Hi siku leri tlhandlamaka ntlawa wa vana va malembe ya kondlo-a-ndzi-dyi lava nga lawulekiki va hlasele ndhawu leyi a hi khomele eka yona nhlengeletano, va hlohloteriwa hi mufundhisi, naswona maphorisa a ma nga ri kona. Ntlawa lowu wu himetele fuloro ya mapulanga hi tinhonga to tlanga besibolo, wu wisela vayingiseri van’wana ehansi va suka eswitshan’weni swa le henhla, ivi wu ya exitejini, laha wu fikeke wu tlakusa mujeko wa le Amerika ivi wu huwelela wu ku, “Wu loseni! Wu loseni!” Kutani wu sungula ku yimbelela “Beer Barrel Polka.” Va herise nhlangano hi ku helela. A hi tivonela hi ya hina leswi Yesu a a swi vula loko a te: “Leswi mi nga riki xiphemu xa misava, kambe ndzi mi hlawuleke emisaveni, hikwalaho ka sweswo misava ya mi venga.”—Yohane 15:19.

Kahle-kahle nkulumo ya le rivaleni a ku ri nkulumo leyi rhekhodiweke ya J. F. Rutherford, loyi a a ri muungameri wa Sosayiti ya Watch Tower hi nkarhi wolowo. Mina na Ann hi tshame edorobeni rolero masiku ma nga ri mangani hi endzela vanhu emakaya ya vona hi va nyika nkarhi wa ku yingisela nkulumo leyi. Vanhu va nga ri vangani va swi tsakerile ku yi yingisela.

Ku Tinyiketela Ku Ya Tirha eMatikweni Mambe

Hi ku famba ka nkarhi, ku pfuleke tindlela letintshwa ta ntirho. Buti wa mina, Russell ni nsati wa yena, Dorothy, va rhambiwile leswaku va ya eka ntlawa wo sungula wa Xikolo xa Gilead hi 1943, kutani va rhumeriwe eCuba tanihi varhumiwa. Makwerhu wa xisati Kathryn a ri eka ntlawa wa vumune. Na yena u averiwe ku ya eCuba. Endzhakunyana u averiwe ku ya eDominican Republic, endzhaku ka sweswo a ya ePuerto Rico. Ku vuriwa yini hi mina na Ann?

Loko hi twe hi ta Xikolo xa Gilead ni mhaka ya leswaku Sosayiti a yi lava ku rhumela varhumiwa ematikweni man’wana, hi navele ku tinyiketela ku ya tirha ematikweni mambe. Eku sunguleni, a hi lava ku tifambela hi ya eMexico. Kambe hi ehlekete leswaku swi nga ha antswa leswaku hi rindzela Sosayiti yi hi avela endzhaku ka loko hi ye eXikolweni xa Gilead. Hi swi xiyile leswaku leri a ku ri lunghiselelo leri Yehovha a a ri tirhisa.

Hi rhambiwe eka ntlawa wa vumune wa Xikolo xa Gilead. Kambe loko ntlawa wolowo wu nga si sungula, N. H. Knorr, loyi a ri muungameri wa Sosayiti ya Watch Tower hi nkarhi wolowo, u swi xiye swinene swihinga leswi Ann a ri na swona hikwalaho ka vuvabyi byo khwanyana swirho lebyi a byi n’wi khome loko a ha ri n’wana. U vulavule na mina mayelana na swona ivi a anakanya leswaku ku ta va ku nga ri vutlhari ku hi rhumela etikweni rimbe hi ya tirha kona.

Endzhaku ka malembe mambirhi, loko ndzi ri karhi ndzi endla malunghiselelo ya ntsombano, Makwerhu Knorr u tlhele a ndzi vona ivi a vutisa loko ha ha swi tsakela ku ya eGilead. U ndzi byele leswaku a hi nga ta yisiwa exiavelweni xa le tikweni rimbe; a anakanya hi swin’wana. Kutani loko ntlawa wa vukaye wu tsarisa hi February 26, 1947, hi katsiwile entlaweni wa swichudeni.

Masiku wolawo a hi ri eGilead ha wona a ma rivaleki. Tikhoso ta kona a ti fuwile hi tlhelo ra moya. Ku endliwe vunghana bya vutomi hinkwabyo. Kambe vukona bya mina exikolweni a byi helelanga kwalaho.

Exikarhi Ka Washington Na Gilead

Xikolo xa Gilead a xa ha ri xintshwa. Hulumendhe ya le United States a yi nga swi tivi kahle swikongomelo swa xikolo lexi, kutani a ku vutisiwa swivutiso swo tala. Sosayiti a yi lava ku va ni muyimeri eWashington D.C. Tin’hweti ti nga ri tingani endzhaku ko thwasa eGilead hi rhumeriwe kwalaho. A ndzi fanele ndzi pfuneta eku kumeni ka maphepha yo endza ha wona ya lava a va rhamberiwe ku ta eGilead va huma ematikweni man’wana swin’we ni le ku kumeni ka maphepha lama nga enawini leswaku mathwasana ma rhumeriwa entsungeni ma ya entirhweni wa vurhumiwa. Vatirhela-mfumo van’wana a va twisisa swinene naswona a va pfuna. Van’wana a va nga lavi no twa nchumu hi Timbhoni. Vatirhela-mfumo va nga ri vangani lava a va ngheniwe hi politiki swinene a va vula leswaku hi tirhisana ni mintlawa leyi va nga yi tsakeriki.

Wanuna un’wana loyi ndzi yeke ehofisini ya yena u hi sole swinene hileswi hi nga wu losiki mujeko kumbe ku ya enyimpini. Endzhaku ka loko a holove hi mhaka yoleyo nkarhi wo leha, ndzi hetelele hi ku: “Ndzi lava u swi tiva, naswona wa swi tiva leswaku Timbhoni ta Yehovha a ti lwi na munhu emisaveni. A hi hlanganyeli etimhakeni ta misava. A hi hlanganyeli etinyimpini ta yona ni le ka tipolitiki ta yona. A hi katseki hi ku helela. Ana se hi swi hlurile swiphiqo leswi mi langutaneke na swona; hi ni vun’we enhlengeletanweni ya hina. . . . Kutani, u lava leswaku hi endla yini? Xana u lava hi tlhela hi endla swilo hi ndlela leyi mi endlaka ha yona hi tshika ya hina?” Endzhaku ka sweswo a nga ha vulanga nchumu.

A hi heta masiku mambirhi hi vhiki hi ri etihofisini ta hulumendhe. Ku engetela kwalaho, a hi ri maphayona yo hlawuleka. Enkarhini wolowo, leswi a swi katsa ku heta tiawara ta 175 evutirhelini bya nsimu n’hweti na n’hweti (endzhakunyana ti hungutiwile ti va tiawara ta 140), kutani hakanyingi a hi ya evutirhelini ku kondza ku va vusiku. A hi tiphina. A hi fambisa tidyondzo to tala letinene ni mindyangu yi helerile, naswona va endle nhluvuko lowunene. Mina na Ann hi endle xiboho xa ku nga vi na vana, kambe, hi tlhelo ra moya, a hi vanga ni vana ntsena kambe hi ve ni vatukulu ni vatukulu-xinguwe. Va tsakisa timbilu ta hina swinene!

Eku heleni ka 1948, ndzi kume xiavelo xin’wana. Makwerhu Knorr u hlamusele leswaku Makwerhu Schroeder, mutsarisi tlhelo un’wana wa vadyondzisi eXikolweni xa Gilead, a a ta khomeka hi ntirho wun’wana wa nkoka, kutani ndzi komberiwe ku dyondzisa eGilead loko swi laveka. Ndzi fike eGilead, le South Lansing, eNew York, na Ann hi December 18, ndzi chuhile swinene. Eku sunguleni, a hi ya eGilead ku ringana mavhiki ma nga ri mangani, ivi hi tlhelela eWashington. Hambiswiritano, eku heteleleni a ndzi heta nkarhi wo tala eGilead ku tlula lowu a ndzi wu heta ndzi ri eWashington.

Hilaha ndzi hlamuseleke hakona eku sunguleni, a ku ri hi nkarhi lowu, laha ntlawa wa vu-21 wa le Gilead wu thwaseke eYankee Stadium le New York. Kutani leswi a ndzi ri un’wana wa valeteri, ndzi ve ni lunghelo ro hlanganyela enongonokweni wolowo wa ku thwasa.

Ku Tirha eYindlu-nkulu Ya Misava Hinkwayo

Hi February 12, 1955, hi kume xiavelo xin’wana xa ntirho. Hi ve swirho swa ndyangu wa Bethele eyindlu-nkulu ya misava hinkwayo ya nhlengeletano ya Yehovha leyi vonakaka. Kambe, xana a xi ta katsa yini? Kahle-kahle, a xi ta katsa ku rhandza ku endla xin’wana ni xin’wana lexi a hi averiwa xona, ku hlanganyela emintirhweni leyi a yi ta lava ku khomisana ni van’wana. Ina, sweswo a hi swi endla eku sunguleni, kambe sweswi a hi ta va swirho swa ntlawa lowukulu swinene—ndyangu wa Bethele wa le yindlu-nkulu. Hi xi amukele hi ntsako xiavelo lexi lexintshwa tanihi xikombiso xa nkongomiso wa Yehovha.

Xiphemu lexikulu xa ntirho wa mina a xi katsa timhaka leti fambisanaka ni vuhaxi bya mahungu. Hi ku lava ku tsakisa vanhu ni ku kuma rungula eka vanhu lava nga ni xihlawu-hlawu, phepha-hungu rin’wana a ri tsale swilo leswi nyenyetsaka hi Timbhoni ta Yehovha. Hi ringete ku lulamisa xiyimo xolexo.

Makwerhu Knorr a a lava ku tiyiseka leswaku hinkwerhu a hi ri ni swo tala swo swi endla, kutani hi kume swiavelo swin’wana. Swin’wana swa swona a swi lava vuleteri lebyi ndzi byi kumeke tanihi mutshila eka swa vunavetisi. Swin’wana swi katse xitichi xa xiya-ni-moya xa Sosayiti, ku nga WBBR. A ku ri ni ntirho lowu a wu fanele wu endliwa malunghana ni swifaniso leswi tshukatshukaka leswi humesiweke hi Sosayiti. Ina, matimu ya swa le tilweni a ma ri xiphemu xa khoso ya le Gilead, kambe sweswi a ku endliwa mintirho yo hambana-hambana leswaku ku pfuniwa vanhu vo tala va Yehovha ku tiva vuxokoxoko bya matimu wolawo ya nhlengeletano leyi lawuriwaka hi Xikwembu ya manguva lawa, ni ku endla leswaku ma kumiwa na hi vanhu va le handle. Ndlela yin’wana yo letela eGilead a yi katsa ku vulavula erivaleni, naswona a ku fanele ku endliwa leswaku vamakwerhu emavandlheni va kuma vuleteri bya xisekelo byo vulavula erivaleni. Kutani a ku ri ni swo tala swo swi endla.

Ku Va eGilead Nkarhi Hinkwawo

Hi 1961, loko ku leteriwa valanguteri lava famba-fambaka ni lava a va ta tirha erhavini, Xikolo xa Gilead xi rhurhiseriwe eBrooklyn, laha Sosayiti ya Watch Tower yi nga ni tihofisi-nkulu ta yona. Kutani ndzi tlhelele eku dyondziseni—sweswi hayi tanihi muleteri la khomelaka kambe tanihi xirho xa nkarhi hinkwawo xa vadyondzisi. Mawaku lunghelo ronghasi! Ndzi tiyiseka swinene leswaku Xikolo xa Gilead i nyiko leyi humaka eka Yehovha, nyiko leyi vuyeriseke nhlengeletano yakwe hinkwayo leyi vonakaka.

Le Brooklyn mintlawa ya le Gilead yi ve ni malunghelo lawa swichudeni leswi teke emahlweni ka yona swi nga ma tiviki. A ku ri ni vadyondzisi lava engetelekeke lava nga vaendzi, naswona a ku ri ni xinakulobye lexikulu ni Huvo leyi Fumaka ni ndyangu wa Bethele wa le yindlu-nkulu. Naswona a swi koteka leswaku swichudeni swi leteriwa matirhelo ya le hofisini, ya le kaya ra Bethele ni mintirho yo hambana-hambana ya le fektri.

Emalembeni wolawo nhlayo ya swichudeni a yi hambana-hambana, a swi ri tano ni hi nhlayo ya valeteri. Ni xikolo xi rhurhe ko tala. Sweswi xi le ndhawini leyi rhandzekaka ePatterson, le New York.

Ku Tirha Ni Swichudeni

Ku ve ntsako swinene ku dyondzisa mintlawa leyi! Laha ku ni vantshwa lava nga swi tsakeriki ku endla swilo emafambiselweni ya khale. Va siya mindyangu ya ka vona, vanghana va vona, makaya ya vona ni vanhu lava vulavulaka ririmi ra vona. Maxelo, swakudya—hinkwaswo swi ta va swi hambanile. A va swi tivi ni leswaku va ta ya etikweni rihi, kambe pakani ya vona i ku va varhumiwa. A wu boheki ku va khutaza vanhu va muxaka wolowo.

Loko ndzi sungula ku dyondzisa, xikongomelo xa mina nkarhi hinkwawo a ku ri ku endla swichudeni swi titwa swi ntshunxekile. A nga kona munhu loyi a dyondzaka kahle loko a chuhile naswona a vilela. I ntiyiso, a ndzi ri muleteri, kambe a ndzi swi tiva leswaku swi njhani ku va xichudeni. Na mina ndzi tshama ndzi va xichudeni. Ina, va dyondze hi matimba naswona va kume swo tala eGilead, kambe na mina a ndzi lava leswaku va tiphina.

A ndzi swi tiva leswaku loko va ya eswiavelweni swa vona, a ku ta va ni swin’wana leswi a va ta swi lava leswaku va humelela. A va fanele va va ni ripfumelo leri tiyeke. A va fanele va titsongahata—swinene. A va fanele va dyondza ku hanyisana ni vanhu van’wana, ku pfumelelana ni swiyimo, ku rivalela hi ku ntshunxeka. A va fanele va hambeta va hlakulela mihandzu ya moya. Nakambe a va fanele va rhandza vanhu ni ntirho lowu a va rhumiwe ku wu endla. Sweswo i swilo leswi nkarhi hinkwawo a ndzi ringeta ku swi kandziyisa eka swichudeni loko swa ha ri eGilead.

A ndzi swi tivi leswaku ndzi dyondzise swichudeni swingani. Kambe ndza swi tiva leswaku ndzi titwa njhani hi swona. Endzhaku ko heta tin’hweti ta ntlhanu ndzi ri karhi ndzi va dyondzisa, a ndzi va rhandza swinene. Kutani loko ndzi va hlalerile va ya exitejini ivi va kuma maphepha ya vona yo thwasa hi siku ra ku thwasa, a ndzi swi tiva leswaku va humelerile eka khoso ya vona naswona ku nga ri khale va ta famba. A swi fana ni loko xirho xin’wana xa ndyangu wa mina xi famba. Xana a wu ta swi papalata njhani ku rhandza vanhu lava ha riki vantshwa lava tinyiketeleke entirhweni lowu?

Endzhaku ka malembe yo hlaya, loko va hi endzerile, ndzi va twa va vulavula hi ntsako wa vona entirhweni kutani ndza swi vona leswaku va ha ri eswiavelweni swa vona, va endla leswi va leteriweke leswaku va swi endla. Xana sweswo swi endla leswaku ndzi titwa njhani? Ku vula ntiyiso, ndza tsaka.

Ku Languta eNkarhini Lowu Taka

Sweswi mahlo ya mina a ma ha voni kahle, naswona ma ndzi vangela gome. A ndza ha swi koti ku dyondzisa eGilead. Eku sunguleni, a swi tika loko ndza ha ku tshika, kambe evuton’wini bya mina hinkwabyo ndzi dyondze ku amukela swiyimo ni ku langutana na swona. Hakanyingi ndzi anakanya hi muapostola Pawulo ni “mutwa [wa yena] enyameni.” Pawulo u khongele kanharhu a lava ku ntshunxiwa eka maxangu wolawo, kambe Hosi yi te: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” (2 Vakorinto 12:7-10) Pawulo u hambete a hanya na wona. Loko a swi kotile, na mina ndzi fanele ndzi ringeta. Hambileswi ndzi nga ha dyondzisiki, ndza tsaka swinene leswi ndzi vonaka loko swichudeni swi ta swi tlhela swi famba siku na siku. Minkarhi yin’wana ndza swi kota ku vulavula na swona, naswona swi tsakisa mbilu ya mina ku anakanya hi moya lowunene lowu swi wu kombisaka.

Swa tsakisa ku anakanya hi leswi vumundzuku byi hi khomeleke swona. Masungulo ma karhi ma sungule ku simekiwa sweswi. Gilead yi ve ni xiphemu lexikulu eka wona. Endzhaku ka nhlomulo lowukulu, loko tibuku-songwa leti ku vulavuriwaka ha tona eka Nhlavutelo 20:12 ti pfuriwa, ku ta va ni gidi ra malembe ra dyondzo leyi enteke leyi engetelekeke ya malunghana ni tindlela ta Yehovha. (Esaya 11:9) Kambe a swi heleli kwalaho. Kahle-kahle ko va masungulo ntsena. Ku ta va ni swo tala swo swi dyondza hi Yehovha ni swo tala swo swi endla loko hi vona swikongomelo swa yena swi paluxiwa, hilaha ku nga heriki. Ndza tiyiseka swinene leswaku Yehovha u ta hetisisa switshembiso hinkwaswo leswikulu leswi a swi tshembiseke, naswona ndzi lava ku va kona leswaku ndzi hlanganyela eku amukeleni ka nkongomiso lowu Yehovha a nga ta va a hi nyika wona hi nkarhi wolowo.

[Xifaniso lexi nga eka tluka 26]

Ku thwasa ka le Gilead le Yankee Stadium eNew York hi 1953

[Xifaniso lexi nga eka tluka 26]

Gertrude, mina, Kathryn na Russell

[Xifaniso lexi nga eka tluka 26]

Ndzi tirha na N. H. Knorr (le kule eximatsini) na M. G. Henschel eku lunghiseleleni ka ntsombano

[Xifaniso lexi nga eka tluka 26]

Laha WBBR a yi haxa kona

[Xifaniso lexi nga eka tluka 29]

Etlilasini ya le Gilead

[Xifaniso lexi nga eka tluka 31]

Ndzi ri na Ann, sweswinyana