‘Nkarhi Wa Ku Rhula’ Wu Tshinele!

“Šilo šiṅwana ni šiṅwana ši ni nkari wa šona, . . . nkari wu kona wa nyimpi, wu kona nkari wa ku rula.”—EKLESIASTA 3:1, 8.

1. I xiyimo xihi lexi hlamarisaka lexi veke kona eka lembe-xidzana ra vu-20 malunghana ni nyimpi ni ku rhula?

VANHU vo tala va ni xivangelo lexi twalaka xa ku lava ku rhula. Lembe-xidzana ra vu-20 a ri vanga ni ku rhula loko ri ringanisiwa ni malembe-xidzana lama hundzeke. Lexi hlamarisaka hileswi ku endliweke matshalatshala lamakulu ngopfu leswaku ku kondleteriwa ku rhula. Hi 1920 ku simekiwe Ntwanano wa Matiko. Hi 1928, Ntwanano wa Kellogg-Briand, lowu buku yin’wana yi wu vuleke “nchumu wo hlawuleka swinene wa ku kondletela ku rhula endzhaku ka Nyimpi yo Sungula ya Misava,” wu amukeriwe hi “kwalomu ka matiko hinkwawo ya misava . . . ma pfumela ku tshika nyimpi.” Kutani, hi 1945, ku simekiwe Nhlangano wa Matiko leswaku wu siva Ntwanano wa Matiko lowu a wu nga ha pfuni nchumu.

2. Hi xihi xikongomelo xa Nhlangano wa Matiko, naswona xi humelele ku fikela kwihi?

² Ku fana ni Ntwanano, xikongomelo xa Nhlangano wa Matiko i ku kondletela ku rhula emisaveni hinkwayo. Kambe a wu humelelanga ngopfu. Kunene, emisaveni a ku na laha ku lwiwaka nyimpi yo fana ni tinyimpi timbirhi ta misava. Hambiswiritano, tinyimpi to tala letitsongo ta ha tsona vanhu va madzana ya magidi ku rhula ka mianakanyo, naswona ti endla leswaku va lahlekeriwa hi nhundzu ya vona, minkarhi yin’wana ni hi vutomi bya vona. Xana ha kholwa leswaku Nhlangano wa Matiko wu ta endla leswaku lembe-xidzana ra vu-21 ri va “nkari wa ku rula”?

Xisekelo Xa Ku Rhula Ka Ntiyiso

3. Ha yini ku rhula ka ntiyiso ku nga fambisani ni rivengo?

³ Ku rhula exikarhi ka vanhu ni matiko a ku tisiwi hi ku lehiselana mbilu ntsena. Xana u kona loyi a nga vaka ni ku rhula hakunene ni munhu loyi a n’wi vengaka? Ku nga ri hi ku ya hi 1 Yohane 3:15, leyi nge: “Mani na mani la vengaka makwavo i mudlayi.” Hilaha matimu ya manguva lawa ma kombisaka hakona, rivengo lerikulu ri hatlisa ri vanga swiendlo swa madzolonga.

4. I vamani ntsena lava nga kumaka ku rhula, naswona ha yini?

⁴ Leswi Yehovha a nga “Xikwembu lexi nyikaka ku rhula,” ku rhula ku nga kumiwa ntsena hi vanhu lava rhandzaka Xikwembu ni ku yi xixima swinene misinya ya xona ya milawu leyi lulameke. Kunene, Yehovha a nga ku nyiki mani na mani ku rhula loku. “A ku na ku rula e ka la’v̌o biha, ku v̌ula Šikwembu ša mina.” Leswi swi vangiwa hileswi lavo biha va alaka ku kongomisiwa hi moya lowo kwetsima wa Xikwembu, lowu tisaka ku rhula.—Varhoma 15:33; Esaya 57:21; Vagalatiya 5:22.

5. I yini leswi Vakreste va ntiyiso va swi langutaka swi ri vuhunguki?

⁵ Ku lwa ni vanhu-kulobye—leswi hi ntolovelo swi endliweke hi lava tivulaka Vakreste, ngopfu-ngopfu eka lembe-xidzana ra vu-20—i vuhunguki eka Vakreste va ntiyiso. (Yakobo 4:1-4) I ntiyiso, va lwa ni tidyondzo leti vulavulaka swo biha hi Xikwembu, kambe nyimpi ya vona i ya ku pfuna vanhu, hayi ku va vavisa. Ku xanisa van’wana hileswi va nga va vukhongeri lebyi hambaneke kumbe ku vavisa van’wana hileswi va nga va tiko rin’wana swi lwisana swinene ni Vukreste bya ntiyiso. Pawulo u byele Vakreste va le Rhoma a ku: “Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:17-19; 2 Timotiya 2:24, 25.

6. Ku rhula ka ntiyiso ku nga kumiwa kwihi ntsena namuntlha?

⁶ Namuntlha, ku rhula loku humaka eka Xikwembu ku kumeka exikarhi ka vagandzeri va ntiyiso va Yehovha Xikwembu ntsena. (Pisalema 119:165; Esaya 48:18) Vun’we bya vona a byi kavanyetiwi hi ku avana ka tipolitiki, tanihi leswi va nga ni vukala-tlhelo hi tlhelo ra tipolotiki ematikweni hinkwawo. (Yohane 15:19; 17:14) Leswi va “[hlanganeke] hilaha ku faneleke emianakanyweni yin’we ni le ndleleni yin’we ya ku ehleketa,” a ku na ku avana ka vukhongeri loku kavanyetaka ku rhula ka vona. (1 Vakorinto 1:10) Ku rhula loku Timbhoni ta Yehovha ti nga na kona namuntlha i singita leri vangiwaka hi Xikwembu, hi ku pfumelelana ni xitshembiso xa xona lexi nge: “Nḍi ta ku fumisa hi ku rula, kambe u ta risiwa hi ku lulama.”—Esaya 60:17; Vaheveru 8:10.

Ha Yini Ku Ri ‘Nkarhi Wa Nyimpi’?

7, 8. (a) Hambileswi Timbhoni ta Yehovha ti nga eku rhuleni, xana ti wu languta njhani nkarhi lowu hi hanyaka eka wona? (b) Hi rihi tlhari ra nkoka leri Vakreste va ri tirhisaka enyimpini ya vona?

⁷ Hambileswi Timbhoni ta Yehovha ti nga eku rhuleni, ta swi xiya leswaku namuntlha ngopfu-ngopfu i ‘nkarhi wa nyimpi.’ Kunene, leyi a hi nyimpi ya xiviri, tanihi leswi ku sindzisa van’wana leswaku va amukela rungula ra Bibele swi lwisanaka ni xirhambo xa Xikwembu xa ku va “mani na mani la swi navelaka [a nwa] mati ya vutomi mahala.” (Nhlavutelo 22:17) Vanhu a va sindzisiwi leswaku va hundzuka! Nyimpi leyi lwiwaka hi Timbhoni ta Yehovha i ya moya ntsena. Pawulo u tsarile a ku: “Matlhari ya nyimpi ya hina a hi ya nyama, kambe Xikwembu hi xona xi ma nyikaka matimba leswaku ma wisetela swilo leswi simekiweke swi tiya.”—2 Vakorinto 10:4; 1 Timotiya 1:18.

⁸ Xa nkoka eka “matlhari ya nyimpi ya hina” i “banga ra moya, ku nga rito ra Xikwembu.” (Vaefesa 6:17) Banga leri ri ni matimba. “Rito ra Xikwembu ra hanya naswona ri ni matimba, ri kariha ku tlula banga rihi na rihi leri tsemaka hi matlhelo mambirhi, ri tlhava hambi ku ri ku ya fika emaaveni ya moya-xiviri ni moya, ni ya mahlangano ni mongo, naswona ra swi kota ku twisisa miehleketo ni makungu ya mbilu.” (Vaheveru 4:12) Hi ku tirhisa banga leri, Vakreste va kota ku wisa “makungu ni swilo hinkwaswo leswi tlakukeke leswi lwisanaka ni vutivi bya Xikwembu.” (2 Vakorinto 10:5) Ri va pfuna ku paluxa tidyondzo ta mavunwa, mikhuva yo biha ni tifilosofi leti dzunisaka vutlhari bya vanhu, ku nga ri bya Xikwembu.—1 Vakorinto 2:6-8; Vaefesa 6:11-13.

9. Ha yini hi nga fanelanga hi tshika ku lwa ni nyama leyi voyameleke eku dyoheni?

⁹ Muxaka wun’wana wa nyimpi ya moya i wa ku lwa ni nyama leyi voyameleke eku dyoheni. Vakreste va landzela xikombiso xa Pawulo, loyi a nga te: “Ndzi ba miri wa mina, ndzi wu kongomisa tanihi hlonga, leswaku loko ndzi chumayele eka van’wana, mina ndzi nga vi loyi a nga amukelekiki hi ndlela yo karhi.” (1 Vakorinto 9:27) Vakreste va le Kolosa va tsundzuxiwe ku dlaya “swirho swa miri wa [vona] leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava.” (Vakolosa 3:5) Naswona Yudha mutsari wa Bibele u khutaze Vakreste leswaku va “lwa hi matimba [va] lwela ripfumelo leri nyikiweke vakwetsimi kan’we swi helela kwalaho.” (Yudha 3) Ha yini hi fanele hi endla tano? Pawulo wa hlamula a ku: “Loko mi hanya hi ku pfumelelana ni nyama mi ta fa hakunene; kambe loko mi dlaya mikhuva ya miri hi moya, mi ta hanya.” (Varhoma 8:13) Hikwalaho ka nhlamuselo leyi leyi twisisekaka, a hi nge tshiki ku lwa ni mimboyamelo yo biha.

10. Ku humelele yini hi 1914, naswona ku ta endleka yini ku nga ri khale?

¹⁰ Xivangelo xin’wanyana xa ku va nkarhi lowu wu nga tekiwaka wu ri wa nyimpi hileswi “siku ra ku tirihisela ka Šikwembu ša hina” ri tshineleke. (Esaya 61:1, 2) Hi 1914, ku fike nkarhi lowu Yehovha a wu vekeke wa ku tlhoma Mfumo wa Vumesiya, a wu lerisa ku lwisana ni mafambiselo ya Sathana. Nkarhi lowu vanhu va nyikiweke wona leswaku va ringeta vulawuri bya munhu handle ka ku nghenelela ka Xikwembu wu hele hi lembe rero. Ematshan’weni yo amukela Mufumi wa Vumesiya la vekiweke hi Xikwembu, vanhu vo tala va hambeta va lwisana na yena, hilaha vo tala va endleke hakona eka lembe-xidzana ro sungula. (Mintirho 28:27) Hikwalaho ka ku kanetiwa ka Mfumo, Kreste u boheke ku “tlhoma ku fuma ka [yena] e šikari ka v̌alala v̌a [yena].” (Pisalema 110:2) Lexi tsakisaka, Nhlavutelo 6:2 yi tshembisa leswaku u ta “hetisa ku hlula ka yena.” U ta endla tano hi nkarhi wa “nyimpi ya siku lerikulu ra Xikwembu xa Matimba Hinkwawo . . . , leyi vuriwaka Har–Magedoni hi Xiheveru.”—Nhlavutelo 16:14, 16.

Se I “Nkari Wa Ku V̌ulav̌ula”

11. Ha yini Yehovha a lehise mbilu swinene, kambe ku ta endleka yini eku heteleleni?

¹¹ Se ku hundze malembe ya 85 ku ve ni ku cinca lokukulu etimhakeni ta vanhu loku sunguleke hi 1914. Yehovha u va lehisele mbilu swinene vanhu. U endle leswaku Timbhoni ta yena ti xalamukela xiyimo lexi xa xihatla. Vutomi bya vanhu va timiliyoni byi le khombyeni. Vanhu lava va fanele va tsundzuxiwa, hikuva “Yehovha . . . a nga naveli leswaku ku lova ni un’we kambe u navela leswaku hinkwenu mi hundzuka.” (2 Petro 3:9) Hambiswiritano, ku nga ri khale ku ta fika siku ra ku “[hlavuteriwa] ka Hosi Yesu a huma etilweni swin’we ni tintsumi takwe ta matimba.” Kutani, hinkwavo lava va aleke rungula ra Mfumo wa Xikwembu hi vomu va nga ta tokota “ndzihiselo” lowu Yesu a nga ta wu tisa “eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.”—2 Vatesalonika 1:6-9.

12. (a) Ha yini swi nga pfuni nchumu ku mbambela leswaku nhlomulo lowukulu wu ta sungula rini? (b) Yesu u lemukise hi khombo rihi emhakeni leyi?

¹² Xana Yehovha u ta lehisa mbilu ku fikela rini? A swi pfuni nchumu ku mbambela leswaku “nhlomulo lowukulu” wu ta sungula rini. Yesu u vule hi ku kongoma a ku: “Malunghana ni siku ra kona ni nkarhi wa kona a ku na munhu la swi tivaka.” Hi hala tlhelo, u tsundzuxile a ku: “Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona. . . . Tshamani mi lunghekile, hikuva N’wana wa munhu u ta fika hi nkarhi lowu mi nga wu ehleketiki.” (Matewu 24:21, 36, 42, 44) Hi ku kongoma, leswi swi vula leswaku siku na siku hi fanele hi tshama hi xalamukele swiendlakalo swa misava ni ku tlhekeka ka nhlomulo lowukulu. (1 Vatesalonika 5:1-5) Swi ni khombo hakunene ku anakanya leswaku hi nga tigedlha, hi tihanyela vutomi lebyi tolovelekeke, hi rindzela ku vona leswaku swilo swi ta fambisa ku yini! Yesu u te: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu.” (Luka 21:34, 35) Leswi hi nga tiyisekaka ha swona hi leswi: “Timheho ta mune” ta ndzoviso leti sweswi ti khomiweke hi “tintsumi ta mune” ta Yehovha a ti nge khomeriwi makumu.—Nhlavutelo 7:1-3.

13. I yini lexi xiyiweke hi vanhu va kwalomu ka tsevu wa timiliyoni?

¹³ Hikwalaho ka siku leri ra ku tenga leri tshinelaka hi ku hatlisa, marito ya Solomoni malunghana ni vukona bya “nkari wa ku v̌ulav̌ula” i ya nkoka swinene. (Eklesiasta 3:7) Hi ku xiya leswaku sweswi i nkarhi wa ku vulavula hakunene, Timbhoni ta Yehovha ta kwalomu ka tsevu wa timiliyoni ti vulavula ni vanhu hi ku hiseka mayelana ni ku dzuneka ka vuhosi bya Xikwembu ni ku va tsundzuxa hi siku ra xona ra ku tirihisela. Ti tinyiketela hi ku swi rhandza esikwini leri ra vuthu ra nyimpi ya Kreste.—Pisalema 110:3; 145:10-12.

Lava Nge ‘Ku Rhula, Kasi A Ku Na Ku Rhula’

14. I vaprofeta vahi va mavunwa lava a va ri kona eka lembe-xidzana ra vunkombo B.C.E.?

¹⁴ Eka lembe-xidzana ra vunkombo B.C.E., vaprofeta va Xikwembu, Yeremiya na Ezekiyele, va vule marungula ya Xikwembu ya vuavanyisi ehenhla ka muti wa Yerusalema, hileswi wu dyoheleke Xikwembu hi ku ka wu nga xi yingisi. Ndzoviso lowu va wu vuleke ka ha ri emahlweni wu humelele hi 607 B.C.E., hambileswi varhumiwa lava va Xikwembu va kanetiweke hi varhangeri va vukhongeri lava tlakukeke ni lava nga ni nkucetelo wo biha. Varhangeri lava va vukhongeri va vonake va ri ‘vaprofeta lava nga swihunguki, lava a va hambukisa vanhu va Xikwembu, va ku, “Ku ni ku rhula!” kasi a ku na ku na ku rhula.’—Ezekiyele 13:1-16; Yeremiya 6:14, 15; 8:8-12.

15. Xana ku ni vaprofeta va mavunwa lava fanaka namuntlha? Hlamusela.

¹⁵ Ku fana ni ‘vaprofeta lava nga swihunguki’ va nkarhi wolowo, varhangeri vo tala va vukhongeri namuntlha na vona va hluleka ku tsundzuxa vanhu hi siku leri taka ra ku avanyisa ka Xikwembu. Ku ri na sweswo, va anakanya leswaku mintlawa ya tipolitiki yi ta hetelela yi fikelele ku rhula ni nsirhelelo. Tanihi leswi va hisekelaka ku tsakisa vanhu ku ri na Xikwembu, va byela swirho swa tikereke ta vona leswi swi lavaka ku twa swona, ematshan’weni yo hlamusela leswaku Mfumo wa Xikwembu wu tlhomiwile naswona Hosi ya Vumesiya yi ta hetisisa ku hlula ka yona ku nga ri khale. (Daniyele 2:44; 2 Timotiya 4:3, 4; Nhlavutelo 6:2) Tanihi vaprofeta va mavunwa, na vona va vulavula hi ‘ku rhula, kasi a ku na ku rhula.’ Kambe leswi va swi kholwaka swi ta xaxa loko va ta fanela ku langutana ni vukarhi bya Loyi va n’wi onheke vito. Varhangeri va mfumo wa misava wa vukhongeri bya mavunwa, lowu eBibeleni wu hlamuseriwaka tanihi wansati wa muoswi, va ta tshovela va ri karhi va vulavula hi ku rhula ka vona ka vukanganyisi.—Nhlavutelo 18:7, 8.

16. (a) Timbhoni ta Yehovha ti tiveriwa yini? (b) Ti hambana njhani ni lava va huwelelaka ‘ku rhula, kasi a ku na ku rhula’?

¹⁶ Hambileswi vunyingi bya varhangeri lava tlakukeke ni lava nga ni nkucetelo wo biha byi phikelelaka eka xitshembiso xa byona xa ku rhula ka vukanganyisi, sweswo a swi ku tsekatsekisi ku tiyiseka ka lava va nga ni ripfumelo exitshembisweni xa Xikwembu xa ku rhula ka ntiyiso. Ku tlula dzana ra malembe, Timbhoni ta Yehovha ti tiviwe ti ri valweri lava tshembekaka va Rito ra Xikwembu, vakaneti lava phikelelaka va vukhongeri bya mavunwa ni vaseketeri lavakulu va Mfumo wa Xikwembu. Ematshan’weni yo verhamisa vanhu hi ku va byela leswaku ku ni ku rhula, va va lemukisa hi ku gingiriteka leswaku namuntlha i nkarhi wa nyimpi.—Esaya 56:10-12; Varhoma 13:11, 12; 1 Vatesalonika 5:6.

Yehovha A Vulavula

17. Swi vula yini leswaku Yehovha u ta vulavula ku nga ri khale?

¹⁷ Nakambe, Solomoni u te: “Šikwembu ši ta av̌anyisela l’a lulameke ni lo’wo biha, hikuv̌a hikwaŝo le’ŝi endliwaka . . . ŝi v̌ekeriwe nkari wa ŝona.” (Eklesiasta 3:17) Ina, Yehovha u ni nkarhi lowu vekiweke wa ku avanyisa vukhongeri bya mavunwa ni ‘tihosi ta misava leti lwisanaka na Yehovha ni mutotiwa wa yena.’ (Pisalema 2:1-6; Nhlavutelo 16:13-16) Loko nkarhi wolowo wu fikile, masiku ya Yehovha ya ku “miyela” ma ta va ma herile. (Pisalema 83:1; Esaya 62:1; Yeremiya 47:6, 7) Hi ku tirhisa Hosi ya Vumesiya leyi a yi vekeke exiluvelweni, ku nga Yesu Kreste, u ta “v̌ulav̌ula” hi ririmi leri vakaneti vakwe va nga ta ri twisisa kahle: “Yehova wa huma tani hi nhenha, o pfuša v̌ukari bya yena tani hi munhu l’a yaka nyimpini, o tlakusa rito, o ba huwa, o kombisa matimba ya yena e ka v̌alala v̌a yena. O ri: Nḍi miyerile khale, nḍi ku ntse, nḍi v̌a nḍi tikhoma; ŝeŝi nḍi ta rila tani hi wansati l’a v̌elekaka, e v̌ukarini bya mina nḍi ta tlhakama; nḍi onha tinṭhav̌a ni ŝiṭunga, nḍi ta v̌unisa rilambyana ra ŝona, e milambu nḍi ta yi hunḍula yi v̌a misav̌a le’yi tiyeke, nḍi ta omisa mativ̌a. Nḍi ta fambisa la’v̌o-fe-mahlo e ndleleni leyi v̌a nga yi tiv̌iki, nḍi v̌a fambisa e mitileni leyi v̌a nga yi tiv̌iki. E mahlweni ka v̌ona nḍi ta hunḍula munyama wu v̌a ku v̌onakala, ni tinṭhav̌a ti v̌a riv̌ala; hi leŝi nḍi nga ta ŝi endla, nḍi nga ka nḍi nga v̌a fulareli.”—Esaya 42:13-16, xiitaliki i xerhu.

18. Vanhu va Xikwembu va ta “miyela” hi ndlela yihi ku nga ri khale?

¹⁸ Loko Yehovha a “v̌ulav̌ula” a lwela Vukwembu byakwe, vanhu va yena a va nge he boheki ku vulavula va tilwela. Ku ta va nkarhi wa vona wa “ku miyela.” Eka vona ku ta tirha marito lama tirheke eka malandza ya Xikwembu enkarhini lowu hundzeke: “A hi ṅwina lav̌a mi nga ta lwa e mhakeni leyi; humani, mi v̌a kona, kutani mi ta v̌ona ku [ponisa] ka Yehova, l’a nga na ṅwina.”—2 Tikronika 20:17.

19. I lunghelo rihi leri vamakwavo va moya va Kreste va nga ta va na rona ku nga ri khale?

¹⁹ Sweswo swi ta vula ku hluriwa lokukulu ka Sathana ni nhlengeletano ya yena! Vamakwavo va Kreste lava va nga ta va eku dzunekeni va ta hlanganyela eku lweriweni lokukulu ka vululami, hi ku ya hi xitshembiso lexi nge: “Loko ku ri xona, Xikwembu lexi nyikaka ku rhula xi ta pfotlosela Sathana ehansi ka milenge ya n’wina ku nga ri khale.” (Varhoma 16:20) Nkarhi wa ku rhula lowu ku nga khale wu rindzeriwile se wu tshinele.

20. Ku nga ri khale ku ta va nkarhi wa yini?

²⁰ Ku ta va nkateko lowukulu eka hinkwavo emisaveni lava va nga ta pona ku kombisiwa loku kukulu ka matimba ya Yehovha! Endzhakunyana va ta landzeriwa hi vavanuna ni vavasati lava tshembekaka va nkarhi lowu hundzeke, loko ku fika nkarhi wa vona wa ku pfuxiwa. Kunene, Ku Fuma ka Kreste ka Gidi ra Malembe ku ta va “nkari wa ku simeka . . . , nkari wa ku horisa . . . , nkari wa ku aka . . . , nkari wa ku hleka . . . , nkari wa ku tšina . . . , nkari wa ku [angarha ni] . . . nkari wa ku ranḍa.” Ina, naswona wu ta va “nkari wa ku rula” loku nga heriki!—Eklesiasta 3:1-8; Pisalema 29:11; 37:11; 72:7.

Hi Yihi Nhlamulo Ya Wena?

◻ Hi xihi xisekelo xa ku rhula loku nga heriki?

◻ Ha yini Timbhoni ta Yehovha ti teka masiku ya namuntlha ma ri ‘nkarhi wa nyimpi’?

◻ Vanhu va Xikwembu va fanele va “v̌ulav̌ula” rini, naswona va fanele va “miyela” rini?

◻ Yehovha u ta vulavula njhani naswona rini?

[Bokisi/Swifaniso leswi nga eka tluka 13]

Yehovha U Veke Nkarhi Wa

◻ ku endla leswaku Gogo a lava ku hlasela vanhu va Xikwembu.—Ezekiyele 38:3, 4, 10-12

◻ ku nghenisa nsusumeto wo lovisa Babilona Lonkulu etimbilwini ta vafumi va vanhu.—Nhlavutelo 17:15-17; 19:2

◻ ku endliwa ka nkhuvo wa vukati wa Xinyimpfana.—Nhlavutelo 19:6, 7

◻ ku tlhekeka ka nyimpi ya Har–Magedoni.—Nhlavutelo 19:11-16, 19-21

◻ ku boha Sathana leswaku ku sungula Ku Fuma ka Yesu ka Gidi ra Malembe.—Nhlavutelo 20:1-3

Swiendlakalo leswi swi lo longoloxiwa hi ku ya hi ndlela leyi swi xaxametiweke ha yona eMatsalweni ntsena. Hi nga tiyiseka leswaku swiendlakalo leswi swa ntlhanu hinkwaswo swi ta humelela hi nxaxamelo ni nkarhi lowu vekiweke hi Yehovha.

[Swifaniso leswi nga eka tluka 15]

Hakunene, Ku Fuma ka Kreste ka Gidi ra Malembe ku ta va nkarhi . . .

wa ku hleka . . . 

wa ku angarha . . .

wa ku rhandza . . .

wa ku byala . . .

wa ku cina . . .

wa ku aka . . .