“Swilo Leswi Navelekaka” Swi Tata Yindlu Ya Yehovha

“[Mina Yehovha] ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; ndzi ta tata yindlu leyi hi ku vangama.”—HAGAYI 2:7.

1. Loko ku ri ni mhangu, ha yini hi rhanga hi anakanya hi varhandziwa va hina?

XANA endlwini ya wena ku ni swilo swihi swa risima? Xana u ni fenichara ya manyunyu, khompyuta ya manguva lawa, movha lowuntshwa egaraji ya wena? Hambiloko u ri ni swilo leswi hinkwaswo, xana a hi ntiyiso leswaku swilo swa risima swinene ekaya ra wena i vanhu—swirho swa ndyangu wa wena? A hi nge vusiku byin’wana u pfuxiwa hi ku twa musi. Yindlu ya wena yi le ku tshweni, naswona u fanele u huma hi ku copeta ka tihlo! Xana lexi u khathalaka ngopfu ha xona i yini? Xana i fenichara ya wena? I khompyuta? I movha? Xana a wu nge anakanyi hi varhandziwa va wena? Ina, u ta anakanya ha vona, hikuva vanhu i va nkoka swinene ku tlula swilo leswin’wana.

2. Swilo leswi Yehovha a swi tumbuluxeke swi tale ku fikela kwihi, naswona Yesu u tsakele ngopfu yini eka swona?

² Kutani anakanya hi Yehovha Xikwembu na Yesu Kreste N’wana wa yena. Yehovha hi “[Yena] la endleke tilo ni misava ni lwandle ni swilo hinkwaswo leswi nga eka swona.” (Mintirho 4:24) N’wana wa yena, “mutirhi la nga ni vuswikoti,” hi yena loyi Yehovha a n’wi tirhiseke ku endla swilo leswin’wana hinkwaswo. (Swivuriso 8:30, 31; Yohane 1:3; Vakolosa 1:15-17) Kunene, Yehovha na Yesu va swi tlangela hinkwaswo leswi tumbuluxiweke. (Ringanisa Genesa 1:31.) Kambe, xana u ehleketa leswaku i yini xa nkoka swinene eka vona exikarhi ka leswi tumbuluxiweke—xana i swilo kumbe i vanhu? Tanihi vutlhari lebyi munhuhatiweke, Yesu u ri: “Swilo leswi a ndzi swi rhandza a swi ri ni vana va vanhu,” kumbe, hilaha vuhundzuluxeri bya William F. Beck byi swi vekaka hakona, Yesu u “tsakele swivumbiwa leswi nga vanhu.”

3. I vuprofeta byihi lebyi Yehovha a byi vuleke hi nomu wa Hagayi?

³ Handle ko kanakana vanhu i va risima swinene eka Yehovha. Xikombiso xin’wana xa mhaka yoleyo i marito ya vuprofeta lawa a ma vuleke hi lembe ra 520 B.C.E. hi nomu wa Hagayi muprofeta wakwe. Yehovha u te: “Ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; ndzi ta tata yindlu leyi hi ku vangama. . . . Ku vangama ka yindlu leyi ya le ndzhaku ku ta va kukulu ku tlula ka leyo sungula.”—Hagayi 2:7, 9.

4, 5. (a) Ha yini swi nga twali ku gimeta hi leswaku xiga lexi nge “swilo leswi navelekaka” xi vulavula hi ku dzuneka ka swilo leswi vonakaka? (b) U nga swi hlamusela njhani “swilo leswi navelekaka,” naswona ha yini?

⁴ Hi swihi “swilo leswi navelekaka” leswi a swi ta tata yindlu ya Yehovha, kutani yi vangama hi ndlela yo hlawuleka swinene? Xana i fenichara ya manyunyu ni swikhaviso swo saseka? Xana i nsuku, silivhere ni maribye ya risima? Sweswo a swi nga ta twala. Tsundzuka, tempele leyo sungula, leyi a yi khanguriwe kwalomu ka malembe-xidzana ya ntlhanu emahlweni ka nkarhi wolowo, a yi ri muako wo durha swinene!a Kunene, Yehovha a a nga ta rindzela leswaku tempele leyi akiweke hi ntlawa lowu wutsongo wa Vayuda lava vuyeke eka rikwavo yi tlula tempele ya Solomoni hi ku dzuneka ka yona ka xiviri!

⁵ Kutani i yini “swilo leswi navelekaka” leswi a swi ta tata yindlu ya Yehovha? Swi le rivaleni leswaku i vanhu. Phela, leswi tsakisaka mbilu ya Yehovha a hi silivhere ni nsuku, kambe i vanhu lava n’wi tirhelaka hi rirhandzu. (Swivuriso 27:11; 1 Vakorinto 10:26) Ina, Yehovha u tlangela vavanuna, vavasati ni vana hinkwavo lava n’wi gandzelaka hi ndlela leyi a yi amukelaka. (Yohane 4:23, 24) Lava i “swilo leswi navelekaka,” naswona i va risima swinene eka Yehovha ku tlula swikhaviso hinkwaswo leswi a swi sasekise tempele ya Solomoni.

6. Tempele ya khale ya Xikwembu a yi tirha yini?

⁶ Hambileswi a ku ri ni nkaneto lowu phikelelaka, tempele yi hetiwile hi 515 B.C.E. Ku fikela loko Yesu a nyikela gandzelo rakwe, tempele ya le Yerusalema yi hambete yi ri ndhawu ya vugandzeri lebyi tengeke ya “swilo leswi navelekaka” swo tala, ku nga Vayuda va ntumbuluko ni Vamatiko lava hundzukeke Vayuda. Kambe tempele a yi yimela nchumu lowukulu ngopfu, hilaha hi nga ta swi vona hakona.

Leswi Hetisekeke Hi Lembe-xidzana Ro Sungula

7. (a) Xana tempele ya Xikwembu ya khale leyi a yi ri eYerusalema a yi fanekisela yini? (b) Hlamusela swilo leswi a swi endliwa hi muprista lonkulu hi Siku ro Kombela ku Rivaleriwa.

⁷ Tempele ya le Yerusalema a yi fanekisela lunghiselelo lerikulu ra vugandzeri. I tempele ya Xikwembu ya moya, leyi Yehovha a yi simekeke hi 29 C.E., ivi Yesu a va Muprista Lonkulu eka yona. (Vaheveru 5:4-10; 9:11, 12) Xiya ku yelana loku nga kona exikarhi ka mintirho ya muprista lonkulu wa le Israyele kun’we ni swiendlo swa Yesu. Lembe na lembe hi Siku ro Kombela ku Rivaleriwa, muprista lonkulu a a ya ealitarini exivaveni xa tempele, a nyikela nkunzi leswaku ku rivaleriwa swidyoho swa vaprista. Endzhaku, a a nghena etempeleni ni ngati ya nkunzi, a hundza hi le tinyangweni leti a ti hambanisa xivava ni Ndhawu yo Kwetsima, a tlhela a hundza engubyeni leyi hambanisaka Ndhawu yo Kwetsima ni Ndhawu yo Kwetsima Ngopfu. Loko a fika eNdhawini yo Kwetsima Ngopfu, muprista lonkulu a a xuva ngati emahlweni ka alitari ya ntwanano. Kutani, hi ku tirhisa ndlela yoleyo, a a nyikela mbuti yo rivalela swidyoho swa tinyimba ta 12 ta Vaisrayele leti nga riki ta rixaka ra vaprista. (Levhitika 16:5-15) Xana mukhuva lowu wu fambisana njhani ni tempele ya Xikwembu ya moya?

8. (a) Yesu u nyikeriwe hi ndlela yihi ku sukela hi 29 C.E.? (b) Yesu a a ri ni vuxaka byihi byo hlawuleka na Yehovha hi nkarhi wa vutirheli lebyi a byi endleke emisaveni?

⁸ Kahle-kahle, Yesu u nyikeriwile ealitarini ya ku rhandza ka Xikwembu loko a khuvuriwa ni ku totiwa hi moya wo kwetsima wa Xikwembu hi 29 C.E. (Luka 3:21, 22) Kunene, xiendlakalo lexi a xi fungha masungulo ya vutomi bya ku tinyiketela ka Yesu, loku heteke malembe manharhu ni hafu. (Vaheveru 10:5-10) Hi nkarhi wolowo, Yesu a a ri ni vuxaka bya moya na Xikwembu. Vanhu a va nga byi twisisi hi xitalo vuxaka lebyi hlawulekeke lebyi Yesu a a ri na byona na Tata wakwe wa le tilweni. A swi fana ni loko xiavanyiso xi sivela mahlo ya vona ya ku twisisa, tanihi leswi xiavanyiso a xi endla leswaku Ndhawu yo Kwetsima yi nga voniwi hi lava a va ri exivaveni xa tabernakela.—Eksoda 40:28.

9. Ha yini a swi nga ta koteka leswaku Yesu a nghena etilweni a ri munhu wa nyama, naswona xihinga lexi xi susiwe njhani?

⁹ Hambileswi a a ri N’wana wa Xikwembu la totiweke hi moya, Yesu a a nga ta swi kota ku hanya etilweni loko a ha ri munhu wa nyama. Ha yini? Hikuva nyama ni ngati a swi swi koti ku dya ndzhaka ya Mfumo wa Xikwembu wa le tilweni. (1 Vakorinto 15:44, 50) Tanihi leswi nyama ya Yesu a yi ri yona yi endlaka leswaku sweswo swi nga koteki, a yi fanekiseriwa kahle hi nguvu leyi a yi hambanisa Ndhawu yo Kwetsima ni Ndhawu yo Kwetsima Ngopfu etempeleni ya khale ya Xikwembu. (Vaheveru 10:20) Kambe loko a ri ni masiku manharhu a file, Yesu u pfuxiwile hi Xikwembu a va munhu wa moya. (1 Petro 3:18) Kutani a a ta kota ku nghena eNdhawini yo Kwetsima Ngopfu etempeleni ya moya ya Xikwembu—etilweni hi koxe. Kutani swi ve tano. Pawulo wa tsala: “Kreste [a] nga nghenanga endhawini yo kwetsima [handle ko kanakana u vula Ndhawu yo Kwetsima Ngopfu] leyi endliweke hi mavoko, leyi nga xifaniso xa swa xiviri, kambe [u nghene] etilweni hi koxe, kutani a humelela emahlweni ka Xikwembu hi xiviri hikwalaho ka hina.”—Vaheveru 9:24.

10. Yesu u fike a endla yini loko a tlhelela etilweni?

¹⁰ Etilweni, Yesu ‘u xuve ngati’ ya gandzelo rakwe hi ku nyikela ntikelo wa ngati leyi kutsulaka ya vutomi byakwe eka Yehovha. Kambe, Yesu u endle leswi engetelekeke. Emahlweninyana ka rifu rakwe, u byele valandzeri vakwe a ku: “Ndzi ya mi lunghiselela ndhawu. Nakambe, loko ndzi ya mi lunghisela ndhawu, ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona.” (Yohane 14:2, 3) Kutani loko a nghena eNdhawini yo Kwetsima Ngopfu kumbe etilweni, Yesu u pfule ndlela leswaku van’wana va n’wi landzela. (Vaheveru 6:19, 20) Vanhu volavo, lava nhlayo ya vona a yi ta va 144 000, a va ta va vaprista lava nga ehansi ka yena elunghiselelweni ra tempele ya moya ya Xikwembu. (Nhlavutelo 7:4; 14:1; 20:6) Tanihi leswi muprista lonkulu wa le Israyele a a rhanga hi ku nghenisa ngati ya nkunzi eNdhawini yo Kwetsima Ngopfu leswaku ku rivaleriwa swidyoho swa vaprista, xisweswo ntikelo wa ngati ya Yesu leyi halatiweke wu rhange wu tirhisiwa eka vaprista lava va 144 000, lava nga ehansi ka yena.b

“Swilo Leswi Navelekaka” Swa Manguva Lawa

11. Muprista lonkulu wa le Israyele a a yi nyikelela vamani mbuti, naswona sweswo a swi fanekisela yini?

¹¹ Swi tikomba onge hi lembe ra 1935, ku hlengeletiwa ka vatotiwa hi ku angarhela a ku fike emakumu.c Kambe Yehovha a a nga si heta ku vangamisa yindlu yakwe. Phela, “swilo leswi navelekaka” a swa ha ta nghena eka yona. Tsundzuka leswaku muprista lonkulu wa le Israyele a a nyikela swifuwo swimbirhi—nkunzi yi nyikeriwa leswaku ku rivaleriwa swidyoho swa vaprista, mbuti yona yi nyikeriwa leswaku ku rivaleriwa swidyoho swa tinyimba leti nga riki ta rixaka ra vaprista. Tanihi leswi vaprista a va fanekisela vatotiwa lava a va ta va na Yesu eMfun’weni wa le tilweni, xana tinyimba leti nga riki ta rixaka ra vaprista a ti fanekisela vamani? Nhlamulo yi kumeka emaritweni ya Yesu lama nga eka Yohane 10:16: “Ndzi ni tinyimpfu tin’wana, leti nga riki ta tshanga leri; na tona ndzi fanele ku ti tisa, ti ta yingisa rito ra mina, ti ta va ntlhambi wun’we, murisi a va un’we.” Hikwalaho, ngati leyi halatiweke ya Yesu yi pfuna vanhu va mintlawa yimbirhi—wo sungula, i Vakreste lava ntshembo wa vona ku nga ku ya fuma etilweni na Yesu, kasi wa vumbirhi, hi lava va languteleke ku hanya hi masiku emisaveni leyi nga paradeyisi. Handle ko kanakana, i ntlawa lowu wa vumbirhi lowu fanekiseriwaka hi “swilo leswi navelekaka” swa vuprofeta bya Hagayi.—Mikiya 4:1, 2; 1 Yohane 2:1, 2.

12. Xana “swilo leswi navelekaka” swo tala swi nghenisiwa njhani endlwini ya Xikwembu namuntlha?

¹² “Swilo leswi [swi] navelekaka” swa ha tata yindlu ya Yehovha. Emalembeni ya sweswinyana, swipimelo swi susiwile eYuropa Vuxa, etindhawini tin’wana ta le Afrika, ni le matikweni man’wana, leswi pfuleke ndlela ya leswaku mahungu lamanene ya Mfumo lowu simekiweke wa Xikwembu, ma huweleriwa swinene emasin’wini lawa, ku ta fikela enkarhini wolowo, a ma nga si tirhiwa. Loko vanhu lava navelekaka va nghena elunghiselelweni ra tempele ya Xikwembu, na vona va fika va ringeta hi matimba ku endla vadyondzisiwa lava engetelekeke, hi ku yingisa xileriso xa Yesu. (Matewu 28:19, 20) Loko va endla tano, va hlangana ni vanhu vo tala, lavantshwa ni lavakulu, lava nga ni mboyamelo wa ku va “swilo leswi navelekaka,” leswi nga ta vangamisa yindlu ya Yehovha. Xiya swikombiso swi nga ri swingani swa ndlela leyi leswi swi humelelaka ha yona.

13. Xinhwanyetana xin’wana eBolivia xi ku kombise njhani ku hisekela ka xona ku hangalasa rungula ra Mfumo?

¹³ Le Bolivia, xinhwanyetana xa malembe ya ntlhanu lexi vatswari va xona va nga Timbhoni xi kombele mudyondzisi leswaku a xi ntshunxa exikolweni hi vhiki leri a va endzeriwe hi mulanguteri wa xifundzha. Ha yini? A xi lava ku hlanganyela evutirhelini evhikini leri ro hlawuleka hinkwaro. Leswi swi hlamarise vatswari va xona, kambe langutelo ra xona lerinene swonghasi ri va tsakisile. Xinhwanyetana lexi sweswi xi fambisa ntlhanu wa tidyondzo ta le kaya ta Bibele, naswona swin’wana swa swichudeni swa kona se swa ta eminhlanganweni ya Vukreste. Nakambe xi te ni mudyondzisi wa xona eHolweni ya Mfumo. Hi ku famba ka nkarhi, ha tshemba leswaku swin’wana swa swichudeni swa xona swa Bibele swi ta tikombisa swi ri “swilo leswi navelekaka” leswi nga ta vangamisa yindlu ya Yehovha.

14. Le Korea, byi ve byihi vuyelo bya ku phikelela ka makwerhu un’wana loko munhu a vonaka a nga tsakeli?

¹⁴ Loko wansati la nga Mukreste le Korea a ha rindzile exiticini xa xitimela, u ye eka xichudeni lexi a xi yingisele vuyimbeleri hi ku tirhisa swikurisa-mpfumawulo swa le tindleveni. “Xana wa nghena kereke?” ku vutisa wansati loyi. Xichudeni xi hlamule xi ku: “Mina a ndzi na mhaka ni kereke.” Makwerhu loyi a nga helanga matimba. U ye emahlweni a ku: “Hi ku famba ka nkarhi, munhu a nga ha lava ku hlawula vukhongeri. Kambe loko a nga tivi nchumu hi vukhongeri, a nga hlawula vukhongeri lebyi hoxeke.” Nghohe ya xichudeni lexi yi sungule ku cinca, kutani xi sungula ku yingisela makwerhu loyi hi tindleve timbirhi. Makwerhu u xi nyike buku leyi nge Is There a Creator Who Cares About You?, a vula leswaku buku leyi yi ta xi pfuna swinene loko ku fika nkarhi wa leswaku xi hlawula vukhongeri. Xi amukele buku hi mbilu hinkwayo. Hi vhiki leri landzelaka, xi sungule ku dyondza Bibele ni Timbhoni ta Yehovha, naswona sweswi xi ya eminhlanganweni hinkwayo ya vandlha.

15. Xinhwanyetana xin’wana xa le Japani xi ti sungula njhani tidyondzo ta Bibele, naswona vuyelo bya matshalatshala ya xona byi ve byihi?

¹⁵ Le Japani, Megumi wa malembe ya 12 u teka xikolo xakwe xi ri nsimu leyi noneke ya ku chumayela ni ku dyondzisa eka yona. U kote ni ku sungula tidyondzo to tala ta Bibele. Xana Megumi u endlisa ku yini? Tanihi leswi a hlayaka Bibele kumbe ku lunghiselela minhlangano hi nkarhi wo wisa, hakanyingi lava a dyondzaka na vona etlilasini va lava ku tiva leswi a swi endlaka. Van’wana va vutisa Megumi leswaku ha yini a nga hlanganyeli etimhakeni tin’wana ta xikolo. Megumi u hlamula swivutiso swa vona, a va byela ni leswaku Xikwembu xi ni vito. Leswi hakanyingi swi susumetela vayingiseri vakwe leswaku va kombisa ku tsakela. Kutani a kombela ku dyondza na vona Bibele. Sweswi Megumi u fambisa tidyondzo ta 20—laha 18 eka tona ku nga vana lava a dyondzaka na vona etlilasini.

16. Makwerhu un’wana wa le Cameroon u swi kotise ku yini ku sungula tidyondzo ta Bibele ni van’wana exikarhi ka ntlawa wa vahlekuri?

¹⁶ Le Cameroon, ntlawa wa vavanuna va nhungu lava a va ri eku tirheni wu huwelele makwerhu loyi a a ri karhi a fambisela vahundzi va ndlela tibuku ta Bibele. Hi ku lava ku hlekula makwerhu loyi, va n’wi vutisile leswaku ha yini a nga pfumeli eka Vunharhu-n’we, ndzilo wa tihele kumbe ku nga fi ka moya-xiviri. Makwerhu loyi u hlamule swivutiso swa vona, a tirhisa Bibele. Hikwalaho, vavanuna vanharhu exikarhi ka vona va amukele dyondzo ya Bibele. Un’wana wa vona, Daniel, u sungule ku ya eminhlanganweni, naswona u cukumete swilo swakwe hinkwaswo leswi fambisanaka ni mimoya yo biha. (Nhlavutelo 21:8) Ni lembe a ri nga si hela loko a khuvuriwa.

17. Vamakwerhu van’wana le El Salvador va byi tirhise njhani vutlhari leswaku va chumayela wanuna loyi eku sunguleni a a nga swi lavi ku twa rungula ra Mfumo?

¹⁷ Le El Salvador, wanuna un’wana a a boha mbyana yakwe yo leva emahlweni ka rivanti minkarhi hinkwayo loko a vona Timbhoni ta Yehovha ti tshinela. Wanuna loyi a a tshika Timbhoni ti hundza, ku ri kona a nghenisaka mbyana endlwini. Vamakwerhu a va nga swi koti ku vulavula ni wanuna loyi. Kutani siku rin’wana va anakanye hi ku tirhisa ndlela yin’wana. Hi ku tiva leswaku wanuna loyi a a ta swi twa leswi va swi vulaka, va anakanye ku chumayela mbyana leyi. Va fike endlwini leyi, va xeweta mbyana, va vula leswaku va tsaka swonghasi leswi va kumeke nkarhi wo vulavula na yona. Va vulavule hi nkarhi lowu ku nga ta va ni paradeyisi emisaveni, laha vanhu va nga ta ka va nga ha hlundzuki—ina, laha ni swiharhi swi nga ta va eku rhuleni. Kutani va sarise mbyana liya hi ku rhula va rhelela ni ndlela. Lexi va hlamariseke swinene, wanuna loyi u hume endlwini a kombela ku khomeriwa hileswi a a nga si tshama a nyika Timbhoni nkarhi wo vulavula na tona. U amukele timagazini, kutani ku sunguriwa dyondzo ya Bibele. Wanuna loyi sweswi i makwerhu—un’wana wa “swilo leswi navelekaka”!

“Mi Nga Chavi”

18. I swiphiqo swihi leswi Vakreste vo tala va langutanaka na swona, kambe xana Yehovha u va languta njhani vagandzeri vakwe?

¹⁸ Xana wa hlanganyela entirhweni wa nkoka wa ku chumayela hi ta Mfumo ni ku endla vadyondzisiwa? Loko swi ri tano, u ni lunghelo lerikulu. Kunene, Yehovha u nghenisa “swilo leswi navelekaka” endlwini yakwe hikwalaho ka ntirho wolowo. (Yohane 6:44) Ina, nkarhi wun’wana u nga titwa u karhele kumbe u hele matimba. Minkarhi yin’wana, van’wana—hambi ku ri malandza ya Yehovha lama tshembekaka—va karhatiwa hi mintlhaveko ya ku titwa va nga pfuni nchumu. Kambe u nga heli matimba! Yehovha u languta un’wana ni un’wana wa vagandzeri vakwe a ri la navelekaka, naswona u swi rhandza hi mbilu hinkwayo leswaku u ponisiwa.—2 Petro 3:9.

19. I xikhutazo xihi lexi Yehovha a xi nyikeleke hi nomu wa Hagayi, naswona marito lawa ma nga hi khutaza njhani?

¹⁹ Loko hi titwa hi hele matimba, kumbexana hikwalaho ka ku kanetiwa kumbe swiyimo swin’wana leswi nga tsakisiki, marito lawa Yehovha a ma byeleke Vayuda lava vuyeke eka rikwavo ma nga hi tiyisa. Eka Hagayi 2:4-6, ha hlaya: “‘Kambe vana ni matimba sweswi, Wena Zerubabele,’ ku vula Yehovha, ‘u va ni matimba, Wena Yoxuwa n’wana wa Yohozadaki lowa muprista lonkulu. Vanani ni matimba, n’wina hinkwenu vanhu va tiko,’ ku vula Yehovha, ‘mi tirha. Hikuva ndzi na n’wina,’ ku vula Yehovha wa mavuthu. ‘Tsundzukani nchumu lowu ndzi wu boheke swin’we na n’wina loko mi huma aEgipta, loko moya wa mina wu yime exikarhi ka n’wina. Mi nga chavi.’ Hikuva Yehovha wa mavuthu u te, ‘Kan’we ntsena—hi nkarhinyana—ndzi ta ninginisa matilo ni misava ni lwandle ni misava leyi omeke.’” Xiya leswaku Yehovha a nga hi khutazi leswaku hi tiya ntsena, kambe u tlhela a hi nyika ndlela yo kuma matimba. Njhani? Xiya xitiyisekiso lexi nge: “Ndzi na n’wina.” Swi tiyisa ripfumelo swonghasi ku xiya leswaku ku nga khathariseki swihinga leswi hi langutaneke na swona, Yehovha u na hina!—Varhoma 8:31.

20. Ku vangama lokukulu swinene sweswi ku tata yindlu ya Yehovha hi ndlela yihi?

²⁰ Yehovha u swi kombisile hakunene leswaku u na vanhu vakwe. Kunene, swi endleke hilaha a vuleke hakona hi nomu wa muprofeta Hagayi a ku: “Ku vangama ka yindlu leyi ya le ndzhaku ku ta va kukulu ku tlula ka leyo sungula . . . Endhawini leyi ndzi ta tisa ku rhula.” (Hagayi 2:9) Ina, ku vangama lokukulu namuntlha ku kumeka etempeleni ya Yehovha ya moya. Phela, vanhu va madzana ya magidi va khitikanela evugandzerini bya ntiyiso lembe na lembe. Vanhu vo tano va wundliwa swinene emoyeni, naswona hambi ku ri emisaveni leyi ya hasahasa, va ni ku rhula loku nga ta tluriwa ntsena hi loku nga ta va kona emisaveni leyintshwa ya Xikwembu.—Esaya 9:6, 7; Luka 12:42.

21. Hi fanele hi tiyimisela ku endla yini?

²¹ Ku ninginisiwa ka matiko hi Yehovha eArmagedoni se ku tshinele swinene. (Nhlavutelo 16:14, 16) Hikwalaho, a hi tirhiseni nkarhi lowu seleke hi pfuna ku ponisa vutomi bya vanhu lava engetelekeke. Onge hi nga tiya, hi tshemba Yehovha hi ku helela. A hi tiyimiseleni ku hambeta hi gandzela etempeleni yakwe leyikulu ya moya, hi yi tata hi “swilo leswi navelekaka” swo tala swinene, ku fikela loko Yehovha a vula leswaku ntirho wa hina wu fike emakumu.

[Tinhlamuselo ta le hansi]

Wa Tsundzuka Xana?

• I yini lexi nga xa risima swinene eka Yehovha ku tlula swilo leswi vonakaka?

• Hi yihi mintlawa yimbirhi ya vanhu leyi vuyeriwaka hikwalaho ka ngati ya Yesu leyi halatiweke?

• I vamani “swilo leswi navelekaka” leswi a swi ta tata yindlu ya Yehovha hi ku vangama?

• Hi byihi vumbhoni lebyi hi nga na byona bya leswaku vuprofeta bya Hagayi bya hetiseka namuntlha?

[Dayagramu leyi nga eka tluka 16]

(Leswaku u vona rungula leri hleriweke hi ku helela, vona nkandziyiso wa kona)

Xana wa swi tiva leswi tempele ya khale ya Yehovha yi yimelaka swona?

Ndhawu yo Kwetsima Ngopfu

Nguvu

Ndhawu yo Kwetsima

Rikupakupa

Alitari

Xivava

[Xifaniso lexi nga eka tluka 17]

Muprista lonkulu a a nyikela nkunzi leswaku ku rivaleriwa swidyoho swa Valevhi, a nyikela ni mbuti leswaku ku rivaleriwa swidyoho swa tinyimba ta Israyele leti nga riki ta rixaka ra vaprista

[Xifaniso lexi nga eka tluka 18]

Ntirho wo chumayela hi ta Mfumo emisaveni hinkwayo wu nghenisa mintshungu endlwini ya Yehovha