Hi Muxaka Lowu Nga Ni Ripfumelo

Ku Nyikela Rungula Leri Chavelelaka eItaliya

YEHOVHA i “Xikwembu xa nchavelelo hinkwawo.” Hi ku dyondza ku n’wi tekelela, malandza ya yena ma “kota ku chavelela lava nga emahlomulweni ya mixaka-xaka.” (2 Vakorinto 1:3, 4; Vaefesa 5:1) Xolexo i xin’wana xa swikongomelo-nkulu swa ntirho wo chumayela lowu endliwaka hi Timbhoni ta Yehovha.

Ku Pfuna Wansati La Lavaka Mpfuno

Ngopfu-ngopfu emalembeni ya sweswinyana vusweti, nyimpi ni ku navela ku kuma vutomi byo antswa, swi susumetele vo tala ku rhurhela ematikweni lama fuweke ngopfu. Kambe a swi olovi ku tolovelana ni ndhawu leyintshwa. Manjola a a tshama ni varikwavo va le Albania le Borgomanero. Tanihi leswi a a tshama le Italiya swi nga ri enawini, a a chava ku vulavula na Wanda, loyi a nga Mbhoni ya Yehovha. Nilokoswiritano, Wanda u hetelele a veke siku leri a nga ta hlangana ha rona na Manjola, loyi a hatliseke a komba ku tsakela lokukulu eku dyondzeni ka Rito ra Xikwembu, hambileswi a va nga twanani kahle hi ririmi. Hambiswiritano, endzhaku ka maendzo ma nga ri mangani, Wanda a nga ha kumanga munhu ekaya. Xana a ku humelele yini? Wanda u twe leswaku vanhu lava tshamaka endlwini yoleyo hinkwavo va balekile hikuva un’wana wa vona—ku nga xigangu xa Manjola—a a ri ku hlotiweni hileswi a nga dlaya munhu hi vomu!

Endzhaku ka tin’hweti ta mune Wanda u tlhele a hlangana na Manjola. Wanda u ri: “Leswi a a kwalarile a tlhela a ondza, a a languteka tanihi munhu loyi a a tikeriwa hakunene.” Manjola u hlamuserile leswaku khale ka xigangu xa yena a xi ri ekhotsweni ni leswaku vanghana lava a yeke eka vona leswaku va n’wi pfuna va n’wi hete matimba hi ndlela yo vava swinene. Hikwalaho ko heleriwa hi ntshembo, u khongele eka Xikwembu a lava mpfuno. Kutani a tsundzuka Wanda, loyi a vulavuleke na yena hi Bibele. Manjola a a tsakile hakunene loko a tlhele a n’wi vona!

Dyondzo ya Bibele yi tlhele yi sunguriwa, naswona ku nga ri khale Manjola u sungule ku ya eminhlanganweni ya Vukreste. U swi kotile ku kuma mpfumelelo wa le nawini wa ku tshama eItaliya. Endzhaku ka lembe, Manjola u ve Mbhoni leyi khuvuriweke. Hi ku va a chaveleriwe hi switshembiso swa Xikwembu, u tlhelele eAlbania leswaku a ya avelana ni vanhu va le tikweni ra rikwavo rungula ra Bibele leri chavelelaka.

Ku Chumayela eKampeni Ya Vahlapfa

Mavandlha yo tala ya le Italiya ma endle malunghiselelo yo chumayela vahlapfa vo fana na Manjola. Hi xikombiso, vandlha ra le Florence ri endle malunghiselelo yo endzela kampa ya vahlapfa nkarhi na nkarhi. Vanhu lava tshamaka ekampeni—lava vo tala va vona va humaka eVuxeni bya Yuropa, Makedoniya na Kosovo—a va langutane ni maxangu yo hambana-hambana. Van’wana a va ri ni xiphiqo xa swidzidzirisi kumbe xihoko. Vo tala a va tihanyisa hi ku yiva.

Ku chumayela endhawini leyi a ku ri ntlhontlho. Hambiswiritano, muvuri wa evhangeli wa nkarhi hinkwawo la vuriwaka Paola u hetelele a vulavule na Jaklina, wansati wa le Makedoniya. Endzhaku ko vulavurisana minkarhi yo hlayanyana, Jaklina u khutaze munghana wa yena Susanna leswaku a kambisisa Bibele. Susanna yena u byele maxaka man’wana. Ku nga ri khale, swirho swa ntlhanu endyangwini a swi dyondza Bibele nkarhi na nkarhi, swi hlanganyela minhlangano ya Vukreste naswona swi hanya hi ku pfumelelana ni leswi a swi swi dyondza. Ku nga khathariseki swiphiqo leswi va langutanaka na swona, va kuma nchavelelo eka Yehovha ni le Ritweni ra yena.

Nani Yi Amukela Nchavelelo Lowu Humaka Eka Yehovha

Edorobeni ra Formia, muvuri wa evhangeli wa nkarhi hinkwawo la vuriwaka Assunta u vulavule ni wansati loyi a swi n’wi tikela ku famba. Wansati loyi a a ri nani eka vukhongeri byo karhi lebyi pfunaka vavabyi ni lava lamaleke lava nga eswibedlhele ni le makaya.

Assunta u byele nani leyi a ku: “Na wena wa xaniseka, a swi tano? Lexi vavisaka, hinkwerhu hi ni swiphiqo leswi hi faneleke hi langutana na swona.” Hiloko nani yi ku xibuku, ivi yi hlamusela leswaku a yi vabya swinene. Assunta u yi khutazile, a vula leswaku Xikwembu xa Bibele xi nga yi chavelela. Nani yi teke timagazini leti sekeriweke eBibeleni leti Assunta a yi nyikeke tona.

Eka bulo ra vona leri landzeleke, nani, leyi vito ra yona a ku ri Palmira, yi pfumerile leswaku a yi xaniseka swinene. Yi tshame nkarhi wo leha endhawini leyi fambisiwaka hi tinani. Loko yi boheke ku famba swa xinkarhana hikwalaho ko vabya, a ya ha pfumeleriwanga ku vuya. Nilokoswiritano, Palmira u titwe a tibohile eka Xikwembu leswi a hlambanyeke ku va nani. U ye eka vatshunguri leswaku va ya n’wi “tshungula” kambe u tshikileriwe hi leswi n’wi humeleleke. Palmira u pfumerile ku dyondza Bibele, ivi a ya eminhlanganweni ya Vukreste ku ringana lembe. Kutani u rhurhele endhawini yin’wana, kutani Timbhoni a ta ha kotanga ku vulavurisana na yena. Ku hundze malembe mambirhi Assunta a nga si n’wi kuma. Palmira u kanetiwe swinene hi ndyangu wa ka vona swin’we ni hi vafundhisi. Nilokoswiritano, u tlhele a sungula dyondzo ya yena ya Bibele, a endla nhluvuko hi tlhelo ra moya ivi a khuvuriwa a va Mbhoni ya Yehovha.

Ina, vo tala va khutaziwa hi rungula ra ‘Xikwembu lexi nyikaka nchavelelo.’ (Varhoma 15:4, 5) Hikwalaho, Timbhoni ta Yehovha ta le Italiya ti tiyimisele ku ya emahlweni ti tekelela Xikwembu hi ku avela van’wana rungula ra xona ro hlamarisa leri chavelelaka.