Yingisa Xitsundzuxo!
HI XITSHUKETA, hi June 3, 1991, Ntshava ya Fugen le Japani yi hlante boboma ra gasi ni nkuma wa vholkheno, leswi a swo pfuma kunene. Boboma rolero leri vavulaka ri khulukele eriweni. Ku buluka loku ku dlaye vanhu va 43. Vo tala lava koteke ku pona a va tshwe ku vava. Van’wana va huwelerile va ku: “Hi pfuneni hi mati, hi ri mati.” Ku ve xisiyamani eka vatimi va ndzilo ni maphorisa loko va ya va pfuna.
KWALOMU ka mavhiki mambirhi emahlweninyana ka ku buluka loku, ku voniwe ndhundhuma ya ndzhope enhlohlorhini ya Ntshava ya Fugen, kutani valawuri ni vaaki a va lunghekile. Ku ringana nkarhi lowu tlulaka vhiki emahlweni ka khombo leri, ku humesiwe xitsundzuxo xa leswaku va suka endhawini yoleyo. Loko ka ha sele siku leswaku yi buluka, maphorisa ma kombele vateki va mahungu leswaku va nga ngheni endhawini leyi ya khombo. Hambiswiritano, hi ndzhenga wolowo wa khombo vanhu lavaya va 43 a va ri endhawini yoleyo.
Ha yini vanhu vo tarisa xileswi va nghene endhawini leyi kumbe va ale ku suka? Varimi van’wana lava a va baleke emakaya ya vona va tlhelele endzhaku leswaku va ya kamba nhundzu ya vona ni masimu. Vativi va tivholkheno vanharhu va ringete ku tshinela swinene eka vholkheno leswaku va ta yi vona va eneriseka. Vaviki vo hlayanyana va mahungu ni vateki va swifaniso va kanye mbilu va tsemakanya mindzilakano leyi a yi vekiwile hikwalaho ka leswi a va lava ku kumisisa rungula ro tala hi vholkheno. Vachayeri vanharhu va mathekisi lava hirhiweke hi vateki va mahungu a va ri kona na vona. Maphorisa ni vatimeri va ndzilo lava tirhaka hi ku tirhandzela na vona a va ri entirhweni. Un’wana ni un’wana a ye hi xivangelo xa yena endhawini leyi nga ni khombo—naswona vuyelo bya kona hi leswaku va lahlekeriwe hi vutomi bya vona.
Xana U Le Ndhawini Leyi Nga Ni Khombo?
A hi hinkwerhu hi tshamaka ekusuhi ni ndhawu leyi nga ni vholkheno leyi nga bulukaka. Kambe, ku vuriwa yini loko a hi langutane ni khombo ra misava hinkwayo, leri a ri ta endla leswaku hinkwerhu hi va endhawini leyi nga ni khombo? Buku leyi tikombeke yi ri xihlovo lexi tshembekaka xa rungula ra vuprofeta yi hi tsundzuxa hi khombo leri taka ra misava hinkwayo naswona yi ri hlamusela hi ndlela leyi: “Dyambu ri ta hundzuka ntima, ni n’weti a wu nge he humesi ku vonakala ka wona, ni tinyeleti ti ta wa hi le tilweni, ni matimba ya matilo ma ta ninginisiwa. . . . Tinyimba hinkwato ta misava ti ta tiba hi xirilo.” (Matewu 24:29, 30) Laha swiendlakalo swa le xibakabakeni leswi fikelelaka vuako hinkwabyo swi hlamuseriwa tanihi leswi khumbaka “tinyimba hinkwato ta misava.” Hi marito man’wana, vuprofeta lebyi byi vulavula hi khombo leri nga ta hi khumba hinkwerhu.
Buku leyi, leyi nga ni vuprofeta lebyi tshembekaka i Bibele. Lexi tsakisaka, mongo wa ndzimana ya tsalwa lera ha ku boxiwaka laha henhla wu swi hlamusela hi vuxokoxoko, swilo leswi nga ta yisa eka khombo ra misava hinkwayo. Tanihi leswi ndhundhuma ya ndzhope ni swikombiso swin’wana swa vholkheno swi nyikeke vatirhela-mfumo va doroba ra Shimabara swivangelo swo vula leswaku ndhawu leyi yi ni khombo, Bibele yi hi nyika swivangelo swo tshama hi xalamukile ni ku tilunghiselela ku pona. Hi nga dyondza swo karhi eka khombo ra Ntshava ya Fugen ivi hi twisisa nkoka wa leswi swa ha taka.
[Laha Xifaniso Xi Humaka Kona eka tluka 2]
COVER: Yomiuri/Orion Press/Sipa Press
[Laha Xifaniso Xi Humaka Kona eka tluka 3]
Yomiuri/Orion Press/Sipa Press