Xiviko Xa Vahuweleri Va Mfumo

Ku Cheleta Timbewu Ta Ntiyiso eChile

EMANANGA ya le n’walungwini wa Chile, ku nga ha hundza malembe yo tala mpfula yi nga si na. Kambe loko yi fika, misava leyi omeke swinene, leyi teleke maribye ya hundzuka yi va ndhawu ya swiluva swa mivala yo hambana-hambana. Vuxongi lebyi byi koka vavalangi lava humaka etikweni hinkwaro.

Hambiswiritano, ku ni nchumu wun’wana lowu tsakisaka ngopfu lowu endlekaka eka vanhu va le Chile. Mati ya ntiyiso wa Bibele ma khulukela ematlhelo hinkwawo ya tiko, naswona vanhu vo tala lava nga ni timbilu letinene va “rhumbuka” va va vadyondzisiwa va Yesu Kreste. Ndlela yin’wana leyi tirhisiwaka ku hangalasa mati lawa ya ntiyiso i riqingho. Mintokoto leyi landzelaka yi kombisa vuyelo lebyinene lebyi fikeleriwaka hi ku tirhisa ndlela leyi ya ku nyikela vumbhoni.

• Muvuri wa evhangeli wa nkarhi hinkwawo la vuriwaka Karina u komberiwe ku endla nkombiso enongonokweni wa nhlengeletano ya xifundzha malunghana ni ndlela yo nyikela vumbhoni hi riqingho. Kambe, Karina a a nga si tshama a nyikela vumbhoni hi riqingho. Leswaku a khutaziwa ku hlanganyela enongonokweni wa nhlengeletano, nkulu un’wana ni nsati wakwe va kambisise na Karina tinhla tin’wana leti fambisanaka ni ku nyikela vumbhoni hi riqingho. Va tlhele va n’wi khutaza leswaku a khongelela nkongomiso wa Yehovha emhakeni leyi. U endle tano kutani eku heteleleni a endla xiboho xo ba riqingho.

Karina u hlawule nomboro ya riqingho ya le mugangeni lowu nga ekusuhi ni le ka vona. Munhu la tirhaka hi tinqingho u hlamurile, kutani Karina a n’wi hlamusela xikongomelo xa ku ba ka yena riqingho. Munhu loyi u angule kahle, kutani ku endliwe malunghiselelo ya ku vulavula na yena endzhaku ka masiku manharhu. Riendzo ro vuyela leri endliweke hi riqingho ri yise edyondzweni ya Bibele, ku tirhisiwa broxara leyi nge I Yini Leswi Xikwembu Xi Swi Languteleke Eka Hina? Ku sukela kwalaho, va ve ni tidyondzo leti tsakisaka, leti hanyaka naswona Karina u rhumelele wansati loyi tibuku leti hlamulaka swivutiso swa yena.

• Bernarda u nyikele vumbhoni eka wanuna loyi a n’wi beleke riqingho hi xihoxo. Ematshan’weni yo kombisa ku nyangatseka, Bernarda u n’wi byele leswaku yena i Mbhoni ya Yehovha kutani a vutisa ndlela leyi a nga n’wi pfunaka ha yona. Ku landzele bulo, kutani wanuna loyi u yingiserile loko a ri karhi a n’wi chumbutela ndlela leyi Mfumo wa Xikwembu wu nga ta herisa vuhomboloki ha yona ku nga ri khale. Wanuna loyi u nyike Bernarda nomboro yakwe ya riqingho, kutani u endle maendzo yo vuyela hi riqingho. Loko va ri karhi va bula nkarhi wun’wana, u n’wi hlayele xiphemu xo karhi ebukwini leyi nge Vutivi Lebyi Yisaka eVuton’wini Lebyi Nga Heriki. Wanuna loyi u vutise leswaku a nga yi kuma njhani buku leyi, kutani Bernarda u n’wi rhumele yona swin’we ni Bibele. Ku endliwe malunghiselelo ya leswaku a endzeriwa hi makwerhu la tshamaka endhawini ya ka vona, loyi ni sweswi a yaka emahlweni a “cheleta ximila” lexi xi kulaka.

Ina, emakwandzasini ya moya ya misava leyi, timbewu leti tumbeleke ti yimele ku mila loko ti fikeriwa hi mati ya ntiyiso lama nyikaka vutomi. Vanhu va magidi lava nga ni torha va ya emahlweni va “huma” ni ku “baleka swiluva” va va malandza lama tshembekaka ya Yehovha Xikwembu.—Esaya 44:3, 4.