Yehovha U Ndzi Pfule Mahlo

Hi ku vula ka Patrice Oyeka

Dyambu se a ri rhengile. Leswi se a ku hundze siku rin’wana ndzi ri emunyameni—ndzi nga ha voni, ndzi ri ni xivundza naswona ndzi ri karhi ndzi yingisela xin’wana ni xin’wana lexi a xi vulavuriwa eka xiya-ni-moya—a ndzi lava ku tidlaya. Ndzi chele chefu enghilazini leyi nga ni mati kutani ndzi yi veka etafuleni. A ndzi lava ku rhanga ndzi hlamba ni ku ambala kahle ro hetelela ndzi nga si nwa mati lawa ya chefu ndzi tidlaya. Ha yini a ndzi lava ku tidlaya? Nakambe swi tisa ku yini leswaku namuntlha ndzi va ndza ha hanya leswaku ndzi ta rungula mhaka leyi?

NDZI velekiwe hi February 2, 1958 exifundzheni xa Kasaï Oriental lexi nga eDemocratic Republic of the Congo. Tatana u fe loko ndzi ri ni malembe ya kaye naswona buti wa mina hi yena a a ndzi khathalela loko ndzi ri karhi ndzi kula.

Endzhaku ka loko ndzi hete xikolo, ndzi kume ntirho endhawini leyi a ku byariwa mirhi yo humesa mafi yo endla rhaba. Hi mixo wun’wana hi lembe ra 1989, loko ndzi ri karhi ndzi lunghiselela xiviko ehofisini ya mina, hi xitshuketa ndzi vone ri lo mphuu, ematihlweni ya mina ndzi nga ha voni. Eku sunguleni, a ndzi anakanya leswaku ku fambe gezi, kambe a ndza ha twa janareta yi ri eku dumeni naswona a ka ha ri mixo! A ndzi chuhe swinene loko ndzi kuma leswaku a ndza ha koti ku vona nchumu, hambi ku ri maphepha lawa a ma ri emahlweni ka mina.

Ndzi hatle ndzi vitana un’wana wa vavanuna loyi a tirha ehansi ka nkongomiso wa mina leswaku a ta ndzi yisa eka munhu loyi a tirhaka exibedlhele xa feme ya hina. Kambe wanuna yoloye u ringanyete leswaku ndzi yisiwa eka dokodela loyi a nga ni ntokoto edorobeni. Dokodela yoloye u nambe a swi vona leswaku ti-retina ta mina ti vavisekile naswona xiyimo xa tona a xi chavisa kutani u ndzi rhumele entsindza, ku nga eKinshasa.

Vutomi eKinshasa

Loko ndzi ri eKinshasa, ndzi ye eka madokodela yo tala lama tirhanaka ni mahlo, kambe ku hava ni rin’we ra wona leri ndzi pfuneke. Endzhaku ka loko ndzi tshame masiku ya 43 exibedlhele, madokodela ma vule leswaku ndzi nge he voni vutomi hinkwabyo. Swirho swa ndyangu wa mina swi ndzi yise eka tikereke to hambana-hambana hi ku tshemba leswaku ndzi nga hola hi singita kambe a nga kona ni un’we loyi a koteke ku ndzi pfuna.

Eku heteleleni, ndzi lahle thawula ra leswaku ndzi nga tlhela ndzi vona. Xilo xin’wana ni xin’wana a xo va ntshikilelo eka mina. A ndzi nga voni naswona a ndzi heleriwe hi ntirho. Ndzi tlhele ndzi tshikiwa hi nsati wa mina loyi a tlheleke a teka swilo hinkwaswo leswi a swi ri endlwini ya hina a famba na swona. A ndzi khomiwa hi tingana ku va ndzi huma ndzi ya tihlanganisa ni vanhu van’wana kumbe vanghana va mina. Ndzi tihambanise ni vanhu ndzi tshama ndzexe endlwini. Ndzi tlhele ndzi titwa ndzi nga pfuni nchumu.

Ndzi ringete ku tidlaya kambirhi. Leswi ndzi swi hlamuseleke eku sunguleni ka xitori lexi hi loko ndzi ringeta ku tidlaya ra vumbirhi. Ndzi ponisiwe hi n’wana wa le ndyangwini wa ka hina. Hi xihoxo u teke nghilazi leyi a yi ri ni chefu kutani a halata chefu loko ndza ha ri eku hlambeni. Ndza nkhensa hileswaku a nga yi nwanga chefu yoleyo. Ndzi hele matimba loko ndzi nga ha yi kumi nghilazi yoleyo. Kutani ndzi byele swirho swa ndyangu wa ka hina leswi a ndzi tiyimisele ku swi endla.

Ndzi nkhensa Xikwembu ni ndyangu wa ka hina hileswi va hambeteke va ndzi veka tihlo. Kungu ra mina ro lava ku tidlaya ri siveriwile.

Ku Tlhela Ndzi Kuma Ntsako eVuton’wini

Hi Sonto yin’wana hi 1992, loko ndzi titshamele ekaya ndzi ri eku dzaheni, Timbhoni ta Yehovha timbirhi leti a ti famba ti chumayela hi yindlu ni yindlu ti ndzi endzerile. Hi ku xiya leswaku a ndzi voni, ti ndzi hlayele tsalwa ra Esaya 35:5 leri nge: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa.” Ndzi sungule ku khapakhapa hi ntsako loko ndzi twa marito wolawo! Ku hambana ni leswi ndzi swi tweke etikerekeni leti ndzi tshameke ndzi ya eka tona, Timbhoni a ti kalanga ti vulavula hi ku tshunguriwa hi singita. Ematshan’weni ya sweswo, ti hlamusele leswaku ndzi nga tlhela ndzi vona emisaveni leyintshwa leyi Xikwembu xi yi tshembisaka loko ntsena ndzi nghenisa vutivi ha xona. (Yohane 17:3) Ku sukela kwalaho, ndzi sungule ku dyondza Bibele ni Timbhoni hi ku tirhisa buku leyi nge U Nga Hanya Hi Masiku eParadeyisini eMisaveni. Ndzi tlhele ndzi sungula ku ya eminhlanganweni hinkwayo ya Vukreste eHolweni ya Mfumo ya laha ndzi tshamaka kona kutani ndzi sungula ku cinca ndlela leyi a ndzi hanya ha yona. Ndzi tshike ku dzaha.

Leswi a ndzi nga voni a swi ndzi sivela ku endla nhluvuko hi tlhelo ra moya. Kutani ndzi ye eka nhlangano wa vanhu lava nga voniki leswaku ndzi ta dyondza ku hlaya ni ku tsala hi Braille. Leswi swi endle leswaku ndzi kota ku tsarisa exikolweni xa ndzetelo wa vutirheli eHolweni ya Mfumo. Swi nga si ya kwihi, ndzi sungule ku chumayela mahungu lamanene endhawini ya ka hina. Ndzi tlhele ndzi kuma ntsako evuton’wini. Ndzi hambete ndzi endla nhluvuko kutani ndzi tinyiketela eka Yehovha. Ndzi khuvuriwe hi May 7, 1994.

Loko ndlela leyi ndzi rhandzaka Yehovha ni vanhu yi ya yi ri karhi yi kula, ndzi sungule ku navela ku nghenela ntirho wa nkarhi hinkwawo. Hi December 1, 1995 ndzi sungule ku tirha tanihi phayona ra nkarhi hinkwawo. Ndzi tlhele ndzi va ni lunghelo ra ku tirha tanihi nkulu evandlheni ku sukela hi February 2004. Minkarhi yin’wana ndzi rhambiwa emavandlheni man’wana lama nga ekusuhi ni laha ndzi tshamaka kona leswaku ndzi ya nyikela tinkulumo leti sekeriweke eBibeleni. Mikateko leyi hinkwayo yi ndzi tisela ntsako naswona yi ndzi pfuna leswaku ndzi tshama ndzi ri karhi ndzi tsundzuka leswaku a ku na vulema ni byin’we lebyi nga hi sivelaka ku hetisisa ku navela ka hina ku tirhela Yehovha Xikwembu.

Yehovha U Ndzi Nyike “Mahlo”

Hilaha ndzi vuleke hakona eku sunguleni, nsati wa mina u ndzi tshikile hikwalaho ka leswi a ndzi nga ha voni. Kambe ndzi kume mikateko leyi engetelekeke eka Yehovha. Hi ndlela yo hlawuleka, u ndzi nyike matihlo leswaku ndzi kota ku vona. Anny Mavambu, loyi a pfumeleke leswaku ndzi va nuna wakwe hambileswi a ndzi nga voni hi yena a veke mahlo ya mina. Tanihi leswi a nga muchumayeri wa mahungu lamanene wa nkarhi hinkwawo, minkarhi hinkwayo u famba na mina entirhweni wa nsimu. Nakambe u ndzi hlayela maphepha ya tinkulumo ta mina leswaku ndzi ta kota ku tsala tinotsi ta mina hi Braille. I nkateko eka mina hi ndlela leyi tlurisaka. Hikwalaho ka yena, ndzi vone ku hetiseka ka marito lama nga eka Swivuriso 19:14 lama nge: “Ndzhaka leyi humaka eka vatatana i yindlu ni rifuwo, kambe wansati wo tlhariha u huma eka Yehovha.”

Yehovha u tlhele a katekisa mina na Anny hi vana vambirhi, wa jaha ni wa nhwana. Ndzi swi navela hi mbilu hinkwayo ku va vona eParadeyisini! Nkateko wun’wana hileswaku buti wa mina loyi a hi pfumeleleke hi musa leswaku hi tshama endhawini yakwe u amukele ntiyiso wa Bibele naswona u khuvuriwile. Hinkwerhu ka hina hi hlanganyela evandlheni rin’we.

Hambileswi ndzi nga voniki, ndza ha swi lava hi mbilu hinkwayo ku tirhela Xikwembu hikuva xi ndzi katekise hilaha ku tlurisaka. (Malakiya 3:10) Siku ni siku ndzi khongelela leswaku Mfumo wa xona wu ta leswaku wu ta herisa ku xaniseka hinkwako loku nga kona laha misaveni. Ku sukela loko ndzi sungule ku tiva Yehovha, ndzi nga vula handle ko tiluma-luma leswaku “nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—Swivuriso 10:22.

[Swifaniso leswi nga eka tluka 13]

Ndzi ri karhi ndzi nyikela nkulumo ya Bibele; ndzi ri ni ndyangu wa mina ni buti wa mina