Hambeta U Tswala Mihandzu Hi Ku Tiyisela

1 Loko a tsalela bandlha ra le Kolosa, malembe lama nga ehansi ka 30 endzhaku ka ku fa ni ku pfuxiwa ka Yesu Kriste, muapostola Pawulo u swi kotile ku vula leswaku ntiyiso wa mahungu lamanene a wu tswala mihandzu ni ku kula emisaveni hinkwayo. (Vakol. 1:5, 6) Hi mpimo lowukulu swinene namuntlha, Timbhoni ta Yehova ti fikelele “emakun’wini ya misava” ni mahungu lamanene ya Mfumo hi xiviri. (Mintirho 1:8; Yoh. 14:12) Hi lembe ra ntirho ra 1989, a ku ri ni ku engeteleka ka tiphesente ta 5,6 eka nhlayo-xikarhi ya vahuweleri va Mfumo emisaveni hinkwayo, naswona hi fikelele nhlohlorhi leyintshwa ya vahuweleri va 3787-188 ematikweni ya 212!

2 Ematikweni lawa ku chumayeriwa hi ta Mfumo wa Xikwembu ku yirisiweke ni laha swiviko swi nga helelangiki, ku engeteleka lokukulu ka tiphesente ta 7,6 ku vikiwile! Ku nga khathariseki swiphiqo swo tala leswi swi nga kona ematikweni wolawo, vahuweleri va hambeta va “veka mihandzu hi ku tiyisela.” (Luka 8:15) Etindhawini tin’wana mintshikilelo yi hungutekile, kambe swiyimo leswo nonon’hwa swi hambeta handle ko hundzuka ematikweni man’wana.

3 Ematikweni lawa ku nga ni ntshunxeko lowukulu wo hambeta ni mintirho ya ku chumayela hi ta Mfumo eka wona, hi langutana ni swiphiqo leswi hambaneke. Ku hlanganiwa ni ku nga tsakeli ni ku honisa ko tala, ngopfu-ngopfu laha ku nga ni rifuwo ra leswi vonakaka. Malandza ya Yehova ma fanele ku tivonela leswaku ma nga amukeli malangutelo yo tano. A hi lavi leswaku ku hlongorisa rifuwo, mintsako, ku tihungasa ni swihambukisi swin’wana swi nghenela eka mintirho ya hina ya swa le tilweni. Handle ka swona hi nga sungula ku hola ivi hi hluleka ku tlangela xilaveko xo hambeta hi tswala mihandzu hi ku tiyisela.—Luka 21:34-36.

KU TIYISELA NI KU TIKARHATA SWA LAVEKA

4 Ku tiyisela ka laveka hambi hi langutana ni ku kanetiwa eka mahungu lamanene kumbe hi ri ni ntshunxeko lowu ringaneleke wo hetisisa vutihlamuleri bya hina bya Vukriste. Ematikweni man’wana, vamakwerhu a va ri karhi va tirha ehansi ka swiyimo leswo nonon’hwa hi makume ya malembe. Ku tiyisela ka vona ehansi ka ku nonon’hwa ko tano ku vumbe xiyimo lexi amukeriweke, naswona sweswi va tshovela mikateko leyi fuweke. (Varhoma 5:3-5; Vagal. 6:9) Ku nga khathariseki ku nonon’hwa loku hi nga hlanganaka na kona, hi lava ku hambeta hi tiyisela. Vumbhoni bya Mfumo byi fanele ku nyikeriwa, naswona hinkwerhu ka hina hi fanele ku hambeta hi kombisa ku tshembeka ka hina. Hi ku tiyisela ka hina, hi ta sirhelela moya-xiviri (soul) kumbe vutomi bya hina.—Marka 13:10; Luka 21:19.

5 Hi nga kombisa leswaku a hi swi honisi swilo swa moya hi ku tikarhata hi matimba entirhweni wa Yehova, hi nga karhali entirhweni wo chumayela. Ematikweni man’wana laha vutleketli byi nonon’hwaka swinene, laha swilaveko swa swilo leswi vonakaka swi kayivelaka ni laha ku nga ni swiphiqo swa ikhonomi, ku hava ku tsana eku chumayeriweni ka mahungu lamanene. Eka ma nga ri mangani ya matiko yo tano, vahuweleri va bandlha nkarhi na nkarhi va va ni avhareji ya tiawara ta 14 ku ya ka 17 entirhweni wa nsimu n’hweti yin’wana ni yin’wana. Tinhlayo ta vona ta maphayona na tona ti engeteleka nkarhi na nkarhi. Swi endla leswaku lava nga ni ku aneriseka lokukulu ka swilo leswi vonakaka exikarhi ka hina va yima va anakanya. Xana hi nga engetela ku hlanganyela ka hina ka nkarhi na nkarhi entirhweni wa nkoka lowukulu wa ku chumayela hi ta Mfumo ni wa ku endla vadyondzisiwa?

XANA HI NGA ENDLA LESWI ENGETELEKEKE?

6 Ku heta nkarhi lowu engetelekeke entirhweni wa nsimu swi nga lava leswaku hi lulamisanyana swiyimiso swa hina. Loko a hi heta awara evutirhelini bya nsimu hi Sonto, xana kumbexana hi nga lehisa nkarhi wolowo hi ku heta awara yin’wana hi endla maendzo yo vuyela kumbe hi fambisa dyondzo ya Bibele? Kumbe loko hi fambisa dyondzo ya Bibele, xana hi nga katsa ni awara kumbe ku tlula eka ntirho wa yindlu na yindlu kumbe hi endla maendzo yo vuyela ma nga ri mangani emahlweni ka dyondzo? Hi Mugqivela endzhaku ko heta tiawara timbirhi entirhweni wa timagazini, kumbexana hi nga yisa timagazini eka ntila wa timagazini lowu hi wu vumbeke kumbe hi ringeta ku endla maendzo ma nga ri mangani yo vuyela. Lava va tshamaka endhawini ya le dorobeni va nga swi kuma swi fanela ku heta nkarhi wo karhi eku nyikeleni ka vumbhoni bya le xitarateni. Hi ndlela leyi kumbe tin’wana, hi nga swi kota ku engetela ku hlanganyela ka hina entirhweni wa nsimu. Vuyelo lebyinene byi fanele byi engeteleka hi laha ku ringaneleke.

7 Nkarhi lowu engetelekeke entirhweni wa nsimu ku ri karhi ku endliwa maendzo yo vuyela handle ko kanakana wu ta vanga tidyondzo leti engetelekeke ta Bibele leti fambisiwaka. Hi ku famba ka nkarhi leswi swi ta vula vanhu lava engetelekeke lava taka entiyisweni ni ku hi pfuna ku hetisisa ntirho wo chumayela hi ta Mfumo.—Mat. 28:19, 20.

XIKHONGELO I XA NKOKA

8 Loko hi ta hambeta hi tswala mihandzu hi ku tiyisela, hi fanele ku lava ku katekisiwa hi Yehova ivi hi ya laha moya wa yena wu hi kongomisaka kona. Hi fanele hi endla vutirheli bya hina mhaka ya xikhongelo eka Yehova. Loko hi khongela eka Yehova ehenhleni ka ntirho wa hina wa nsimu, hi tsundzuxiwa leswaku hi vatirhi-kulobye vakwe. (1 Vakor. 3:9) Hi mpfuno wa Yehova, hi nga tiyisela evutirhelini bya hina hambi loko hi nga voni vuyelo bya xihatla. Etindhawini tin’wana, ku engeteleka ku te ntsena endzhaku ka malembe yo tala ya ku tiyisela ko tshembeka ka vahuweleri va Mfumo. Loko hi langutisa eka vumundzuku, i swa nkoka hi minkarhi hinkwayo ku lava vukongomisi ni mpfuno wa Xikwembu leswaku hi nga tsani kambe hi hetisisa vutirheli bya hina hi xitalo. (2 Tim. 4:5) Ka ha ri ni mihandzu yo tala leyi humesiwaka entirhweni wo chumayela hi ta Mfumo ni wa ku endla vadyondzisiwa.

9 Yesu u kandziyise xilaveko xa leswaku hi khongela nkarhi na nkarhi. (Luka 18:1) Pawulo u khongoterile: “Mi nga tshiki ku khongela.” (1 Vates. 5:17) Ku na swivangelo swa xihatla swa leswaku hi phikelela eku khongeleni sweswi. Vutihlamuleri byo tala bya katseka eku khathaleleni ka ntlhambi lowu kulaka lembe na lembe. Hi lava ku pfuna van’wana leswaku va tswala mihandzu hi ku tiyisela. Nyingiso wu fanele ku nyikeriwa eka swilaveko swo hambana-hambana swa vahuweleri ha un’we-un’we ni swa nhlengeletano hinkwayo. Hi ku vona xilaveko xa minyikelo yo seketela ntirho lowu ni ku endla leswaku ku humesiwa loku yisiwaka emahlweni ka tibuku leti sekeriweke eBibeleni ku koteka, hi lava ku khongelela leswaku Yehova a hambeta a susumeta vanhu lava chavaka Xikwembu leswaku va va lava hananaka emhakeni leyi.—2 Vakor. 9:8-11.

10 Loko swiyenge swa nsimu ya misava hinkwayo swi amukela ku ndlandlamuka ka swa le tilweni ku fika eka mpimo lowukulu ku tlula rini na rini, xikhutazo xa Matsalwa lexi nga eka Vakolosa 4:2 xi va lexi nga ni ntikelo swinene: “Mi tiyisela emikhongelweni, mi hitekela kona mi ri karhi mi nkhensa.” Swikhongelo swa hina swi fanele swi va hikwalaho ka vamakwerhu hinkwako leswaku va hambeta va tswala mihandzu, va pfuna vanhu van’wana lava fanaka ni tinyimpfu lava kumekaka etinsin’wini leti ku veka vumbhoni eka tona a ku nonon’hwa swinene enkarhini lowu hundzeke.

KOMBISA KU NKHENSA

11 Ha nkhensa swonghasi hikwalaho ka ndzalo ya malunghiselelo ya moya lama hi ma tsakelaka swinene! Hi lava ku nkhensa Yehova hikwalaho ka leswi, naswona hi tlhela hi khongelela nkateko wa yena lowu hambetaka entirhweni wa nandza la tshembekaka ni Huvo ya yena leyi Fumaka. Matshalatshala ya vona yo titsongahata, yo pfumala ku karhala hikwalaho ka hina ni hikwalaho ka vanhu lava fanaka ni tinyimpfu lava va nga emisaveni hinkwayo ya tlangeriwa swinene ngopfu.

12 Eku byaleni ka mbewu ya Mfumo, mpimo lowukulu wa tibuku wu fambisiwile. (Mat. 13:3-8, 18-23) Hambi swi ri tano, ku na xilaveko lexi yaka emahlweni xa Tibibele ni tibuku ta Bibele ensin’wini. Xiviko xa misava xi kombisa leswaku mpimo lowukulu wa ku hlakula ni ku cheleta hi xivumbeko xa maendzo yo vuyela ni tidyondzo ta le kaya ta Bibele wu endliwile. Loko hi ya emahlweni hi endla xiphemu xa hina eka swivumbeko leswi swa nkoka swa vutirheli bya hina, hi nkhensa Yehova hikwalaho ka nkateko wa yena lowu yaka emahlweni lowu kurisaka swilo. Hakunene, hi khongelela nkateko wolowo.—1 Vakor. 3:6, 7.

SWILAVEKO SWIN’WANA

13 Hikwalaho ka ku va emisaveni hambi loko va nga ri xiphemu xa yona, Vakriste va ta hambeta va langutana ni miringo, naswona leswi swa ha ta kula emasikwini lawa ya makumu. Van’wana sweswi va tiyisela nxaniso kumbe ku nonon’hwa kun’wana. Van’wana va fanele ku hambeta ni mintirho ya vona ya Vukriste ematikweni lama hlaseriwaka hi nyimpi. Vamakwerhu va tokote timhangu to tanihi ku tsekatseka ka misava, swidzedze ni swihuhuri. Loko leswi swi humelela, hi fanele hi khongelela vamakwerhu lava nga eswivandleni swo tano. (Ringanisa Mintirho 12:5; 2 Vakorinto 1:11.) Minkarhi yin’wana swa fanela ku tshinelela kumbe ku tsalela vatirhela-mfumo lava nga eswikhundleni leswi tlakukeke malunghana ni ku yirisiwa ka ntirho wa hina, ku xanisiwa ka vamakwerhu kumbe timhaka tin’wana leti khumbaka swilaveko swa Mfumo. Ehansi ka swiyimo swo tano, hi endla leswi hi nga swi kotaka hi hexe, naswona hi nyikela xikhongelo malunghana ni vanhu lava leswaku onge va nga kombisa tintswalo eka malandza-kulorhi.—1 Tim. 2:1, 2.

14 Ku ni mintshikilelo yo tala leyi tisiwaka ehenhla ka mindyangu leyi tshamaka emisaveni leyo homboloka ya Sathana. (2 Vakor. 4:4) Mimpatswa leyi tekaneke yi nga kongomana ni swiphiqo leswikulu. Va fanele ku khutaziwa leswaku va khongelela vukongomisi bya Xikwembu, naswona na hina hi nga va khongelela. (1 Vakor. 7:5; 1 Pet. 3:7) Tinhloko ta mindyangu ti fanele ti twisisa leswaku Yehova u ta yingisa swikhongelo swa tona leswi humaka embilwini swa vukongomisi byo langutela mindyangu ya vona khwatsi. (Vaav. 13:8; Vafil. 4:6, 7) Lavantsongo kun’we ni lavakulu va langutane ni swiyimo leswi ringaka. Leswi swi nga ha va exikolweni, entirhweni wo tihanyisa, loko va teka riendzo kumbe va ri eka swiyimo swin’wana. Xikhongelo xi hi pfuna ku landzula moya wa misava leyi yo homboloka ni ku hambeta hi tswala mihandzu loko hi ya emahlweni hi endla leswi swi tsakisaka emahlweni ka Xikwembu.—Mat. 6:13; Vaef. 6:13-18; 1 Yoh. 3:22.

15 Yehova i Muyingisi lonkulu wa xikhongelo. (Ps. 65:2) Hi minkarhi hinkwayo hi fanele ku nyikela ku karhateka ka hina eka yena. (Ps. 55:22) Hi ni minkarhi leyi hi pfulekeleke yo kombisa ku khathalela ka hina timhaka hinkwato ta Mfumo ni ku hlayiseka ka vamakwerhu hinkwako hi ku tirhisa xikhongelo. Loko hi anakanya hi ntirho wa lava va rhangelaka ebandlheni ni lava va kongomisaka nongonoko wa misava hinkwayo wa ku ndlandlamuka, loko hi khathalela lava va vabyaka hi tlhelo ra moya, ni loko hi khathalela swiphiqo swin’wana leswintsongo ni leswikulu, hinkwerhu ka hina hi fanele ku yisa timhaka to tano emahlweni ka Yehova hi xikhongelo. (1 Vates. 5:25; Yak. 5:14-16) Ina, ku karhateka ka hina ku fanele ku vekiwa eka Yehova hi ri ni ntshembo lowu taleke wa leswaku ku nga khathariseki leswaku i yini lexi hi xi kombelaka hi ku pfumelelana ni ku rhandza ka yena, u ta hi twa. (1 Pet. 5:7; 1 Yoh. 5:14) Onge hi nga chivirika entirhweni wa Mfumo ivi hi hambeta hi languta eka Yehova leswaku a hi pfuna ku hambeta hi tswala mihandzu hi ku tiyisela.