Chava Xikwembu Hi Laha Kriste A Endleke Ha Kona

1 Xiga xa Bibele ‘ku chava Xikwembu’ xi kombetela eka ku chava ka hina loku enteke eka Yehova Xikwembu ni ntirho wa vutshembeki eka yena. Xikombiso lexikulu swinene xa ku chava Xikwembu a a ku ri Hosi ya hina Yesu Kriste.

2 Hi mahanyelo ya yena laha misaveni, Yesu u tikombise a ri munhu wa ku chava Xikwembu loku hetisekeke. Hikwalaho, hi endla kahle loko hi xiya swilo swin’wana ehenhleni ka vutomi bya yena, ngopfu-ngopfu tanihi leswi swi yelanaka ni xiphemu xa yena tanihi muvulavuleri-nkulu wa Yehova Xikwembu.

VANA LA CHIVIRIKAKA NI XIVINDZI

3 Yesu a a chivirika eku twariseni ka leswi Esaya 61:2 yi swi hlamuselaka tanihi “lembe lerinene ra Yehova.” Eku landzeleleni ka xikombiso xa Yesu, hi fanele hi hlanganyela entirhweni lowu wo ponisa vutomi hi ku chivirika emasikwini ya makumu ya mafambiselo lawa yo biha ya swilo. Nakambe hi fanele ku va ni xivindzi hi laha Yesu a ri ha kona. Ha yini? Hikuva rungula ra Mfumo leri hi ri twarisaka ra nonon’hwa naswona a ri amukeleki eka van’wana, ngopfu-ngopfu loko hi vulavula hi siku ra ku tirihisela ka Yehova.

4 Hi lava moya ni nkongomiso wa Yehova, leswaku swi hi pfuna ku vulavula hi xivindzi ivi hi kombisa ku tinyiketela eka Xikwembu. Eka Luka 4:18, Yesu u te: “Moya wa [Yehova] wu le ka mina.” Hi moya ni mikateko ya Yehova, na hina hi nga chava Xikwembu ivi hi tsakisa eka Yehova. Ku tirhisa nchumu wo karhi swi vula ku hambeta u wu endla. Swi vula leswaku nchumu wo karhi wu va ndlela ya hina ya vutomi bya siku na siku. Ku chava Xikwembu ku fanele ku va ndlela ya vutomi ya malandza ya Xikwembu. Muapostola Pawulo u vurile: “Hambi ma dya, hambi ma nwa, hambi mi endla yini na yini, endlani hinkwaswo ku dzunisa Xikwembu.”—1 Vakor. 10:31.

KU CHAVA XIKWEMBU, NDLELA YA HINA YA VUTOMI

5 A hi fanelanga hi honisa xilaveko lexi hambetaka xa ku tekelela Kriste hi ku yi tirhisa kahle minkarhi yo avelana mahungu lamanene ni van’wana. Loko hi endla leswi en’hwetini ya June, hi bumabumeriwa leswaku hi tirhisa buku leyi nge Ku Lavisa Ka Vanhu Xikwembu.

6 Evutirhelini bya hina, vanhu van’wana va ta tivula leswaku i swirho swa ntlawa wo karhi wa vukhongeri lebyikulu. Hi musa hi nga amukela yinhla leyi, kumbexana hi ku: “Swa tsakisa ku hlangana ni vanhu va vukhongeri byo hambana-hambana. Ku lavisisa ka vanhu Xikwembu ku teke tindlela to tala to hambana-hambana. [Loko swi fanerile eka yinhla leyi, ku nga ha kombeteriwa eka Mintirho 17:26, 27.] Xana a wu pfumeli leswaku hi ntolovelo vanhu va landzela vukhongeri bya vatswari va vona, ematshan’wini yo lavisisa Xikwembu hi voxe? Hi marito man’wana, va tswaleriwe eka vukhongeri byo karhi. Yoleyo i yinhla leyi kombisiweke eka ndzima yo sungula ya buku leyi yi nge Ku Lavisisa Ka Vanhu Xikwembu. [Kombisa tluka 8, ndzimana 12.] Ku dyondza swo tala hi vukhongeri byin’wana swa voningela ni ku dyondzisa. Buku leyi yi hlamusela masungulo, mikhuva ni tidyondzo ta vukhongeri lebyikulu bya misava.”

7 Ndlela ya hina ya vutomi a yi katsi ku twarisa siku ra Yehova ra ku tirihisela ni lembe lerinene ntsena kambe ni ku kombisa ku chava Xikwembu evuton’wini bya hina hi xiyexe ni bya ndyangu. Hi fanele ku tekelela Yesu, hi dyondzisa van’wana hi xikombiso, leswi ku chava Xikwembu ku nga swona hakunene. Hi ku landzelela xikombiso xa Kriste xa ku chava Xikwembu, nkarhi hinkwawo hi lwela ku va ni nsusumeto lowunene eka xin’wana ni xin’wana lexi hi xi endlaka, hi dzunisa Yehova ivi hi tikombisa hi ri malandza ya yena yo tshembeka. Onge ku kombisa ka hina ku chava Xikwembu ku nga tirha ku pfuna van’wana eku lavisiseni ka vona Xikwembu ni ku kongomisa lavo tshembeka eka vutivi bya Xikwembu xa ntiyiso, Yehova.