Ku Tirha Hi Matimba Eku Endleni Ka Ku Rhandza Ka Xikwembu

1 Ku tirha hi matimba hi xikongomelo loku humesaka vuyelo lebyi naveriwaka ku anerisa ngopfu. (Ekl. 3:13) I ntirho wihi mamuntlha lowu nga tisaka ntsako sweswi ku ya eka vumundzuku lebyi nga heriki? Nhlamulo i yin’we ntsena—ku endla ku rhandza ka Xikwembu. Swivangelo swa leswi swi ta kambisisiwa hi vukheta hi ku tirhisa tinkulumo, minkombiso ni mintokoto eka nongonoko wa siku ra nhlengeletano ya hina leyi hlawulekeke ya lembe ra ntirho ra 1992. Nhloko-mhaka ya nongonoko yi ta ku “Ku Tirha Hi Matimba Eku Endleni Ka Ku Rhandza Ka Xikwembu.”—Vaef. 6:6; 1 Tim. 4:10.

2 Vo tala namuntlha a va aneriseki naswona va hele matimba hikwalaho ka swil swo tala leswi va hlanganaka na swona evuton’wini, xiphemu lexikulu xa vona xi taleriwe hi ntirho lowu va nga wu tsakeriki. Ku hambana na sweswo, ku endla ku rhandza ka Yehova hi ku tekelela Kriste swi endla vutomi bya hina byi va ni xikongomelo naswona swi hi pfuna ku endla hambi ku ri mintirho ya hina ya ku tihanyisa hi langutelo lerinene. Swi katsa yini ku tirha hi matimba eku endleni ka ku rhandza ka Xikwembu? I swilo swihi swin’wana leswi hi faneleke ku tivonela eka swona leswaku hi ta kota ku ya emahlweni hi hanyela ku rhandza ka Xikwembu? Malunghana ni ntirho wa ku chumayela ni ku dyondzisa, i swa nkoka ku fikela kwihi ku landzela swileriso ni swiringanyeto leswi nyikeriwaka hi nhlengeletano ya Yehova? I minkarhi yihi leyi hlawulekeke eka vantshwa lava anakanyaka hi ku endla ku rhandza ka Xikwembu?

3 Swivutiso leswi swi ta hlamuriwa hi laha ku anerisaka hi nongonoko, lowu katsaka tinkulumo timbirhi letikulu leti nge “Xana Ku Rhandza Ka Xikwembu Ku Lawula Vutomi Bya Wena?” na “Xikongomelo Xa Hina eVuton’wini—Ku Endla Ku Rhandza Ka Xikwembu.” Kunguhata ka ha ri sweswi ku va kona ni ku tsakela nongonoko lowu wo hlawuleka hi xitalo.