Lunghiselelo Ra Dyondzo Ya Buku Ya Bandlha Xiyenge 4: Hambetani Mi Akana

1 Un’wana ni un’wana eka ntlawa wa Dyondzo ya Buku ya Bandlha a nga endla xiphemu xa nkoka eka nhluvuko wa moya wa van’wana entlaweni. Hinkwerhu hi lava ku yingisa xileriso xa Matsalwa xo ‘kombana rirhandzu ni mintirho leyinene, ngopfu-ngopfu leswi makumu ma tshinelaka.’—Vahev. 10:24, 25.

2 Ku Pfunana: Hinkwerhu hi nga pfuna ku vumba moya lowu kufumelaka, wa xinghana eka dyondzo ya buku. Loko un’wana ni un’wana wa hina a kombisa ku tsakela ka munhu hi yexe eka swirho swin’wana, swi engetela eka vun’we bya ntlawa. Eka Vagalatiya 6:10 hi kongomisiwa leswaku “hi endle[la] vanhu hinkwavo leswinene, ngopfu-ngopfu va ndyangu wa lava pfumeleke.” Hi xikombiso, xana wa swi xiya loko van’wana eka dyondzo ya buku va vabya naswona va nga ri kona eminhlanganweni? Kumbexana u nga vulavurisana na vona hi riqingho kumbe u va endzela. Moya wo tano eka ntlawa wa dyondzo ya buku wu hlanganisa vamakwerhu swin’we.

3 Xana va kona van’wana lava lavaka xikhutazo hikwalaho ka mintshikilelo ya siku na siku, vutihlamuleri bya ndyangu kumbe swiphiqo swin’wana? U nga endla yini leswaku u pfuna? Endla matshalatshala lama hlawulekeke yo nghenisa van’wana ebulwini eminhlanganweni, ku nga ri ku va pfuxela ntsena. Van’wana va nga ha va ni tingana kambe va lava un’wana wo vulavula na yena naswona va nga vulavula loko va tshineleriwa. (uw matl. 137-8) Muapostola Pawulo u khutaze Vakriste a ku “layani malolo, mi tiyisa lava helaka ntamu; pfunani lava tsaneke, mi lehisela hinkwavo timbilu.” (1 Vates. 5:14) Loko un’wana a vabya kumbe a hele matimba, swa khutaza swonghasi loko vanghana va n’wi endzela kumbe va n’wi pfuna! Hakanyingi ku tiva leswaku un’wana wa khathalela hi swona leswi lavekaka.

4 Nakambe hi fanele ku tirhisana eka malunghiselelo ya ntirho wa nsimu. Hi fanele hi ringeta ku tirha ni vanhu vo hambana-hambana entlaweni. (2 Vakor. 6:11-13; 12:15) Nkarhi wun’wana mufambisi wa Dyondzo ya Buku a nga ha hi kombela ku pfuna un’wana. Hi hlamula njhani? Ntlawa wa dyondzo ya buku wa tiyisiwa swinene loko vahuweleri ni maphayona va tirha swin’we eka swivumbeko swo hambana-hambana swa ntirho wo chumayela ni wo endla vadyondzisiwa.

5 Xikombiso Xa Munhu Hi Xiyexe: Ku na tindlela tin’wana leti u nga pfunaka ha tona elunghiselelweni ra dyondzo ya buku. Xikombiso xa wena lexinene i xa nkoka. Hi xikombiso, loko u ambala tanihi loko u ya enhlanganweni eHolweni ya Mfumo, u kombisa xichavo. U veka xikombiso lexinene eka lava va nga ha vaka va ngheniwe hi mukhuva wo tiambalela ntsena. Xana u swi endla mukhuva ku fika hi nkarhi leswaku u nga kavanyeti nhlangano?

6 Lunghiselelo ra Dyondzo ya Buku ya Bandlha i lunghiselelo ra rirhandzu leri humaka eka Yehova leri lavaka leswaku hi ri seketela hi xitalo. (Esa. 40:11) I ndhawu leyi eka yona hi nga kumaka mpfuno wa munhu hi xiyexe ni ku engetela ku phyuphya ka moya ka van’wana. Hinkwerhu ka hina a hi ‘hambeteni hi chavelelana ni ku akana’ hi ku seketela lunghiselelo leri hi xitalo.—1 Vates. 5:11.